Read idoma ÚKLƆ́ KÚ ĀCOTƐ̄HƆ̄ 13 Bible Online

ÚKLƆ́ KÚ ĀCOTƐ̄HƆ̄ 13 - idoma bible

ÚKLƆ́ KÚ ĀCOTƐ̄HƆ̄ 13

¹Ācomɛ́ɛbɛ mɛ́mla aítíca: Ubánābasi, Usáyímɔ̄ni (nēé hī ɔ̄cɛ onōbí ā), Ulúsīyɔsi (nōo ŋmá Usayiríni), Umánɛn (nēé bī jɛ̄ mla Uhérɔ̄du) [6] mɛ́mla Usɔ́lu.

²Eko nēé yɔ̄ ī gwū okónu klla yɔ̄ ī gbɔ̄ɔkɔ lɛ Óndú ā, Alelékwū Ihɔ ā kahíníī, “Aá habɔ̄ Ubánābasi mɛ́mla Usɔ́lu tá gā um ohígbū úklɔ́ nɛ̄ n fu uwá kú nū ā.”

³Eko nēé klla le okónu gwū lɛ ɔkɔ gbā kwɛyí ā, é lɛ abɔ̄ ce uwá ɛyí anɔ́ɔ é kwú uwā ú tɛ̄hɔ̄ nyɔ̄ á.

⁴Abɔ̄ ó i lɛ āā, abɔ̄ Alelékwū Ihɔ ā lɛ uwá tɛ̄hɔ̄ gɛcɛ ā, é le tá Usɛlúsīya anɔ́ɔ é le tá ipú úgbéenyi ŋmá abɔ́ɔ gā Usáyiprɔ̄si.

⁵Eko nēé gā ajɛ Usalámisi ā, é tɔ́ɔna kú ɛlā Ɔwɔicō ipú Ɛgogbɔ̄ɔkɔ kú ācɛ Ujíyu ā. Ujɔ́ni Umáki kē yɔ̄ abɔ́ɔ ī tá uwā abɔ̄.

⁶É le yɛ ŋmá okónōgwu éyi kú ɔlíidɔ ā ga okónōgwu ɔhá jāā wāajɛ Upáfɔ̄si ā, ɛga nēé má ɔ̄cɛ ujíyu oyímabɔ̄ mɛ́mla ɔ̄comɛ́ɛbɛ ɛ̄kɛ̄mgbɛ̄ éyi nēé hī ka Uba-Ujísɔ̄si ā.

⁷Ó ī yɔ̄ mla Usájīyɔ̄si Upɔ́lɔ̄si, Igbómína kú ɔlíidɔ ā, ó wɛ ɔ̄cɛ ojéyi. Igbómína ā le Ubánābasi mɛ́mla Usɔ́lu hīgwú, ohígbū koó tíne kóō pó ɛlā Ɔwɔicō.

⁸Amáŋ Ɛlíyāmasi ɔ̄cɛ oyímabɔ̄ ā (ohígbū ka ɔ́ɔmā wɛ ɛyí iyē kú nū á) dɔɔ̄kā kóō lɛ Igbómína ā eyī pīya kú ō híī cɛ̄ɛ̄lā Ɔwɔicō ŋ́.

⁹Amáŋ Usɔ́lu nēé hī ka Upɔ́lu dúú ā, le mu mla Alelékwū Ihɔ ā, ó leyīkwu oyímabɔ̄ ā eyī glīglī,

¹⁰anɔ́ɔ ó kahíníī, “Awɔ, ɔyínɔ̄nyīlɔ kú ebilíi, awɔ olɛlā kú ɔdā olɔhi ō yá dóódu, a le mu mla ɛ̄kɛ̄mgbɛ̄ mla ɔ̄cɛ ō plá dóódu ā, ā yɔ̄ gē ka ka ɔkwɛ̄yi kú Óndú ā ɔ́ɔ wɛ ɛ̄kɛ̄mgbɛ̄!

