Read idoma UJƆ́NI 9 Bible Online

UJƆ́NI 9 - idoma bible

UJƆ́NI 9

¹Abɔ̄ Ujísɔ̄si yɔ̄ gē yɛ ā, ó má ɔ̄cɛ éyi nē eyī kú nū le pu ŋmá ipú kú ɛ́nɛ́ nū.

²Anɔ́ɔ ayíkpó kú nū da ɔ́ ɔ̄kā kahíníī, “Itíca, ɔ̄nyɛ bīyíne ɛ́ɛ́ nɛ̄ ɔ̄cɛ ā peyī ā, ɔ̄cɛ ā kɛ̄ɛ ka ācɛ nēe ma ɔ́ ā?”

³Ujísɔ̄si tóohi ka, “Ó wɛ Ɔ̄cɛ ā ɛ́ɛ́ nɛ̄ ó wɛ ācɛ nēe ma ɔ́ ā bīyíne ā ŋ́, amáŋ kéē lɛ úklɔ́ kú Ɔwɔicō mafú iyē kú ɔ̄cɛ ā nɛ n.

⁴Alɔ géē yúklɔ́ kú ɔ̄cɛ nōo tū um ɛhɔ̄ ā piíí eko nɛ̄ ɛnɔ yɔ̄ icō. Otū gē bī, eko nɛ̄ ɔ̄cɛ dúú í gáā yúklɔ́ glá ŋ́.

⁵Eko nɛ̄ n yɔ̄ ɛcɛ ā, ami wɛ ɔlá-ofíyajɛ kú ɛcɛ ā.”

⁶Eko nōó lɛ ɛ̄nyā ka kwɛyí ā, ó lɛ ahɛ tá tāajɛ, anɔ́ɔ ó lɛ ajɛ ma ŋmá ahɛ ā, anɔ́ɔ ó kwú ɔ̄ ú ma plá opeyī ā eyī á.

⁷Anɔ́ɔ ó da ɔ́ kóō nyɔ̄ gaá lɛ iyē gwā ókpoó kú Usáyílomi (nɛ̄ ɛyí nū wɛ otɛ̄hɔ̄ ā). Anɔ́ɔ ɔ̄cɛ ā nyɛ̄ɛ̄ gaá le iyē gwá, anɔ́ɔ ó pīyɛyí gbɔɔ́ ō mɛ́ɛbɛ á.

⁸Aóladógbe kú nū mɛ́mla ācɛ nēe tɛtɛ má ɔ̄ eko nōó wɛ obɔdā ā kóō wɛ ɔ̄cɛ nōo tɛtɛ yāajɛ gē ba ɔdā ā yɔ̄ ā ŋ́ nɛɛ?

⁹Ācɛ ōhī ka anú nɛ. Amáŋ ācɛ ɔhá kē tá ka ɔ́ɔ wɛ anú ŋ́, amáŋ ɔ̄cɛ o gbla ɔ̄cɛ icííci nɛ. Anɔ́ɔ anú abɔ̄yī nū ka anúɔ nɛ.

¹⁰Anɔ́ɔ é da ɔ́ ɔ̄kā kahíníī, “Ɛ́gɛ́nyā nɛ̄ eyī kú uwɔ kē nwūla ā gɛ?”

¹¹Anɔ́ɔ ó tóohi kahíníī, “Ɔ̄cɛ nēé hī ka Ujísɔ̄si ā lɛ ajɛ ma, anɔ́ɔ ó le ɔ́ nya um eyī á, ó da um ka n̄ nyɔ̄ Usáyílomi gaá lɛ iyē gwā. Anɔ́ɔ n ga nyɔ̄, gaá lɛ iyē gwā á. Anɔ́ɔ n gbɔɔ́ ō mɛ́ɛbɛ á.”

¹²Anɔ́ɔ é da ɔ́ ɔ̄kā ka iní nɛ̄ ɔ́ɔ yɔ̄ ā? Ó da uwá ka anúɔ í jé nóó.

¹³É le ɔ̄cɛ nōo tɛtɛ peyī ā bī gé lɛ Ācɛ Ufárisīi,

¹⁴ohígbū ka ɛ̄cī usábāti nɛ̄ Ujísɔ̄si ma ajɛ klla nwūla eyī kú nū á.

¹⁵Ācɛ Ufárisīi da ɔ́ ɔ̄kā ɛ́gɛ́nɛ̄ ó yá ɛ́ɛ́ nɛ̄ ó mɛ́ɛbɛ ā. Anɔ́ɔ ó da uwá kahíníī, “Ó lɛ ajɛ nya um eyī, n lɛ iyē gwā, anɔ́ɔ abālɔbányā, n kē ī mɛ́ɛbɛ ɛɛ́.”

