Read idoma UJƆ́NI 21 Bible Online

UJƆ́NI 21 - idoma bible

UJƆ́NI 21

¹Igbīhi ɛ̄nyā, Ujísɔ̄si klla i hɛ́bɛ̄cɛ igbɔhá kpɔ́ ɔtāhɛ̄ ayíkpó kú nū okónu ísu kú Utibérīyasi. Ɛ́gɛ́nɛ̄ ó yá lɛ ā yɔ̄ á.

²Usáyímɔ̄ni Upíta, mɛ́mla Utɔ́mɔ̄si nēé hī ka Áplɛ́ ā mɛ́mla Unatánīyɛ̄lu, ɔ̄cɛ Ukéna kú Ugálīli ā, mɛ́mla ayínɔ̄nyīlɔ ɛpa kú Usébēdi ā, mɛ́mla ayíkpó kú nū ɛpa ɔhá bá tɔ̄há.

³Usáyímɔ̄ni Upíta da uwá kahíníī, “N nyɔ̄ gáā kwú ɛbéenyi ɛɛ́ n.” É da ɔ́ kahíníī, “Alɔ géē nyɔ̄ mla awɔ dúú.” Anɔ́ɔ é nyɛ̄ɛ̄ gɛcɛ le tá ipú ɔ́kɔ á. Otú ɔ́ɔmā, é kwú ɔdā dúúmā ŋ́.

⁴Amáŋ eko nɛ̄ eyī yɔ̄ ī nyā ā, Ujísɔ̄si wā gaá háyi ɔ́kɔngɔ̄ ɔkpá ā. Amáŋ ayíkpó ā í jé ka ɔ́ɔ wɛ Ujísɔ̄si ŋ́.

⁵Anɔ́ɔ Ujísɔ̄si da uwá ɔ̄kā kahíníī, “Aóklóbīya um, aá kwú ɛbéenyi dúúmā ŋ́ nɛɛ?” Anɔ́ɔ é tá ɔ̄ ohi kahíníī, “Ehéee.”

⁶Anɔ́ɔ ó da uwá kahíníī, “Aá lɛ ɛ́yá kú aá tá ga abɔ̄lɔ́ná kú ɔ́kɔ ā, aá géē má ɛbéenyi í kwú.” Anɔ́ɔ é lɛ ɛ́yá ā tá, amáŋ é lɔfú pi ɔ́ wɛ̄ɛcɛ glá ŋ́ ohígbū ɛbéenyi alɛwa nēe bá ipú nū ā.

⁷Anɔ́ɔ ɔyíkpó nɛ̄ Ujísɔ̄si yíihɔtū nū ā da Upíta kahíníī, “Óndú ā nɛ̄ n.” Eko nɛ̄ Usáyímɔ̄ni Upíta pó kóō wɛ Óndú ā, ó lɛ īlī kú nū kpó klá iyē ohígbū kóō le iyī nū wɛ́ɛwa gbɔbū. Anɔ́ɔ ó le ómbli tá tū ipú éŋkpɔ̄ á.

⁸Amáŋ ayíkpó ohile ā le ɔ́kɔ ā pɛ́ ga okónu ɔkpá ā, yɔ̄ ī pi ɛya nōo le mu mla ɛbéenyi ā, ohígbū ka é ligbó lɛ ajɛ gɛ ŋ́. Ó lɛbɛ̄ɛka ikpó ofu igwɛ́ɛhɔ̄ ā.

⁹Eko nēé gā ɛcɛ ŋmá éŋkpɔ̄ ā, é má ɔlá ahā gē cɛ̄, ɛbéenyi mɛ́mla igbō ce ɛyí nū.

¹⁰Ujísɔ̄si da uwá kahíníī, “Aá lɛ ɛbéenyi ōhī nɛ̄ aá kwú ānāānā ā bī wā.”

¹¹Usáyímɔ̄ni Upíta le yɛ tá ipú ɔ́kɔ ā, anɔ́ɔ ó lɛ ɛ́yá ā pi wɛ̄ɛcɛ á. Ó le mu mla ɛbéenyi nɛ̄hi nɛ̄ áluka nū wɛ ofahāapa cigwɛ́tá (153). Abɔ̄ ɛbéenyi alɛwa bá ipú ɛ́yá ā, nááná ā ɛ́yá ā í kē híla ŋ́.

¹²Ujísɔ̄si da uwá kahíníī, “Aá gaá lɛ ucɔ hɛ́ ɛ́ɛ́.” Amáŋ ɔ̄cɛ dúú kú ayíkpó ā í lɔtū da ɔ́ ɔ̄kā kahíníī, “Á wɛ ɔ̄nyɛ nɛ̄ ŋ́?” Ohígbū kéē jé ka ó wɛ Óndú ā.

¹³Ujísɔ̄si wā gaá kwú igbō ā ú lɛ uwá. Ó klla yá ɛ́gɔ́ɔmā mla ɛbéenyi ā dúú.

¹⁴Ɛ̄nyā wɛ igbo ɔ́mɛtá nɛ̄ Ujísɔ̄si hɛ́wɛ̄ɛ̄cɛ ɔtāhɛ̄ ayíkpó ā yɔ̄ mɛ́ɛ̄ á, ŋmá eko nēé je ɔ́ héyī ŋmá ɔlékwū ā.