¹¹Amáŋ pīyeyī abālɔbányā, abɔ̄ kú Óndú ā lɛ uwɔ kwú ɛɛ́, eyī kú uwɔ géē pu anɔ́ɔ á kē gáā mɛ́ɛbɛ gɛ ŋ́ jāā gbéeko éyi.” Anɔ́ɔ ɔkwɔɔkwu ɔ́ɔmā ébú mɛ́mla obū gaá klá anú. Anɔ́ɔ ó yɔ̄ ī lɛ abɔ̄ maajɛ ī dɔɔ̄kā ɔ̄cɛ éyi kóō bī ɔ̄ jé ɔwɛ.

¹²Anɔ́ɔ eko nɛ̄ Igbómína ā lɛ ɔdā nōo yá ā má ā, ó cɛ̄ ɛlā kú Óndú ā, ɔdā nēé gē nwū lɛyíkwu Óndú ā klla kē le hɛ́ ɔ́ idáagó nɛ̄hi.

¹³Upɔ́lu mɛ́mla ācɛ nēe tīkpó mla anú ā le tá ipú úgbéenyi ŋmá Upáfɔ̄si gā Upága, igelī nɛ̄hi kú Upamfilíya, ɛga nɛ̄ Ujɔ́ni habɔ̄ uwā tá, klla kwúcē le tá Ujerúsālɛm ā.

¹⁴É yɔ̄ ī yāwu kpɔ́ ŋmá Upága gā Ántīyɔ̄ku kú Upisidíya. Anɔ́ɔ ɛ̄cī Usábāti ā é le pɛ́ tá ipú Ɛgogbɔɔkɔ gaá yāajɛ.

¹⁵Eko nɛ̄ ɔ̄cɛ éyi lɛ ɔkpá kú íne kú Umósīsi mɛ́mla ɔkpá nɛ̄ ācomɛ́ɛbɛ tá ā jé kwɛyí ā, otrɛ̄yí kú Ɛgogbɔ̄ɔkɔ nɛ̄ŋcɛ̄ ā le ɛhɔ̄ tū fu uwá kahíníī, “Ayínɛ́ um, ɔ́dāŋ ka aá lɛ ɛlā ō tá ɔ̄cɛ ɔtūlé dúúmā lɛ alɔ, ayíka aá ka mɛ́ɛ́nɛ.”

¹⁶Anɔ́ɔ Upɔ́lu cāŋjɛ, ó le abɔ̄ yá lɛ uwá kéē mā uya, anɔ́ɔ ó gbɔɔ́ ō kɛlā kahíníī, “Ācɛ Ísrɛ̄lu, mɛ́mla aéwɔhá nēe ī gbō Ɔwɔicō ɛ̄gbā ā, kócōō, aá jāhɔ̄ gā um!

¹⁷ Ɔwɔicō kú ācɛ Ísrɛ̄lu le aádáádā alɔ fu, anɔ́ɔ ó lɛ uwá pīya éwo ɛnɛ̄hi eko nēé wɛ ugbɔga ipú ajɛ Íjīpiti ā. Ó bī abōlɔfú le uwā kpó wɛ̄ɛcɛ ŋmá abɔ́ɔ.

¹⁸Ó tá uwā abɔ̄ iháyí ofɛpa ipú ígbíli nááná nɛ̄ ucē kú uwā mafú lɛ ɔ́ koó he uwá ɔtū ŋ́ mā.

¹⁹Ó lɛ éwo ahāapa yíífi ŋmá ipú ajɛ kú Ukénan ā, ó kwú ajɛ kú uwā ú lɛ ācɛ ɔlɛ́ nū bɛ̄ɛka úgwū ā.

²⁰Ɛ̄nyā yá ɛplá iháyí úlā ce ofɛpa cigwó. Ó je aɔ́cɛ́ ohɛ́pɔ̄ lɛ uwá jāā gbéeko kú Usámūwɛ̄lu ɔ̄comɛ́ɛbɛ.

