Read idoma UJƆ́NI 12 Bible Online

UJƆ́NI 12 - idoma bible

UJƆ́NI 12

¹Ɛ̄cī ɛhīlī gbɔbū ɛ́ɛ́ ká Ucɛ kú Onyatá ā kóō wā ā, Ujísɔ̄si gā Ubɛ́tāni ɛga nɛ̄ Ulásārɔ̄si ɔ̄cɛ nɛ̄ Ujísɔ̄si je héyī ŋmá ɔlékwū ā lā ā.

²É le ɔdōlé ɔ̄nɛ̄ yá lɛ ɔ́. Umáta yɔ̄ gē cɛ̄ uwā ɛhɔ̄, Ulásārɔ̄si wɛ ɔ̄cɛ éyi kú ipú ācɛ nēe bá gē lé ɔdōlé mla anú ā.

³Anɔ́ɔ Umerí kwú íkpém anɔ̄ unáadi nōo gē gbɔɔ́lá nɛ̄hi ā ú. Anɔ́ɔ ó lɛ anɔ̄ ā pīya klá Ujísɔ̄si ikpó, bī inyīlɛ̄yī kú nū lɛ ɔ́ nyā tū ɔ̄, anɔ́ɔ ocu kú anɔ̄ ā mīyɛ inu ā tābɔ̄ kpɛmm á.

⁴Amáŋ Ujúdasi Iskárīyɔ̄tu, éyi kú ayíkpó kú nū ā (ɛ̄nɛ̄ o géē je ɔ́ lá ā) kahíníī,

⁵“Ɔdíyá nēé kwú anɔ̄ nyā ú lá égō nɛ̄hɛ̄ ofigwó, kéē kwú ije kú nū ú lɛ aógbɛhá ŋ́ mā ā?”

⁶Ó ka ɛ̄nyā, ohígbū ka ó lɛlá wu aógbɛhá ā ŋ́, amáŋ ohígbū ka abɔ̄ nɛ̄ ó wɛ uwī nōo gē bī alítā kú ije kú ayíkpó ā nɛ̄ n. Ó kē ī le abɔ̄ wu ɔ́ ī je ije ŋmá anú ojigógó.

⁷Ujísɔ̄si tá ɔ̄ ohi kahíníī, “Habɔ̄ ɔ̄ tá cíí. Ó yá ɛnyā kóō le ɔkpíyē kú um tútū gbēyī eko nēé géē nyi um ā.

⁸Aá géē lɛ ācogbɛhá ipú aá eko dóódu, amáŋ ami ā í gáā yɔ̄ pi aá eko dóódu ŋ́.”

⁹Ɛwa nɛ̄hi ká ācɛ Ujíyu le jé ká Ujísɔ̄si yɔ̄ abɔ́ɔ, anɔ́ɔ é le pɛ́ nyɔ̄ á. Ó wɛ ohígbū kéē lɛ Ujísɔ̄si má ōfūnū ŋ́, amáŋ kéē lɛ Ulásārɔ̄si, ɔ̄cɛ nōó je héyī ŋmá ɔlékwū ā má dúú.

¹⁰Anɔ́ɔ aótrɛ̄yí kú ācogwɛ́ɛya tɛɛtɛ le ujɔ̄ tū gbɔbū kéē lɛ Ujísɔ̄si ŋmó. Abālɔbányā é tínē kéē lɛ Ulásārɔ̄si ŋmó dúú,

¹¹ohígbū ka ācɛ Ujíyu alɛwa le pɛ́ tá ɛgiyí Ujísɔ̄si klla lɔtūce ɔ́ ohígbū Ulásārɔ̄si nōó je héyī ŋmá ɔlékwū ā.

¹²Oŋmɔ́ɔ̄cí nū ɛwa nɛ̄hi kú ācɛ nēe wā ɛgiyí ucɛ ā le pó ka Ujísɔ̄si ɔ́ɔ gē wā Ujerúsālɛm,

¹³anɔ́ɔ é le ābɔ̄ ālī hɛ́ anɔ́ɔ é le pɛ́ gɛcɛ gaá jīla anú ɔwɛ, bá yɔ̄ ī tɔ́ɔga lɛ ɔ́ kahíníī, “Aá cɛ̄tra Ɔwɔicō! É lɛ ɔhā hɛ́ ce ɔ̄cɛ nōo gē wā ŋmá iyē kú Óndú ā, nōo géē gbō ācɛ kú Ísrɛ̄lu ā!”

