Read idoma UJƆ́NI 3 Bible Online

UJƆ́NI 3 - idoma bible

UJƆ́NI 3

¹Ɔ̄cɛ Ufárisīi éyi yɔ̄, nɛ̄ iyē nū lé ka Unikɔdímɔ̄si. Ó wɛ ɔ̄cɛ éyi kú aígabɔ̄ kú ācɛ Ujíyu.

²Ɔ̄cɛ ā wā ɛgiyí Ujísɔ̄si otú, anɔ́ɔ ó da ɔ́ kahíníī, “Itíca, alɔ jé ka a wɛ Itíca nōo ŋmá ɛgiyí Ɔwɔicō. Ohígbū ka ɔ̄cɛ dúúmā í lɔfú yá aɔ́dā o hídáagó nāa gē yá ā glá ŋ́, ń táafú ŋ́ Ɔwɔicō yɔ̄ mla anú.”

³Ujísɔ̄si tóohi da ɔ́ kahíníī, “Ɔkwɔ̄ɔ̄kwɛ̄yi, n̄ da uwɔ ka, ayíka é lɛ ɔ̄cɛ ma igbɔhá [4] ámāŋ ó gáā má ajɔ̄ɔ̄cɛ́ kú Ɔwɔicō glá ŋ́.”

⁴Unikɔdímɔ̄si da ɔ́ kahíníī, “Ɛ́gɛ́nyā nōó tɔ́ɔtɛ́ kéē ma ɔ̄cɛ igbɔhá eko nōó le gbɔnyākwɔ́cɛ ɛɛ́ ā? Ó géē lɔfú kwúcē ga ipú kú ɛ́nɛ́ nū igbo ɔ́mpa kéē ma ɔ́ kɛ̄ɛ?”

⁵Ujísɔ̄si tóohi kahíníī, “Ɔkwɔ̄ɔ̄kwɛ̄yi, n̄ da uwɔ ka, ɔ̄cɛ dúúmā í gáā ga ajɔ̄ɔ̄cɛ́ kú Ɔwɔicō glá ŋ́, ayíka é lɛ ɔ́ ma mla éŋkpɔ̄ mɛ́mla Alelékwū.

⁶Ɔdā nēé ma ŋmá ɔkpíyē wɛ ɔkpíyē, ɔdā nēé ma ŋmá Alelékwū ā wɛ ákú alelékwū.

⁷Ó híī hɛ́ uwɔ idáagó ohígbū ka n da uwɔ ka, ‘É géē ma uwɔ igbɔhá piíí ŋ́.’

⁸Owu gē tá ɛga dúúmā nōo he ɔ́ ɔtū, anɔ́ɔ a gē pó úcɛ́ kú nū, amáŋ á jé ɛga nɛ̄ ó ŋmá ŋ́, á kē jé ɛga nōó gē nyɔ̄ ŋ́. Ɛ́gɔ́ɔmā nɛ̄ ɔ̄cɛ dóódu nēé bī Alelékwū ma ā lɛ á.”

⁹Unikɔdímɔ̄si tóohi da ɔ́ kahíníī, “Ɛ́gɛ́nyā nɛ̄ ɔdā nēe bá ā géē yá glá ā?”

¹⁰Ujísɔ̄si tóohi da ɔ́ kahíníī, “A wɛ Itica kú Ísrɛ̄lu, anɔ́ɔ á jé ɔdā nēe bá ā ŋ́ kpɔ́ɔ̄ áā?

¹¹Ɔkwɔ̄ɔ̄kwɛ̄yi, n̄ da uwɔ ka, alɔ gē kɛlā kú ɔdā nɛ̄ alɔ jé, alɔ kē í cɛ̄ ijáalí kú ɔdā nɛ̄ alɔ má. Amáŋ ɔ̄cɛ dúúmā kú aá kē tútū kóō mīyɛ ijáalí kú alɔ ŋ́.

