Read idoma UJƆ́NI 11 Bible Online

UJƆ́NI 11 - idoma bible

UJƆ́NI 11

¹Ɔ̄cɛ éyi lé ka Ulásārɔ̄si, ó lā ɔlɛ́ éyi nēé hī ka Ubɛ́tāni. Ɔ́ɔmā wɛ ɔlɛ́ kú Umerí mɛ́mla ɔyínɛ́ nū nɔ̄nyā Umáta dúú á. Ɛ̄cī éyi Ulásārɔ̄si gbɔɔ́ ō doōcē.

² Umerí nyā wɛ ɔ̄cɛ nōo lɛ anɔ̄ nya Óndú ā iyē, klla nya ikpó kú Óndú ā mla īnyīlɛ̄yí kú nū á. Anú nɛ̄ ɔyínɛ́ nū nɔ̄nyīlɔ, Ulásārɔ̄si, yɔ̄ gē doōcē á.

³Ayínɛ́ nū nɔ̄nyā le ɛ̄hɔ̄ tū fu Ujísɔ̄si kahíníī, “Óndú, má ɔ̄, oklóbīya uwɔ yɔ̄ ī doōcē.”

⁴Eko nɛ̄ Ujísɔ̄si le pó ā, ó kahíníī, “Ōcē nyā í gáā ŋmó Ulásārɔ̄si ŋ́, ɛ̄nyā le yá cɛ́ɛ́ kú ācɛ kéē cɛ̄tra Ɔwɔicō. Ó klla í wɛ ɔwɛ nɛ̄ ācɛ géē bī le cɛ̄tra Ɔyínɔ̄nyīlɔ kú Ɔwɔicō.”

⁵Umáta mɛ́mla ɔyínɛ́ nū nɔ̄nyā mɛ́mla Ulásārɔ̄si he Ujísɔ̄si ɔtū nɛ̄hi.

⁶Eko nɛ̄ ó le pó ka ɔ́ɔ gē doōcē ā, ó yɔ̄ ɛga nɛ̄ ó klá ā kpó, jāā ɛ̄cī ɛpa.

⁷Anɔ́ɔ, ó da ayíkpó kú nū kahíníī, “Ālɔ̄ kwúcē ga Ujudíya kpɔ́.”

⁸Anɔ́ɔ ayíkpó kú nū da ɔ́ kahíníī, “Itíca, ācɛ Ujíyu tíne kéē tá ɛcɔ̄ klá uwɔ eko kpiíí nōo yɛ ā, a klla tíne ká ā nyɔ̄ abɔ́ɔ igbɔhá kpɔ́ ɔ̄ɔ̄?”

⁹Anɔ́ɔ Ujísɔ̄si tóohi kahíníī, “Áwa igwɛ́ɛpa ī yɔ̄ ipú ɛ̄cī éyi ŋ́ nɛɛ? Ɔ́dāŋ́ ka ɔ̄cɛ gē yāwu ɔlɛ́ɛnɔ, ó gáā gwōnū ŋ́, ohígbū ka ó gē mɛ́ɛbɛ kú ɛcɛ nyā.

¹⁰Ɔ́dāŋ́ ka ɔ̄cɛ gē yāwu ipú obū otú, ó géē gwōnū, ohígbū ka ɔlá-fíyajɛ í yɔ̄ mla anú ŋ́.”

¹¹Ó le ɛ̄nyā ka, anɔ́ɔ ó klla da uwá eko kpií kpɔ́ kahíníī, “Oklóbīya alɔ Ulásārɔ̄si yɔ̄ ī gbɔlā, amáŋ n géē nyɔ̄ gáā lɛ ɔ́ héyī.”

¹²Anɔ́ɔ ayíkpó kú nū da ɔ́ kahíníī, “Óndú, ɔ́dāŋ ka ó yɔ̄ ī gbɔlā, ó géē héyī kpɔ́ ɛ́ɛ́.”

¹³Ɛyí ɛlā kú Ujísɔ̄si ā wɛ ka Ulásārɔ̄si gekwú, amáŋ ayíkpó kú nū gbɛlá ka ɔ́ɔ kɛlā lɛyíkwu omlɛ́nyɔ́ ipú iyɔ̄la ōgbo.

