Read idoma ÚKLƆ́ KÚ ĀCOTƐ̄HƆ̄ 1 Bible Online

ÚKLƆ́ KÚ ĀCOTƐ̄HƆ̄ 1 - idoma bible

ÚKLƆ́ KÚ ĀCOTƐ̄HƆ̄ 1

¹Ɛ́nɛ́nɛ̄ Utiyófīlɔs, ipú ɔkpá aflɛ́yí nɛ̄ n tá ā, n lɛ abɔ̄ kwu úklɔ́ dóódu nɛ̄ Ujísɔ̄si yá mɛ́mla ɛ̄nɛ̄ ó nwū ŋmá eko nɛ̄ ó gbo úklɔ́ kú nū ā,

²jāā gbéeko nɛ̄ Ɔwɔicō je ɔ́ ga ɔkpáncō. Gbɔbū kóō nyɔ̄ ā, ó bī ɔfú kú Alelékwū Ihɔ le ɔ́da je lɛ ācɛ nōó fu keé wɛ ɔ̄cotɛ̄hɔ̄ ā.

³Ɛplá ɛ̄cī ofɛpa igbīhi ikwū kú nū ā, ó hɛ́wɛ̄ɛ̄cɛ ipú uwā igbo alɛwa nōo mafú péee nōó tū ō táafú nū ŋ́ kóō yēeyī ɔkwɔ̄ɔ̄kwɛ̄yi. É má ɔ̄ igbo alɛwa, ó kē kɛlā lɛ uwá lɛyíkwu ajɔ̄ɔ̄cɛ́ kú Ɔwɔicō.

⁴Eko nōó kē yɔ̄ mla uwá kpɔ́ ɛ́ɛ́ mā, ó tū uwā ukɔ́ kahíníī, “Aá nyɛ̄ɛ̄ ŋmá Ujerúsālɛm ŋ́, amáŋ aá gbēyī ɛhi nɛ̄ Ádā um cokónu ō je lɛ aá nɛ̄ n tɛtɛ kɛlā ohígbū nū lɛ aá ā.

⁵Ujɔ́ni bī éŋkpɔ̄ gē le yá ācɛ Ubatísim, amáŋ ofíílí ká ɛ̄cī alɛwa kóō yá, é géē bī Alelékwū Ihɔ yá aá Ubatísim.”

⁶Eko nɛ̄ ayíkpó ā lé jīla tɔ̄há ā, é da ɔ́ ɔ̄kā kahíníī, “Óndú, a géē je ajɔ̄ɔ̄cɛ́ kwúcē gé lɛ Ísrɛ̄lu eko nyā āa?”

⁷Amáŋ Ujísɔ̄si tá uwā ohi kahíníī, “Ádā um ōfōōfūnū gē mīya eko nɛ̄ aɔ́dā nēe bá nyā géē yá á, ó wɛ ɛlā aá kú aá jé ɔ̄ ŋ́.

⁸Amáŋ Ɔwɔicō géē tū aá mu mla ɔfú eko nɛ̄ Alelékwū Ihɔ ā wā gaá ce aá ɛyí. Aá kē í wɛ ijáalí kú um ŋmá Ujerúsālɛm mɛ́mla Ujudíya dóódu mɛ́mla Usamérīya klla jāā ga oŋmɛ́yí kú ɛcɛ.”

⁹Eko nōó lɛ ɛ̄nyā ka kwɛyí ā, ipú eyī ūwā, Ɔwɔicō kwú ɔ̄ ú ga ɔkpáncō anɔ́ɔ ojuja gaá klá anú ŋmá eyī uwā á.

¹⁰Eko nēé bá ī pléeyī tū ɔkpáncō ā, abɔ̄ ó le ticō ā, igbeékpónú ācɛ ɛpa nēe le otógwō ɛnɛ̄hɛ́ wiiyē le hɛ́wɛ̄ɛ̄cɛ ɔtāhɛ̄ uwā.

¹¹Anɔ́ɔ é kahíníī, “Ācɛ-Ugálīli, ɔdíyá nɛ̄ aá háyi gē pléeyī tū ɔkpáncō ā? Ujísɔ̄si nyā nēé je ŋmá ɛgiyí aá ga ɔkpáncō ā, géē wā ɛ́gɛ́nɛ̄ aá má ɔ̄ gē nyɔ̄ ɔkpáncō ā.”

¹²Anɔ́ɔ é pīyɛyí wā Ujerúsālɛm ŋmá ɛyí ɛfu nēé hī ka Ólīifu, nōo yɔ̄ kwu Ujerúsālɛm ajaajɛ ā. Ó wɛ iyāwu kú ukilómīta éyi ŋmá ipú igelī ā.

