Read idoma UJƆ́NI 4 Bible Online

UJƆ́NI 4 - idoma bible

UJƆ́NI 4

¹Ācɛ Ufárisīi le pó ka Ujísɔ̄si ɔ́ɔ yɔ̄ ī lɛ ayíkpó alɛwa, klla gē yá ācɛ alɛwa ubatísim fíyɛ́ Ujɔ́ni á,

²Nááná nɛ̄ Ujísɔ̄si abɔ̄yīnū í yá ācɛ ubatísim ŋ́ mā, amáŋ ayíkpó kú nū gē yá á.

³Anɔ́ɔ eko nɛ̄ Ujísɔ̄si le ɔdā nēé yɔ̄ ī ka ā pó ā, ó kwúcē ŋmá Ujudíya le tá Ugálīli.

⁵Ó wā igelī nɛ̄hi kú Usamérīya éyi nēé hī ka Usáyíka, kwu ajɛ nɛ̄ Ujékɔ̄pu je lɛ ɔyínɔ̄nyīlɔ kú nū Ujósɛ̄fu ā.

⁶Abɔ́ɔ nɛ̄ obuga kú Ujékɔ̄pu ā yɔ̄ á. Abɔ̄ ɛ̄jɛ̄ le jɛ̄ Ujísɔ̄si ŋmá iyāwu nōó yɛ ā, ó má yājɛ ɛgiyí obugā ā. Ó lɛbɛ̄ɛka ɛplá oje igwɛ́ɛpa ā.

⁷Ɔ̄cɛnyā kú Usamérīya éyi wā gáā pi éŋkpɔ̄. Ujísɔ̄si da ɔ́ kahíníī, “Je éŋkpɔ̄ gā um ká n̄ gwá.”

⁸Ayíkpó kú nū le pɛ́ ga igelī nɛ̄ŋcɛ́ gaá lá ɔdōlé.

⁹Ɔ̄cɛnyā kú Usamérīya ā da ɔ́ kahíníī, “Ɔdíyá nɛ̄ awɔ nōo wɛ ɔ̄cɛ Ujíyu ā ī ba éŋkpɔ̄ ŋmá abɔ̄ um nōo wɛ ɔ̄cɛnyā kú Usamérīya ā?” Ohígbū ka ācɛ Ujíyu í gē yá ɔdā dúúmā tɔ̄há mla ācɛ Usɛmérīya ŋ́[6]

¹⁰Ujísɔ̄si tóohi da ɔ́ kahíníī, “Ɔ́dāŋ́ ka a jé ɛhi nɛ̄ Ɔwɔicō gē je lɛ ɔ̄cɛ ā, mɛ́mla ɔ̄cɛ nōo gē da uwɔ ka, ‘Je éŋkpɔ̄ gā um ká n̄ gwá ā nɛɛ’, a géē yɛ í lɛ ɔ̄kā da ɔ́, ó géē yɛ í lɛ éŋkpɔ̄ olɔhi je gā uwɔ.”

¹¹Ɔ̄nya ā da ɔ́ kahíníī, “Óndú, á lɛ ɔdā ō pi éŋkpɔ̄ ŋ́, obugā ā kē liipú, iní nāa géē bī éŋkpɔ̄ olɔhi ā ŋmá ā?

¹²Awɔ fíyɛ́ ádā alɔ Ujékɔ̄pu, nōo je obuga ā lɛ alɔ, nɛ̄ anú abɔ̄yī nū mɛ́mla ayínɔ̄nyīlɔ kú nū mɛ́mla aɛ́bɛ́ ɔlɛ́ kú nū gwá éŋkpɔ̄ ŋmá anú ā á nɛɛ?”

¹³Ujísɔ̄si tóohi da ɔ́ kahíníī, “Ɔ̄cɛ dúúmā nōo lɛ éŋkpɔ̄ nyā gwá, ijēēnyi géē ŋmó ɔ̄ igbɔhá kpɔ́.

¹⁴Amáŋ ɔ̄cɛ dúúmā nōo lɛ éŋkpɔ̄ nɛ̄ ami abɔ̄yī um géē je lɛ ɔ́ ā gwá, ijēēnyi í gáā ŋmó ɔ̄ gɛ ŋ́ piyóó. Amáŋ éŋkpɔ̄ nɛ̄ ami abɔ̄yī um géē je lɛ ɔ́ ā géē je pīya njɔlɔ ipú nū, nōo géē pīya éŋkpɔ̄ olɔhi opiyóó.”