¹⁴Anɔ́ɔ Ujísɔ̄si le da uwá pélúú kahíníī, “Ulásārɔ̄si gekwú ɛɛ́.

¹⁵Ɔtū he um nɛ̄hi, ohígbū ka ń yɔ̄ abɔ́ɔ ŋ́, o yá cɛ́ɛ́ ká aá cɛ̄ɛ̄lā kú um. Ālɔ̄ nyɔ̄ ɛgiyí nū.”

¹⁶Anɔ́ɔ Utɔ́mɔ̄si, nēé hī ka Áplɛ́ ā da ayíkpó ɔ́mpa nū kahíníī, “Ālɔ̄ nyɔ̄ dúú ká ālɔ̄ kwú mla anú.”

¹⁷Eko nɛ̄ Ujísɔ̄si gā ā, ó le jé ka é kwú ɔ̄ nyi ipú únóji ɛ̄cī ɛnɛ ɛɛ́.

¹⁸Ubɛ́tāni yɔ̄ kwu Ujerúsālɛm ajaajɛ. Ó lɛbɛ̄ɛka ukilómīta ɛtá ā.

¹⁹Ācɛ Ujíyu alɛwa wā gaá tū Umáta mɛ́mla Umerí ɔtūlé ohígbū ɔyínɛ́ uwā nɔ̄nyīlɔ nōo kwú ā.

²⁰Abɔ̄ Umáta le pó ka Ujísɔ̄si yɔ̄ ī wā, ó le tɛ́ɛcɛ gaá jīla anú ɔwɛ. Amáŋ Umerí yɔ̄ ɔlɛ́.

²¹Anɔ́ɔ Umáta da Ujísɔ̄si kahíníī, “Óndú, ɔ́dāŋ ka a yɔ̄ amānyā nɛɛ, ɔyínɛ́ um nɔ̄nyīlɔ ā í yɛ í kwú ŋ́.

²²Amáŋ abālɔbányā n jé ka ɔdā dúúmā nāa dɔɔ̄kā ŋmá ɛgiyí Ɔwɔicō, ó gē je ɔ́ gā uwɔ.”

²³Ujísɔ̄si da ɔ́ kahíníī, “Ɔyínɛ́ uwɔ géē héyī.”

²⁴Umáta da ɔ́ kahíníī, “N jé kóō géē héyī ŋmá ɔlékwū ɛ̄cī ámōōmɛ ā.”

²⁵Ujísɔ̄si da ɔ́ kahíníī, “Ami gē je ācɛ héyī ŋmá ɔlékwū á. Ācɛ nēe cɛ̄ɛ̄lā kú um, géē yēeyī, nááná nēé gekwú ā.

²⁶Ɔ̄cɛ dúúmā nōo yēeyī klla lɛ ɔtūce um, í gáā kwú ŋ́ piyóó. A cɛ̄ ɛ̄nyā a?”

²⁷Umáta da ɔ́ kahíníī, “Īī, Óndú. N cɛ̄ ka a wɛ Ohɔ́nyɛtá á, Ɔyínɔ̄nyīlɔ kú Ɔwɔicō nōo gáā wɛ̄ɛcɛ ā.”

²⁸Eko nɛ̄ Umáta le ɛlā nyā ka kwɛyí ā, ó nyɛ̄ɛ̄ gaá lɛ Umerí ɔyínɛ́ nū nɔ̄nyā hīgwú gɛɛcɛ. Anɔ́ɔ ó ka tū ɔ̄ ahɔ̄ kahíníī, “Itíca ā yɔ̄ amānyā. Ó ī hī uwɔ igwú.”

²⁹Eko nɛ̄ Umerí le pó ā, ó nyāŋjɛ, anɔ́ɔ ó páápá le tá ɛgiyí nū á.

³⁰Ujísɔ̄si í wā ipɔ́lɛ́ ā dúúdú ɛ́ɛ́ nóo, amáŋ ó yɔ̄ ɛga nɛ̄ Umáta jīla anú ɔwɛ ā.

³¹Eko nɛ̄ ācɛ Ujíyu nēe bá inu mla anú gē tū ɔ̄ ɔtūlé ā má ɔ̄ bá ó nyāŋjɛ kpá le tɛ́ɛcɛ ā, é yɛce ɔ́, ohígbū kéē gbɛlá kóō gē nyɔ̄ únóji gaá jikwū abɔ́ɔ nɛɛ.

