Read idoma UJƆ́NI 7 Bible Online

UJƆ́NI 7 - idoma bible

UJƆ́NI 7

¹Igbīhi ɛ̄nyā Ujísɔ̄si yɔ̄ gē yɛ ipú Ugálīli ŋmá igelī éyi ga ɔhá. Ó dɔɔ̄kā ō yɛ ipú Ujudíya ŋ́, ohígbū ka ācɛ Ujíyu tíne kéē lɛ ɔ́ ŋmó.

²Ucɛ kú ācɛ Ujíyu nōo wɛ ucɛ kú áklɔ̄kpɛ ā le bá ajaajɛ.

³Ohígbū ɔ́ɔmā ayínɛ́ nū da ɔ́ kahíníī, “Nyɛ̄ɛ̄ ká ā ga Ujudíya ká ayíkpó kú uwɔ kéē má úklɔ́ nāa yɔ̄ ī yá ā.

⁴Ohígbū ka ɔ̄cɛ dúúmā í gē yúklɔ́ tayínū ŋ́. Ɔ́dāŋ ka ó dɔɔ̄kā kú ācɛ kéē lɛ ɔdā nōó yɔ̄ ī yá ā jé. Abɔ̄ nāa yɔ̄ ī yá aɔ́dā nēe bá nyā, lɛ iyī uwɔ mafú lɛ ācɛ cɛ́ɛ́ kéē lɛ uwɔ jé. Ɔ́dāŋ́ ka a lɛ ɔdā nēe bá ā yá, lɛ iyī uwɔ mafú lɛ alɛɛcɛ.”

⁵Ohígbū ka ayínɛ́ nū nááná í lɔtūce ɔ́ ŋ́ dúú.

⁶Anɔ́ɔ Ujísɔ̄si da uwá kahíníī, “Eko nōo le kpaakpa gā um ā í yá ɛ́ɛ́ ŋ́. Amáŋ eko dóódu le kpaakpa lɛ aá.

⁷Ɛcɛ ā í gáā wɔ́tū aá glá ŋ́, amáŋ ó gē wɔ́tū um ohígbū ka n cījáalí ka úklɔ́ kú nū wɛ obɔ̄bí.

⁸Aá nyɔ̄ ɛgiyí ucɛ abɔ̄yī aá, ń gáā nyɔ̄ ɛgiyí ucɛ ā ɛ́ɛ́ ŋ́, ohígbū ka eko kú um í yá jīla ɛ́ɛ́ ŋ́[12]

⁹Eko nōó lɛ ɛ̄nyā ka lɛ uwá kwɛyí ā, ó má klá Ugálīli.

¹⁰Amáŋ eko nɛ̄ ayínɛ́ nū le yɛ tá ɔ̄nū ucɛ ā, anú abɔ̄yī nū le yɛ dúú. Ó nyɔ̄ cāā ŋ́ amáŋ ó nyɔ̄ tayínū.

¹¹Aótrɛ̄yí kú ācɛ Ujíyu lɛyītáajɛ nū ɔnū ucɛ ā. Anɔ́ɔ é kahíníī, “Iní nōó yɔ̄ ā?”

¹²Iŋini yɔ̄ ɔtāhɛ̄ kú ācɛ ā fíyɛ́ abɔ̄ ohígbū nū. Ācɛ ōhī kahíníī, “Ó wɛ ɛ́nɛ́nɛ̄ ɔ̄cɛ.” Ācɛ ɔhá kahíníī, “Ehée, ó gē bī ācɛ bī.”

¹³Amáŋ ohígbū ufi kú ācɛ Ujíyu ā, ɔ̄cɛ dúúmā í kɛlā lɛyíkwu ɔ́ gēdēē ŋ́.

¹⁴Ɔtāhɛ̄ kú ucɛ ā Ujísɔ̄si le tá ipú Agblīihɔ-nɛ̄hi ā gaá nwɛ̄lā.

