Read idoma UJƆ́NI 16 Bible Online

UJƆ́NI 16 - idoma bible

UJƆ́NI 16

¹Ujísɔ̄si klla da uwá kpɔ́ kahíníī, “N lɛ ɔdā nēe bá ā kpó ka lɛ aá cɛ́ɛ́ kú aá híī kwúcē ŋmá o cɛ̄ ɛlɔ̄ɔwɔicō ŋ́.

²É géē nū aá tɛ́ɛcɛ ŋmá Ɛgogbɔ̄ɔkɔ, amáŋ eko gē wā, eko nɛ̄ ɔ̄cɛ dúúmā nōo lɛ aá ŋmó géē gbɛlá ka anúɔ yɔ̄ ī cɛ̄ Ɔwɔicō ɛhɔ̄.

³É géē yá ɔdā nēe bá ā ohígbū kéē jé Ádā ā ŋ́ ɛ́ɛ́ nēe kē í jé um ŋ́.

⁴Amáŋ n le aɔ́dā nēe bá ā kpó da aá, cɛ́ɛ́ eko nɛ̄ eko le yá, aá géē bla ka n kɛlā lɛ aá lɛyíkwu uwā. Ń da aá ɔdā nēe bá ā ŋmá aflɛ́yí ŋ́ ohígbū ka n yɔ̄ mla aá.

⁵Amáŋ abālɔbányā n gē nyɔ̄ ɛgiyí ɔ̄cɛ nōo tū um ɛhɔ̄ ā, ɔ̄cɛ dúú kú ipú aá í kē da um ɔ̄kā ka, ‘Iní nāa gē nyɔ̄ ŋ́?’

⁶Abɔ̄ n le da aá ā, ɔtū le bīya lɛ aá.

⁷Amáŋ n̄ da aá ɛlā ɔkwɛ̄yi, ó géē tū ile lɛ aá ká n̄ nyɛ̄ɛ̄, ohígbū ka ɔ́dāŋ ka ń nyɛ̄ɛ̄ ŋ́, otɔ́tūlé ā í gáā wā ɛgiyí aá ŋ́. Amáŋ ɔ́dāŋ́ ka n le yɛ, n géē tū ɔ̄ ɛhɔ̄ fu aá.

⁸Eko nɛ̄ ó gā, ó géē mafú lɛ ācɛ kú ɛcɛ ka é jé ɔdā dúú lɛyíkwu ínoōbīya ŋ́, é klla jé ɔdā dúú lɛyíkwu ɔdā nōo le kpaakpa ŋ́, ɛ́ɛ́ nēé ī jé ɔdā dúú lɛyíkwu ɛpɔ̄ nɛ̄ Ɔwɔicō gē hɛ́ ā ŋ́.

⁹É le ɛpɔ̄bí kú íne ō bīya ā lé, ohígbū ka é cɛ̄ɛ̄lā kú um ŋ́.

¹⁰É jé ɔdā dúú lɛyíkwu ɔdā olɔhi ō yá ŋ́ ohígbū ka n yɔ̄ ī nyɔ̄ ga ɛgiyí Ádā um, aá kē gáā má um glá gɛ ŋ́,

¹¹ákú ɛpɔ̄, é jé ɔdā dúú lɛyíkwu ɛpɔ̄ nēé ī ka ā ŋ́ ohígbū kéē lɛ ɛpɔ̄ ka tū otrɛ̄yí kú ɛcɛ nyā kwɛyí ɛɛ́.

¹²N lɛ ɔdā alɛwa nɛ̄ n géē da aá kpɔ́ ɛ́ɛ́, amáŋ aá gáā bī uwā glá ɛ́ɛ́ ŋ́.

¹³Eko nɛ̄ Alelékwū kú ɛlā ɔkwɛ̄yi ā gā, ó géē bī aá tá ga ipú ɛlā ɔkwɛ̄yi dóódu. Ohígbū ka, ó gáā kɛlā ŋmá ɔfú kú abɔ̄yī nū ŋ́, amáŋ ɔdā dóódu nōó pó, nōó géē ka á, ó klla géē da aá aɔ́dā nēe gē wā ā.

¹⁴Ó géē mafú ka n wɛ idáagó ohígbū kóō géē da aá ɔdā dúú nōó í pó ŋmá ɛgiyí um ā.

¹⁵Ɔdā dóódu nɛ̄ Ádā um lɛ ā wɛ ákú um, ohígbū ɔ́ɔmā nɛ̄ n ka, ‘Ó géē da aá ɔdā nɛ̄ ó í pó ŋmá ɛgiyí um ā á.’

¹⁶“Eko kpií ā, aá gáā má um gɛ ŋ́, eko kpií ɔhá kpɔ́, aá géē má um.”

¹⁷Aóhī kú ayíkpó kú nū da iyī uwā kahíníī, “Ɔdí wɛ ɔdā nyā nɛ̄ ó gē da alɔ ā mɛ́ɛ̄? ‘Eko kpií ā, aá gáā má um gɛ ŋ́, igbɔhá, eko kpií, aá géē má um, ohígbū ka n gē nyɔ̄ ɛgiyí Ádā.?”