¹⁵Eko nēé lɛ ucɔ hɛ́ ā, Ujísɔ̄si da Usáyímɔ̄n Upíta ɔ̄kā kahíníī, “Usáyímɔ̄n, ɔyí Ujɔ́ni, a yíihɔtū um fíyɛ́ ɛ̄nyā ā?” Upíta cīla kahíníī, “Īī, Óndú. A jé ka n yíihɔtū uwɔ.” Ó da ɔ́ kahíníī, “Je ɔdōlé lɛ ayí álá kú um.”

¹⁶Ó da ɔ́ ɔ̄kā igbo ɔ́mpa kahíníī, “Usáyímɔ̄ni, ɔyí Ujɔ́ni, a yíihɔtū um?” Ó cīla kahíníī, “Īī, Óndú a jé ka n yíihɔtū uwɔ.” Ujísɔ̄si da ɔ́ kahíníī, “Gbō aálá kú um.”

¹⁷Ó da ɔ́ ɔ̄kā igbo ɔmɛtá kahíníī, “Usáyímɔ̄ni, ɔyí Ujɔ́ni, a yíihɔtū um?” Upíta le mu mla ɔtūnōbí ohígbū kóō da ɔ́ ɔ̄kā igbɔ ɔmɛtá kahíníī, “A yíihɔtū um m?” Anɔ́ɔ ó cīla ɔ́ kahíníī, “Óndú, a jé ɔdā dóódu, á je ka n yíihɔtū uwɔ.” Ujísɔ̄si da ɔ́ kahíníī, “Leyīkwu aálá kú um.

¹⁸Ɔkwɔ̄ɔ̄kwɛ̄yi, n da uwɔ ka, eko nāa wɛ ɔyípōklóbīya ā, a lɛ ɛ́nyɔ́ kú uwɔ gbō, a kē nyɔ̄ ɛga dúúmā nāa tíne. Amáŋ eko nāa le pīya ɔnyākwɔ́cɛ, a gē lɛ abɔ̄ kú wɔ nāńdaa, anɔ́ɔ ɔ̄cɛ ɔhá gē gbō uwɔ ɛ́nyɔ́ á. Ó klla gē bī uwɔ nyɔ̄ ɛga nɛ̄ á tíne ŋ́ mā.”

¹⁹Ujísɔ̄si ka ɛ̄nyā kú Upíta kóō le jé ka ɛdɔ kú ikwū nɛ̄ ó géē kwú ā í yá kú ācɛ kóō lɛ ojīlīmā ce Ɔwɔicō. Eko nōó lɛ ɛ̄nyā ka kwɛyí ā, ó da ɔ́ kahíníī, “Yɛce um.”

²⁰Upíta pīyeyī biílí anɔ́ɔ ó le ɔyíkpó nɛ̄ Ujísɔ̄si yíihɔtū nū ā nōo cīce bayi ce ɔ́ ɔtū eko ɔdōlé ɔ̄nɛ̄ ā, nɛ̄ ó klla da ɔ́ ɔ̄kā kahíníī, “Óndú, ɔ̄nyɛ géē je uwɔ lá ā?” A má yɔ̄ gē yɛce uwá ā.

²¹Eko nɛ̄ Upíta le ɔ́ má ā, ó da Ujísɔ̄si ɔ̄kā kahíníī, “Óndú, ɔ̄cɛ ā bɛ́ɛ?”

²²Ujísɔ̄si tá ɔ̄ ohi kahíníī, “Ɔ́dāŋ́ ka n tíne kóō yɔ̄ ī yēeyī gbéeko nɛ̄ n géē wā bɛ́ɛ́gɛ, ɔdí wɛ ɛlā uwɔ gɛ? Awɔ ā, yɛce um.”

²³Anɔ́ɔ ɛlā nyā le yɛ ɛbɛɛbɛ ɔtāhɛ̄ kú ayíkpó ā, ka ɔyíkpó ɔ́ɔmā ɔ́ɔ gáā kwú gɛ ŋ́. Amáŋ Ujísɔ̄si í da ɔ́ ka ɔ́ gáā kwú ŋ́ nɛɛ ŋ́, amáŋ ó kahíníī, “Ɔ́dāŋ́ ka n tíne ka ó yɔ̄ ī yēeyī jāā gbéeko nɛ̄ n wā, ɔdí wɛ ɛlā uwɔ gɛ?”

²⁴Ɛ̄nyā wɛ ɔyíkpó nōo gē cījáalí kú ɔdā nēe bá á, nōo klla tá ɔdā nēe bá ā tāajɛ á. Alɔ jé ka ijáalí kú nū wɛ ɔkwɛ̄yi.

²⁵Amáŋ aɔ́dā ɔ̄há alɛwa bá nɛ̄ Ujísɔ̄si yá, nɛ̄ ɔ́dāŋ kéē lɛ uwá dúúdú tá nɛɛ, n gbɛlá ka odúúdú ɛcɛ í gáā bī ɔkpá nēe géē tá ɔ̄ tū ipú nū ā glá ŋ́.