³²Anɔ́ɔ eko nɛ̄ Umerí wā ɛga nɛ̄ Ujísɔ̄si yɔ̄ ā, ó lɛ ɔ́ má ā, ó má kwōkwū ajɛ iyɔbu kú nū. Anɔ́ɔ ó da ɔ́ kahíníī, “Óndú, ɔ́dāŋ ka a yɔ̄ amānyā nɛɛ, ɔyínɛ́ um nɔ̄nyīlɔ ā í yɛ í kwú ŋ́.”

³³Anɔ́ɔ eko nɛ̄ Ujísɔ̄si má ɔ̄ gē jikwū, mɛ́mla ācɛ Ujíyu nēe wā mla anú ā bá gē jikwū dúú ā, ó yɔ̄ gē hīlifu ipú ɔtū kú nū. Ó le kwú ɔ̄ iyē nɛ̄hi.

³⁴Anɔ́ɔ ó kahíníī, “Iní nɛ̄ aá lɛ ɔ́ gwutá ā?” Anɔ́ɔ é da ɔ́ kahíníī, “Óndú, wā gaá má ɔ̄.”

³⁵Ujísɔ̄si le ikwū je.

³⁶Anɔ́ɔ ācɛ Ujíyu kahíníī, “Má ɛ́gɛ́nɛ̄ ó yíihɔtū tū ɔ̄ dúú ā.”

³⁷Amáŋ ācɛ ōhī kú ipú uwā kahíníī, “Ɔ̄cɛ nōo nwūla eyī kú ópeyī ā, í lɔfú yá ká ɔ̄cɛ kóō kwú ŋ́ glá ŋ́ nɛɛ?”

³⁸Ɔtūnwula nwūla yá Ujísɔ̄si nɛ̄hi igbɔhá, anɔ́ɔ ó le tá únóji ā. Únóji ā wɛ ɔ̄gɔ̄ nōo yɔ̄ áklō kú ɛfu, nēé lɛ ɛcɔ̄ gwū ɔ̄ á.

³⁹Ujísɔ̄si kahíníī, “Aá kwú ɛcɔ̄ nyā ú míya ŋmá amānyā.” Umáta, ɔyínɛ́ nɔ̄nyā kú ɔ̄cɛ nōo kwú ā, da ɔ́ kahíníī, “Óndú, abālɔbányā ó gē hójújá mla ípī mɛ́ɛnɛ, ohígbū ka ɛ̄cī ɛnɛ nɛ̄ ó kwú yɔ̄ mɛ́ɛ̄ á.”

⁴⁰Ujísɔ̄si da ɔ́ kahíníī, “Ń tɛtɛ da uwɔ ka, ‘Ɔ́dāŋ́ ka a cɛ̄, a géē má ɔfú kú Ɔwɔicō ŋ́ nɛɛ?’”

⁴¹Anɔ́ɔ é kwú ɛcɔ̄ ā ú ŋmá abɔ́ɔ. Ujísɔ̄si jeyī gicō, anɔ́ɔ ó kahíníī, “Ádā, n tá uwɔ ahínyá ohígbū ka a gē jāhɔ̄ gā um.

⁴²N kē jé ka a gē jāhɔ̄ gā um eko dóódu, amáŋ n kɛlā nyā ohígbū ācɛ nēe háyi amānyā ā, kéē cɛ̄ ka awɔ tū um ɛhɔ̄ á.”

⁴³Eko nōó lɛ ɛ̄nyā ka kwɛyí ā, ó dɛ̄gba gbōmgbōm kahíníī, “Ulásārɔ̄si, gā ɛcɛ!”

⁴⁴Ɔ̄cɛ nōo kwú ā gā ɛcɛ. É bī ɔpá le ɔ́ ikpó mɛ́mla abɔ̄ gbō, é kē lɛ ɛyí kú nū gbo igbogbo. Anɔ́ɔ Ujísɔ̄si da uwá kahíníī, “Aá lɛ ɔ́ wī kóō nyɔ̄.”

⁴⁵Ācɛ alɛwa kú ācɛ Ujíyu nēe wā mla Umerí, nēe kē má ɔdā nɛ̄ ó yá ā, lɔtūce ɔ́.