¹⁸Ohígbū ɔ́ɔmā é kahíníī, “Ɔdí wɛ ɛyí eko kpií nyā ā? Alɔ í jɛ́yí ɔdā nɛ̄ ó ka ā ŋ́.”

¹⁹Ujísɔ̄si jé kéē ī tíne kéē da ɔ́ ɔ̄kā, anɔ́ɔ ó da uwá kahíníī, “Aá bā gē leyī yī ɛlā nɛ̄ n ka ka eko kpií aá gáā má um gɛ ŋ́, eko kpií aá kē í má um kpɔ́ ā.

²⁰Ɔkwɔ̄ɔ̄kwɛ̄yi, n̄ da aá ka, aá géē jikwū, klla géē tɛgíkwū, amáŋ ɛcɛ ā géē gwéeyē. Aá géē bá ipɔ́tū nōbí, amáŋ ɔtūnōbí kú aá géē je pīya ɔtū nɛ̄hɛ́.

²¹Eko nɛ̄ ɔnyā gáā ma ɔyí, ó gē jé ɔnɔ ohígbū ka eko nōó gē jɔ́ɔnɔ ā gā ɛɛ́. Amáŋ eko nɛ̄ ó lɛ ɔyí ma, ó klla blakwu ɔnɔ kú nū gɛ ŋ́, ohígbū éeyē kú ɔyí nɛ̄ ó ma wɛ̄ɛcɛ ā.

²²Ɛ́gɔ́ɔmā nɛ̄ ó lɛ abālɔbányā lɛ aá á, aá yɔ̄ ī yá ɔtū nōbí, amáŋ n géē má aá igbɔhá ɛ́ɛ́, ɔtū klla géē he aá. Cɛ́ɛ́, ɔ̄cɛ dúúmā í gáā je éeyē kú aá ŋmá ɛgiyí aá glá gɛ ŋ́.

²³Ɛ̄cī ɔ́ɔmā aá gáā da um ɔ̄kā dúúmā ŋ́. Ɔkwɔ̄ɔ̄kwɛ̄yi, n̄ da aá ka, ɔdā dóódu nɛ̄ aá dɔɔ̄kā ŋmá ɛgiyí Ádā ā, ó géē je lɛ aá ŋmá iyē kú um. [22]

²⁴Gbɔbū lɛ abālɔbányā, aá dɔɔ̄kā ɔdā dúúmā ŋmá lɛ iyē kú um ŋ́. Aá dɔɔ̄kā, aá géē mīyɛ, ká éeyē kú aá kóō le mu.”

²⁵Ujísɔ̄si kɛlā gɔbū kahíníī, “N bī ācīije le da aá aɔ́dā nēe bá ā, amáŋ eko gē wā, nɛ̄ ń gáā kɛlā lɛ aá ipú ācīije gɛ ŋ́, amáŋ n géē da aá ɛlā lɛyíkwu Ádā ā pélúú.

²⁶Eko nɛ̄ ɛ̄cī ɔ́ɔmā aá gā, aá géē da ɔ́ ɔ̄kā o ŋmá lɛ iyē kú um, n da aá ka ń gáā da Ádā ā ɔ̄kā kwɛyí aá ŋ́,

²⁷ohígbū ka Ádā ā abɔ̄yī nū yíihɔtū tū aá. Ó yíihɔtū tá aá ohígbū ka aá yíihɔtū tū um, aá klla cɛ̄ ka n ŋmá ɛgiyí anú nōo wɛ Ɔwɔicō ā.

²⁸N ŋmá ɛgiyí Ádā ā wɛ̄ɛcɛ, abālɔbányā n yɔ̄ ī nyɛ̄ɛ̄ ŋmá ɛcɛ ā ī nyɔ̄ ɛgiyí Ádā ā.”

²⁹Ayíkpó kú nū kahíníī, “Má ɔ̄, abālɔbányā a gē kɛlā pélúú, nɛ̄ ó kē wɛ ācīije gɛ ŋ́.

³⁰Abālɔbányā alɔ jé ka a jé ɔdā dóódu, ó kē cɛgbá nɛ̄ ɔ̄cɛ dúúmā gē da uwɔ ɔ̄kā ɔdā dúúmā gɛ ŋ́. Oŋmá ɛ̄nyā alɔ cɛ̄ ka a ŋmá ɛgiyí Ɔwɔicō.”

³¹Ujísɔ̄si tá uwā ohi kahíníī, “Aá cɛ̄ abālɔbányā ɛɛ́ ɛ́ɛ?

³²Má ɔ̄, eko ā gē wā, ó kē gā ɛɛ́, eko nɛ̄ aá géē pahīla, ɔ̄cɛ dóódu géē ga ɔlɛ́ nū, aá klla géē habɔ̄ um tá ōfū um, nááná ā ń gáā yɔ̄ ōfū um ŋ́, ohígbū ka Ádā ā géē yɔ̄ pī um.

³³N ka ɔdā nēe bá ā lɛ aá, ká aá lɛ ɛbɔ́ ɔ́dāŋ ka aá yɔ̄ ī piyatɔ̄há mla um. Ācɛ kú ɛcɛ géē yá ká aá móōwē. Amáŋ aá lɛ ɔtū lɛ! Ohígbū ka n lɛ ɛcɛ yálé mɛɛ́.”