Read idoma UJƆ́NI 8 Bible Online

UJƆ́NI 8 - idoma bible

UJƆ́NI 8

¹Amáŋ Ujísɔ̄si le tá ɛfu nēé hī ka Ólīifu ā.

²Anɔ́ɔ ɔ̄cɔ̄ɔ̄cī blibli ó klla gā ipú Agblīihɔ-nɛ̄hi ā, anɔ́ɔ ācɛ dóódu wā ɛgiyí nū. Ó yāajɛ kla ī nwū uwā ɛlā.

³Anɔ́ɔ aítíca kú íne mɛ́mla ācɛ Ufárisīsi bī ɔnyā éyi nōo gbaajā wā ɛgiyí nū. Anɔ́ɔ é kwú ɔ̄ ú háyi ɔtāhɛ̄.

⁴É da ɔ́ kahíníī, “Itíca é lɛ ɔnyā nyā kwú abɔ̄ ó yɔ̄ ī gbaajā ā.

⁵Ipú íne nɛ̄ Umósīsi je lɛ alɔ ā, é ka ālɔ̄ ɔ́ɔ̄ tá ɛcɔ̄ klá ɔ̄cɛ ɛ́gɛ́nyā. Ɔdí nɛ̄ awɔ ā ka lɛyíkwu ɔ́ ā?”

⁶É ka ɛ̄nyā kéē jē ɔ̄ má, kéē má ɔdā nēé géē bī kpɛ́lā ce ɔ́. Amáŋ Ujísɔ̄si túkpɛɛ́ lɛ ɔkpá tá tāajɛ.

⁷Abɔ̄ uwá bá gē da ɔ́ ɔ̄kā kpɔ́ ā, ó cāŋjɛ da uwá kahíníī, “Ɔ̄cɛ dúúmā nōó yá ɔdōbɔ̄bí ɔtāhɛ̄ aá jéjéē ɛ́ɛ́ ŋ́ kóō wɛ ɔ̄cɛ aflɛ́yí nōo í tá ɛcɔ̄ klá anú.”

⁸Ó kla túkpɛɛ́ lɛ ɔkpá tá tāajɛ.

⁹Eko nēé lɛ ɛ̄nyā pó ā, é nyɛ̄ɛ̄ éyééye. É gbɔɔ́ ŋmá anyākwɔ́cɛ jāā ga ayípōklóbīya. Anɔ́ɔ é habɔ̄ Ujísɔ̄si ōfūnū mɛ́mla ɔnyā ā tá háyi á.

¹⁰Anɔ́ɔ Ujísɔ̄si cāŋjɛ, da ɔ́ kahíníī, “Ɔnyā, ācɛ nēe kpɛ́lā ce wɔ ā bá iní? Ɔ̄cɛ dúú í ŋmó uwɔ ɛpɔ̄bí ŋ́ nɛɛ?”

¹¹Anɔ́ɔ ɔnyā ā tóohi kahíníī, “Ehée, Óndú.” Anɔ́ɔ Ujísɔ̄si kahíníī, “Ń kē ŋmó uwɔ ɛpɔ̄bí ŋ́ dúú. Nyɔ̄ o ŋmá abālɔbányā ā yá ɔdōbɔ̄bí ɔhá gɛ ŋ́.”

¹²Ujísɔ̄si le ɛlā ka lɛ ācɛ Ufárisīi igbɔhá kahíníī, “Ami wɛ ɔlá-ofíyajɛ kú ɛcɛ á, ɔ̄cɛ dúúmā nōo yɛce um, ó gáā yāwu ipú obū ŋ́, amáŋ ó géē lɛ ɔlá-ofíyajɛ kú oyēeyī.”

¹³Anɔ́ɔ ācɛ Ufárisīi da ɔ́ kahíníī, “A ī cījáalí lɛ iyī uwɔ, ijáalí kú wɔ í wɛ ɔkwɛ̄yi ŋ́.”

¹⁴Ujísɔ̄si tóohi da uwá kahíníī, “Ɔ́dāŋ́ ka n cījáalí lɛ iyī um nááná, ijáalí kú m wɛ ɔkwɛ̄yi ohígbū ka n jé ɛga nɛ̄ n ŋmá mla ɛga nɛ̄ n gē nyɔ̄ ā. Amáŋ aá jé ɛga nɛ̄ n ŋmá mɛ́mla ɛga nɛ̄ n gē nyɔ̄ ā ŋ́.

¹⁵Aá gē hɛ́pɔ̄ ɛ́gɛ́nɛ̄ alɛɛcɛ gē hɛ́pɔ̄ lɛ ā, ami ā ń ge hɛ́pɔ̄ kú ɔ̄cɛ dúúmā ŋ́.