¹⁵Ācɛ Ujíyu le hídáagó. Anɔ́ɔ é kahíníī, “Ɛ́gɛ́nyā nɛ̄ ɔ̄cɛ ā jɔ́kpá lɛ ā dúú ā, ó kē nyɔ̄ ínɔ́kpá ŋ́?”

¹⁶Anɔ́ɔ Ujísɔ̄si tá uwā ohi kahíníī, “Ɔdā nɛ̄ n gē nwū ā í wɛ ákú um ŋ́, amáŋ ákú Ɔ̄cɛ nōo tū um ɛhɔ̄ ā nɛ.

¹⁷Ɔ̄cɛ dúúmā nōo cɛ̄ kóō yá ɔdā nɛ̄ Ɔwɔicō tíne ā, géē jé ɔ́dāŋ ka ɔdā nɛ̄ um nwū ā ŋmá ɛgiyí Ɔwɔicō ámāŋ ka n kɛlā mla ɔfú kú abɔ̄yī um.

¹⁸Ɔ̄cɛ nōo i kɛlā ŋmá ɔfú kú iyī nū, gē tíne owóofu kú iyī nū. Amáŋ ɔ̄cɛ nōo gē tíne owóofu kú Ɔ̄cɛ nōo tū ɔ̄ ɛhɔ̄ ā, wɛ ɔ̄cɛ ɔkwɛ̄yi. Ɛ̄kɛ̄mgbɛ̄ í yɔ̄ ipú oyēeyī kú nū ŋ́.

¹⁹Umósīsi í je íne lɛ aá ŋ́ nɛɛ, nááná anɔ́ɔ ɔ̄cɛ dúú kú ipú aá í lɛ íne ā tū ŋ́ má ā? Ɔdíyá nɛ̄ aá gē tíne ká aá ŋmó um ā?”

²⁰Anɔ́ɔ ācɛ ā kahíníī, “A lɛ alelékwū obɔ̄bí. Ɔ̄nyɛ tíne kóō ŋmó uwɔ ā?”

²¹Anɔ́ɔ Ujísɔ̄si tóohi da uwá kahíníī, “N le úklɔ́ éyi yá, ó kē le hɛ́ odúúdú aá idáagó.

²²Ohígbū ɛ̄nyā Umósīsi le íne je lɛ aá ká lɛ ayípɛ̄ ɔlɛ́ aá apī hɛ́. (ó wɛ ka o ŋmá abɔ̄ Umósīsi nóo amáŋ ó ŋmá abɔ̄ aádáádā aá), anɔ́ɔ aá gē hɛ́ ɔ̄cɛ apī ɛ̄cī usábāti á.

²³Ɔ́dāŋ́ ka é lɛ ɔ̄cɛ apī hɛ́ ɛ̄cī usábāti o yá ɛ́ɛ́ kéē híī nyílá íne kú Umósīsi ŋ́, aá gē cɔ̄nū tū um ohígbū ka n le yá kú ōcē kú ɔ̄cɛ éyi kóō mɛ dúúdú ɛ̄cī usábāti ā nɛɛ?

²⁴Aá híī hɛ́pɔ̄ ohígbū eyīgoo kú ɔ̄cɛ ŋ́, amáŋ aá ka ɛ́nɛ́nɛ̄ ɛpɔ̄.”

²⁵Anɔ́ɔ ācɛ kú Ujerúsālɛm ōhī kahíníī, “Ó wɛ ɔ̄cɛ ā nēé yɔ̄ ī tíne kéē ŋmó ā ŋ́ nɛɛ?

²⁶Má ɔ̄, ó yɔ̄ i kɛlā cāā, ɔ̄cɛ dúú kē da ɔ́ ɔdā dúúmā ŋ́. Aótrɛ̄yí ká alɔ i kpōō le jé ɔkwɛ̄yi ka ɔ̄cɛ ā wɛ Ohɔ́nyɛtá ā nɛɛ?

