Read idoma UJƆ́NI 20 Bible Online

UJƆ́NI 20 - idoma bible

UJƆ́NI 20

¹Ɔ̄cɔ̄ɔ̄cī blibli kú ɛ̄cī Aláadi eko nɛ̄ obū le du kpɔ́ɔ́ ɛ́ɛ́ mā, Umerí Umagidalíni, le tá únóji, anɔ́ɔ ó má kéē le ɛcɔ̄ ā míya ŋmá okónu únóji ā.

²Ó gbo inya ŋmá abɔ́ɔ ga ɛgiyí Usáyímɔ̄ni Upíta mɛ́mla ɔyíkpó ɔhá nɛ̄ Ujísɔ̄si yíihɔtū nū ā. Anɔ́ɔ ó da uwá kahíníī, “É kwú Óndú ā ú ŋmá únóji ɛɛ́, alɔ í jé ɛga nēé lɛ ɔ́ tá ā ŋ́.”

³Anɔ́ɔ Upíta mɛ́mla ɔyíkpó ɔhá ā nyɛ̄ɛ̄ lɛyíkwu únóji ā.

⁴Uwá ɛplɛ́ɛpa kwinya, amáŋ ɔyíkpó ɔhá ā le inya kwu le gwú Upíta, anɔ́ɔ ó le táajɛ únóji ā gbɔbū á.

⁵Ó tū kpɛɛ́, anɔ́ɔ ó má īlī ahilíki nɛ̄hɛ́ ā bá ajɛ, amáŋ ó bēhé ŋ́.

⁶Anɔ́ɔ Usáyímɔ̄ni Upíta kwūcē ɔ́ wā, anɔ́ɔ ó le yɛ tá ipú únóji ā. Ó má īlī ahilíki nɛ̄hɛ́ nēé le gbō ɔ̄ ā bá ajɛ abɔ́ɔ,

⁷anɔ́ɔ ó klla má igbogbo nēé lɛ gbō ɔ̄ ɛyí ā. Ó bá pī īlī ahilíki nɛ̄hɛ́ ā ŋ́, Amáŋ ó le hā bá ajɛ ɛgɔhá kú nū céé.

⁸Anɔ́ɔ ɔyíkpó ɔhá, nōo wā ɛgiyí únóji ā aflɛ́yí ā, le bēhé wā ipú nū á, anɔ́ɔ ó le ɔ́ má, ó kē cɛ̄.

⁹Amáŋ nááná é kōō jɛ́yí kú ɛlā nē é tá ipú ɛlɔ̄ɔwɔicō nēé ka ka ɔ́ɔ géē héyī ŋmá olékwū piíí ā ŋ́.

¹⁰Anɔ́ɔ ayíkpó ā kwúcē ga ɔlɛ́ uwā á.

¹¹Amáŋ Umerí háyi eyɛ̄ɛ̄cɛ kú únóji ā yɔ̄ ī jikwū. Abɔ̄ ó yɔ̄ gē jikwū ā, ó feyī kpeé ga ipú únóji ā.

¹²Anɔ́ɔ ó má alelékwū-ōtɛ̄hɔ̄ ɛpa nēe lɛ úwé nɛ̄hɛ́ wiiye cīce ajɛ, éyi yɔ̄ ablɛ̄yí, ɔhá yɔ̄ ablīkpó kú ɛga nēé lɛ okwū kú Ujísɔ̄si gwutá ā.

¹³É da ɔ́ kahíníī, “Ɔcɛnyā, ɔdíyá nāa gē jikwū ā?” Anɔ́ɔ ó da uwá kahíníī, “Ohígbū kéē kwú Óndú um ú, ń kē jé ɛga nēé lɛ ɔ́ tá ā ŋ́.”

¹⁴Eko nōó lɛ ɛ̄nyā ka kwɛyí ā, ó pīyeyī, anɔ́ɔ ó má Ujísɔ̄si háyi, amáŋ ó jé ká ɔ́ɔ wɛ Ujísɔ̄si ŋ́.

¹⁵Ujísɔ̄si da ɔ́ kahíníī, “Ɔcɛnyā, ɔdíyá nāa gē jikwū ā? Ɔ̄nyɛ nāa gē dɔɔ̄kā ā?” Ó gbɛlá ka ɔ́ɔ wɛ ɔgɛ́ɛjí kú ɛhɔ̄ ā nɛ, anɔ́ɔ ó da ɔ́ kahíníī, “Ɔkpani, ɔ́dāŋ ka a kwú ɔ̄ ú ŋmá amānyā nɛɛ, da um ɛga nāa je ɔ́ tá ā, ká um kwú ɔ̄ ú ŋmá abɔ́ɔ.”

¹⁶Ujísɔ̄si da ɔ́ kahíníī, “Umerí!” Ó pīyeyī da ɔ́ ɔkɔ kú Uhíbru kahíníī, “Rabonáyi!” (ɛ̄nɛ̄ ɛyí nū wɛ Itíca).

¹⁷Ujísɔ̄si da ɔ́ kahíníī, “Ā lɛ abɔ̄ kwu um ŋ́, ohígbū ka ń gicō ga ɛgiyí Ádā ɛ́ɛ́ ŋ́. Amáŋ nyɔ̄ ɛgiyí ayínɛ́ um nɔ̄nyīlɔ ká ā da uwá ka, n gē gicō ɛgiyí Ádā um mɛ́mla Ádā aá, Ɔwɔicō kú um mɛ́mla Ɔwɔicō kú aá.”