¹⁴Ujísɔ̄si lɛ ɔyí ijakī má le ce, ɛ́gɛ́nɛ̄ é tá ɔ̄ ipú ɔkpá kú ɛlɔ̄ɔwɔicō kahíníī,

¹⁵“Ā yúufi ɔdā dúúmā ŋ́, ācɛ kú Ujerúsālɛm, aá má ɔ̄, Ɔcɛ́ ká aá ī wā yɔ á, ó yɔ̄ ī ce ɔyí ijakī!”

¹⁶Aflɛ́yí ā ayíkpó kú nū í jɛ́yí aɔ́dā nēe bá nyā eko nēé yá ā ŋ́, amáŋ eko nēé le Ujísɔ̄si héyī ŋmá ɔlékwū ɔwɛ nōo yéyījii nɛ̄hi ā, é le bla kéē le aɔ́dā nēe yá ā tá tāajɛ ipú ɛlɔ̄ɔwɔicō ohígbū nū, ó kē le yá tá ɔ̄ yíílí.

¹⁷Anɔ́ɔ ɛwa nēe bá mla anú eko nōó hī Ulásārɔ̄si igwú ŋmá únóji ā, klla je ɔ́ héyī ŋmá ɔlékwū ā, bá yɔ̄ ī cījáalí nū.

¹⁸Ɛwa ā yɛjīla anú, abɔ̄ é le pó ka ó le ɔdā ō hídáagó nyā yá ā.

¹⁹Anɔ́ɔ ācɛ Ufárisīi da iyī uwā kahíníī, “Aá má ɔ̄, ɔdā nɛ̄ alɔ miya kpɛ́ɛ́mm ā í yúklɔ́ dúúmā gɛ ŋ́. Má ɔ̄, ācɛ dóódu gē yɛce ɔ́ ɛɛ.”

²⁰Abālɔbányā ācɛ Ugríisi bá ipú ācɛ nēe nyɔ̄ Ujerúsālɛm ɔnū ucɛ gaá gbɔ̄ɔkɔ ā.

²¹Anɔ́ɔ é le tá ɛgiyí Ufílīpu (ɔ̄cɛ Ubɛtsáyída ipú Ugálīli) anɔ́ɔ é da ɔ́ kahíníī, “Ɔkpani, alɔ tíne ká ālɔ̄ má Ujísɔ̄si.”

²²Ufílīpu nyɔ̄ gaá le da Ándru, anɔ́ɔ Ándru mɛ́mla Ufílīpu nyɔ̄ gaá le da Ujísɔ̄si á.

²³Anɔ́ɔ Ujísɔ̄si tá uwā ohi kahíníī, “Eko gā ɛɛ́, nɛ̄ Ɔwɔicō géē mafú ɛ́gɛ́nɛ̄ Ɔyínɔ̄nyīlɔ kú Ɔ̄cɛ ā wɛ ɔ̄cɛ idáagó lɛ ā.

²⁴Ɔkwɔ̄ɔ̄kɛ̄yi, n da aá ka, īkpō eyē éyi wɛ ékpónú ōfōōfū nū kpɔ́, ń táafú ŋ́, ayíka é kwú ɔ̄ ú nyi ga ipú ajɛ, nɛ̄ ó gekwú, cɛ́ɛ́ ó lɛ īkpō alɛwa yá wɛ̄ɛcɛ.

²⁵Ācɛ nēe ī piyɔtū kú oyēeyī kú uwā, géē kwú. Ɔ̄cɛ nōo kē tū oyēeyī kú nū eyījii, géē lɛ ɔ́ tū cɛ́ɛ́ kóō yēeyī piyóó.