²¹Anɔ́ɔ eko nēé dɔɔ̄kā ɔcɛ́ á, Ɔwɔicō kwú Usɔ́lu, ɔyínɔ̄nyīlɔ kú Ukíssi, ɔ̄cɛ kú ipɔ́ɔma kú Ubénjamīn, ú lɛ uwá. Ó gbō uwā iháyí ofɛpa.

²²Eko nōó lɛ ɔ́ nū ā, ó kwú Udéfīdi ú pīya ɔcɛ́ kú uwā, ɔ̄cɛ nɛ̄ Ɔwɔicō cījáalí kú nū ka, ‘N le má ka Udéfīdi, ɔyí kú Ujése, wɛ ɛdɔ ɔ̄cɛ nōo he um ɔtū, nōo géē yá ɔdā dóódu nɛ̄ n tíne kóō yá.’

²³Ujísɔ̄si nōo wɛ ɔyɔ́ɔ́yí kú Udéfīdi, nɛ̄ Ɔwɔicō le pīya Ohɔ́nyɛtá kú ācɛ Ísrɛ̄lu, ɛ́gɛ́nɛ̄ ó cokónu lɛ ā.

²⁴ Ofíílí kóō o wā, Ujɔ́ni le ɔna tá lɛ odúúdú ācɛ Ísrɛ̄lu kéē le pīyabɔ̄ ŋmá íne nēé bīya ā, cɛ́ɛ́ kéē lɛ ubatísim yá uwā.

²⁵Abɔ̄ úklɔ́ kú Ujɔ́ni gáā mɛ ā, ó da ācɛ ā ka, ‘Ɔnyɛ nɛ̄ aá gbɛlá ka um wɛ ā? Ń wɛ ɔ̄cɛ nɛ̄ aá yɔ̄ ī gbēyī ā ŋ́ Amáŋ ɔ̄cɛ éyi gē wā igbīhi um, ɔ̄cɛ nɛ̄ ń cíkā ká um plla áblákpá ŋmá ikpó kú nū ŋ́.’

²⁶“Ayínɛ́ um, ayí kú ipɔ́ɔma kú Ébrahām, mɛ́mla odúúdú aílɔ́wá nēe bá ipú aá, nēe ī gbō Ɔwɔicō ɛ̄gbā a. Alɔ nēé tū olɛhɔ̄ nōo ī nya ɔ̄cɛ tá nyā fu alɔ á!

²⁷Ācɛ nēe bá Ujerúsālɛm mɛ́mla aótrɛ̄yí kú uwā í jé ɔ̄ éjúuma ka anú wɛ Ohɔ́nyɛtá ā ŋ́, ɛ́ɛ́ nēé ī jɛ́ɛ́yí kú ɛlā nɛ̄ ācomɛ́ɛbɛ ka nɛ̄ ācɛ gē jé tɛ́ɛcɛ ɛ̄cī Usábāti dóódu ā ŋ́. Ɔkwɛ̄yi nɛ, ɛpɔ̄bí nēé ŋmó ɔ̄ ā lɛ ɛlā nɛ̄ ācomɛ́ɛbɛ ka ā yá jīla.

²⁸Nááná nēé má ɔdā dúúmā nōó yá, nēé géē bī lɛ kɛpɔ̄ ɔ̄cɛ ō ŋmó tū ɔ̄ ŋ́ mā ā, é da Upáyílēti kóō lɛ ɔ́ ŋmó kpɔ́.

²⁹ Eko nēé lɛ ɔdā dóódu nɛ̄ ācomɛ́ɛbɛ ā ka lɛyíkwu ɔ́ ā yá jīla ā, ācɛ o tá ɔ̄ ɔkwu kwú ɔ̄ ú wāajɛ ŋmá ɔcóōnyɔ́kpá ā, anɔ́ɔ é kwú ɔ̄ ú tá ipú únóji á.