¹⁵Anɔ́ɔ ɔ̄nya ā da ɔ́ kahíníī, “Óndú, je éŋkpɔ̄ nyā gā um, ká ijēēnyi kóō híī ŋmó um gɛ ŋ́, cɛ́ɛ́ ká n̄ híī bēē wā amānyā gaá pi éŋkpɔ̄ gɛ ŋ́.”

¹⁶Ujísɔ̄si da ɔ̄nya ā kahíníī, “Nyɔ̄, gaá hī ɔbá uwɔ igwú wā amānyā.”

¹⁷Ɔ̄nya ā tóohi da ɔ́ kahíníī, “Ń lɛ ɔbá nóó.” Ujísɔ̄si da ɔ́ kahíníī, “A kɛlā ɔkwɛ̄yi nɛ, ɛ́gɛ́nɛ̄ a ka ka anúɔ í lɛ ɔbá nóó ā.

¹⁸Ohígbū ka a lɛ ɔbá igbɛhɔ̄ ɛɛ́, ɔ̄cɛ nāa yɔ̄ mla anú abālɔbányā í kē wɛ ɔbá uwɔ ŋ́. A kɛlā ɔkwɛ̄yi ipú ɛ̄nyā.”

¹⁹Ɔ̄nyā ā da ɔ́ kahíníī, “N le jé ka a wɛ ɔ̄comɛ́ɛbɛ ɛɛ́.

²⁰Aádáádā alɔ gbā Ɔwɔicō ɛ̄gbā ɛyí ɛfu nyā, amáŋ aá ācɛ Ujíyu ka ka Ujerúsālɛm ɔ́ɔ wɛ ɛga nɛ̄ ācɛ ɔ́ɔ cíkā kéē gbā Ɔwɔicō ɛ̄gbā á.”

²¹Ujísɔ̄si da ɔ́ kahíníī, “Cɛ̄ɛ̄lā kú um, ɔnya. Eko géē wā, nɛ̄ aá gáā gba Ádā ɛ̄gbā ɛyí ɛfu nyā ámāŋ ipú Ujerúsālɛm ā gɛ ŋ́.

²²Aá nēe wɛ ācɛ Usamérīya ā gē gbā ɔdā nɛ̄ aá jé ŋ́ ɛ̄gbā, amáŋ alɔ ācɛ Ujíyu ā jé ɔ̄cɛ nɛ̄ alɔ gē gbɛ̄ɛ̄gbā, ohígbū ka Ɔwɔicō nya ācɛ tá ŋmá iyē kú ācɛ Ujíyu.

²³Amáŋ eko gē wā, eko ā kē gā ɛɛ́, nɛ̄ ācɛ nōo géē gbā Ɔwɔicō ɛ̄gbā ɔkwɛ̄yi géē gbā Ádā ā ɛ̄gbā ipú alelékwū mɛ́mla ɔkwɛ̄yi. Ohígbū ka Ádā ā gē dɔɔ̄kā ācɛ ɛ́gɔ́ɔmā kéē gbā ɔ̄ ɛ̄gbā.

²⁴Ɔwɔicō wɛ Alelékwū, ācɛ nēe í gbā ɔ̄ ɛ̄gbā ā, géē gbā ɔ̄ ɛ̄gbā ipú alelékwū mɛ́mla ɔkwɛ̄yi.”

²⁵Anɔ́ɔ ɔnyā ā da ɔ́ kahíníī, “N jé ka Umɛsáyíya ā gē wā, nōo wɛ Ohɔ́nyɛtá ā, eko nōó gā ó géē nwūla ɔdā dóódu eyī péee lɛ alɔ.”

²⁶Ujísɔ̄si da ɔ́ kahíníī, “Ami nōo gē kɛlā gā uwɔ ā, ami wɛ anú á.”

