Read idoma UJƆ́NI 14 Bible Online

UJƆ́NI 14 - idoma bible

UJƆ́NI 14

¹Ujísɔ̄si yɔ̄ ī kɛlā lɛ ayíkpó ā kahíníī, “Ɔtū kú aá kóō lɛ unwalu ŋ́, aá lɔtūce Ɔwɔicō, cɛ́ɛ́ aá klla kē lɔtūce um dúú.

²Ɛga omlɛ́nyɔ́ alɛwa bá ɔlɛ́ Ádā um. N yɔ̄ ī nyɔ̄ gaá tú ɛga tū gbēyī aá. Ɔ́dāŋ́ kóō lɛ ā ŋ́ nɛɛ, n géē yɛ í da aá dɛ̄ɛ̄ ŋ́.

³Ɔ́dāŋ́ ka n kē gaá lɛ ɛga tútū gbēyī aá, n géē wā igbɔhá ká n̄ gaá lɛ aá kpó wā ɛgiyí um, cɛ́ɛ́ ɛga nɛ̄ n yɔ̄ ā, abɔ́ɔ nɛ̄ aá géē bá dúú á.

⁴Aá jé ɛga nɛ̄ n gē nyɔ̄ ā, aá kē jé ɔwɛ kú nū ā.”

⁵Utɔ́mɔ̄si da ɔ́ kahíníī, “Óndú, alɔ í jé ɛga nāa gē nyɔ̄ ā ŋ́, abɔ̄ ó yá lɛ nɛ̄ alɔ í jé ɔwɛ kú nū ā?”

⁶Ujísɔ̄si da ɔ́ kahíníī, “Ami wɛ ɔwɛ á, ɔkwɛ̄yi mɛ́mla oyēeyī á. Ɔ̄cɛ dúúmā í wā ɛgiyí Ádā um glá ŋ́, ń táafú ŋ́ ó yɛ ŋmá ɛgiyí um.

⁷Ɔ́dāŋ́ ka aá lɛ um jé nɛɛ, aá géē yɛ í lɛ Ádā um jé dúú. O ŋmá abālɔbányā aá lɛ ɔ́ jé, klla lɛ ɔ́ má ɛɛ́.”

⁸Ufílīpu da ɔ́ kahíníī, “Óndú, ma Ádā ā fú lɛ alɔ, ká ɔtū kóō he alɔ.”

⁹Ujísɔ̄si da ɔ́ kahíníī, “N húmáyī yɔ̄ mla aá gbojī gbojī ɛɛ́, anɔ́ɔ aá jé um ɛ́ɛ́ ŋ́ má ā, Ufílīpu? Ɔ̄cɛ nōo lɛ um má, lɛ Ádā ā má ɛɛ́. Ɔdíyá nāa klla ka, ‘Ma Ádā ā fú lɛ alɔ ā?’

¹⁰Á cɛ̄ ka n yɔ̄ ipú Ádā ā, Ádā ā kē yɔ̄ ipú um ŋ́ nɛɛ? Ɛlā nɛ̄ n gē ka lɛ aá ā, ń ka ŋmá ɔfú kú um ŋ́, amáŋ Ádā nōo yɔ̄ ipú um ā gē yúklɔ́ kú nū á.

¹¹Aá cɛ̄ ɛlā kú um ka n yɔ̄ ipú Ádā ā, Ádā ā kē yɔ̄ ipú um. Ɔ́dāŋ́ kóō lɛ ā ŋ́, aá cɛ̄ ɛlā kú um ohígbū úklɔ́ ā.”

¹²Ujísɔ̄si kɛlā gɔbū kpɔ́ kahíníī, “N yɔ̄ ī ka ɛlɔ̄kwɛ̄yi lɛ aá, n̄ da aá ka, ācɛ néē cɛ̄ ɛlā kú um ā, úklɔ́ nɛ̄ n gē yá ā, é géē yá ɔ̄. É kōō í yá aɔ́dā nɛ̄hi fíyɛ́, ohígbū ka n yɔ̄ ī kwúcē ga ɛgiyí Ádā um.

¹³Ɔdā dúúmā nɛ̄ aá bī iyē kú um ba, n géē yá uwā, cɛ́ɛ́ kú Ɔyínɔ̄nyīlɔ ā kóō yá kú ācɛ kéē lɛ ɛ́gɛ́nɛ̄ Ádā ā wɛ idáagó lɛ ā má.

¹⁴Ɔ́dāŋ́ ka aá ba ɔdā dúúmā ohígbū ka aá wɛ ācɛ kú um [20] ā, n géē yá ɔ̄ lɛ aá.”

¹⁵Ujísɔ̄si da ayíkpó kú nū kahíníī, “Ɔ́dāŋ́ ka aá yíihɔtū tū um, aá lɛ íne kú um tū.

¹⁶Anɔ́ɔ n géē ba Ádā ā kóō je otɔ́tūlé ɔhá lɛ á, nōo géē yɔ̄ mla aá piyóó.

