Read idoma UJƆ́NI 5 Bible Online

UJƆ́NI 5 - idoma bible

UJƆ́NI 5

¹Igbīhi ɛ̄nyā, Ujísɔ̄si le tá Ujerúsālɛm ɔnū ucɛ kú ācɛ Ujíyu.

²Ipú Ujerúsālɛm ā, éŋkpɔ̄ ókpoó[7] éyi tá okómpinu ɔwɛ kú álá, nēé hī okónu Uhíbru ka “Ubɛtisáta.” [8] Ó lɛ okómpīinu ɛhɔ̄.

³Ipú okómpīinu nēe bá ā ācɛ odoōcē bá, ācɛ opeyī, ācɛ ocīkpó, mɛ́mla ācɛ nɛ̄ iyē kú uwā le ŋmó. É bá gē gbēyī eko nɛ̄ éŋkpɔ̄ ā géē jíliyē ā.

⁴Ohígbū ka alelékwū-ōtɛ̄hɔ̄ kú Óndú ā gē wā ajɛ eko ōhī gaá jíla éŋkpɔ̄ ā iyē. Ɔ̄cɛ dúúmā nōo le tá ipú éŋkpɔ̄ ā aflɛ́yí eko nēé lɛ ɔ́ jíliyē, ó lɛ nyatá ŋmá ōcē dúúmā nōó lɛ ā.

⁵Amáŋ ɔ̄cɛ éyi yɔ̄ abɔ́ɔ, nōo doōcē iháyí ofu cigwáhātá.

⁶Eko nɛ̄ Ujísɔ̄si le ɔ́ má, nɛ̄ ó le jé ka ɔ́ɔ doōcē gbojī ɛɛ́ mā ā, ó da ɔ́ kahíníī “A tíne kéē lɛ uwɔ nyatá āā?”

⁷Ɔ̄cɛ odoōcē ā tóohi kahíníī, “Óndú, ń lɛ ɔ̄cɛ dúú nōo géē je um tá ipú ókpoó ā eko nēé lɛ ɔ́ jīliyē ŋ́. Eko nɛ̄ n gbɔɔ́ gē nyɔ̄, ɔ̄cɛ ɔhá le gbɔbū gā um le tá ipú éŋkpɔ̄ ā.”

⁸Ujísɔ̄si da ɔ́ kahíníī, “Cāŋjɛ, kwú ipoto kú uwɔ ú ká ā yāwu.”

⁹Anɔ́ɔɔ ɔkwɔɔkwu ɔ́mā ōcē kú nū mɛ. Anɔ́ɔ ó kwu ipoto kú nū ú gbɔɔ́ ō yāwu á. Amáŋ ɛ̄cī ɔ́ɔmā wɛ ɛ̄cī usábāti [9].

¹⁰Eko nɛ̄ aótrɛ̄yí kú ācɛ Ujíyu le ɔ̄cɛ ā má bī ipoto kú nū ā, é da ɔ́ kahíníī, “Ícɛ wɛ ɛ̄cī usábāti, ó kē wɛ íne ō bīya ká ā bī ipoto kú uwɔ.”

¹¹Amáŋ ó da uwá kahíníī, “Ɔ̄cɛ nōo nya um tá ā da um ka āmí ɔ̄ɔ́ kwú ipoto kú um ká n̄ yāwu.”

¹²É da ɔ́ ɔ̄kā kahíníī, “Ɔ̄nyɛ wɛ ɔ̄cɛ nōo da uwɔ kā a kwú ipoto kú uwɔ ú ká ā yāwu ā?”

¹³Amáŋ ɔ̄cɛ nēé nyatá ā í jé ɔ̄cɛ nōó wɛ ā ŋ́, ohígbū ka ɛwa nɛ̄hi bá abɔ́ɔ, Ujísɔ̄si kē le púla wɛɛlɛ nyɛ̄ɛ̄ ŋmá abɔ́ɔ.

¹⁴Igbīhi ɛ̄nyā Ujísɔ̄si lɛ ɔ́ má ipú Agblīihɔ-nɛ̄hi ā, anɔ́ɔ ó da ɔ́ kahíníī, “Má ɔ̄, a le lɔfú iyē ɛɛ́. Ā bīyíne gɛ nóo, ohígbū nɛ̄ ɔdōbɔ̄bí fíyɛ́ géē yá uwɔ.”

¹⁵Ɔ̄cɛ ɔ́ɔmā nyɛ̄ɛ̄ gaá da ācɛ Ujíyu ka Ujísɔ̄si ɔ́ɔ wɛ ɔ̄cɛ nɛ̄ ɔ́ɔ yá ká iyē kóō lɔfú lɛ anúɔ á.

¹⁶Ohígbū ɛ̄nyā ācɛ Ujíyu gbɔɔ́ ō yá ikpɛ́lā tá Ujísɔ̄si, ohígbū koó nya ɔ̄cɛ tá ɛ̄cī usábāti.

¹⁷Ujísɔ̄si da uwá kahíníī, “Ádā um gē yúklɔ́ ojigógó, ɛ́gɔ́ɔmā nɛ̄ n kē í yá á.”

