Read idoma ÚKLƆ́ KÚ ĀCOTƐ̄HƆ̄ 10 Bible Online

ÚKLƆ́ KÚ ĀCOTƐ̄HƆ̄ 10 - idoma bible

ÚKLƆ́ KÚ ĀCOTƐ̄HƆ̄ 10

¹Ɔ̄cɛ éyi yɔ̄ Usísarīya, nɛ̄ iyē nū lé ka Ukɔnílīyɔ̄si, otrɛ̄yí kú aícɔ́ɔja ofɛhɔ̄ kú ɔ́wá aícɔ́ɔja nēé hī ka Ɔ́wá kú Ítāli.

²Anú mɛ́mla aɔ́máapú nū dóódu gē gbā Ɔwɔicō ɛ̄gbā klla gē yúufi nū. Ó gē yá ācɛ Ujíyu ogbɛhá ɛhi kpɔngɔɔ ojigógó, ó klla gē gbɔ̄ɔkɔ lɛ Ɔwɔicō eko dóódu.

³Ɛ̄cī éyi, ɛplá oje ɛtá kú ɔlɛ́ɛnɔ ā, ó má alelékwū-ōtɛ̄hɔ̄ kú Ɔwɔicō cāā eko nɛ̄ obócádēde je ɔ́ ā. Anɔ́ɔ ó da ɔ́ kahíníī, “Ukɔnílīyɔ̄si.”

⁴Ó le eyī plla tū alelékwū-ōtɛ̄hɔ̄ ipú ufi anɔ́ɔ ó kahíníī, “Ɔdí nɛ, Óndú um?” Anɔ́ɔ Alelékwū otɛ̄hɔ̄ ā da ɔ́ kahíníī, “Ɔkɔ nāa gē gbā mɛ́mla ɛhi kú uwɔ nāa gē je ā le tíicō iyɔ̄bū Ɔwɔicō ɛɛ́, ó kē yɔ̄ ī tá uwɔ ohi ɛɛ́.

⁵Abālɔbányā, lɛ ācɛ ōhī tɛ̄hɔ̄ ga Ujɔ́pa, kéē lɛ ɔ̄cɛ éyi nɛ̄ iyē nū lé ka Usáyímɔ̄n Upíta ā hīgwú wā. Iyē nū ɔhá lé ka Upíta.

⁶Ó gbɔga ɔlɛ́ ɔ̄cɛ éyi nōo lé ka Usáyímɔ̄n ā, ó ī yúklɔ́ ɔkpɛ́bɛ́, nɛ̄ inu ɔlɛ́ nū kwu okónu ísu ā.”

⁷Eko nɛ̄ Alelékwū otɛ̄hɔ̄ nōo kɛlā lɛ ɔ́ ā nyɛ̄ɛ̄ ā, ó lɛ ɔ̄cocɛ̄hɔ̄ obɔ́tū kú nū ɛpa kpó hīgwú, mɛ́mla ícɔ́ɔ́ja éyi nōo gē gbā Ɔwɔicō ɛ̄gbā ŋmá ipú aɛ́nɛ̄ o gē yúklɔ́ lɛ ɔ́ ā.

⁸Anɔ́ɔ eko nōó lɛ ɔdā nōo yá ā ka lɛ uwá ā, ó lɛ uwá tɛ̄hɔ̄ ga Ujɔ́pa.

⁹Oŋmɔ́ɔ̄cī nū, abɔ̄ é yɔ̄ ī nyɔ̄ le bá lɛ Ujópa ā, Upíta le tá inicō ɛplá ɛnɔ oyɛ̄ɛyí ā kóō gbɔ̄ɔkɔ lɛ Ɔwɔicō.

¹⁰Anɔ́ɔ ɛmiyɛ gbɔɔ́ ō ŋmó ɔ̄ á, ó cɛgbá ɔdā nōó í lé. Amáŋ eko nēé yɔ̄ ī yá ɔdōlé ā, obócádēde gbɔɔ́ ō je ɔ́.

¹¹Ó má ɔkpáncō bā ó le nwūla, anɔ́ɔ ó má odée nōo lɛbɛ̄ɛka idɔngwu nɛ̄hi nēé bī ɔ̄ ɔ́kíkā ɛnɛ ā yɔ̄ ī wāajɛ.