²⁷Nááná ā alɔ jé ɛga nɛ̄ ɔ̄cɛ ā ŋmá ā, amáŋ eko nɛ̄ Ohɔ́nyɛtá ā gā, ɔ̄cɛ dúúmā í gáā jé ɛga nōó ŋmá ā ŋ́.”

²⁸Ujísɔ̄si yɔ̄ ī nwɛ̄lā ipú Agblīihɔ-nɛ̄hi ā, ó lɛ ɔkɔ cɛyí dɛ̄gba kahíníī, “Aá jé um, aá kē jé ɛga nɛ̄ n ŋmá ā ɔkwɛ̄yi? Ń bī ɔfú kú abɔ̄yī um wā nóó, amáŋ ɔ̄cɛ nōo tū um ɛhɔ̄ ā, nɛ̄ aá jé ŋ́ mā, wɛ ɔ̄cɛ ɔkwɛ̄yi.

²⁹Ami ā jé ɔ̄, ohígbū ka n ŋmá ɛgiyí nū, anú abɔ̄yī nū tū um ɛhɔ̄ á.”

³⁰Anɔ́ɔ é dɔɔ̄kā kéē lɛ ɔ́ kwú abɔ̄fú, amáŋ ɔ̄cɛ dúúmā í lɛ abɔ̄ kwu ɔ́ ŋ́, ohígbū ka eko kú nū í yá ɛ́ɛ́ ŋ́.

³¹Amáŋ ācɛ alɛwa lɔtūce ɔ́, anɔ́ɔ é kahíníī, “Eko nɛ̄ Ohɔ́nyɛtá ā gā, ó géē yá ɔdā ocābɔ̄ fíyɛ́ ɛ̄nɛ̄ ɔ̄cɛ ā yá ā?”

³²Ācɛ Ufárisīi pó iŋini nɛ̄ ɛwa ā gē ka ohígbū nū ā. Ohígbū ɔ́ɔmā ācɛ Ufárisīi mɛ́mla otrɛ̄yí kú ācogwɛ́ɛya le aídengéli tɛ̄hɔ̄ kéē gaá lɛ ɔ́ kwú abɔ̄fú.

³³Anɔ́ɔ Ujísɔ̄si kahíníī, “N géē yɔ̄ mla aá eko kpií, cɛ́ɛ́ n nyɛ̄ɛ̄ ga ɛgiyí ɔ̄cɛ nōo tū um ɛhɔ̄ ā.

³⁴Aá géē dɔɔ̄kā um, amáŋ aá gáā má um glá ŋ́. Ɛga nɛ̄ n kē yɔ̄ ā, aá gáā lɔfú wā abɔ́ɔ glá ŋ́.”

³⁵Anɔ́ɔ ācɛ Ujíyu da iyī uwā kahíníī, “Iní nōó tíne ō nyɔ̄ nɛ̄ alɔ í gáā má ɔ̄ glá ŋ́ mā ā? Ó tíne ō nyɔ̄ ɛgiyí ācɛ Ujíyu nēe le pahīla ɔtāhɛ̄ kú ācɛ Ugiríiki ā, kóō nwū ācɛ Ugiríiki ɛlā kɛ̄ɛ?

³⁶Ɔdí wɛ ɛyí ɛlā nyā ā nōó ka, ‘Aá géē dɔɔ̄kā um, amáŋ aá gáā má um glá ŋ́. Ɛga nɛ̄ n kē í yɔ̄ ā, aá gáā lɔfú wā abɔ́ɔ glá ŋ́ mā ā?”

³⁷Ɛ̄cī ámōōmɛ, nōo wɛ ɛ̄cī nɛ̄hi kú ucɛ ā, Ujísɔ̄si háyi lɛ ɔkɔ cɛyí dɛ̄gba kahíníī, “Ɔ̄cɛ dúúmā nɛ̄ ijēēnyi gē ŋmó ɔ̄ kóō wā ɛgiyí um gaá gwá éŋkpɔ̄.