¹⁸Ɛlā nɛ̄ ó ka nyā yá kú ācɛ Ujíyu kéē tíne fíyɛ́ kéē lɛ ɔ́ ŋmó. Ohígbū keé ka ó wɛ íne kú usábāti ōfūnū nɔ́ɔ bīya ā ŋ́, amáŋ ó kla hī Ɔwɔicō ka ádā nū. O ŋmá ɛ̄nyā ɔ́ɔ gē je iyī nū jōnjīlɛ̄ mla Ɔwɔicō.

¹⁹Ujísɔ̄si tóohi da uwá kahíníī, “Ɔkwɔ̄ɔ̄kwɛ̄yi, n̄ da aá ka, Ɔyínɔ̄nyīlɔ ā í yá ɔdā dúúmā abɔ̄yīnū glá ŋ́, ayíka ɛ̄nɛ̄ ó má Ádā nū gē yá ā nɛ̄. Ohígbū ka ɔdā dóódu nōó yá ā, Ɔyínɔ̄nyīlɔ ā géē yá ɔ̄ glá dúú.

²⁰Ohígbū ka Ɔyínɔ̄nyīlɔ ā he Ádā nū ɔtū, anɔ́ɔ Ádā le ɔdā dóódu nɛ̄ ó yɔ̄ ī yá abɔ̄yīnū kpɛ́mm ā kpó mafú lɛ ɔ́. Ó klla géē ma úklɔ́ nōo fíyɛ́ ɛ̄nɛ̄ e bá ā fú lɛ ɔ́, kóō hɛ́ aá idáagó.

²¹Ɛ́gɛ́nɛ̄ Ádā ā yá kú ācɛ ogekwú kéē le héyī nɛ̄ ó klla í je oyēeyī lɛ uwá ā, ɛ́gɔ́ɔmā nɛ̄ Ɔyínɔ̄nyīlɔ ā géē je oyēeyī lɛ ācɛ nēe he ɔ́ ɔtū á.

²²Ohígbū ka Ádā ā í kɛpɔ̄ tū ɔ̄cɛ dúúmā ŋ́, amáŋ ó kwú ɛpɔ̄ dóódu ú kpó tū Ɔyínɔ̄nyīlɔ ā abɔ̄,

²³cɛ́ɛ́ ká ācɛ dóódu kéē lɛ ojīlīmā ce Ɔyínɔ̄nyīlɔ ā, ɛ́gɛ́nɛ̄ é lɛ ojīlīmā ce Ádā ā. Ɔ̄cɛ nōó lɛ ojīlīmā ce Ɔyínɔ̄nyīlɔ ā ŋ́, ayíka ó ī lɛ ojīlīmā ce Ádā nōo tū ɔ̄ ɛhɔ̄ ā ŋ́.

²⁴Ujísɔ̄si kahíníī, “Ɔkwɔ̄ɔ̄kwɛ̄yi, ɔ̄cɛ nōo cɛ̄ɛ̄lā kú um, nōo kē lɔtūce ɔ̄cɛ nōo tū um ɛhɔ̄ ā, lɛ oyēeyī opiyóo. É gáā ŋmó ɔ̄ ɛpɔ̄bī ŋ́, amáŋ ó le gla ikwū le tá ipú oyēeyī ɛɛ́.”

²⁵Ó klla ka kpɔ́ kahíníī, “Ɔkwɔ̄ɔ̄kwɛ̄yi, n̄ da aá ka, eko géē wā, eko ā kōō gā ɛɛ́, eko nɛ̄ ācɛ ogekwú géē pó ɔkɔ kú Ɔyínɔ̄nyīlɔ kú Ɔwɔicō ā, ācɛ nēe kē pó ā géē yēeyī.

²⁶Ohígbū ka ɛ́gɛ́nɛ̄ Ádā ā lɛ oyēeyī abɔ̄yī nū ā, ɛ́gɔ́ɔmā nōo je oyēeyī lɛ Ɔyínɔ̄nyīlɔ kú nū á, kóō lɛ oyēeyī abɔ̄yī nū á.

²⁷Anɔ́ɔ ó le ɔfú je lɛ ɔ́ kóō hɛ́pɔ̄, ohígbū kóō wɛ Ɔyínɔ̄nyīlɔ kú Ɔ̄cɛ.

²⁸Ɛ̄nyā kóō híī hɛ́ aá idáagó ŋ́. Ohígbū ka eko géē wā, eko nɛ̄ ācɛ dóódu nēe bá únóji ā géē pó ɔkɔ kú nū.

²⁹É kē géē pɛ́ wɛ̄ɛcɛ ŋmá únóji kú uwā. Ācɛ nēe yá ɔdā olɔhi ā géē héyī ŋmá ɔlékwū cɛ́ɛ́ kéē yēeyī. Ācɛ nēe kē yá ɔdōbɔ̄bí ā géē héyī ŋmá ɔlékwū kéē ŋmó uwā ɛpɔ̄bí.”

