Read idoma UJƆ́NI 13 Bible Online

UJƆ́NI 13 - idoma bible

UJƆ́NI 13

¹Ujísɔ̄si le jé ka eko nɛ̄ anúɔ géē nyɛ̄ɛ̄ ŋmá ɛcɛ nyā ga ɛgiyí ádā nū ā le yá, ɛcī éyi gbɔbū ɛ́ɛ́ kéē lé ucɛ kú onyatá. Ó húmáyī yíihɔtū tá ācɛ ɔlɛ́ nū nēe bá ipú ɛcɛ nyā ā, anɔ́ɔ ó kē yíihɔtū tū uwā jāā ga eko ámōōmɛ á.

²Ujísɔ̄si mɛ́mla ayíkpó kú nū bá ɛgiyí ɔdōlé ɔ̄nɔ̄ɔ̄nɛ̄. Eko nyā ebilíi tɛɛtɛ le nwū tū Ujúdasi Iskárīyɔ̄tu, ɔyí Usáyímɔ̄ni ɔtū kóō mīyɛ ije ce īkpɛ̄yí Ujísɔ̄si. [19]

³Ujísɔ̄si le jé ka Ádā ā kwú odúúdú ɔfú ú kpó tū anúɔ abɔ̄. Ó klla kē jé ka anúɔ ŋmá ɛgiyí Ɔwɔicō, anúɔ klla yɔ̄ ī nyɔ̄ ɛgiyí Ɔwɔicō.

⁴Ujísɔ̄si cāŋjɛ ŋmá ɛgiyí ɔdōlé ā, anɔ́ɔ ó kwú awulú kú nū ú plla bá ajɛ, kwú ogōdōgōdō ú kpó le ɛ́nyɔ́ kú nū gbō á.

⁵Anɔ́ɔ ó le éŋkpɔ̄ hɛ́ pīya tū ipú ɔgbanjɛ̄, anɔ́ɔ ó gbɔɔ́ ō na ikpó kú ayíkpó kú nū á. Eko nōó le uwá ikpó na kwɛyí cɛ́ɛ́ ó kwú ogōdōgōdō nɛ̄ ó le gbō ɛ́nyɔ́ ā le ikpó ā nya.

⁶Eko nōó gā ɛgiyí Usáyímɔ̄ni Upíta ā, Upíta da ɔ́ kahíníī, “Óndú a gáā na um ikpó nɛɛ?”

⁷Anɔ́ɔ Ujísɔ̄si tá ɔ̄ ohi kahíníī, “Ɔdā nɛ̄ n gē yá ā, á jɛ́yí nū abālɔbányā ɛ́ɛ́ ŋ́, amáŋ a géē jɛ́yí nū ɛ̄cɔ̄bū.”

⁸Anɔ́ɔ Upíta da ɔ́ kahíníī, “Á gáā na um ikpó gbóógbóō ŋ́.” Ujísɔ̄si tá ɔ̄ ohi kahíníī, “Ɔ́dāŋ́ ka ń na uwɔ ikpó ŋ́, ayíka á kē wɛ ɔyíkpó kú um ŋ́.”

⁹Usáyímɔ̄ni Upíta da ɔ́ kahíníī, “Óndú, ó wɛ ikpó kú um ōfōōfūnū nāa géē na ā ŋ́, amáŋ abɔ̄ mɛ́mla ɛyí kú um dúú.”

¹⁰Ujísɔ̄si da ɔ́ kahíníī, “Ɔ̄cɛ nōo le iyē gwā ɛɛ́ mā le yá yēŋēē dúúdú ɛé cɛgbá kéē gwīīyē dúú gɛ ŋ́. Ayíka ikpó kú uwā ōfōōfūnū nēé í na mɛ́ɛ̄ á. Odúúdú aá le yēŋēē ɛɛ́, ayíka ɔ̄cɛ éyi ōfōōfūnū.”

¹¹Ohígbū ka Ujísɔ̄si jé ɔ̄cɛ nōo géē yá ibīyājɛ tū ɔ̄ ā. Ohígbū ɔ́ɔmā yá ɛ́ɛ́ nōó kahíníī, “Ó wɛ odúúdú aá le yēŋēē ā ŋ́” má.