¹⁷Anú wɛ Alelékwū nōo gē mafú ɔdā nɛ̄ Ɔwɔicō wɛ abāābɔ̄yī nū ā fú á. Ācɛ kú ɛcɛ í lɔfú mīyɛ ɔ́ ga ipú ɔtū kú uwā glá ŋ́, ohígbū kéē má ɔ̄ ŋ́, é klla jé ɔ̄ ŋ́. Aá jé ɔ̄, ohígbū kóō lā mla aá, [21] ó klla géē yɔ̄ ipú aá.

¹⁸Ń gáā habɔ̄ aá tá bɛ̄ɛka ayí okwū ā ŋ́, n géē wā ɛgiyí aá.

¹⁹Eko kpií ɛcɛ í gáā má um glá gɛ ŋ́, amáŋ aá géē mā um. Ohígbū ka abɔ̄ n yēeyī ā, aá géē yēeyī dúú.

²⁰Ɛ̄cī ɔ́ɔmā aá géē jé ka n wɛ ɔ̄cɛ ékpó mla Ádā um, aá kē wɛ ɔ̄cɛ ékpó mla um, n kē wɛ ɔ̄cɛ ékpó mla aá.

²¹Ɔ̄cɛ nōo mīyɛ íne kú um, klla lɛ uwá tū, anú wɛ ɔ̄cɛ nōo yíihɔtū tū um á. Ɔ̄cɛ nōo kē yíihɔtū tū um, Ádā um géē yíihɔtū tū ɔ̄, n kē géē yíihɔtū tū ɔ̄, n kē géē ma iyī um fú lɛ ɔ́.”

²²Ujúdasi (ó wɛ Ujúdasi Iskárīyɔ̄tu ŋ́) da ɔ́ kahíníī, ‘Óndú, ɛ́gɛ́nyā nāa géē ma iyī uwɔ fú lɛ alɔ ā, nɛ̄ á gáā ma iyī uwɔ fú lɛ ācɛ kú ɛcɛ ŋ́ mā ā?”

²³Ujísɔ̄si tóohi da ɔ́ kahíníī, “Ɔ́dāŋ́ ka ɔ̄cɛ dúúmā yíihɔtū tū um, ó géē lɛ ɛlā kú um tū, Ádā um klla géē yíihɔtū tū ɔ̄, alɔ kē géē wā ɛgiyí nū, alɔ géē lā mla anú.

²⁴Ɔ̄cɛ nɛ̄ ó yíihɔtū tū um ŋ́, í gáā lɛ ɛlā kú um tū ŋ́. Ɛlā nɛ̄ aá kē pó ā, í wɛ ákú um ŋ́, amáŋ é ŋmá ɛgiyí Ádā um nōo tū um ɛhɔ̄ ā nɛ.

²⁵N le ɛlā nēe bá nyā ka lɛ aá eko nɛ̄ n yɔ̄ mla aá ā.

²⁶Otɔ́tūlé, nōo wɛ Alelékwū Ihɔ, nɛ̄ Ádā ā géē tɛ̄hɔ̄ ohígbū ka aá wɛ ákú um ā, géē nwū aá ɔdā dóódu, ó géē blatū aá ɔdā dóódu nɛ̄ n da aá.

²⁷N habɔ̄ aá tá ipú ɛbɔ́, ɛbɔ́ kú um nɛ̄ n je lɛ aá á. Ó wɛ ɛ́gɛ́nɛ̄ ɛcɛ gē je ā nɛ̄ n gē je lɛ aá ā ŋ́. Ɔtū kú aá kóō lɛ unwalu ŋ́, ɛ́ɛ́ nɛ̄ aá kē ī yúufi ŋ́.

²⁸Aá pó abɔ̄ n da aá kahíníī, ‘N géē nyɛ̄ɛ̄, n klla géē wā ɛgiyí aá.’ Ɔ́dāŋ́ ka aá yíihɔtū tū um nɛɛ, aá géē gwéeyē, ohígbū ka n gē nyɔ̄ ɛgiyí Ádā ā, Ádā ā kē nwuné fíyɛ́ um á.

²⁹Abālɔbányā n̄ le da aá gbɔbū kóō géē yá, cɛ́ɛ́ eko nōó le yá kú aá géē cɛ̄.

³⁰Ń gáā kɛlā mla aá ligbó gɛ ŋ́, ohígbū ka otrɛ̄yí kú ācɛ kú ɛcɛ ā gē wā ɛɛ́. Ó kē lɛ ɔfú dúúmā ɛgiyí um ŋ́.

³¹Amáŋ n géē yá ɔdā nɛ̄ Ádā ā tíne ka n yá ā, cɛ́ɛ́ kú ācɛ kéē le jé ka n yíihɔtū tá Ádā um. Aá caŋ́jɛ ká ālɔ̄ nyɛ̄ ŋmá amānyā.”