³⁰Ujísɔ̄si kahíníī, “Ń lɔfú yá ɔdā dúú ŋmá ɔfú kú abɔ̄yī um ŋ́. N gē hɛ́pɔ̄ ɛ́gɛ́nɛ̄ Ɔwɔicō da um lɛ ā. Ó lɛ ā ɛpɔ̄ kú um kē wɛ ɔkwɛ̄yi, ohígbū ka ń gē dɔɔ̄kā ɔdā nōo tá ɔtū kú um ŋ́, amáŋ ɔdā nōo tá ɔtū kú ɔ̄cɛ nōo tū um ɛhɔ̄ ā.

³¹Ɔ́dāŋ́ ka n cījáalí kú iyī um, ijáalí ɔ́ɔmā í wɛ ɔkwɛ̄yi ŋ́.

³²Amáŋ ɔ̄cɛ éyi yɔ̄, nōo gē cījáalí kú um. N jé ka ɛjɛ̄ɛ̄jī ɔdā nōó ka ohígbū um ā wɛ ɔkwɛ̄yi.

³³Aá tū ācɛ ɛhɔ̄ fu Ujɔ́ni, ó kē kɛlā ɔkwɛ̄yi lɛ uwá.

³⁴Ń mīyɛ ijáalí okwɛ̄yi lɛyíkwu um ŋmá ɛgiyí ɔ̄cɛ ŋ́, amáŋ n ka ɔdā nēe bá ā kéē lɛ aá nyatá nɛ̄ n.

³⁵Ujɔ́ni lɛbɛ̄ɛka agege nōo gē yi klla gē fíyaajɛ lɔɔlɔhi eko kpiíí ā. Ó tīile lɛ aá ɔtū kē he aá.

³⁶Amáŋ n lɛ ijáalí kú abɔ̄yī um nōo fíyɛ́ ákú Ujɔ́ni, ohígbū ka úklɔ́ nɛ̄ Ádā um je gā um ká n̄ lɛ ɔ́ yá mɛ̄ ā, úklɔ́ ā nɛ̄ n kē yɔ̄ gē yá abālɔbányā á, úklɔ́ ā gē cē um ijáalí ka Ádā um ɔ́ɔ tū um ɛhɔ̄ á.

³⁷Ádā um nōo kē tū um ɛhɔ̄ ā, anú abɔ̄yī nū cījáalí kú um á. Aá pó ɔkɔ kú nū jéjéē ɛ́ɛ́ ŋ́, ɛ́ɛ́ nɛ̄ aá ī má ōgbla kú nū ɛ́ɛ́ ŋ́.

³⁸Anɔ́ɔ ɛlā kú nū í yɔ̄ mla aá ŋ́, ohígbū ka aá cɛ̄ ɛlā kú ɔ̄cɛ nɛ̄ anú ā abɔ̄yī nū tɛ̄hɔ̄ ā ŋ́.

³⁹Aá gē kllɔcɛ́ ɔdā kú ipú ɛlɔ̄ɔwɔicō, ohígbū ka aá gbɛlá ka aá géē lɛ oyēeyī opiyóo ŋmá ipú uwā. Amáŋ ɛlɔ̄ɔwɔicō abɔ̄yī nū kē ī cījáalí gā um.

⁴⁰Aá kē cɛ̄ wā ɛgiyí um ká n̄ je oyēeyī opiyóó nyā lɛ aá ŋ́.

⁴¹Ń tíne ká ācɛ kéē cɛ̄tra um ŋ́.

⁴²Amáŋ n jé aá, n kē jé ka aá yíihɔtū tá Ɔwɔicō ŋ́.

⁴³Ami ā wā kwɛyí Ádā um, amáŋ aá mīyɛ um ŋ́. Amáŋ ɔ́dāŋ ka ɔ̄cɛ ɔhá gā ŋmá iyē kú abɔ̄yī nū, aá géē mīyɛ anú.

⁴⁴Ɛ́gɛ́nyā nɛ̄ aá gē cɛ̄ glá ā, aá nōo ī cɛ̄tra iyí aá ā, amáŋ aá gē tíne kú ɔ̄cɛ nōo wɛ Ɔwɔicō ōfōōfūnū ā kóō cɛ̄tra aá ŋ́.

⁴⁵Aá híī gbɛlá ka n géē kpɛ́lā ce aá iyɔ̄bū Ádā ā ŋ́. Ɔ̄cɛ éyi yɔ̄ nōo géē kpɛ́lā ce aá, Umósīsi nɛ̄ aá lɛ ɔtūce ɔ́ ā.

⁴⁶Ɔ́dāŋ́ ka aá cɛ̄ɛ̄lā kú Umósīsi nɛɛ, aá géē cɛ̄ɛ̄lā kú um dúú, ohígbū kóō tá ɔkpá lɛyíkwu um.

⁴⁷Amáŋ ɔ́dāŋ ka aá cɛ̄ɛ̄lā kú ɔdā nōó tá ā ŋ́, ɛ́gɛ́nyā nɛ̄ aá géē cɛ̄ɛ̄lā kú um glá ā?”