¹³É gā Ujerúsālɛm, anɔ́ɔ é le pɛ́ ga ipú inīcō ɛga nēé gbɔga ā á. Ācɛ nēe bá abɔ́ɔ ā yɔ̄ á: Upíta, Ujɔ́ni, Ujémīsi mɛ́mla Ándru, Ufílīpu mɛ́mla Utɔ́mɔ̄si, Ubatɔlɔ́mi mɛ́mla Umátiyu, Ujémīsi ɔyínɔ̄nyīlɔ kú Álifīyɔsi mɛ́mla Usáyímɔ̄n, ɔ̄cɛ kú ɔ́wá Usílɔ̄tu mɛ́mla Ujúdasi, ɔyínɔ̄nyīlɔ kú Ujémīsi,

¹⁴É gē jīla tɔhā ojigógó gē gbɔ̄ɔkɔ mla ɔtū ékpó. Umerí ɛ́nɛ́ kú Ujísɔ̄si, ayínɛ́ kú Ujísɔ̄si nɔ̄nyīlɔ ā mɛ́mla ācɛnyā ōhī wɛ ipú uwā dúú.

¹⁵Ɛ̄cī le hɛ́tíipú lígíí ācɛ nōo cɛ̄ɛ̄lā ā le jīla tɔhā, é lɛbɛ̄ɛka ācɛ ofu ɛhīlī ā, anɔ́ɔ Upíta cāŋjɛ kóō kɛlā lɛ uwá á. Anɔ́ɔ ó kahíníī,

¹⁶“Ayínɛ́, ɔdā nēé tá tū ipú ɛlɔ̄ɔwɔicō ā le yá jīla ɛ́gɛ́nɛ̄ Alelékwū Ihɔ tɛtɛ le tū Udéfīdi okónu kóō ka lɛyíkwu Ujúdasi, nōo wɛ ɔ̄cɛ nōo bī ācɛ wā í kwú Ujísɔ̄si ā.

¹⁷Ujúdasi tɛtɛ wɛ éyi kú alɔ, ohígbū kéē lɛ ɔ́ fu kóō yúklɔ́ nyā tɔ̄há mla alɔ.”

¹⁸Ujúdasi bī ije kú ucē ɔ́bíipú kú nū lɛ ajɛ éyi lá. Ipú ajɛ ā nōó míya ŋmá icō wā í le ca klá ajɛ, anɔ́ɔ ubu kú nū le ca klɛ́ɛcɛ á.

¹⁹Odúúdú ācɛ dóódu kú Ujerúsālɛm le ɔdā nōo yá Ujúdasi ā pó, anɔ́ɔ é hī ajɛ ā ka, ‘Akelidáma’ okónu kú ɔlɛ́ uwā, ɔ́ɔmā lé ka Ajɛ kú Oyī.

²⁰Ohígbū ka é le tá ipú ɔkpá kú Aíjē kú Ɛ̄gbā ka, ‘Ká ɛga nōó lā kóō le tá alácɛ̄, ká ɔ̄cɛ dúúmā kóō yɔ̄ nōo géē lā ipú ajɛ kú nū ā ŋ́.’ Anɔ́ɔ ó klla tá ka, ‘Ɔ̄cɛ ɔhá kóō kwú ɛga kú úklɔ́ kú nū ú!’

²¹Abɔ̄ ó i lɛ āā, alɔ í fu ɔ̄cɛ éyi nōo í cījáalí ka Ujísɔ̄si le héyī ŋmá ɔlékwū, kóō mīyɛ ɔkwu kú Ujúdasi. Ó í wɛ éyi kú ipú ācɛ nēe wɛ ɔ́wá kú alɔ ɛpléeko nɛ̄ Óndú Ujísɔ̄si yɔ̄ gē yɛ ɛga dóódu mla alɔ,

²²gbɔɔ́ ŋmá eko nɛ̄ Ujɔ́ni tɔ́ɔna kú ubatísim ā jāā gaá kwu ɛ̄cī nēé je Ujísɔ̄si ga ɔkpáncō ā.

²³Anɔ́ɔ é le ācɛ ɛpa Ujósɛ̄fu nēé hī ka Ubasábasi nɛ̄ iyē ádā nū wɛ Ujɔ́sitɔ̄si, mɛ́mla Umatáyāsi, kpó kwɛcɛ.

²⁴Anɔ́ɔ é le ɔ̄kɔ gbā kahíníī, “Óndú, awɔ nōo jé ɔtū kú ācɛ dóódu ā, lɛ ɔ̄cɛ éyi fu lɛ alɔ ŋmá ipú ɛpa nēe bá āā,

²⁵kóō mīyɛ ɔkwu kú Ujúdasi ipú úklɔ́ kú ɔ̄cotɛ̄hɔ̄ nɛ̄ Ujúdasi kwúcē hɛ̄ ɔ̄ tá nyɔ̄ ɛga nōó tíne ā.”

²⁶Anɔ́ɔ é lɛ ūlī tá ohígbū uwā, anɔ́ɔ ūlī ā lɛ Umatáyāsi kwú á. Anɔ́ɔ é lɛ ɔ́ ka tū ipú ɔ̄cotɛ̄hɔ̄ igwóléyi ā á.