¹²Ígwu ɛyɛ́ɛyɛ́yí kú aɛ́bɛ́ ō lɛ ikpó ɛnɛ mɛ́mla ɛbɛ́ ō lɛ āpū mɛ́mla ígbáanɔ kú ɔkpáncō bá ipú nū.

¹³Anɔ́ɔ ó pó ɔkɔ nōo da ɔ́ kahíníī, “Cāŋjɛ Upíta, ŋmó ká ā klla lé.”

¹⁴Amáŋ Upíta kahíníī, “Ehée, Óndú. Ohígbū ka ń lé ɔdēelihɔ ámāŋ ɔda oblinyi jéjéē ɛ́ɛ́ ŋ́.

¹⁵Anɔ́ɔ ɔkɔ ā kɛlā lɛ ɔ́ igbo ɔmpa kahíníī, “Ɔdā nɛ̄ Ɔwɔicō ka ó le yēŋēē, ā híī hī ɔ̄ ka ɔdēelihɔ ŋ́.”

¹⁶Ó yá lɛ ā igbɛ ɛtá, anɔ́ɔ é kwú ɔdée ā ú gicō igbo ékpónú á.

¹⁷Anɔ́ɔ eko nɛ̄ Upíta yɔ̄ ī gbafíyóó kú ɔdā nōo géē wɛ ɛyí ɛbɛ nōó má ā, ācɛ nɛ̄ Ukɔnílīyɔ̄si tɛ̄hɔ̄ ā lɛ ɔ̄kā ɔlɛ́ Usáyímɔ̄n da, anɔ́ɔ é gaá háyi okómpīinu ɔlɛ́ ā á.

¹⁸Anɔ́ɔ é le ɔkɔ cɛyí dɔɔ̄kā ka, Ɔ̄cɛ dúú gbɔga amānyā lé ka Usáyímɔ̄n Upíta?”

¹⁹Upíta yɔ̄ ī gbafíyóó kú ɔdā nōo wɛ ɛyí ɛbɛ nyā, ɛ́ɛ́ nɛ̄ Alelékwū Ihɔ da ɔ́ kahíníī, “Má ɔ̄, ācɛ ɛtá bá gē dɔɔ̄kā awɔ.

²⁰Cāŋjɛ, hīlatá, ká ā nyɔ̄ mla uwá, ā híī bíkpáajɛ ŋ́, ohígbū ka ami da uwá kéē wā á.”

²¹Anɔ́ɔ Upíta le hīlatá i tá ɛgiyí ācɛ ā, anɔ́ɔ ó da uwá kahíníī, “Ami nɛ̄ aá gē dɔɔ̄kā á. Ɔdíyá nɛ̄ aá wā ā?”

²²Anɔ́ɔ é da ɔ́ kahíníī, “Ukɔnílīyɔ̄si tū alɔ ɛhɔ̄ á.” É klla kahíníī, “Ó wɛ ācɛ olɔhi nɛ̄ odúúdú ācɛ Ujíyu gē ka olɔhi nū ā. Alelékwū otɛ̄hɔ̄ nōo tīihɔ ā da Ukɔnílīyɔ̄si, otrɛ̄yí kú aícɔ́ɔja ofɛhɔ, ōyá olɔhi mɛ́mla ɔ̄cɛ o yúufi Ɔwɔicō ā, kóō lɛ ɛhɔ̄ tū fu uwɔ ká ā wā ɔlɛ́ nū, kóō pó ɔdā nāa géē ka ā.”

²³Upíta le ācɛ ā hīgwú wā inu, anɔ́ɔ ó le ɔkɔ gbā lɛ uwá kéē le gbo pīyɛ̄ ɔ̄. Oŋmɔ́ɔ̄cī nū, ó nyāŋjɛ le yɛ mla uwá, ayínɛ́ ōhī nēe bá Ujɔ́pa ā lɛ ɔ́ bíyē nyɔ̄.

²⁴Oŋmɔ́ɔ̄cī nū, é gā ajɛ Usísarīya ā. Abɔ̄ Ukɔnílīyɔ̄si yɔ̄ ī gbēyī uwā ā, ó lɛ aɔ́máapú nū mɛ́mla ɛ́nɛ́nɛ̄ aɔóklóbīya nū kpó hīgwú tɔ̄há.