¹⁶Anɔ́ɔ Ācɛ Ufárisīsi ohí kahíníī, “Ɔ̄cɛ ā í ŋmá ɛgiyí Ɔwɔicō ŋ́, ohígbū kóō gē lɛ íne kú ɛ̄cī usábāti tū ŋ́.” Amáŋ aígwu ɔhá kahíníī, “Ɔwɛ nyá nɛ̄ obīyíne gē yá ɔdōcābɔ̄ ɛ́gɛ́nyā glá ā?” Anɔ́ɔ é le kɔ̄ ohígbū ɛlā ā a.

¹⁷Anɔ́ɔ Ācɛ Ufárisīsi le ɔ̄kā da ɔ̄cɛ nōo tɛtɛ peyī ā kpɔ́ kahíníī, “Ɔdí nāa lɛ í ka lɛyíkwu ɔ̄cɛ ā, abɔ̄ ó lɛ eyī kú uwɔ nwūla āa?” Anɔ́ɔ ɔyínɔ̄nyīlɔ ā ka ɔ́ɔ wɛ ɔ̄comɛ́ɛbɛ.

¹⁸Amáŋ aótrɛ̄yí kú ācɛ Ujíyu í cɛ̄ ka ɔ́ɔ tɛtɛ wɛ opeyī, ɛ́ɛ́ nɛ̄ abālɔbányā nēé lɛ ɔ́ eyī nwūla ā ŋ́, jāā gbéeko nēé lɛ ācɛ nēe ma ɔ́ ā hīgwú.

¹⁹Anɔ́ɔ é da uwá ɔ̄kā kahíníī, “Ɔ̄cɛ ā wɛ ɔyínɔ̄nyīlɔ ká aá, nɛ̄ aá kē ma ɔ́ opeyī ŋmá ipú á nɛɛ? Abɔ̄ ó yá lɛ ɛ́ɛ́ nōó gē mɛ́ɛbɛ abālɔbányā ā?”

²⁰Ācɛ nēe ma ɔ́ ā tóohi kahíníī, “Alɔ jé kóō wɛ ɔyínɔ̄nyīlɔ kú alɔ, nɛ̄ alɔ klla ma ɔ́ opeyī ŋmá ipú.

²¹Amáŋ ɛ́gɛ́nɛ̄ ó gē mɛ́ɛbɛ abālɔbányā ā alɔ í jé nóo. Ɔ̄cɛ nōo nwūla anú eyī ā alɔ í jé ɔ̄ ŋ́. Aá da ɔ́ ɔ̄kā, ó le jɛ̄ kwɛyí ɛɛ́. Ó lɔfú kɛlā abɔ̄yī nū glá.”

²²Ācɛ nēe má ɔ̄ ā kɛlā nyā ohígbū ka é gē yúufi aótrɛ̄yí kú ācɛ kú Ujíyu. Ohígbū kéē tɛtɛ le ka ka ɔ̄cɛ dúúmā nɛ̄ ɔ cɛ̄ ka ɔ́ɔ wɛ Ohɔ́nyɛtá á, é géē nū ɔ̄ ŋmá ipú Ɛgogbɔ̄ɔkɔ ā.

²³Ohígbū ɛ̄nyā nɛ̄ ācɛ nēe ma ɔ́ ā kahíníī, “Ó le jɛ̄ kwɛyí ɛɛ́, aá da ɔ́ ɔ̄kā á.”

²⁴Anɔ́ɔ é hī ɔ̄cɛ nōo tɛtɛ peyī ā igwú igbo ɔ́mpa, anɔ́ɔ é da ɔ́ kahíníī, “Lɛ okónu ce lɛ Ɔwɔicō ka anúɔ í kɛlā ɔkwɛ̄yi. Alɔ jé ka ɔ̄cɛ ā wɛ ɔ̄cɛ o bīyíne.”

²⁵Anɔ́ɔ ó tóohi kahíníī, “Ɔ́dāŋ́ kóō wɛ ɔ̄cɛ o bīyíne ń jé nóo. Amáŋ ɔdā nɛ̄ n jé ā wɛ ka n tɛtɛ peyī, abālɔbányā n gē mɛ́ɛbɛ.”

²⁶Anɔ́ɔ é da ɔ́ ɔká kahíníī, “Ɔdí nɛ̄ ó yá gā uwɔ ā? Ɛ́gɛ́nyā nɛ̄ ó nwūla eyī kú uwɔ ā?”

