Read idoma ÚKLƆ́ KÚ ĀCOTƐ̄HƆ̄ 11 Bible Online

ÚKLƆ́ KÚ ĀCOTƐ̄HƆ̄ 11 - idoma bible

ÚKLƆ́ KÚ ĀCOTƐ̄HƆ̄ 11

¹Ācotɛ̄hɔ̄ mɛ́mla ayínɛ́ nēe bá ɛga dóódu kú Ujudíya le pó ka aéwɔhá mīyɛ ɛlā kú Ɔwɔicō ā dúú ɛɛ́.

²Abɔ̄ ó i lɛ āa, eko nɛ̄ Upíta le tá Ujerúsālɛm ā, ācɛ ōhī kú ipú ācɛ nēe cɛ̄ɛ̄lā kú apī ō hɛ́ aílɔ́wá ā le ɔdā ka tū ɔ̄ kahíníī,

³“A le tá ɔlɛ́ kú aéwɔhá olufíyé gaá le gbɔga, a kōō le ɔdōlé lé mla uwá.”

⁴Anɔ́ɔ Upíta le ɛ́gɛ́nɛ̄ ɛjɛ̄ɛ̄jī ɛlā ā yá lɛ kpɛ́mm ŋmá ajaajɛ ā, kpó ka lɛ uwá. Ó kahíníī,

⁵“Abɔ̄ n yɔ̄ ī gbɔ̄ɔkɔ ipú igelī nɛ̄hi kú Ujɔ́pa ā, obócádēde kwú um ú, anɔ́ɔ n má odée yɔ̄ ī wāajɛ bɛ̄ɛka idɔngwu nɛ̄hi nēé bī ɔ̄ ɔ́kíkā ɛnɛ yɔ̄ ī wāajɛ ŋmá ɔkpáncō. Anɔ́ɔ ó gaá māhayi ɛgiyí um á.

⁶N leyī hɛ́ tū ɔ̄, anɔ́ɔ n má ɛbɛ́ ō lɛ ikpó ɛnɛ, ɛbɛ́ ɔlɛ́, mɛ́mla ɛbɛ́ ipácí, aɔ́dā ō lɛ ipú piyajɛ mɛ́mla ígbáanɔ kú ipácí.

⁷Anɔ́ɔ n pó ɔkɔ kú ɔ̄cɛ éyi yɔ̄ ī da um ka, ‘Cāŋjɛ Upíta, ŋmó ká ā klla lé.’

⁸Amáŋ n ka, ‘ehée Óndú. Ohígbū ka ɔdā dúú nōo wɛ ɔdēlihɔ ámāŋ nōo blínyī í ga okónu kú um jéjéē ɛ́ɛ́ ŋ́.’

⁹Anɔ́ɔ ɔ̄cɛ ā le ɛlā ka gā um igbo ɔmpa ŋmá ɔkpáncō ka amíyɔ̄ɔ̄ híī je ɔdā nōó tīihɔ ŋ́ nɛ̄ Ɔwɔicō le yá tīihɔ ka ɔdēlihɔ ŋ́.

¹⁰Ɛ̄nyā yá igbo ɛtá, anɔ́ɔ é kwú odúúdú nū ú cīgbīhi ga ɔkpáncō á.

¹¹Eko nɛ̄ ɛ̄nyā í yá kwɛyí bōōbū ā, ācɛ ɛtá nēé tɛ̄hɔ̄ fu um ŋmá Usísarīya ā gāājɛ ɔlɛ́ ɛga nɛ̄ alɔ bá ā.

¹²Alelékwū Ihɔ ā da um ka amiyɔ̄ɔ̄ lɛ ɔtū ō bɛ́ɛpa ŋ́ ka n̄ nyɔ̄ mla uwá. Ayínɛ́ ɛhīlī nēé bá mbá ā tīkpó mla um ga Usísarīya, anɔ́ɔ alɔ le tá ɔlɛ́ Ukɔnélīyɔ̄si á.

¹³Ó le ɛ́gɛ́nɛ̄ ó má alelékwū-ōtɛ̄hɔ̄ háyi ipú inu ɔlɛ́ nū nōo da ɔ́ kóō lɛ ɛhɔ̄ tū ga Ujɔ́pa kéē lɛ Usáyímɔ̄n nēé hī ka Upíta ā hīgwú ā da alɔ.

¹⁴Ó da ɔ́ ka ɔ́ɔ géē hɛ́ anú mɛ́mla odúúdú ācɛ ɔlɛ́ nū tá lɛ ɔ́.

¹⁵Anɔ́ɔ Upíta da uwá kahíníī, “Eko nɛ̄ n gbɔɔ́ ō kɛlā ā, Alelékwū Ihɔ ā gaá ce uwá ɛyí bɛ̄ɛka ɛ́gɛ́nɛ̄ ó ce alɔ ɛyí eko aflɛ́yí ā.

¹⁶Eko ɔ́ɔmā ā, anɔ́ɔ n le blakwu ɛlā nɛ̄ Óndú ā ka ka, ‘Ujɔ́ni bī éŋkpɔ̄ gē yá ācɛ ubatísim, amáŋ é géē bī Alelékwū Ihɔ lɛ yá aá ubatísim.’

