Read idoma UJƆ́NI 6 Bible Online

UJƆ́NI 6 - idoma bible

UJƆ́NI 6

¹Igbīhi ɛ̄nyā Ujísɔ̄si le tá ísu kú Ugálīli nōo wɛ ísu kú Utibérīyasi ā.

²Ɛwa nɛ̄hi yɛce ɔ́, ohígbū kéē má ocābɔ̄ nōó ó yá iyē kú ācɛ odoōcē ā.

³Ujísɔ̄si le tá ɛyí ɛfu, anɔ́ɔ ayíkpó kú nū gaá cīice pī ɔ̄ biílí.

⁴Eko ucɛ kú onyatá ā, nōo wɛ ucɛ kú ācɛ Ujíyu ā, le bá ajaajɛ.

⁵Eko nɛ̄ Ujísɔ̄si jeyī gicō ā, anɔ́ɔ ó má ɛwa nɛ̄hi gē wā lɛyíkwu ɔ̄, ó da Ufílīpu ɔ̄kā kahíníī, “Iní nɛ̄ alɔ géē lá igbō ŋmá ká ācɛ nēe bá aá kéē lé ā?”

⁶Ó ka ɛ̄nyā kóō já ɔ̄ má, ohígbū ka anú abɔ̄yī nū jé ɔdā nɛ̄ ó gáā yá ā á.

⁷Ufílīpu tóohi kahíníī, “Igbō nōo fíyɛ́ ikpō égō ofigwó [10] lɔfú jɛ̄ ūwā glá, ɔ́dāŋ keé lé lígíílígíí.”

⁸Éyi kú ipú ayíkpó kú nū, Ándru ɔyínɛ́ nɔ̄nyīlɔ kú Usáyímɔ̄ni nēé hī ka Upíta, da ɔ́ ka,

⁹“Ɔyípɛ̄ éyi yɔ̄ amānyā nōo bī igbō eyē ɛhɔ̄ mla ɛbéenyi ɛpa. Ɛ̄nyā jɛ̄ ɔdí ipú ɛwa ɛ́gɛ́nyā glá?”

¹⁰Ujísɔ̄si da uwá kahíníī, “Aá yá ká ācɛ ā kéē má bá ajɛ.” Ohígbū ka ácí yɔ̄ abɔ́ɔ nɛ̄hi. Anɔ́ɔ ācɛ ā má bá ajɛ á. Áluka kú uwā ā lɛbɛ̄ɛka úlā igwɛ́ɛpa cofigwó ā (5,000).

¹¹Anɔ́ɔ Ujísɔ̄si kwú igbō ā ú, lɛ ahínyá tá Ɔwɔicō. Anɔ́ɔ ó je ɔ́ lɛ ācɛ nēe bá ajɛ ā. Ó yá ɛ́gɔ́ɔmā mla ɛbéenyi ā dúú. Ó je ɔ́ lɛ uwá ɛ́gɛ́nɛ̄ é tíne lɛ ā.

¹²Eko nēé lɛ ipú nū ā, ó da ayíkpó kú nū kahíníī, “Aá lɛ iwili kú nū túbá ká ɔdā dúúmā kóō bónū ŋ́.”

¹³Anɔ́ɔ é lɛ ɛjɛ̄ɛ̄jī iwili kú igbō kú eyē ɛhɔ̄ nɛ̄ ācɛ lé hile ā túbá, anɔ́ɔ ó le kpó mu ómblí igwɛ́ɛpa.

¹⁴Eko nɛ̄ ācɛ le úklɔ́ ō hídáagó nɛ̄ Ujísɔ̄si yá ā má ā, é kahíníī, “Ɔkwɛ̄yi nɛ, ɔ̄cɛ ā wɛ ɔ̄comɛ́ɛbɛ ā á”

¹⁵Eko nɛ̄ Ujísɔ̄si jé ka é gáā kwú ɔ̄ abɔ̄fú kéē je ɔ́ lé ɔ̄cɛ́ ā, ó nyɛ̄ɛ̄ lɛ tá ɛyí ɛfu, ōfōōfūnū.

