Read idoma UJƆ́NI 10 Bible Online

UJƆ́NI 10 - idoma bible

UJƆ́NI 10

¹Anɔ́ɔ Ujísɔ̄si da uwá kahíníī, “Ɔkwɔ̄ɔ̄kwɛ̄yi n̄ da aá ka, ɔ̄cɛ nōó yɛ okómpīinu ga ipú igá kú álá ŋ́, amáŋ nōó le icō ɔdɔ tū le yɛ ɔ́gba wā eyīpú wɛ uwī mɛ́mla ohéjulúgwu.

²Amáŋ ɔ̄cɛ nōo yɛ okómpīinu ga ipú igá ā, anú wɛ ɔ̄cogbāálá á.

³Ɔ̄cogbɔ̄wɛ gē nwūla ɔwɛ lɛ ɔ́, aálá ā ke í pó ɔkɔ kú nū. Ó gē hī aálá kú nū iyē abɔ̄yī uwā, ó kē í kpó wā wɛ̄ɛcɛ.

⁴Eko nɛ̄ ó lɛ aálá kú nū kpó wɛ̄ɛcɛ, ó gē tá iyɔ̄bū ūwā, aálá ā kē í yɛce ɔ́, ohígbū kéē jé ɔkɔ kú nū.

⁵É gáā yɛce ugbɔga ŋ́. É géē kwu ŋmá ɛgiyí nū ohígbū kéē jé ɔkɔ kú nū ŋ́.”

⁶Ujísɔ̄si tá ācīije nyā lɛ uwá, amáŋ é jɛ́yí ɔdā nōó da uwá ā ŋ́.

⁷Anɔ́ɔ Ujísɔ̄si da uwá igbɔhá kahíníī, “Ɔkwɔ̄ɔ̄kwɛ̄yi, n̄ da aá ka, ami lɛbɛ̄ɛka okómpīinu nɛ̄ aálá gē bū á.

⁸Ācɛ dóódu nēe wā gbɔbū gā um ā wɛ uwī mɛ́mla ācohéjulúgwu. Aálá ā í kē gáā pó ɛlā kú uwā ŋ́.

⁹Ami lɛbɛ̄ɛka okómpīinu á, ɔ̄cɛ dúúmā nōo bēhé ŋmá iyí um géē nyatá, ó géē ga eyīpú klla í wɛ̄ɛcɛ, ó klla géē má ácí í lé.

¹⁰Aúwī ā í wā ohígbū ɔdā dúúmā ŋ́, ń tá áafú ŋ́ kéē gaá wūwī, kéē ŋmó, kéē kla gáā bīya ɔdā tāajɛ. Amáŋ ami ā wā kéē lɛ oyēeyī, kéē klla lɛ ɔ́ nwuné nwuné.

¹¹Ami wɛ ɛ́nɛ́nɛ̄ ɔ̄cogbāálá á. Ɛ́nɛ́nɛ̄ ɔ̄cogbāálá ā gē je oyēeyī kú nū kwɛyí ákú aálá kú nū ā.

¹²Ɔ̄cɛ nēé pūla ā, nōó wɛ ɔ̄cogbāálá ā ŋ́ mā, ɔ̄cɛ nɛ̄ aálá ā í wɛ ákú nū ŋ́ mā, eko nɛ̄ ó má ɔgwú gē wā, ó í habɔ̄ aálá tá le kwu. Anɔ́ɔ ɔgwú lɛ uwá pahīla le aóhī kpó kwú.

¹³Ó le kwu ohígbū kóō wɛ ɔ̄cɛ nēé pūla, ó lɛlá wu aálá ā ŋ́.

¹⁴Ami wɛ ɛ́nɛ́nɛ̄ ɔ̄cogbāálá á, n jé álá kú um, álá kú um kē jé um. Ɛ́gɛ́nɛ̄ Ádā ā je um ā, ɛ́gɔ́ɔmā nɛ̄ n kē jé Ádā ā á. N géē je oyēeyī kú um kwɛyí ákú aálá kú um ā.

¹⁶N lɛ aálá ɔhá, nēé wɛ ákú ipú igá nyā ɛ́ɛ́ ŋ́. N géē kpó uwā wā inu piíí. É géē pó ɔkɔ kú um, cɛ́ɛ́ é géē je pīya ɔ́wá kú aálá éékpónú mɛ́mla ogbāálá éékpónú.

¹⁷Ohígbū ɛ̄nyā Ádā ā yíihɔtū tū um, ohígbū ka n cɛ̄ ká n̄ gekwú o yá ɛ́ɛ́ ká n̄ klla yēeyī igbɔhá kpɔ́.

¹⁸Ɔ̄cɛ dúú í lɔfú ŋmó um icííci glá ŋ́. Ami abɔ̄yī um cɛ̄ ka n gē kwú á. N lɔfú cɛ̄ ō kwú, n kē lɔfú nɛ̄ n gē yēeyī igbɔhá glá kpɔ́. Ami miyɛ ɔ́da ŋmá ɛgiyí Ádā um á.”

¹⁹Ɛlā nɛ̄ Ujísɔ̄si ka nēe bā nyā cɛ̄ le ācɛ Ujíyu kwú kɔ̄.

²⁰Ācɛ alɛwa kú uwā kahíníī, “Ó lɛ alelékwū obɔ̄bí, ó klla ī jɛɛ́lɛ́. Ɔdíyá nɛ̄ aá gē jāhɔ̄ lɛ ɔ́ ā?”