³⁰Amáŋ Ɔwɔicō kwú ɔ̄ ú héyī ŋmá ɔlékwū.

³¹Ipú ɛ̄cī alɛwa ó le iyī nū mafú lɛ ācɛ nēe tīkpó mla anú ŋmá Ugálīli gā Ujerúsālɛm ā, ācɛ nēe kē wɛ ijáalí kú nū lɛ ācɛ Ujíyu abālɔbányā ā.

³²Alɔ kē yɔ̄ amānyā ká ālɔ̄ bī Ɔ̄kōolɔhi ā gé lɛ aá. Ɔwɔicō le okónu nōó ce lɛ aádáádā alɔ ā,

³³yá jīla lɛ alɔ nēe wɛ ayípɛ̄ ɔlɛ́ uwā ā, oŋmá lɛ ō je Ujísɔ̄si héyī ŋmá ɔlékwū. Ɛ́gɛ́nɛ̄ é tá ɔ̄ ipú ɔkpá kú Aíjē olɔhi ɔ́mpa ā ka, ‘Awɔ wɛ Ɔyínɔ̄nyīlɔ kú um á, ícɛ nyā n le pīya ádā ɛɛ́.’

³⁴Ɛ̄nyā wɛ ɔdā nɛ̄ Ɔwɔicō ka lɛyíkwu o je ɔ́ héyī ŋmá ɔlékwū o yá ɛ́ɛ́ kóō wā tāajɛ ipú únóji ŋ́ mā, ‘N géē hɔ́hā otīihɔ nɛ̄ n ce Udéfīdi okónu nū ā ce uwɔ.’

³⁵Ohígbū ɔ́ɔmā ó kē klla ka ɔ́ ipú Aíjē olɔhi ɔhá ka, ‘Á gáā cɛ̄ ká ɔ̄cocɛ̄hɔ̄ ká uwɔ kóō wā tāajɛ ipú únóji ŋ́.’

³⁶Ohígbū ka, Udéfīdi le ɔdā nɛ̄ Ɔwɔicō miya ā yá tū ɔ̄ ɔtū eko kú nū, anɔ́ɔ ó gekwú, é le ɔ́ nyi mla aádáádā nū, anɔ́ɔ ɔkpíyē kú nū kwú watāajɛ ipú únóji á.

³⁷Amáŋ ɔ̄cɛ nɛ̄ Ɔwɔicō yá kóō héyī ŋmá ɔlékwū ā í kē wā tāajɛ ŋ́.

³⁸Ayínɛ́, aá lɛ ɛ̄nyā jé lɔhi lɔhi ka o ŋmá ɛgiyí Ujísɔ̄si nēé cɛ̄ olɛhɔ kóō o je yɛ́ɛhi kú íne nɛ̄ aá bīya ā lɛ aá á.

³⁹É le ɛjɛ̄ɛ̄jī ācɛ nēe cɛ̄ɛ̄lā nū ā hɛ́tá ŋmá íne nēé bīya nɛ̄ íne kú Umósīsi í hɛ́ uwā tá ŋmá anú glá ŋ́ mā ā.

⁴⁰Aá lɛ ɛlá kwu ɔ̄, cɛ́ɛ́ kú ɔdā nɛ̄ ācomɛ́ɛbɛ ka ā kóō híī yá aá ŋ́.

⁴¹‘Aá jāhɔ̄, aá nēe gē ka obɔ̄bí kú ɔdā nɛ̄ Ɔwɔicō le ka ā, aá le hídáagó, ká aá le yíífi. Ohígbū ka n yá odée eko ká aá, ɔdā nɛ̄ aá gáā cɛ̄ gbóógbóō glá ŋ́, ɔ́dāŋ ka ɔ̄cɛ dúú kōō lɛyí nū ka lɛ aá.’”