²⁷Ikpííkpó ɔ́ɔmā ayíkpó kú nū pīyɛyí gā. É le hídáagó ɛ́gɛ́nɛ̄ ó yɔ̄ gē kɛlā mla ɔnyā ā. Nááná ɔ̄cɛ dúúmā í da ɔ́ kahíníī, “Ɔdíyá nāa ī kɔ̄ɔkā mla anú ā ŋ́?” Amāŋ “Ɔdíyá nāa gē kɛlā mla anú ā ŋ́”?

²⁸Anɔ́ɔ ɔnyā ā habɔ̄ ɛtɛ́ éŋkpɔ̄ kú nū ā tá, le tá igelī nɛ̄ŋcɛ́ ā gaá da ācɛ ā ka,

²⁹“Aá wā gaá má ɔ̄cɛ nōo da um ɔdā dóódu nɛ̄ n yá ā. Óokpōō anú wɛ Ohɔ́nyɛtá áā?”

³⁰Ācɛ pɛ́ ŋmá igelī nɛ̄ŋcɛ́ ā kéē wā ɛgiyí nū.

³¹Eko ɔ́ɔmā ayíkpó kú nū le ɔkɔ gbā lɛ ɔ́ kahíníī, “Itíca, lɛ odée lé ɛ́ɛ́.”

³²Amáŋ ó da uwá kahíníī, “N lɛ ɔdōlé nɛ̄ n gē lé, nɛ̄ aá jé ɔdā dóódu lɛyíkwu ɔ́ ŋ́.”

³³Anɔ́ɔ ayíkpó ā da iyī uwā kahíníī, “Ɔ̄cɛ éyi lɛ odée bī gé lɛ ɔ́ nɛɛ?”

³⁴Ujísɔ̄si da uwá kahíníī, “Odōlé kú um wɛ kā n̄ yá ɔdā nōo tá ɔtū kú ɔ̄cɛ nōo tū um ɛhɔ̄ ā, ká n̄ kē lɛ úklɔ́ kú nū yá mɛ.

³⁵Ó wɛ aá ka, ‘Ó hile ɔyā ɛnɛ kú eko ō cē ɔdɛ̄hɔ̄ kóō yá ā ŋ́ nɛɛ?’ N̄ da aá ka, aá má ɔ̄, aá jeyī gicō kú aá má ɛhɔ̄. Ɔdɛ̄hɔ̄ le jé kú ācɛ kéē cē ɛɛ́.

³⁶Ɔ̄cɛ nōo cē ɔdɛ̄hɔ̄ ā yɔ̄ ī mīyɛ ulé ohígbū keé yɔ̄ ī tū īkpō kú oyēeyī opiyóo bá. Cɛ́ɛ́ ɔ̄cɛ nōo nyi mɛ́mla ɔ̄cɛ nōo cē ā kē í gwéeyē tɔ̄há.

³⁷Ɛlā nēé ka ā wɛ ɔkwɛ̄yi, ‘Ɔ̄cɛ éyi gē nyi, ɔ̄cɛ ɔhá gē cē.

³⁸Ń tū aá ɛhɔ̄ ká aá gaá cē ɔdá nɛ̄ aá yúklɔ́ nū ŋ́. Ācɛ ɔhá lɛ úklɔ́ olɔfú ā yá ɛɛ́, anɔ́ɔ aá gáā cē ɔdɛ̄hɔ̄ kú uwā icííci á.’”

³⁹Ācɛ Usamérīya alɛwa nēe ŋmá igelī nɛ̄ŋcɛ́ a lɔtūce ɔ́ ohígbū ɛlā kú ɔnyā ɔ́ɔmā nōo cīijáalí kahíníī, “Ó da um ɔdā dóódu nɛ̄ n yá ā.”

⁴⁰Ohígbū ɛ́gɔ́ɔmā eko nɛ̄ ācɛ Usamérīya wā ɛgiyí nū ā, é gbɔ̄ɔkɔ lɛ ɔ́ kóō yɔ̄ mla uwá. Anɔ́ɔ ó yɔ̄ abɔ́ɔ ɛ̄cī ɛpa.

⁴¹Anɔ́ɔ ācɛ kú Usamérīya alɛwa cɛ̄ ohígbū ɛlā nōó ka lɛ uwá.