¹⁸Umerí Umagidalíni nyɔ̄ gaá le da ayíkpó ā kahíníī, “N lɛ Óndú ā má ɛɛ́.” Anɔ́ɔ ó da uwá ka anú ɔ́ɔ da anúɔ ɔdā nēe bá ā á.

¹⁹Ɔ̄nɔ̄ɔnɛ̄ kú ɛ̄cī ɔ́ɔmā nōo wɛ ɛ̄cī aflɛ́yí kú aláadi ā, eko nēé le ɔwɛ kú ɛga nɛ̄ ayíkpó ā bá ā gwū ohígbū ufi kú ācɛ Ujíyu ā, Ujísɔ̄si wā gaá háyi ɔtāhɛ̄ uwā, anɔ́ɔ ó da uwá kahíníī, “Ɛbɔ́ kóō yɔ̄ mla aá.”

²⁰Eko nɛ̄ ó lɛ ɛ̄nyā ka kwɛyí ā, ó lɛ abɔ̄ mɛ́mla áklō kú nū mafú lɛ uwá. Ayíkpó ā gwéeyē eko nɛ̄ uwá lɛ Óndú ā má ā.

²¹Anɔ́ɔ Ujísɔ̄si da uwá igbɔhá kahíníī, “Ɛbɔ́ kóō yɔ̄ mla aá. Ɛ́gɛ́nɛ̄ Ádā ā tū um ɛhɔ̄ ā, ɛ́gɔ́ɔmā nɛ̄ n tū aá ɛhɔ̄ á.”

²²Eko nōó lɛ ɛ̄nyā ka kwɛyí ā, ó lɛ owu fu klá uwá, anɔ́ɔ ó da uwá kahíníī, “Aá mīyɛ Alelékwū Ihɔ ā.

²³ Ɔ́dāŋ́ ka aá habɔ̄ íne nɛ̄ ācɛ dúúmā bīya ā tá lɛ uwá ayíka é habɔ̄ ɔ̄ tá lɛ uwá. Ɔ́dāŋ́ ka aá habɔ̄ íne nɛ̄ ācɛ bīya ā tá lɛ uwá ŋ́, ayíka é habɔ̄ ɔ̄ tá lɛ uwá ŋ́.”

²⁴Amáŋ Utɔ́mɔ̄si, éyi kú ipú aíkpó igwɛ́ɛpa ā nēé hī ka Áplɛ́ ā, í yɔ̄ mla uwá eko nɛ̄ Ujísɔ̄si wā abɔ́ɔ ā ŋ́.

²⁵Abɔ̄ ó lɛ ā, ayíkpó ɔhá ā da ɔ́ kahíníī, “Alɔ lɛ Óndú ā má ɛɛ́.” Amáŋ ó da uwá kahíníī, “Ayíka n lɛ ofu kú ágbe unɛ́ɛlu ā má abɔ̄ kú nū, klla ke lɛ ayíkābɔ̄ kú um wu ofu kú ágbe kú unɛ́ɛlu ā, klla kē lɛ abɔ̄ kú um wu áklō kú nū, ń gáā cɛ̄ ŋ́.”

²⁶Eko nɛ̄ ɛ̄cī ɔ́mahātá gā ā, ayíkpó kú nū klla le jīla ipú inu igbɔhá, Utɔ́mɔ̄si kē yɔ̄ mla uwá. Ujísɔ̄si gā kpɔ́ eko nēé lɛ ɔwɛ gwū ā, anɔ́ɔ ó háyi ɔtāhɛ̄ uwā, ó kahíníī, “Ɛbɔ́ kóō yɔ̄ mla aá.”

²⁷Anɔ́ɔ ó da Utɔ́mɔ̄si kahíníī, “Lɛ ayíkābɔ̄ kú uwɔ wu amānyā, ká ā má abɔ̄ kú um. Ká ā klla lɛ abɔ̄ kú uwɔ wu áklō kú um, a híī wɛ ɔ̄cɛ nɛ̄ ó gē cɛ̄ɛ̄lā kú Ɔwɔicō ŋ́ mā ŋ́, amáŋ wɛ ɔ̄cɛ nōo gē cɛ̄ ā.”

²⁸Utɔ́mɔ̄si tóohi da ɔ́ kahíníī, “Óndú um, mɛ́mla Ɔwɔicō kú um!”

²⁹Ujísɔ̄si da ɔ́ kahíníī, “Á cɛ̄ ohígbū ka a le má ɛɛ́ ā nɛɛ? É lɛ ɔhā hɛ́ ce ācɛ nēé má ŋ́ nááná nēé cɛ̄ ā.”

³⁰Ujísɔ̄si yá aɔ́dā o cābɔ̄ alɛwa igbɔhá iyɔ̄bū kú ayíkpó kú nū nēé tá tū ipú ɔkpá nyā ŋ́.

³¹Amáŋ é tá ɛ̄nyā cɛ́ɛ́ kú aá cɛ̄[25] ka Ujísɔ̄si ɔ́ɔ wɛ Ohɔ́nyɛtá ā Ɔyínɔ̄nyīlɔ kú Ɔwɔicō ā, cɛ́ɛ́ ɔ́dāŋ ka aá cɛ̄, aá géē lɛ oyēeyī ŋmá iyē kú nū.