⁴²Abɔ̄ Upɔ́lu mɛ́mla Ubánābasi bá yɔ̄ ī nyɛ̄ɛ̄ ŋmá Ɛgogbɔ̄ɔkɔ ā, ācɛ ā le uwá plla ɛ̄cī usábāti ɔhá cɛ́ɛ́ kéē kɛlā lɛ uwá kpɔ́ lɛyíkwu ɔdā nēé tɛtɛ ka gbɔbū ā.

⁴³Anɔ́ɔ eko nɛ̄ ójila kú Ɛgogbɔ̄ɔkɔ ā le kābɔ̄ ā, ācɛ Ujíyu alɛwa mɛ́mla aílɔ́wá alɛwa nēe je pīya tá ɔ́wá kú ācɛ Ujíyu ā, kwúce Upɔ́lu mɛ́mla Ubánābasi. Ayíkpó ā le ɛlā ka lɛ uwá, anɔ́ɔ é le ɔfú tū uwā iyē klla da uwá kéē yɔ̄ ī gboló ce olɔhi nɛ̄ Ɔwɔicō gē yá ā.

⁴⁴Ɛ̄cī Usábāti ɔhá ā, ɛyínɛ̄hi ācɛ kú ipú igelī ā le jīla tɔ̄há kéē pó ɛlā kú Ɔwɔicō.

⁴⁵Amáŋ eko nɛ̄ ācɛ Ujíyu lɛ ɛwa nɛ̄hi ā má ā, ímálānyī le mu uwá ɔtū, anɔ́ɔ é le áafú tá tū ɛlā nɛ̄ Upɔ́lu ka ā klla le ɛcá cá ɔ̄.

⁴⁶Anɔ́ɔ Upɔ́lu mɛ́mla Ubánābasi le ɔtū lɛ kɛlā tɛ́ɛcɛ kahíníī, “Ó cɛgbá kéē kɛlā kú Ɔwɔicō lɛ aá gbɔbū, amáŋ abɔ̄ aá kē tá ɛlā ā, anɔ́ɔ aá kē lɛ iyī aá ŋmɛ́pɔ̄bí ka aá cíkā ō lɛ oyēeyī opiyóó ŋ́ mā. Abālɔbányā alɔ leyī pīya tá aílɔ́wá ā.

⁴⁷Ohígbū ka Óndú ā jɔfú lɛ alɔ ka, ‘N kwú uwɔ ú ce ká ā wɛ ɔlá ofíyajɛ lɛ aílɔ́wá, cɛ́ɛ́ ká odúúdú ācɛ kú ɛcɛ kéē le nyatá.’”

⁴⁸Eko nɛ̄ aílɔ́wá ā lɛ ɛ̄nyā pó ā, é gwéeyē, klla cɛ̄tra ɛlā kú Ɔwɔicō. Anɔ́ɔ odúúdú ācɛ nēé fu kéē lɛ oyēeyī opiyóó ā cɛ̄ ɛlɔ̄ɔwɔicō á.

⁴⁹Ɛwa kú ācɛ kú ajɛ abɔ́ɔ bá yɔ̄ ī pó ɛlā lɛyíkwu Óndú ā

⁵⁰Amáŋ ācɛ Ujíyu lɛ ɔtū kú ācɛnyā aílɔ́wá mɛ́mla ācɛ nɛ̄hi nēe ī gbā Ɔwɔicō ɛ̄gbā ā wu klíicō. Anɔ́ɔ é gbɔɔ́ ō bɛ́yíkwu Upɔ́lu mɛ́mla Ubánābasi, é klla lɛ uwá nū ŋmá ajɛ kú uwā.

⁵¹Amáŋ é lɛ úmúlá nōo bá uwā ikpó ā gwō bónū kóō wɛ ijáalí kú uwā. Anɔ́ɔ é le yɛ tá Ikónīyɔm.

⁵²Anɔ́ɔ ācocɛ̄lɔ̄wɔicō ā le mu mla éeyē mɛ́mla Alelékwū Ihɔ ā á.