⁴²É da ɔnyā ā kahíníī, “Ó wɛ ohígbū ɛlā nāa da alɔ ā yá nɛ̄ alɔ cɛ̄ ā ŋ́, amáŋ ohígbū ka alɔ abɔ̄yī alɔ le pó ŋmá ɛgiyí nū, alɔ cɛ̄ ka anú wā í hɛ́ ɛcɛ tá ɔkwɛ̄yi á.

⁴³Ujísɔ̄si le tá Ugálīli eko nōó lɛ ɛ̄cī ɛpa ā yá kwɛyí ā.

⁴⁴Ohígbū ka Ujísɔ̄si abɔ̄yī nū tɛtɛ le je kahíníī, “Ɔ̄comɛ́ɛbɛ í gē lɛ ojīlīmā ajɛ ɔlɛ́ nū ŋ́.”

⁴⁵Eko nōó gā Ugálīli ā, ācɛ Ugálīli mīyɛ ɔ́ ɛ́gɛ́nɛ̄ é lɛ ɔdā dóódu nōó yá Ujerúsālɛm, eko kú ucɛ ā má ā. Ohígbū ka uwá abɔ̄yī uwā gā ɛgiyí ucɛ ā.

⁴⁶Ujísɔ̄si kwúcē ga Ukéna kú Ugálīli igbɔhá, ɛga nōó le éŋkpɔ̄ pīya ejé ā. Ogbāājɛ éyi yɔ̄, nɛ̄ ɔyínɔ̄nyīlɔ kú nū gē doōcē ajɛ Ukapánɔm.

⁴⁷Eko nɛ̄ Ogbāājɛ nyā le pó ka Ujísɔ̄si ɔ́ɔ nyɛ̄ɛ̄ ŋmá Ujudíya le tá Ugálīli ā, ó wā ɛgiyí nū gaá gbɔ̄ɔkɔ lɛ ɔ́ ka ɔ́ɔ wā gaá lɛ ɔyí nū nɔ̄nyīlɔ ā nyatá. Ohígbū ka ó yɔ̄ ī kwú.

⁴⁸Ujísɔ̄si da ɔ́ kahíníī, “Ɔ́dāŋ́ ka aá má ɔdōcābɔ̄ mɛ́mla ɔdā ō hídáagó ŋ́ nɛɛ, aá géē yɛyí cɛ̄ ŋ́.”

⁴⁹Ogbāājɛ ā da ɔ́ kahíníī, “Óndú, gā ká ɔyí um kóō kwú gɛ ŋ́.”

⁵⁰Ujísɔ̄si da ɔ́ kahíníī, “Nyɔ̄, ɔyínɔ̄nyīlɔ kú uwɔ yēeyī ɛɛ́.” Ogbāājɛ ā cɛ̄ɛ̄lā nɛ̄ Ujísɔ̄si da ɔ́, anɔ́ɔ ó nyɛ̄ɛ̄ á.

⁵¹Abɔ̄ ó yɔ̄ gē nyɔ̄ ɔlɛ́ ā, ɔ̄cocɛ̄hɔ̄ kú nū jīla anú ɔwɛ, anɔ́ɔ é da ɔ́ kahíníī, “Ɔyínɔ̄nyīlɔ kú ɔlɛ́ uwɔ le ɔbɔ́lā lɛ ɛɛ́.”

⁵²Anɔ́ɔ ó da uwá ɔ̄kā eko nɛ̄ ōcē gbɔɔ́ ō habɔ̄ ɔ̄ tá ā. Anɔ́ɔ é tóohi kahíníī, “Ɛ́nɛ̄, ɛplá oje éyi kú ɔlɛ́ɛnɔ nɛ̄ iyē ōkwɔ́lá ā habɔ̄ ɔ̄ tá á.”

⁵³Anɔ́ɔ ádā ā jé ka ɔ́ɔ wɛ eko nɛ̄ Ujísɔ̄si ɔ́ da ɔ́ ka ɔyínɔ̄nyīlɔ kú nū ɔ́ɔ yēeyī ā.” Abɔ̄ ó i lɛ ā, anú mɛ́mla ācɛ ɔlɛ́ nū dóódu cɛ̄ɛ̄lā Ujísɔ̄si.

⁵⁴Ɛ̄nyā wɛ ɔdōcābɔ̄ ɔ́mpa nɛ̄ Ujísɔ̄si yá eko nōó ŋmá Ujudíya wā Ugálīli á.