²¹Aɔ́há kahíníī, “Ɛlā nēe bá ā í wɛ ɛlā kú ojɛɛ́lɛ́ nóo. Alelékwū obɔ̄bí lɔfú nwūla eyī kú opeyī glá āā?”

²²Ɛ̄cī éyi, eko nɛ̄ ofu gē ŋmó nɛ̄hi ā, nōo klla wɛ eko kú ajɛ Ujerúsālɛm ō je tīihɔ ā.

²³Ujísɔ̄si yɔ̄ gē yāwu ipú Agblīihɔ-nɛ̄hi, okómpīinu nēé hī ka ákú Usólōmɔn ā.

²⁴Ācɛ Ujíyu le túbá jīla anú tá. Anɔ́ɔ é da ɔ́ ɔ̄kā kahíníī, “Eko nyá nāa géē bī ɔtū kú alɔ plicō gaá kwu ā? Ɔ́dāŋ́ ka a wɛ Ohɔ́nyɛtá á nɛɛ, da alɔ pélúú.”

²⁵Ujísɔ̄si tá uwā ohi kahíníī, “N le da aá, aá kē cɛ̄ ŋ́. Úklɔ́ nɛ̄ n gē yá ŋmá iyē kú Ádā um ā gē cījáalí kú um á.

²⁶Amáŋ aá kē cɛ̄ ŋ́, ohígbū ka aá í wɛ ipú kú aálá kú um ŋ́.

²⁷Aálá kú um gē pó ɔkɔ kú um, n kē jé uwā, é kē í yɛce um.

²⁸Anɔ́ɔ n géē je oyēeyī nōó ī mɛ ŋ́ lɛ uwá á. É kē gáā yíífi ŋ́, ɔ̄cɛ dúúmā í gáā nū uwā ŋmá abɔ̄ um glá ŋ́.

²⁹Ádā um nōo kpó odúúdú uwā gā um ā, anú fíyɛ́[18] ɔ̄cɛ dóódu á. Ɔ̄cɛ dúúmā í kē lɔfú nū uwā ŋmá abɔ̄ Ádā ā glá ŋ́.

³⁰Ami mɛ́mla Ádā ā wɛ ékpó.”

³¹Ācɛ Ujíyu kwú ɛcɔ̄ ú kpó kéē tá fíyɛ́ ɔ̄ kpɔ́.

³²Ujísɔ̄si tá uwā ohi kahíníī, “N lɛ úklɔ́ olɔhi alɛwa mafú lɛ aá ŋmá ɛgiyí Ádā ā. Ohígbū ɛ̄nyá kú ipú úklɔ́ nēe bá ā, nɛ̄ aá tíne ká aá tá ɛcɔ̄ klá um ā?”

³³ Ācɛ Ujíyu ā tóohi kahíníī, “Alɔ í tá ɛcɔ̄ klá uwɔ ohígbū úklɔ́ olɔhi ŋ́, amáŋ ohígbū ɛbí ō ka, ohígbū ka awɔ nōo wɛ ɔ̄cɛ ā lɛ iyī uwɔ pīya Ɔwɔicō.”

³⁴ Ujísɔ̄si tá uwa ohi kahíníī, “É tá ɔ̄ ipú ɔkpá íne ká aá ka Ɔwɔicō kahíníī, ‘Aá wɛ aɔ́wɔ” ŋ́ nɛɛ?

³⁵Ɔ́dāŋ́ kóō hī ācɛ nɛ̄ ɛlā Ɔwɔicō wā abɔ̄ uwā ka aɔ́wɔ (ɔkpīhɔ í kē bīya glá ŋ́),

³⁶ɔdíyá nɛ̄ aá gē ka ka Ɔ̄cɛ Otīhiɔ nɛ̄ Ádā tū wā ipú ɛcɛ nyā, ɔ́ɔ gē ka ɛbí eko nɛ̄ ó le ka ka anúɔ wɛ Ɔyínɔ̄nyīlɔ ku Ɔwɔicō ā?

³⁷Ɔ́dāŋ́ ka ń yúklɔ́ kú Ádā um ŋ́, aá cɛ̄ ɛlā kú um ŋ́.

³⁸Amáŋ ɔ́dāŋ ka n gē yúklɔ́ kú nū, nɛ̄ aá kē cɛ̄ɛ̄lā kú um ŋ́ nááná, aá í cɛ̄ ohígbū úklɔ́ ā. Ká aá le jé, klla lɛyí nū jé, ka Ádā ā yɔ̄ ipú um, n kē yɔ̄ ipú nū.”

³⁹Anɔ́ɔ é tíne kéē klla lɛ ɔ́ kwú abɔ̄fú kpɔ́, anɔ́ɔ ó le kwu ŋmá abɔ̄ uwā á.

⁴⁰Ó nyɛ̄ɛ̄ igbɔhá le gla Ujɔ́dan, le tá ɛga nɛ̄ Ujɔ́ni tɛtɛ ge yá ācɛ ubatísim ā, anɔ́ɔ ó gaá yɔ̄ abɔ́ɔ á.

⁴¹Ācɛ alɛwa pɛ́ wā ɛgiyí nū, é gē klla kahíníī, “Ujɔ́ni í yá ɔdā ocābɔ̄ dúúmā ŋ́, amáŋ ɔdā dóódu nōó ka ohígbū ɔ̄cɛ ā wɛ ɔkwɛ̄yi.”

⁴²Anɔ́ɔ ācɛ alɛwa lɔtūce ɔ́ abɔ́ɔ á.