¹⁶Eko nɛ̄ ɔ̄nɛ̄ gāa, anɔ́ɔ ayíkpó kú nū ā le tá okónu kú ókpoó ā.

¹⁷É le pɛ́ tá ipú ɔ́kɔ, anɔ́ɔ e gbɔɔ́ ō nyɔ̄ ogbeé ɔhá kú ísu ā lɛyíkwu Ukapánɔm. Amáŋ abɔ̄ obū le du ā, nááná Ujísɔ̄si í wā ɛgiyí uwā ŋ́.

¹⁸Anɔ́ɔ ísu hɛ́ lugwú lugwú gicō ohígbū owu nɛ̄hi nōo yɔ̄ ī tá ā.

¹⁹Eko nēé lɛ ɔ́kɔ pɛ́ bɛ̄ɛka ukilómīta ɛhɔ̄ ámāŋ ka ahāapa ā, igbeékpónú é má Ujísɔ̄si yɔ̄ ī yāwu eyī ísu lɛyíkwu ɔ́kɔ ā. Anɔ́ɔ é gbɔɔ́ ō yúufi.

²⁰Amáŋ Ujísɔ̄si da uwá kahíníī, “Ami nɛ. Aá yúufi ŋ́.”

²¹Ɔtu he uwá nɛ̄hi abɔ̄ é kwú ɔ̄ ú ga ipú ɔ́kɔ ā, anɔ́ɔ ɔkwɔɔkwu ɔ́ɔmā ɔ́kɔ ā ga ajɛ ɛga nēé yɔ̄ ī nyɔ̄ ā.

²²Oŋmɔ́cī nū ɛwa nēe háyi ogbeé ɔhá kú ísu ā, má ka ɔ́kɔ ékpó yɔ̄ abɔ́ɔ á, é kē le jé ka Ujísɔ̄si í ga ipú ɔ́kɔ ā mla ayíkpó kú nū ŋ́, amáŋ ayíkpó kú nū kē nyɛ̄ɛ̄ ōfōōfū uwā.

²³Aɔ́kɔ ɔhá ŋmá Utibérīyasi wā í bá pī ɛga nēé lé igbō eko nɛ̄ Óndú ā le ahínyá tá Ɔwɔicō ohígbū nū gbɔbū ā.

²⁴Eko nɛ̄ ācɛ ā í má Ujísɔ̄si gɛ ŋ́ mā, amáŋ ayíkpó kú nū ōfōōfū ūwā ā, uwá abɔ̄yīwā le pɛ́ tá ipú aɔ́kɔ ā, le tá Ukapánɔm kéē tíne Ujísɔ̄si.

²⁵Eko nēé lɛ ɔ́ pīyɛ ogbeé ɔhá kú ísu ā, é da ɔ́ kahíníī, “Itíca, eko nyá nāa wā amānyā ā?”

²⁶Ujísɔ̄si tá uwā ōhī kahíníī, “Ɔkwɔ̄ɔ̄kwɛ̄yi, n̄ da aá ka, aá gē tíne um, ó wɛ ohígbū úklɔ́ ō hídáagó kú um nɛ̄ aá má ŋ́, amáŋ ohígbū ka aá le igbō lé lɛ ipú nū ā nɛ.

²⁷Aá híī yúklɔ́ kú ɔdōlé nōo gē bīya ā ŋ́, amáŋ ohígbū ɔdōlé nōo gē je oyēeyī opiyóó, nɛ̄ Ɔyínɔ̄nyīlɔ kú Ɔ̄cɛ géē je lɛ aá ā. Ohígbū ɛnyā nɛ̄ Ɔwɔicō Ádā ā tū um ɛhɔ̄ wā ā.”

²⁸Anɔ́ɔ é da ɔ́ kahíníī, “Ɔdí nɛ̄ alɔ géē yá piíí ɛ́ɛ́ ká ālɔ̄ yúklɔ́ kú Ɔwɔicō ā?”