²⁶Ɔ́dāŋ́ ka ɔ̄cɛ dúúmā nōo tíne kóō cɛ̄ um ɛhɔ̄, kóō yɛce um. Ɛga nɛ̄ n yɔ̄ ā, abɔ́ɔ nɛ̄ ɔ̄cocɛ̄hɔ̄ kú um géē yɔ̄ dúú á. Ɔ́dāŋ́ ka ɔ̄cɛ dúúmā gē cɛ̄ um ɛhɔ̄, Ádā ā géē lɛ ojīlīma ce ɔ́.”

²⁷Anɔɔ Ujísɔ̄si klla ka kpɔ́ kahíníī, “Abālɔbányā odo kú um lɛ unwalu. Ɔdí nɛ̄ n géē ka mɛ́ɛ̄ ā? ‘Ádā, ā cɛ̄ gā um má ɛdɔ kú ōwē ɛ́gɛ́nyā ŋ́’ kɛ̄ɛɛ?. Amáŋ ohígbū eko kú ōwē ɛ́gɛ́nyā ā nɛ̄ n kē wā á.

²⁸Ádā, cɛ̄tra iyē kú wɔ.” Anɔ́ɔ ɔkɔ éyi ŋmá ɔkpáncō kahíníī, “N le cɛ̄tra anú ɛɛ́, n klla géē cɛ̄tra anú ɔhá kpɔ́.”

²⁹Ācɛ nēe háyi ajaajɛ ā pó ɔkɔ ā, anɔ́ɔ ācɛ ōhī kahíníī, “Akpáabana le gbo ɛɛ́.” Ācɛ ɔhá kahíníī, “Alelékwū otɛ̄hɔ̄ kú Ɔwɔicō lɛ ɛlā ka lɛ ɔ́ ɛɛ́.”

³⁰Ujísɔ̄si tóohi kahíníī, “Ɔkɛ̄lā ā í wāajɛ kóō tá um abɔ̄ ŋ́, amáŋ o yá ɛ́ɛ́ kóō tá aá abɔ̄ nɛ.

³¹Abālɔbányā wɛ eko nɛ̄ Ɔwɔicō géē hɛ́pɔ̄ kú ācɛ kú ipú ɛcɛ nyā á. Abālɔbányā nɛ̄ Ɔwɔicō géē nū otrɛ̄yí kú ɛcɛ nyā tɛ́ɛcɛ á.

³²Anɔ́ɔ, ami ā, eko nēé lɛ um je gicō, n géē pi ācɛ dóódu wā ɛgiyí um.”

³³Ó ka ɛ̄nyā kóō mafú ɛ́gɛ́nɛ̄ ó gáā kwú lɛ ā.

³⁴Ɛwa ā tá ɔ̄ ohi kahíníī, “É tá ipú ɔkpá kú íne kú alɔ ka Ohɔ́nyɛtá ā géē yēeyī piyóó. Ɔdí yá nāa ka ka é géē je Ɔyínɔ̄nyīlɔ kú Ɔ̄cɛ gicō piíí āa? Ɔ̄nyɛ wɛ Ɔyínɔ̄nyīlɔ kú Ɔ̄cɛ ā?”

³⁵Anɔ́ɔ Ujísɔ̄si da uwá kahíníī, “Ɔlá-ofíyajɛ ā géē yɔ̄ mla aá eko kpiíí. Aá yāwu eko nɛ̄ aá lɛ ɔlá-ofíyajɛ ā, ká obū kóō lɛ aá kwú ŋ́. Ɔ̄cɛ nōo gē yāwu ipú obū, í jé ɛga nɛ̄ ó gē nyɔ̄ ā ŋ́.

³⁶Aá cɛ̄ɛ̄lā kú ɔlá-ofíyajɛ ā eko nɛ̄ ó yɔ̄ ɛgiyí aá ā, o yá ɛ́ɛ́ ká aá kwú pīya ācɛ kú ɔlá ōfíyajɛ ā.”

³⁷Nááná nōó yá aɔ́dā ō hídáagó alɛwa ipéyī uwā ā, é lɔtūce ɔ́ ŋ́.