¹²Ɔ́dāŋ́ ka n da uwɔ ɛlā kú ɛcɛ, nɛ̄ á cɛ̄ ŋ́, abɔ̄ ó lɛ nāa géē cɛ̄ ɔ́dāŋ ka n lɛ ɛlā kú ɔkpáncō da uwɔ ā?

¹³Ɔ̄cɛ dúúmā í nyɔ̄ ɔkpáncō jéjéē ɛ́ɛ́ ŋ́ ayíka ɔ̄cɛ nōo ŋmá ɔkpáncō wāajɛ ā nɛ, Ɔyínɔ̄nyīlɔ kú Ɔ̄cɛ, nōo yɔ̄ ɔkpáncō ā nɛ.

¹⁴Ɛ́gɛ́nɛ̄ Umósīsi je ɛgwā gicō ipú ígbíli ā, ɛ́gɔ́ɔmā nēé géē je Ɔyínɔ̄nyīlɔ kú Ɔ̄cɛ gicō piíí á,

¹⁵cɛ́ɛ́ ɔ̄cɛ dúúmā nōo lɔtūce ɔ́ géē lɛ oyēeyī opiyóó.

¹⁶Ohígbū ka Ɔwɔicō yíihɔtū tū ɛcɛ ā fíyábɔ̄, anɔ́ɔ ó je Ɔyínɔ̄nyīlɔ ékpónú kú nū ā, ka ɔ̄cɛ dúúmā nōo lɔtūce ɔ́ í gáā yíífi ŋ́, amáŋ ó géē lɛ oyēeyī opiyóó.

¹⁷Ɔwɔicō í tū Ɔyínɔ̄nyīlɔ kú nū wɛ̄ɛcɛ kóō gaá ŋmó ɛcɛ ɛpɔ̄bí ŋ́, amáŋ o yá ɛ́ɛ́ kóō lɛ ɛcɛ nyatá nɛ̄ n.

¹⁸Ācɛ nēe lɔtūce ɔ́ ā, é gáā ŋmó uwā ɛpɔ̄bí ŋ́. Ācɛ nēé lɔtūce ɔ́ ŋ́ mā, é le ɛpɔ̄bí ŋmó uwā ɛɛ́, ohígbū keé cɛ̄ɛ̄lā kú Ɔyínɔ̄nyīlɔ ékpónú kú Ɔwɔicō ā ŋ́.

¹⁹Ɛ́gɛ́nyā nɛ̄ ɛpɔ̄ ā gē yúklɔ́ á, ofíyajɛ gā ipú ɛcɛ, amáŋ obū ā he ācɛ ɔtū fíyɛ́ ofíyajɛ á, ohígbū ka ɔdā nēé gē yá ā bɔ̄bí.

²⁰Ɔ̄cɛ dóódu nōo gē yá ɔdōbɔ̄bí ā í dɔɔ̄kā ɔlá-ofíyajɛ ŋ́, ó wā ɛga nɛ̄ ɔlá ī fíyajɛ glá ŋ́, ohígbū nɛ̄ ācɛ géē má ɔdā nōó gē yá ā.

²¹Amáŋ ācɛ nēe gē yá ɔdā ɔkwɛ̄yi ā gē wā ɛgiyí ɔlá ofíyajɛ, kéē le jé keé yɔ̄ ī yá ɔdā nɛ̄ Ɔwɔicō dɔɔ̄kā ā ɛɛ́.”

²²Eko nɛ̄ ɔdā nēe bá ā le yá ā, Ujísɔ̄si mɛ́mla ayíkpó kú nū le yɛ tá ajɛ kú Ujudíya, ó yɔ̄ mla uwá abɔ́ɔ gē yá ācɛ ubatísim.

²³Anɔ́ɔ Ujɔ́ni kē yɔ̄ gē yá ācɛ ubatísim dúú Ayénɔn nōo yɔ̄ kwu Usálim ajaajɛ ā, ohígbū ka éŋkpɔ̄ yɔ̄ abɔ́ɔ íbí. Anɔ́ɔ ɛwa wā ɛgiyí Ujɔ́ni abɔ́ɔ, ó kē yá uwā ubatísim.