²⁹Ujísɔ̄si tóohi da uwá kahíníī, “Ɛ̄nyā wɛ úklɔ́ kú Ɔwɔicō á, aá lɔtūce ɔ̄cɛ nɛ̄ anú abɔ̄yī nū tɛ̄hɔ̄ ā.”

³⁰Anɔ́ɔ é da ɔ́ kahíníī, “Ɔdā ō hídáagó nyá nāa géē yá cɛ́ɛ́ kú alɔ cɛ̄ɛ̄lā kú uwɔ ā? Ɔdí nāa géē yá ā?

³¹Ádáádā alɔ lé umaná ipú ígbíli, ɛ́gɛ́nɛ̄ é tá ɔ̄ tū ipú ɔkpá kú ɛlɔ̄ɔwɔicō lɛ ā, ‘Ó je igbō lɛ uwá ŋmá ɔkpáncō kéē lé.’”

³²Ujísɔ̄si da uwá kahíníī, “Ɔkwɔ̄ɔ̄kwɛ̄yi, n̄ da aá ka, ó wɛ Umósīsi ī je igbō nōo ŋmá [11] ɔkpáncō lɛ aá ā ŋ́, amáŋ Ádā um je igbo ɔkwɛ̄yi ā lɛ aá ŋmá ɔkpáncō á.

³³Ohígbū ka igbō kú Ɔwɔicō wɛ ɔ̄cɛ nōo ŋmá ɔkpáncō, nōo gē je oyēeyī lɛ ɛcɛ ā.”

³⁴Anɔ́ɔ é da ɔ́ kahíníī, “Óndú, je igbō nyā lɛ alɔ eko dóódu.”

³⁵Anɔ́ɔ Ujísɔ̄si da uwá kahíníī, “Ami wɛ igbō kú oyēeyī á. Ɔ̄cɛ nōo wā ɛgiyí um, ɛmiyɛ í gáā ŋmó ɔ̄ fúlufúlu ŋ́. Ɔ̄cɛ nōo kē lɔtūce um, ijēēnyi í kē gáā ŋmó ɔ̄ gbóógbóō gɛ ŋ́.

³⁶Amáŋ n da aá ka, aá lɛ um má ɛɛ́, nááná aá kē cɛ̄ ŋ́.

³⁷Ācɛ dóódu nɛ̄ Ádā ā je gā um ā géē wā ɛgiyí um. Ɔ̄cɛ dúúmā nōo wā ɛgiyí um, ń gáā nū ɔ̄ tɛ́ɛcɛ ŋ́.

³⁸Ohígbū ka ń wā ajɛ ŋmá ɔkpáncō ká n̄ gaá yá ɔdā nōo he um ɔtū ā ŋ́, amáŋ ɔdā nōo tá ɔtū kú ɔ̄cɛ nōo tū um ɛhɔ̄ ā nɛ̄ n.

³⁹Ɛ̄nyā wɛ ɔdā nōo tá ɔtū kú Ɔwɔicō nōo tū um ɛhɔ̄ ā á, ká n̄ híī cɛ̄ kú ɔ̄cɛ dúúmā nōó le tū um abɔ̄ kóō héyī bī ŋ́, amáŋ kā n̄ lɛ uwá héyī ɛ̄cī ámōōmɛ ā.

⁴⁰Ohígbū ka ɔdā nɛ̄ Ádā um tíne á wɛ ka odúúdú ācɛ nēe lɛ Ɔyínɔ̄nyīlɔ ā má, nēe kē cɛ̄ɛ̄lā nū, géē lɛ oyēeyī opiyóó. Anɔ́ɔ n géē kpó uwā héyī ɛ̄cī ámōōmɛ á.”

⁴¹Anɔ́ɔ ācɛ Ujíyu le iŋini ka ce ɔ́ ohígbū ɛlā nōó ka kahíníī, “Ami ā wɛ igbō nōo ŋmá ɔkpáncō á.”