¹⁶Nááná ā ɔ́dāŋ ka n lɛ ɛpɔ̄ ka, ɛpɔ̄ kú um wɛ ɔkwɛ̄yi ohígbū ka ń yɔ̄ ōfōōfū um ŋ́, amáŋ Ádā nōo tū um ɛhɔ̄ ā yɔ̄ mla um.

¹⁷Ipú íne kú aá é lɛ tá ka, ‘Ijáalí kú ācɛ ɛpa wɛ ɔkwɛ̄yi.’

¹⁸N gē cījáalí lɛ iyī um, Ádā nōo tū um ɛhɔ̄ ā kē í cījáalí gā um.”

¹⁹Ohígbū ɔ́ɔmā é da ɔ́ kahíníī, “Iní nɛ̄ Ádā uwɔ yɔ̄ ā?” Ujísɔ̄si tóohi kahíníī, “Aá jé um ŋ́ ɛ́ɛ́ nɛ̄ aá kē jé Ádā um ŋ́. Ɔ́dāŋ́ ka aá lɛ um jé nɛɛ, aá géē lɛ Ádā um jé dúú.”

²⁰Ó kɛlā nēe bá ā eko nɛ̄ ó gē nwū ācɛ ɛlā ipú Agblīihɔ-nɛ̄hi pī ikpati o lɛ ije tá ɔ̄ ā. Ɔ̄cɛ dúúmā í kwú ɔ̄ abɔ̄fú glá ŋ́ ohígbū ka eko kú nū í yá ɛ́ɛ́ ŋ́.

²¹Anɔ́ɔ ó da uwá kahíníī, “N géē nyɛ̄ɛ, aá géē dɔɔ̄kā um, amáŋ aá géē kwú ipú íne nɛ̄ aá bīya ā. Aá lɔfú wā ɛga nɛ̄ n yɔ̄ ī nyɔ̄ ā glá ŋ́.”

²²Anɔ́ɔ aótrɛ̄yí kú ācɛ Ujíyu ā kahíníī, “Ó gáā ŋmó iyī nū nɛɛ? Ɔdí nōó bī ɔtū ɛ́ɛ́ nōó ka, ‘Ɛga nɛ̄ n gē nyɔ̄ ā, aá wā abɔ́ɔ glá ŋ́ má.”’

²³Anɔ́ɔ ó da uwá kahíníī, “Aá ŋmá ɛháajɛ, ami ā ŋmá ɛhícō. Aá ŋmá ɛcɛ nyā, ami ā ń ŋmá ɛcɛ nyā ŋ́.

²⁴Ohígbū ɔ́ɔmā yá ɛ́ɛ́ nɛ̄ n da aá ka, ‘Aá géē kwú ipú íne nɛ̄ aá bīya ā, ayíka aá cɛ̄ ka ami ɔ́ɔ wɛ ɔdā nɛ̄ n ka ka n wɛ ā, ámāŋ aá géē pɛ́ gekwú ipú íne nɛ̄ aá bīya ā.”

²⁵Anɔ́ɔ é da ɔ́ kahíníī, “A wɛ ɔ̄nyɛ nɛ?” Ujísɔ̄si da uwá kahíníī, “Ɔdā nɛ̄ n da aá ŋmá aflɛ́yí ā. [15]

²⁶N lɛ ɔdā alɛwa nɛ̄ n géē ka lɛyíkwu aá mla ɛpɔ̄ alɛwa nɛ̄ n géē ka tū aá, amáŋ ń gáā yá lɛ ā ŋ́. Ɔ̄cɛ nōo kē tū um ɛhɔ̄ ā wɛ ɔ̄cɛ ɔkwɛ̄yi, n ka ɔdā nɛ̄ n pó ŋmá ɛgiyí nū ā lɛ ācɛ kú ɛcɛ.”

²⁷É jé koó kɛlā lɛ uwá ohígbū Ádā ā ŋ́.

²⁸Anɔ́ɔ Ujísɔ̄si kahíníī, “Eko nɛ̄ aá kwú Ɔyínɔ̄nyīlɔ kú ɔ̄cɛ ú gicō, nɛ̄ aá géē jé ka ami ɔ́ɔ wɛ anú á, ka ń yá ɔdā dúúmā ŋmá ɔfú kú um ŋ́, amáŋ ɛ́gɛ́nɛ̄ Ádā ā nwū um ā ɛ́gɔ́ɔmā nɛ̄ n gē ka á.

²⁹Anú nōo tū m ɛhɔ̄ ā yɔ̄ mla um. Ó habɔ̄ um tá ōfōōfū um ŋ́, ohígbū ka ɔdā nōo tá ɔtū kú nū ā nɛ̄ n gē yá eko dóódu á.”