²⁵Abɔ̄ Upíta gáā bēhé ga inu ā, Ukɔnílīyɔ̄si jīla anú, anɔ́ɔ ó lɛ okwúukwu kwajɛ pī ɔ̄ ikpó kóō gbɔɔ́ ō gbā ɔ̄ ɛ̄gbā.

²⁶Amáŋ Upíta kwú ɔ̄ ú cāŋjɛ, anɔ́ɔ ó kahíníī, “Cāŋjɛ, n wɛ ɔ̄cɛ bɛ̄ɛka awɔ ā dúú nɛ.”

²⁷Upíta yɔ̄ ī kɛlā mla Ukɔnílīyɔ̄si abɔ̄ é yɔ̄ ī ga inu ā, anɔ́ɔ ó le ācɛ alɛwa má jīla abɔ́ɔ.

²⁸Ó da uwá kahíníī, “Aá abɔ̄ aá jé ɛ́gɛ́nɛ̄ ó wɛ elihɔ ká Ɔ̄cɛ Ujíyu kóō pīya tɔ̄há mla ɔ̄cɛ aílɔ́wá ámāŋ ka o ga ɔlɛ́ nū ā. Amáŋ Ɔwɔicō le mafú gā um ɛɛ́ kā n̄ híī hī ɔ̄cɛ dúúmā ɔ̄cɛ elihɔ ámāŋ obɔ̄bí ŋ́.

²⁹Ohígbū ɛ́gɔ́ɔmā, eko nāa le ɛhɔ̄ tū fu um ā, ń wā mla ɔtū ōbɛ́pa ŋ́. N̄ da aá ɔ̄kā abālɔbányā, ɔdíyá nɛ̄ ā tɛ̄hɔ̄ fú um ā?”

³⁰Anɔ́ɔ Ukɔnílīyɔ̄si kahíníī, “Ɛ̄cī ɛnɛ nēe gaá yɛ ā, ɛpléeko nyā, n yɔ̄ ī gbɔ̄ɔkɔ [4] inu ɔlɛ́ um ɛplá oje ɛtá kú ɔlɛ́ɛnɔ. Anɔ́ɔ igbeékpónú ɔ̄cɛ éyi nōo le otógwō nōo yɔ̄ Iceyīŋmáŋmá wiyē ā wā í háyi iyɔ̄bū um.

³¹Anɔ́ɔ ó kahíníī, “Ukɔnílīyɔ̄si, Ɔwɔicō le ɔkɔ nɛ̄ ā gbā ā pó ɛɛ́, ó kē le ɛhi kú uwɔ nāa ī yá ācogbɛhá ā má ɛɛ́.

³²Ohígbū ɛ́gɔ́ɔmā, lɛ ɛhɔ̄ tū ga Ujɔ́pa ká ā gaá dɔɔ̄kā Usáyímɔ̄ni nēé hī ka Upíta ā. Ó gbɔga ɔlɛ́ Usáyímɔ̄ni, ɔ̄cɛ oyúklɔ́ ɔkpɛ́bɛ́ okónu ísu.

³³Ohígbū ɛ́gɔ́ɔmā, n le ɛhɔ̄ tū fu uwɔ ikpíkpó, a kē yá lɔhi ɛ́gɛ́nɛ̄ a wā ā. Abɔ̄ ó lɛ á, odúúdú alɔ bá iyɔ̄bū Ɔwɔicō amānyā ká ālɔ̄ pó ɔdā dóódu nɛ̄ Óndú ā da uwɔ ka ka ā.”

³⁴ Anɔ́ɔ Upíta nwūla okónu kahíníī, “Ɔkwɛ̄yi, n le jé ka Ɔwɔicō í má eyīgoo kú ɔ̄cɛ ŋ́.

³⁵Amáŋ ipú éwo dóódu ɔ̄cɛ dúúmā nōo yúufi nū, nōo kē yá ɔdā okpaakpa ó gē mīyɛ anú.

³⁶Aá jé olɛhɔ̄ nɛ̄ Ɔwɔicō tū gé lɛ ācɛ Ísrɛ̄lu, yɔ̄ ī tɔ́ɔna kú Ɔ̄kōolɔhi kú ɛbɔ́ ŋmá ɛgiyí Ujísɔ̄si Ohɔ́nyɛtá nōo wɛ Óndú kú ɔdā dóódu kú odúúdú ācɛ.