⁴²Anɔ́ɔ é kahíníī, “Ó wɛ ɔ̄cɛ ā wɛ Ujísɔ̄si, ɔyí kú Ujósɛ̄fu ā ŋ́ nɛɛ, ɔ̄cɛ nɛ̄ alɔ jé ɛ́nɛ́ nū mɛ́mla ádā nū āā? Abɔ̄ ó yá lɛ ɛ́ɛ́ nōó ka, ‘N ŋmá ɔkpáncō wā ajɛ ā?’”

⁴³Ujísɔ̄si tá uwā ohi kahíníī, “Aá híī ka iŋini ɔtāhɛ̄ iyī aá ŋ́.

⁴⁴Ɔ̄cɛ dúúmā í wā ɛgiyí um glá ŋ́ ayíka Ádā nōo tū um ɛhɔ̄ ā lɛ ɔ́ pi wā nɛ, anɔ́ɔ n géē je ɔ́ héyī ɛ̄cī ámōōmɛ ā.

⁴⁵É lɛ ɔ́ tá ipú ɔkpá kú ācomɛ́ɛbɛ ka, ‘Ɔwɔicō gē nwū odúúdú uwā odée.’ Ɔ̄cɛ dúúmā nōo lɛ ɛlā kú Ádā ā pó nōo klla lɛ ɔ́ jé, géē wā ɛgiyí um.

⁴⁶Ó wɛ ka ɔ̄cɛ dúúmā má Ádā ā jéjéē ɛ́ɛ́ ŋ́, ń táafú ŋ́ ɔ̄cɛ nōo yɔ̄ mla Ádā ā, anú má Ádā ā á.

⁴⁷Ɔkwɔ̄ɔ̄kwɛ̄yi, n̄ da aá ka, ɔ̄cɛ nōo cɛ̄ géē lɛ oyēeyī opiyóó.

⁴⁸Ami wɛ igbō kú oyēeyī á.

⁴⁹Ádáádā aá lé umaná ipú ígbíli, anɔ́ɔ é le pɛ́ gekwú á.

⁵⁰Ɛ̄nyā wɛ ɛdɔ kú igbō nōo ŋmá ɔkpáncō, nɛ̄ ɔ̄cɛ dúúmā lɛ lé, í lɛ oyēeyī opiyóó.

⁵¹Ami wɛ igbō kú oyēeyī nōo ŋmá ɔkpáncō á. Ɔ́dāŋ́ ka ɔ̄cɛ dúúmā lɛ igbō nyā lé, ó géē yēeyī piyóó. Igbō nɛ̄ n géē je ohígbū oyēeyī kú ɛcɛ ā wɛ ɔkpíyē kú um ā.”

⁵²Ohígbū ɛlā nɛ̄ ó ka nyā, ācɛ Ujíyu gbɔɔ́ ō táafú mla iyī uwā kahíníī, “Abɔ̄ ó yá lɛ ɛ́ɛ́ nɛ̄ ɔ̄cɛ ā ka anúɔ géē je ɔkpíyē kú nū lɛ alɔ ká ālɔ̄ lé glá ā?”

⁵³Anɔ́ɔ Ujísɔ̄si da uwá kahíníī, “Ɔkwɔ̄ɔ̄kwɛ̄yi, n̄ da aá ka, ń táafú ŋ́ aá lɛ ɔkpíyē kú Ɔyínɔ̄nyīlɔ kú Ɔ̄cɛ ā lé, klla lɛ oyī kú nū gwá, ámāŋ aá lɛ oyēeyī dúúmā ipú aá ŋ́.

⁵⁴Ɔ̄cɛ nōo lɛ ɔkpíyē kú um lé, klla lɛ oyī kú um gwá, lɛ oyēeyī opiyó, anɔ́ɔ n géē je ɔ́ héyī ɛ̄cī ámōōmɛ á.

⁵⁵Ohígbū ka ɔkpíyē kú um wɛ ɔdōlé ɔkwɛ̄yi. Oyī kú um kē wɛ ɔdōgwá ɔkwɛ̄yi á.

⁵⁶Ɔ̄cɛ nōo lɛ ɔkpíyē kú um lé, klla lɛ oyī kú um gwá, lā ipú um, n kē lā ipú nū.