³⁰Ācɛ alɛwa nēe pó ɛlā nyā lɔtūce ɔ́.

³¹Anɔ́ɔ Ujísɔ̄si da ācɛ Ujíyu nēe cɛ̄ɛlā nū ā kahíníī, “Ɔ́dāŋ́ ka aá géē lɛyítáajɛ lɛ ɛlā kú um, aá géē wɛ ayíkpó kú um ɔkwɛ̄yi.

³²Aá kla géē jé ɛlā ɔkwɛ̄yi ā, ɛlā ɔkwɛ̄yi ā kē í nya aá tá.”

³³Anɔ́ɔ é da ɔ́ kahíníī, “Alɔ wɛ ayí kú Ébrahām, alɔ í kē wɛ ɔfiyɛ kú ɔ̄cɛ dúúmā jéjéē ɛ́ɛ́ ŋ́. Ɛ́gɛ́nyā nɛ̄ aá ka, ‘É géē nya aá tá ā?’”

³⁴Ujísɔ̄si tá uwā ohi kahíníī, “Ɔkwɔ̄ɔ̄kwɛ̄yi n da aá ka, ɔ̄cɛ dúúmā nōo lɛ íne kú Ɔwicō bīya, wɛ ɔfiyɛ kú ínoōbīya.

³⁵Ɔfiyɛ ā í gē lā ipɔ́ɔnū piyóó ŋ́, ɔyínɔ̄nyīlɔ gē lā ipɔ́ɔnū piyóó.

³⁶Ohígbū ɛ́gɔ́ɔmā ɔ́dāŋ ka Ɔyínɔ̄nyīlɔ ā lɛ aá nyatá, aá le nyatá ɔkwɛ̄yi.

³⁷N jé ka aá wɛ ayí kú Ébrahām, amáŋ aá tíne ká aá lɛ um ŋmó ohígbū ka ɛlā kú um í lā ipú aá ŋ́.

³⁸N gē ka ɔdā nɛ̄ um má ɛgiyí Ádā um, aá kē ī yá ɔdā nɛ̄ aá pó ŋmá ɛgiyí ádā aá ā.”

³⁹É tóohi da ɔ́ kahíníī, “Ébrahām wɛ ádā alɔ á.” Anɔ́ɔ Ujísɔ̄si da uwá kahíníī, “Ɔ́dāŋ́ ka aá wɛ ayí kú Ébrahām ɔkwɛ̄yi nɛɛ, aá géē [16] yá ɔdā nɛ̄ Ébrahām yá ā.

⁴⁰N gē da aá ɛlā ɔkwɛ̄yi nɛ̄ n pó ŋmá ɛgiyí Ɔwɔicō ā, amáŋ aá gē tíne ká aá lɛ um ŋmó. Ébrahām í gáā yá ɔdā ɛ́gɛ́nyā ŋ́.

⁴¹Aá yɔ̄ ī yá ɔdā ɛdɔ ékpó nɛ̄ ádā aá yá āa.” Anɔ́ɔ uwá da ɔ́ kahíníī, “Alɔ í wɛ ayí obībá ŋ́, alɔ lɛ Ádā éyi, nōo wɛ Ɔwɔicō.”

⁴²Ujísɔ̄si da uwá ka, “Ɔ́dāŋ́ ka Ɔwɔicō wɛ Ádā aá á, n géē yɛ í he aá ɔtū, ohígbū ka n ŋmá ɛgiyí Ɔwɔicō bōōbū wā, ń bī ɔfú kú abɔ̄yī um wā nóó, amáŋ anú tū um ɛhɔ̄ á.

⁴³Ɔdíyá nɛ̄ aá pó ɛlā kú um ŋ́ mā ā? Ohígbū ka aá jɛ́yí ɛlā kú um glá ŋ́.

⁴⁴Aá wɛ ayípɛ̄ ɔlɛ́ ádā aá, nōo wɛ ebilíi ā nɛ. Aá kē ī tíne ká aá yá ɔdā nōo he ádā aá ɔtū ā. Ó wɛ ɔbáyitɔ ŋmá ohútu. Ó gē wɔ́tū ɛlɔ̄kwɛ̄yi, ohígbū ka ó lɛ ɛlā ɔkwɛ̄yi dúúmā ipú ŋ́. Eko dúúmā nɛ̄ ó lɛ ɛ̄kɛ̄mgbɛ̄ ka, ó gē ma ɛdɔ kú ɔ̄cɛ nɛ̄ ó wɛ ā fú icííci nɛ̄. Ohígbū ka ó wɛ ɔ̄cokɛ̄mgbɛ̄ mɛ́mla ádā kú ɛ̄kɛ̄mgbɛ̄.