²⁷Anɔ́ɔ ó tá uwā ohi kahíníī, “N tɛtɛ da aá, aá pó ŋ́. Ɔdíyá nɛ̄ aá tíne ká aá pó gɛ? Aá tíne ká aá pīya ayíkpó kú nū nɛɛ?”

²⁸Anɔ́ɔ é le ɛgba dɛ̄ tū ɔ̄ kahíníī, “Awɔ ā wɛ ɔyíkpó kú nū, amáŋ alɔ wɛ ayíkpó kú Umósīsi.

²⁹Alɔ jé ka Ɔwɔicō kɛlā lɛ Umósīsi, amáŋ alɔ í jé ɛga nɛ̄ ɔ̄cɛ ā ŋmá ā ŋ́.”

³⁰Ɔ̄cɛ ɔ́ɔmā tóohi da uwá kahíníī, “Kú ɔkwɛ̄yi, ɛ̄nyā wɛ ɔdā idáagó ɛ́gɛ́nɛ̄ aá jé ɛga nōó ŋmá ā ŋ́, nááná ā, anú kē nwūla eyī kú um á.

³¹Alɔ jé ka Ɔwɔicō í gē jāhɔ̄ lɛ ācobīyíne ŋ́. Amáŋ ɔ́dāŋ ka ɔ̄cɛ dúúmā gē gbā Ɔwɔicō ɛ̄gbā, klla gē yá ɔdā nɛ̄ ó tíne, ó gē jāhɔ̄ lɛ ɔ́.

³²Ŋmá ohútu kú ɛcɛ ɔ̄cɛ dúú í pó ka ɔ̄cɛ dúúmā nwūla eyī kú ɔ̄cɛ nɛ̄ eyī kú nū le pu ŋmá ipú jéjéē ɛ́ɛ́ ŋ́.

³³Ɔ́dāŋ́ ka ɔ̄cɛ ā í ŋmá ɛgiyí Ɔwɔicō ŋ́ nɛɛ, ó gáā lɔfú yá ɔdā dúúmā glá ŋ́.”

³⁴Anɔ́ɔ é tóohi da ɔ́ kahíníī, “É ma uwɔ ipú ínoōbīya pélúú, anɔ́ɔ a gē nwū alɔ ɛlā abālɔbányā áā?” Anɔ́ɔ é lɛ ɔ́ nū tɛ́ɛcɛ ŋmá ipú Ɛgogbɔ̄ɔkɔ á.

³⁵Eko nɛ̄ Ujísɔ̄si pó kéē kwú ɔ̄ ú nū tɛ́ɛcɛ ā, ó lɛ ɔ́ má, anɔ́ɔ ó da ɔ́ kahíníī, “A lɔtūce Ɔyínɔ̄nyīlɔ kú Ɔ̄cɛ āā?”

³⁶Anɔ́ɔ ó tóohi kahíníī, “Ɔ̄nyɛ wɛ anú nɛ̄ n géē lɔtūce ɔ́ ā?”

³⁷Ujísɔ̄si da ɔ́ kahíníī, “A lɛ ɔ́ má ɛɛ́, anú gē kɛlā mla awɔ yɔ̄ á.”

³⁸Anɔ́ɔ ó tóohi kahíníī, “N cɛ̄, Óndú.” Anɔ́ɔ ó tɛ́ɛyí-kpɛɛ́ le ɔ́gbá tá ɔ̄ á.

³⁹Ujísɔ̄si kahíníī, “N wɛ̄ɛcɛ ká n̄ hɛ́pɔ̄, ká ācɛ nēé mɛ́ɛbɛ ŋ́ kéē mɛ́ɛbɛ, ká ācɛ nēe mɛ́ɛbɛ ā kéē lɛ pīya opeyī.”

⁴⁰Aótrɛ̄yí kú Ācɛ Ufárisīi nēe bá abɔ́ɔ mla anú ā le ɛlā nyā pó. Anɔ́ɔ é da ɔ́ kahíníī, “Alɔ peyī dúú nɛɛ?”

⁴¹Anɔ́ɔ Ujísɔ̄si tá uwā ohi kahíníī, “Ɔ́dāŋ́ ka aá cɛ̄ ka aá wɛ opeyī nɛɛ, aá gáā lé ɛpɔ̄bí dúúmā ŋ́. Amáŋ abālɔbányā aá ka aá gē mɛ́ɛbɛ ɛɛ́, ohígbū ɔ́ɔmā aá le ɛpɔ̄bí lé kpɔ́.”