⁵⁷Ádā oyēeyī tū um ɛhɔ̄ á, ohígbū koó yēeyī ā n kē yēeyī dúú. Ɔwɛ ékpó ā ɔ̄cɛ nōo lɛ ɔkpíyē kú um lé géē yēeyī ohígbū um.

⁵⁸Ɛ̄nyā wɛ igbō nōo ŋmá ɔkpáncō á. Ó lɛbɛ̄ɛka igbō nɛ̄ aádáádā aá lé, nēé pɛ́ gekwú ā ŋ́. Ɔ̄cɛ nōo lɛ igbō nyā lé géē yēeyī piyóó.”

⁵⁹Ó kɛlā nēe bá ā ipú ɛgogbɔ̄ɔkɔ, eko nōó yɔ̄ gē nwū ācɛ ɛlā Ukapánɔm ā.

⁶⁰Ācɛ alɛwa nēe gē yɛ ce ɔ́ ā, lɛ ɛlā nyā pó, anɔ́ɔ é kahíníī, “Ɔdā nēé nwū nyā lɔnɔ kú ɔ̄cɛ kóō jɛ́yí nū. Ɔ̄nyɛ pó glá ā?”

⁶¹Amáŋ Ujísɔ̄si jé abɔ̄yī nū ka ayíkpó kú nū bá ī ka iŋini ohígbū ɛ̄nyā, anɔ́ɔ ó da uwá kahíníī, “Ɛ̄nyā yá kú aá le cɔ̄nū nɛɛ?

⁶²Ɔdí géē yá ɔ́dāŋ ka aá má Ɔyínɔ̄nyīlɔ kú Ɔ̄cɛ kwúcē ga ɛga nōo tɛtɛ yɔ̄ ā?

⁶³Alelékwū kú Ɔwɔicō gē je oyēeyī á, ɔfú kú ɔ̄cɛ í yá ɔdā dúúmā glá ŋ́. Ɛlā nɛ̄ N ka lɛ aá ā wɛ alelékwū mla oyēeyī.

⁶⁴Amáŋ ācɛ ohī bá ɔtāhɛ̄ kú aá, nēé cɛ̄ ŋ́. Ujísɔ̄si jé ācɛ nēé cɛ̄ ŋ́ mā mla ɔ̄cɛ nōo géē je ɔ́ lá ā ŋmá eko aflɛ́yí ā.

⁶⁵Anɔ́ɔ ó kahíníī, “Ohígbū ɛ̄nyā n̄ da aá ka, ɔ̄cɛ dúúmā í wā ɛgiyí um glá ŋ́, ń táafú ŋ́ Ádā ā lɔfú je lɛ ɔ́.”

⁶⁶Ohígbū ɛ̄nyā ayíkpó kú nū alɛwa kwúcē igbīhi í klla yɛ mla anú gɛ ŋ́.

⁶⁷Anɔ́ɔ Ujísɔ̄si da ayíkpó igwɛ́ɛpa ā kahíníī, “Aá gē tíne kú aá nyɛ̄ɛ̄ dúú nɛɛ?”

⁶⁸Usáyímɔ̄ni tóohi kahíníī, “Óndú, egiyí ɔ̄nyɛ nɛ̄ alɔ géē nyɔ̄ gɛ? Awɔ lɛ ɛlā nōo gē je oyēeyī opiyóó á.

⁶⁹Alɔ cɛ̄, klla jé ka a wɛ Ɔ̄cɛ otīihɔ̄ kú Ɔwɔicō.”

⁷⁰Anɔ́ɔ Ujísɔ̄si tá uwā ohi kahíníī, “Ń fu aá igwɛ́ɛpa ɛ́ɛ́ nɛɛ ɔ̄cɛ éyi kú aá í wɛ ebilíi ā ŋ́ nɛɛ?”

⁷¹Ó kɛlā kú Ujúdasi ɔyínɔ̄nyīlɔ kú Usáyímɔ̄n Iskárīyɔ̄tu, éyi kú ipú ayíkpó igwɛ́ɛpa ā, nōo géē je ɔ́ lá.