⁴⁵Amáŋ abɔ̄ n gē kɛlā ɔkwɛ̄yi ā, aá cɛ̄ɛ̄lā kú um ŋ́.

⁴⁶Ɔ̄nyɛ kú ipú aá géē cīje bá um ka ami ɔ́ɔ bīya íne kú Ɔwɔicō glá āa? Ɔ́dāŋ́ ka n kɛlā ɔkwɛ̄yi, ɔdí kē yá nɛ̄ aá cɛ̄ɛ̄lā kú um ŋ́ mā ā?

⁴⁷Ɔ̄cɛ nōo wɛ ákú Ɔwɔicō ā gē pó ɛlā kú Ɔwɔicō. Ɔdā nōo yá nɛ̄ aá pó ɛlā nēe bá ā ŋ́ mā, wɛ ka aá í wɛ ācɛ kú Ɔwɔicō ŋ́.”

⁴⁸Ācɛ Ujíyu tóohi da ɔ́ kahíníī, “Alɔ í kɛlā ɔkwɛ̄yi, abɔ̄ alɔ ka ka a wɛ ɔ̄cɛ Usamérīya, klla lɛ alelékwū obɔ̄bí ā ŋ́ nɛɛ?”

⁴⁹Ujísɔ̄si tóohi kahíníī, “Ami ā, ń lɛ alelékwū obɔ̄bí dúúmā ŋ́. Amáŋ n lɛ ojīlīmā ce Ádā um, anɔ́ɔ aá kē nyá um ojīlīmā á.

⁵⁰Ń tíne ojīlīmā kú iyī um ŋ́. Amáŋ ɔ̄cɛ éyi nōo yɔ̄ ī dɔɔ̄kā ká n̄ lɛ ojīlīmā lɛ. Anú ā gáā hɛ́pɔ̄ á.

⁵¹Ɔkwɔ̄ɔ̄kwɛ̄yi, n da aá ka, ɔ́dāŋ ka ɔ̄cɛ dúúmā lɛ ɔdā nɛ̄ n gē nwū ā tū, ó gáā kwú gbóógbóō glá ŋ́.”

⁵²Anɔ́ɔ ācɛ Ujíyu da ɔ́ kahíníī, “Abālɔbányā alɔ jé ka a lɛ alelékwū obɔ̄bí. Ébrahām gekwú, ɛ́gɔ́ɔmā nɛ̄ ācomɛ́ɛbɛ kē kwú dúú á. Amáŋ a ka, ‘Ɔ́dāŋ́ ka ɔ̄cɛ dúúmā lɛ ɔdā nɛ̄ n nwū ā tū, ó gáā kwú glá ŋ́.’

⁵³Awɔ fíyɛ́ ádā alɔ Ébrahām mɛ́mla ācomɛ́ɛbɛ nēe pɛ́kwú ā á nɛɛ? Ɔdí nāa hī iyī uwɔ ā mɛ́ɛ̄?”

⁵⁴Ujísɔ̄si tóohi kahíníī, “Ɔ́dāŋ́ ka n cɛ̄tra iyī um, ocɛ̄tra kú um wɛ áncā. Ádā um wɛ ɔ̄cɛ nōo gē cɛ̄tra um á, ɔ̄cɛ nɛ̄ aá ka ka ó wɛ Ɔwɔicō kú aá ā.

⁵⁵Nááná ā aá kē jé ɔ̄ ŋ́. Amáŋ ami ā jé ɔ̄. Ɔ́dāŋ́ ka n ka ka ń jé ɔ̄ ŋ́, ayíka n wɛ ōcokɛ̄mgbɛ̄ bɛ̄ɛka aá ā. Amáŋ n jé ɔ̄, n kē í lɛ ɛlā kú nū tū.

⁵⁶Ádā aá Ébrahām gwéeyē kóō géē má eko nɛ̄ n yɔ̄ ī wā ā. Anɔ́ɔ ó kē lɛ ɔ́ má, ɔtū kē he ɔ́.”

⁵⁷Anɔ́ɔ ācɛ Ujíyu da ɔ́ kahíníī, “Á wɛ iháyí ofɛpa cigwó ɛ́ɛ́ ŋ́, a kē le Ébrahām má ɛɛ́ ɛ̄ɛ̄?” [17]

⁵⁸Ujísɔ̄si da uwá kahíníī, “Ɔkwɔ̄ɔ̄kwɛ̄yi, n da aá ka, n yɔ̄ gbɔbū lɛ Ébrahām.”

⁵⁹Ohígbū ɛ̄nyā uwá kwú ɛcɔ̄ ú gáā tá lɛ ɔ̄, amáŋ Ujísɔ̄si le kwu tayínū, anɔ́ɔ ó nyɛ̄ɛ̄ ŋmá Agblīihɔ-nɛ̄hi ā á.