³⁷Aá jé ɔdā ocɛgbá nɛ̄hi nōo yá nēé tɔ́ɔna nū ɛbɛɛbɛ kú Ujudíya, ó hútu ŋmá Ugálīli igbīhi olɛhɔ̄ ka ācɛ kéē le pīyabɔ̄ cɛ́ɛ́ kéē lɛ ubatísim yá uwā nɛ̄ Ujɔ́ni oyúbatísim cɛ̄ ā.

³⁸Aá jé ka Ɔwɔicō le Alelékwū Ihɔ mɛ́mla ɔfú kpó lɛ Ujísɔ̄si kú Unásārēti. Ó gē yɛ ga ɛbɛɛbɛ, yɔ̄ ī yá ɔdā olɔhi lɛ ācɛ, ó klla gē há ācɛ dóódu nɛ̄ ebilíi bībáajɛ ā tá, ohígbū ka Ɔwɔicō yɔ̄ mla anú.

³⁹Alɔ kē wɛ ijáalí kú ɔdā dóódu nōó yá ipú ajɛ kú ācɛ Ujíyu mɛ́mla ipú Ujerúsālɛm dúú. É lɛ ɔ́ nyɔ́kpá kóō gekwú.

⁴⁰Amáŋ Ɔwɔicō kwú ɔ̄ ú héyī ŋmá ɔlékwū oŋmɔ́cī ɔ́mɛtá, anɔ́ɔ ó le yá kóō lɛ iyī nū mafú,

⁴¹ó wɛ odúúdú ācɛ Ujíyu nēé ma ɔ́ fú lɛ uwá ā ŋ́, amáŋ ó le ɔ́ mafú lɛ alɔ nēe wɛ ijáalí nɛ̄ Ɔwɔicō fu ɛɛ́ mā ā, alɔ nēe lé klla gwá mla anú eko nēé je ɔ́ héyī ŋmá ɔlékwū ā.

⁴²Anɔ́ɔ ó le íkwu je lɛ alɔ kā ālɔ̄ tɔ́ɔna kú Ɔ̄kōolɔhi ā lɛ ācɛ Ujíyu, cɛ́ɛ́ kú ālɔ̄ cījáalí ka Ujísɔ̄si wɛ ɔ̄cɛ nɛ̄ Ɔwɔicō fu kóō wɛ ɔ̄cɛ ohɛ́pɔ̄ kú ācɛ oyēeyī mɛ́mla ācɛ nēe gekwú ā.

⁴³Odúúdú ācomɛ́ɛbɛ ā le ɛlā ka lɛyíkwu ɔ́, bá ī ka ka odúúdú ācɛ nēe cɛ̄ɛ̄lā nū ā, Ɔwɔicō géē je íne nēé bīya ā yá uwā ɛhi o ŋmá lɛ ɔfú kú iyē nū.”

⁴⁴Abɔ̄ Upíta yɔ̄ ī ka ɛ̄nyā ā, Alelékwū Ihɔ ā wā í ce ɛyí kú odúúdú ācɛ nēe pó ɛlā ā.

⁴⁵Anɔ́ɔ ācɛ nēe cɛ̄ ŋmá ipú ācɛ Ujíyu nēe wā mla Upíta ā le kpó hídáagó, ohígbū keé lɛ ɛhi kú Alelékwū Ihɔ kpó lɛ aílɔ́wá dúú.

⁴⁶Ohígbū keé pó abɔ̄ é bá ī ka ucē ɛyɛ́ɛyɛ́yí, klla bá ī cɛ̄tra Ɔwɔicō ā.

⁴⁷Anɔ́ɔ Upíta dɔɔ̄kā kahíníī, “Ācɛ nēe bá nyā mīyɛ ɛhi kú Alelékwū Ihɔ ɛ́gɛ́nɛ̄ alɔ mīyɛ ā dúú, ɔ̄cɛ dúúmā lɔfú ci o bī éŋkpɔ̄ lɛ yá uwā ubatísim glá ā?”

⁴⁸Anɔ́ɔ ó da uwá kéē bī iyē kú Ujísɔ̄si Ohɔ́nyɛtá le yá uwā ubatísim. Anɔ́ɔ é da ɔ́ kóō dēē yɔ̄ mla uwá ɛ́ɛ́.