¹²Eko nōó le uwá ikpó na kwɛyí ā, ó kwú awulú kú nū ú klá iyē, anɔ́ɔ ó le yɛ gáā cīce á. Ó da uwá ɔ̄ka kahíníī, “Aá jɛ́yí ɔdā nɛ̄ n yá nyā ā?

¹³Aá gē hī um ka, Itíca mɛ́mla Óndú ā. Ɔ́ɔmā le kpaakpa lɛ ā, ohígbū ka ɛ́gɔ́ɔmā nɛ̄ n wɛ á.

¹⁴Ɔ́dāŋ́ ka ó lɛ ā, nɛ̄ ami nōo wɛ Óndú mɛ́mla Itíca kú aá ā, lɛ ikpó kú aá na, ó lɛ ā aá cíkā ō na ikpó kú ɔ́mpa iyī aá.

¹⁵N lɛ ɔdā ōgbla ɔdā je lɛ aá ɛɛ́, cɛ́ɛ́ ká aá yá ɛ́gɛ́nɛ̄ n yá lɛ aá nyā.

¹⁶Ɔkwɔ̄ɔ̄kwɛ̄yi, n̄ da aá ka, ɔ̄cocɛ̄hɔ̄ í gē nwuné fíyɛ́ ɔkpani nū ŋ́, ɔ̄cɛ nēe tɛ̄hɔ̄ í kē gē nwuné fíyɛ́ ɔ̄cɛ nōo tū ɔ̄ ɛhɔ̄ ā ŋ́ m.

¹⁷Abālɔbányā nɛ̄ aá le ɛlɔ̄kwɛ̄yi nēe bá ā jé ā, ó géē lɔhi lɛ aá ɔ́dāŋ ka aá gē bī uwā le yúklɔ́.

¹⁸Ń kɛlā nyā ohígbū odúúdú aá ŋ́. N jé ācɛ nɛ̄ n fu ā, amáŋ ká ɛlā nēé ka ipú ɔkpá kú ɛlɔ̄ɔwɔicō ka, ‘Ɔ̄cɛ nōo lé igbō kú um ā, kwú ɛyí ú bú kwu um ɛɛ́ kóō le yá jīla.’

¹⁹N yɔ̄ ī da aá abālɔbányā ɔdā nōo gáā yá gbɔbū ɛ́ɛ́ kóō yá, cɛ́ɛ́ aá géē cɛ̄ ka, ‘Ami wɛ Anū nōo húmáyī yɔ̄ ā nɛ̄.’

²⁰Ɔkwɔ̄ɔ̄kwɛ̄yi, n̄ da aá ka, ɔ̄cɛ dúú nōo mīyɛ ɔ̄cɛ nɛ̄ n tɛ̄hɔ̄ ā, mīyɛ um dúú. Ɔ̄cɛ nōo kē mīyɛ um ā, kē mīyɛ ɔ̄cɛ nōo tū um ɛhɔ̄ ā dúú.”

²¹Eko nɛ̄ Ujísɔ̄si lɛ ɛlā nēe bá ā ka ā, ɔtū nwula nwula gbo ō yá ɔ̄, anɔ́ɔ ó ka tɛ́ɛcɛ kahíníī, “Ɔkwɔ̄ɔ̄kwɛ̄yi, n̄ da aá ka, éyi kú ipú aá géē yá ibīyājɛ tū um.”

²²Ayíkpó ā pīyeyī má iyī uwā, bá gē gbɛlá ɔ̄cɛ nōó kɛlā lɛyíkwu ɔ́ ā.

²³Éyi kú ayíkpó ā nōo he Ujísɔ̄si ɔtū nɛ̄hi, cīce pī Ujísɔ̄si.

²⁴Usáyímɔ̄ni Upíta yá ɔ̄ abɔ̄, anɔ́ɔ ó da ɔ́ kahíníī, “Da alɔ ɔ̄cɛ nōó gē kɛlā lɛyíkwu ɔ́ ā.”

²⁵Abɔ̄ ó cīce pī Ujísɔ̄si ajaajɛ ā, ó da ɔ́ kahíníī, “Óndú, ɔ̄nyɛ nɛ̄?”

²⁶Anɔ́ɔ Ujísɔ̄si tóohi kahíníī, “Ɔ̄cɛ nɛ̄ n géē je igbō nwū ɔhɔ̄ je lɛ ɔ́ ā wɛ anú á.” Anɔ́ɔ ó lɛ igbō ā nwū ɔhɔ̄, kwú ɔ̄ ú lɛ Ujúdasi ɔyí Usáyímɔ̄ni Iskárīyɔ̄tu á.