³⁸Ɛnyā yá lɛ ā cɛ́ɛ́ kú ɛlā nɛ̄ Ayisáya ɔ̄comɛ́ɛbɛ ā ka ā, kóō le yá jīla. Ó kahíníī, “Óndú, ɔ̄nyɛ mīyɛ ɛhɔ̄ nɛ̄ alɔ cɛ̄ ā? Ɔ̄nyɛ nēé kē ma ɔfú kú Óndú ā fú lɛ ɔ́ ā?”

³⁹É cɛ̄ glá ŋ́, ohígbū ka Ayisáya ka igbɔhá kahíníī,

⁴⁰“Ɔwɔicō le uwá eyī kpó pu, klla lɛ ɔtū kú uwā yá lɔfú, kéē híī bī ikpēyī kú uwaā le mɛ́ɛbɛ ŋ́, kéē híī bī ɔtū kú uwā le jɛ́ɛyí ɔdā dúúmā ŋ́, cɛ́ɛ́ kéē pīyɛyí wā ɛgiyí um ká n̄ lɛ uwá hɛ́tá ŋ́.”

⁴¹Ayisáya tɛɛtɛ le má ka Ujísɔ̄si wɛ ɔdā idáagó, anɔ́ɔ ó kɛlā ohígbū nū á.

⁴²Nááná ā aótrɛ̄yí kú ācɛ Ujíyu alɛwa lɔtūce Ujísɔ̄si, amáŋ ohígbū ācɛ Ufárisīi ā, é ka ɔ́ tɛ́ɛcɛ glá ŋ́, ohígbū nēé géē lɛ uwá nū ŋmá Ɛgogbɔ̄ɔkɔ ā.

⁴³Ohígbū ka ocɛ̄tra kú ācɛ he uwá ɔtū fíyɛ́ ocɛ̄tra kú Ɔwɔicō á.

⁴⁴Anɔ́ɔ Ujísɔ̄si ka gbōmgbōm kahíníī, “Ɔ̄cɛ nōo lɔtūce um, ó wɛ ami nɛ̄ ó lɔtūce ā ŋ́, amáŋ ó lɔtūce ɔ̄cɛ nōo tū um ɛhɔ̄ ā nɛ.

⁴⁵Ɔ̄cɛ nōo lɛ um má ɛɛ́, kē lɛ ɔ̄cɛ nōo tū um ɛhɔ̄ ā má dúú ɛɛ́.

⁴⁶N wā ipú ɛcɛ bɛ̄ɛka ɔlá-ofíyajɛ ā, cɛ́ɛ́ ká ɔ̄cɛ dúúmā nōo lɔtūce um, kóō yɔ̄ ipú obū ŋ́.

⁴⁷Ɔ́dāŋ́ ka ɔ̄cɛ dúúmā lɛ ɛlā kú um pó, nōó klla yá ɔdā nɛ̄ n ka ā ŋ́, ń gáā hɛ́pɔ̄ kú nū ŋ́. Ohígbū ka ń wā gaá hɛ́pɔ̄ kú ācɛ kú ipú ɛcɛ ŋ́, amáŋ n wā ká n̄ gáā nya ācɛ kú ipú ɛcɛ tá.

⁴⁸Ɔ̄cɛ nōo tá um, nɛ̄ ó klla mīyɛ ɛlā kú um ŋ́, ó lɛ ɔ̄cɛ nōo géē hɛ́pɔ̄ kú nū. Ɛlā nɛ̄ n ka ā, géē kɛpɔ̄tū ɔ̄ ɛ̄cī ámōōmɛ á.

⁴⁹Ohígbū ka ń kɛlā ā ŋmá ɔfú kú um ŋ́, amáŋ Ádā nōo tū um ɛhɔ̄ ā, je ɔ́da kú ɔdā nɛ̄ n géē ka ā gā um á.

⁵⁰N jé ka íne kú nū gē bī oyēeyī opiyóó wā. Ohígbū ɔ́ɔmā ɔdā dóódu nɛ̄ n ka, n ka ɛ́gɛ́nɛ̄ Ádā ā je gā um ká n̄ ka lɛ ā nɛ̄ n.”