²⁴Eko nyā é kwú Ujɔ́ni tá agbá ɛ́ɛ́ ŋ́.

²⁵Anɔ́ɔ áafú gbɔɔ́ ɔtāhɛ̄ kú ayíkpó kú Ujɔ́ni mɛ́mla ɔ̄cɛ Ujíyu [5] éyi ohígbū iyē ōgwu.

²⁶Anɔ́ɔ é wā ɛgiyí Ujɔ́ni gaá da ɔ́ kahíníī, “Itica, ɔ̄cɛ nōo yɔ̄ mla awɔ ogbeé kú Ujɔ́dan, nāa cē ijáalí kú nū ā, yɔ̄ ī yá ācɛ Ubatísim abɔ̄yī nū, ācɛ dóódu gē pɛ́ nyɔ̄ ɛgiyí nū.”

²⁷Ujɔ́ni tóohi kahíníī, “Ɔ̄cɛ dúúmā í mīyɛ ɔdā dúú glá ŋ́, ayíka ɛ̄nɛ̄ é je lɛ ɔ́ ŋmá ɔkpáncō.

²⁸Aá abɔ̄yī aá cɛ̄ um ijáalí ka n ka, ‘Ami ā í wɛ Ohɔ́nyɛtá ā ŋ́, amáŋ Ɔwɔicō le um tɛ̄hɔ̄ gbɔbū kú Ohɔ́nyɛtá.’

²⁹Ɔ̄cɛ nōo lɛ ɔnyā ā, anú wɛ ɔbá ɔnyā á. Amáŋ oklóbīya kú ɔbɔ́nyā ā nōo háyi kóō pó ɔkɔ kú ɔbɔ́nyā, gē gwéeyē nwuné eko nōó le ɔkɔ kú ɔbɔ́nyā pó. Ohígbū ɔ́ɔmā, n gwéeyē nɛ̄ɛ̄nɛ̄hi.

³⁰Anú ā kóō kwú pīya ɔ̄cɛ o cɛgbá fíyɛ́ um kɔ́ɔ́, cɛ́ɛ́ ká ami ā kóō híī cɛgbá gɛ ŋ́.”

³¹Ɔ̄cɛ nōo wā ŋmá icō ā, fíyɛ́ ɔ̄cɛ dóódu á. Ɔ̄cɛ nōo ŋmá ajɛ ā wɛ ákú ajɛ, ó kē ī kɛlā kú ajɛ. Amáŋ ɔ̄cɛ nōo ŋmá icō ā, anú fíyɛ́ ɔdā dóódu á.

³²Ɔdā nōó má mɛ́mla ɛ̄nɛ̄ ó pó ā, nōó cīijáalí kú nū á, nááná ā ɔ̄cɛ dúúmā í kē mīyɛ ijáalí kú nū ŋ́.

³³Ɔ̄cɛ nōo mīyɛ ijáalí kú nū ɛɛ́ mā ā, ó bī okónu abɔ̄yī nū cɛ̄ ka Ɔwɔicō ɔ́ɔ wɛ ɔkwɛ̄yi.

³⁴Ohígbū ka Ɔwɔicō tū ɔ̄ ɛhɔ̄ á. Ó gē kɛlā kú Ɔwɔicō, ohígbū keé lɛ alelékwū kú Ɔwɔicō nōó lɛɛjī ŋ́ mā ā.

³⁵Ádā ā yíihɔtū tū Ɔyínɔ̄nyīlɔ kú nū ā, anɔ́ɔ ó lɛ ɔdā dóódu kpó tū ɔ̄ abɔ̄ á.

³⁶Ɔ̄cɛ dúúmā nōo cɛ̄ɛ̄lā Ɔyínɔ̄yīlɔ ā lɛ oyēeyī opiyóó. Amáŋ ɔ̄cɛ nōo lɛyitáajɛ lɛ Ɔyínɔ̄nyīlɔ ā ŋ́, í gáā má oyēeyī ŋ́, amáŋ ícɔ̄nū kú Ɔwɔicō géē yɔ̄ ɛyí nū.