³⁸Ɔ̄cɛ dúúmā nōo lɔtūce um, ɛ́gɛ́nɛ̄ é tá ɔkpá kú ɛlɔ̄ɔwɔicō lɛ ā, ‘Ŋmá ipú nū ísu kú éŋkpɔ̄ ōhíjēnyi géē pɛ́ wɛ̄ɛcɛ.’”[13]

³⁹Ó ka ɛ̄nyā ohígbū Alelékwū nɛ̄ ācɛ nēe lɔtūce ɔ́ ā géē mīyɛ ā. Ohígbū ka jāā kwu eko ɔ́ɔmā é je Alelékwū ā lɛ ācɛ ɛ́ɛ́ ŋ́, ohígbū keé je Ujísɔ̄si gicō ipú ɛgahi mɛ́mla ojīlīmā ɛ́ɛ́ ŋ́.

⁴⁰Ācɛ ōhī kú ipú ɛwa nēe pó ɛlā nyā kahíníī, “Ɔkwɛ̄yi, ɛ̄nyā wɛ ɔ̄comɛ́ɛbɛ [14] ā á.”

⁴¹Aɔ́há kahíníī, “Ɛ̄nyā wɛ Ohɔ́nyɛtá ā á.” Amáŋ ɔhá kahíníī, “Ohɔ́nyɛtá ā géē ŋmá Ugálīli nɛɛ?

⁴²É tá ipú ɔkpá kú ɛlɔ̄ɔwɔicō ā ka Ohɔ́nyɛtá ā géē ŋmá ipɔ́ɔma kú Ɔcɛ́ Udéfīdi, ipú Ubɛ́tulɛhēm, igelī nɛ̄ŋcɛ́ ɛga nēé ma Udéfīdi ā.”

⁴³Anɔ́ɔ ɛwa ā le kɔ̄ ohígbū nū á.

⁴⁴Aóhī kú uwā tíne kéē lɛ ɔ́ kwú abɔ̄fú, amáŋ ɔ̄cɛ dúúmā í lɛ abɔ̄ kwu ɔ́ glá ŋ́.

⁴⁵Anɔ́ɔ aídengéli ā kwúcē le tá ɛgiyí otrɛ̄yí kú ācogwɛ́ɛya mɛ́mla ācɛ Ufárisīi ā, anɔ́ɔ é da uwá ɔ̄kā kahíníī, “Ɔdíyá nɛ̄ aá bī ɔ̄ wā ŋ́?”

⁴⁶Anɔ́ɔ aídengéli ā tóohi kahíníī, “Ɔ̄cɛ dúúmā í kɛlā bɛ̄ɛka anú ā jégéé ŋ́.”

⁴⁷Anɔ́ɔ ācɛ Ufárisīi ā tá uwā ohi kahíníī, “Ó lɛ aá bī bī dúú nɛɛ?

⁴⁸Ó lɛ ɔ̄cɛ dúú ŋmá ipú aótrɛ̄yí ā ámāŋ ācɛ Ufárisīsi nōo lɛ ɔtūce ɔ́ nɛɛ?

⁴⁹Amáŋ ɛwa kú ācɛ nēe bá ā nēé jé íne ā ŋ́ mā nɛ, é kē lɛ okónu tá lɛ uwá!”

⁵⁰Unikɔdímɔ̄si, éyi kú uwā, nōo wā ɛgiyí nū eko éyi ā, da uwá ka,

⁵¹“Íne kú alɔ ī ŋmó ɔ̄cɛ ɛpɔ̄bí gbɔbū ɛ́ɛ́ kéē pó ɔkɔ kú nū, kla jé ɔdā nōó yá ā nɛɛ?”

⁵²Anɔ́ɔ uwá tóohi da ɔ́ kahíníī, “A ŋmá Ugálīli dúú nɛɛ? Jila ɔkpá kú ɛlɔ̄ɔwɔicō, a géē má ka ɔ̄comɛ́ɛbɛ dúúmā í bɛ̄cɛ ŋmá Ugálīli ŋ́.”

⁵³Anɔ́ɔ ɔnyɔɔnyɛ le kābɔ̄ ga ɔlɛ́ nū á.