¹⁷Ó tá péee ka Ɔwɔicō le ɛdɔ ɛhi ékpó nōó kpó lɛ alɔ eko nɛ̄ alɔ cɛ̄ɛ̄lā kú Óndú Ujísɔ̄si Ohɔ́nyɛtá ā kpó lɛ aéwɔhá nēe bá mbá ā dúú ɛɛ́, ó lɛ ā, ɔnyɛ wɛ ami nɛ̄ n lɔfú tá Ɔwɔicō áafú glá!”

¹⁸Eko nēé le ɔdā nēe bá ā pó ā, okónu í hɛ́ uwā gɛ ŋ́. Anɔ́ɔ é cɛ̄tra Ɔwɔicō kahíníī, “Ɔwɔicō le ɛga je lɛ aéwɔhá ā dúú kéē pīyabɔ̄, cɛ́ɛ́ kéē yēeyī.”

¹⁹ Ācɛ ōhī kú ācocɛ̄lɔ̄wɔicō nēé pahila ohígbū oyáŋmó nōo gbɔɔ́ ohígbū Usitífin ā le pɛ́ jāā gaajɛ Ufinísiya mɛ́mla Usáyíprɔ̄si mɛ́mla Ántīyɔ̄ku, nyɔ̄ gē tɔ́ɔna kú Ɔ̄kōolɔhi ā lɛ ācɛ Ujíyu ōfōōfūnū.

²⁰Amáŋ ācɛ ōhī kú uwā nēe wɛ ācɛ Usáyíprɔ̄si mɛ́mla Usayiríni ā, abɔ̄ é gā Ántīyɔ̄ku ā, é gbɔɔ́ ō tɔ́ɔna kú Ɔ̄kōolɔhi kú Óndú Ujísɔ̄si ā tɛ́ɛcɛ lɛ ācɛ Ugríisi [5] dúú.

²¹Ɔfú kú Óndú yɔ̄ mla uwá, anɔ́ɔ ācɛ alɛwa nēe cɛ̄ ā kwú pīya tá Óndú ā ɔkwu á.

²²Eko nɛ̄ icɔ́ɔci nēe bá Ujerúsālɛm ā lɛ ofu ɛlā kú uwā nyā pó ā. Anɔ́ɔ é lɛ Ubánābasi tū nyɔ̄ Ántīyɔ̄ku á.

²³Eko nōó gā gaá lɛ úklɔ́ nɛ̄hi nɛ̄ Ɔwɔicō yá ā má ā, ɔtū he ɔ́ nɛ̄hi, anɔ́ɔ ó lɔfú tū odúúdú uwā iyē kéē háyi kli lɛ Óndú ā ŋmá ɔtū ékpó.

²⁴Ohígbū kóō wɛ ɛ́nɛ́nɛ̄ ɔ̄cɛ, nōo le mu mla Alelékwū Ihɔ, ó kē cɛ̄ ɛlɔ̄ɔwɔicō. Anɔ́ɔ é le ācɛ alɛwa kpó wā gé lɛ Óndú ā á.

²⁵Ubánābasi le tá Utásɔsi gaá dɔɔ̄kā Usɔ́lu.

²⁶Eko nōó lɛ ɔ́ má ā, ó lɛ ɔ́ bī wā Ántīyɔ̄ku. Ipú iháyí odunkwulu é gē jīla tɔ̄há mla icɔ́ɔci, gē nwū ācɛ alɛwa ɛlā. Ajɛ Ántīyɔ̄ku nēé hī ayíkpó ā ka ācɔ̄lóhɔ́nyɛtá aflɛ́yí á.

²⁷Ɛplá ɔ́ɔmā nɛ̄ ācomɛ́ɛbɛ ōhī le pɛ́ ŋmá Ujerúsālɛm wā Ántīyɔ̄ku.

²⁸ Ɔ̄cɛ éyi kú uwā nōo lé ka Ágābɔsi ā cāŋjɛ le ka tɛ́ɛcɛ ŋmá ɔfú kú Alelékwū Ihɔ ka ɔkpɛtā nɛ̄hi ɔ́ɔ géē ŋmó odúúdú ɛcɛ. Ɔdā nyā le yá eko kú ɔcɛ́ nɛ̄hi Uklɔdíyɔsi.

²⁹Anɔ́ɔ ayíkpó ā le miya ka ɔnyɔɔnyɛ ká ɔ́ɔ géē lɔfú tīyē, ɛ́gɛ́nɛ̄ ɔfú kú nū jɛ̄ lɛ ā, kóō lɛ ɔdā nēe í le tá ayínɛ́ nēe lā Ujudíya abɔ̄ ā tɛ̄hɔ̄ fu uwá.

³⁰É kwú ɔdā nēé le tá uwā abɔ̄ ā ú tū Ubánābasi mɛ́mla Usɔ́lu ɛhɔ̄ fu anyākwɔ́cɛ ā.