²⁷Eko nōó le lé kwɛyí ā, Usɛ́tan le tá ipú ɔ́tū kú nū. Anɔ́ɔ Ujísɔ̄si da ɔ́ kahíníī, “Ɔdā nāa gáā yá ā, yá ɔ̄ fíya fíya.”

²⁸Amáŋ ɔ̄cɛ dúúmā kú ipú ācɛ nēe bá gē lé ɔdōlé mla anú ā í jé ɔdā nōo yá nōó kɛlā nyā lɛ ɔ́ ā ŋ́.

²⁹Ohígbū ka ācɛ ōhī gbɛlá ka, abɔ̄ Ujúdasi gē bī alítā kú ije ā, ka Ujísɔ̄si da ɔ́ ká ɔ̄ lɛ ɔdā nōo ce uwá ɛgbá kú ucɛ ā lá, ámāŋ ka ɔ́ɔ̄ je odée lɛ aógbɛhá.

³⁰Ujúdasi mīyɛ igbō ā, anɔ́ɔ ó nyɛ̄ɛ̄ le tɛ́ɛcɛ bōōbū á. Ó kē wɛ otú.

³¹Eko nɛ̄ Ujúdasi nyɛ̄ɛ̄ le tɛ́ɛcɛ ā, Ujísɔ̄si kahíníī, “Abālɔbányā ācɛ géē má ɛ́gɛ́nɛ̄ é géē lɛ ojīlīmā ce Ɔyínɔ̄nyīlɔ kú Ɔ̄cɛ ā, ó géē yá kú ācɛ kéē má ɛ́gɛ́nɛ̄ nɛ̄ Ɔwɔicō wɛ idáagó lɛ ā.

³²Ɔwɔicō abɔ̄yī nū géē mafú lɛ ācɛ ɛ́gɛ́nɛ̄ Ɔyínɔ̄nyīlɔ kú Ɔ̄cɛ wɛ idáagó lɛ āa, ó géē yá lɛ ā bōōbū.

³³Ayípɛ̄ ɔlɛ́ um, ń gáā yɔ̄ mla aá gbojī ajɛ gɛ ŋ́. Aá géē dɔɔ̄kā um, amáŋ ɛ́gɛ́nɛ̄ n da ācɛ Ujíyu ka, ‘Ɛga nɛ̄ n gē nyɔ̄ ā, aá wā abɔ́ɔ glá ŋ́ mā,’ ɛ́gɔ́ɔmā nɛ̄ n gē da aá abālɔbányā á.

³⁴N je íne ɛ̄yīpɛ̄ lɛ aá, ká aá yíihɔtū tū iyī aá. Ɛ́gɛ́nɛ̄ n yíihɔtū tū aá ā, ɛ́gɔ́ɔmā aá í yíihɔtū tū iyī aá lɛ ā dúú á.

³⁵Ɔ́dāŋ́ ka aá gē yíihɔtū tá iyī aá, cɛ́ɛ́ ācɛ géē jé ka aá wɛ ayíkpó kú um.”

³⁶Usáyímɔ̄ni Upíta da ɔ́ kahíníī, “Óndú, iní nāa gē nyɔ̄ ā?” Ujísɔ̄si tá ɔ̄ ohi kahíníī, “Á tū um ɔkwu ga ɛga nɛ̄ n gē nyɔ̄ abālɔbányā ā glá ŋ́, amáŋ a géē yɛce um igbīhāajɛ.”

³⁷Upíta da ɔ́ kahíníī, “Óndú, ɔdíyá nɛ̄ ń yɛce uwɔ abālɔbányā glá ŋ́ mā ā? N géē je oyēeyī kú um táajɛ gā uwɔ.”

³⁸Ujísɔ̄si tóohi kahíníī, “A géē je oyēeyī kú uwɔ táajɛ gā um m? Ɔkwɔ̄ɔ̄kwɛ̄yi, n̄ da uwɔ ka, ɔbúgwū í gáā tōgwú ɛ́ɛ́ nɛ̄ a géē híhó igbɛ ɛtá ka anúɔ í jé um ŋ́ mā ā ŋ́.”