⁴⁶Amáŋ aóhī kú ipú uwā nyɛ̄ɛ̄ le tá ɛgiyí ācɛ Ufárisīi, gaá le ɔdā nɛ̄ Ujísɔ̄si yá ā ka lɛ uwá.

⁴⁷Ohígbū ɔ́ɔmā otrɛ̄yí kú ācogwɛ́ɛya mla Ācɛ Ufárisīi lɛ ójila ohɛ́pɔ̄ hīgwú. Anɔ́ɔ é kahíníī, “Ɔdí nɛ̄ alɔ géē yá mɛ́ɛ̄ ā? Ohígbū ka ɔ̄cɛ ā gē yá ɔdōcābɔ̄ alɛwa.

⁴⁸Ɔ́dāŋ́ ka ālɔ̄ habɔ̄ ɔ̄ tá lɛ ā, ācɛ dóódu géē lɔtūcɛ̄ ɛlā nū, ó lɛ ā, ācɛ Uróm géē wā gaá lɛ Agblīihɔ-nɛ̄hi mla ɔpu kú alɔ ca tāajɛ.”

⁴⁹Amáŋ ɔ̄cɛ éyi kú ipú uwā, Ukayáfāsi, nōo wɛ otrɛ̄yí kú ācogwɛ́ɛya iháyí ɔ́ɔmā ā da uwá kahíníī, “Aá jé ɔdā dúúmā ŋ́.

⁵⁰Aá jé kóō cɛgbá ká ɔ̄cɛ éyi kóō gekwú ohígbū ācɛ ā, ikoko nɛ̄ odúúdú ɔpu ā gé ca tāajɛ.”

⁵¹Ó wɛ ɔfú kú abɔ̄yī nū nōó bī le kɛlā nyā ŋ́, amáŋ ɛ́gɛ́nɛ̄ ó wɛ otrɛ̄yí kú ācogwɛ́ɛya iháyí ɔ́ɔmā ā, ó le ɛbɛ má ka Ujísɔ̄si ɔ́ɔ géē kwú ohígbū ācɛ Ujíyu ā.

⁵²Ó wɛ ohígbū ācɛ Ujíyu ā ōfūnū nɛ̄ Ujísɔ̄si í kwú ā ŋ́, amáŋ ohígbū kóō lɛ ayí kú Ɔwɔicō, nēe le pahīla bá ɛga dóódu ā pīya tɔ̄há.

⁵³Anɔ́ɔ oŋmɛ́cī ɔ́mā a aótrɛ̄yí ācɛ Ujíyu gbɔɔ́ ō tū ujɔ̄ kéē géē lɛ Ujísɔ̄si ŋmó.

⁵⁴Ohígbū ɔ́ɔmā Ujísɔ̄si í yɛ ipú ācɛ Ujíyu cāā glá gɛ ŋ́, amáŋ ó nyɛ̄ɛ̄ ŋmá abɔ́ɔ le tá ipɔ́lɛ́ nōo yɔ̄ kwu ígbíli nēé hī ka Ɛ́frem ā, abɔ́ɔ nōó yɔ̄ mla ayíkpó kú nū á.

⁵⁵Eko Ucɛ kú Onyatá le kwajaajɛ ɛɛ́. Ācɛ alɛwa ŋmá ɔlɛ́ uwā wā Ujerúsālɛm gbɔbū lɛ ɛ̄cī Ucɛ kú Onyatá ā, kéē lɛ iyī uwā gwu gbɔbū lɛ ucɛ ā.

⁵⁶É bá yɔ̄ ī dɔɔ̄kā Ujísɔ̄si, uwá ka ɔtāhɛ̄ iyī uwā eko nēé bá Agblīihɔ-nɛ̄hi ā kahíníī, “Ɔdí nɛ̄ aá gbɛlá? Kóō gáā wā ɛgiyí ucɛ ā ŋ́ nɛɛ?”

⁵⁷Ohígbū ka otrɛ̄yí kú ācogwɛ́ɛya ā mɛ́mla ācɛ Ufárisīi ā le ɔ́da je ka ɔ́dāŋ ka ɔ̄cɛ dúúmā jé ɛga nɛ̄ Ujísɔ̄si yɔ̄, kóō le ka tɛ́ɛcɛ, kéē lɛ ɔ́ kwú abɔ̄fú.