Read idoma ÚKLƆ́ KÚ ĀCOTƐ̄HƆ̄ 14 Bible Online

ÚKLƆ́ KÚ ĀCOTƐ̄HƆ̄ 14 - idoma bible

ÚKLƆ́ KÚ ĀCOTƐ̄HƆ̄ 14

¹Ɔdā ékpónú nōo híkpó du uwā ipú ajɛ kú Ántiyɔ̄ku kú Upisídiya ā yá Ukónīyɔm. Upɔ́lu mɛ́mla Ubánābasi le tá Ɛgogbɔ̄ɔkɔ ā, anɔ́ɔ é le ɛlɔ̄ɔwɔicō ka ɔwɛ nōo yá ká ɛwa nɛ̄hi kú ācɛ Ujíyu mɛ́mla aílɔ́wá kéē cɛ̄ɛ̄lā Ujísɔ̄si.

²Amáŋ ācɛ Ujíyu nēé cɛ̄ ŋ́ mā ā, lɛ ɔtū kú aílɔ́wá ā wu klíicō, é kla lɛ uwá ɔtū bīya lɛyíkwu Upɔ́lu mɛ́mla Ubánābasi.

³Nááná ā, ācotɛ̄hɔ̄ ā bá abɔ́ɔ aláadi alɛwa, bá ī kɛlā kú Ujísɔ̄si ā tɛ́ɛcɛ pāālā, Óndú ā le mafú ka ɔdā nēé yɔ̄ ī ka ā wɛ ɔkwɛ̄yi eko nēé kɛlā lɛyíkwu ogbonɛnɛ kú nū lɛ uwá ā. Anɔ́ɔ ó je ɔfú lɛ uwá kéē yá ɔdōcābɔ̄ mɛ́mla ɔdīdáagó.

⁴Amáŋ ācɛ kú igelī nɛ̄hi ā le kɔ̄ ɛpa, ācɛ ōhī yɛce ācɛ Ujíyu, ācɛ ōhī kē yɛce ācotɛ̄hɔ̄ ā.

⁵Anɔ́ɔ aílɔ́wá mɛ́mla ācɛ Ujíyu mɛ́mla aótrɛ̄yí kú uwā, lɛ ujɔ̄ tū kéē lɔfú kpó kwu Upɔ́lu mɛ́mla Ubánābasi. É klla kē le miya kéē lɛ ɛcɔ̄ tá kla uwá ā dúú.

⁶Eko nɛ̄ ayíkpó ā le ujɔ̄ kú uwā ā jé ā, anɔ́ɔ é le pɛ́kwu gā aígelī nɛ̄hi kú Ulístra mɛ́mla Udábi, igelī nɛ̄hi kú Ulayikónīya klla yɛ jāā ga aígelī nɛ̄hi nēe yɛ jīla ajɛ ā tá ā.

⁷É tɔ́ɔna kú Ɔ̄kōolɔhi ā abɔ́ɔ dúú.

⁸Ipú ajɛ kú Ulístra ó lɛ ɔ̄cɛ éyi yɔ̄ nōo wɛ ocīkpó ŋmá ipú. Ó kē yāwu jééjéē ɛ́ɛ́ ŋ́.

⁹Ɔ̄cɛ āa cīce le ahɔ̄ jē lɛ Upɔ́lu abɔ̄ ó yɔ̄ ī kɛlā ā. Upɔ́lu le má ka ó cɛ̄ɛ̄lā, ka ɔ̄cɛ kē hɛ́ ɔ̄ tá glá, anɔ́ɔ ó le eyī plla tū ɔ̄ eyī glīglī

¹⁰ó le ɔkɔ cɛyí le ɛgba dɛ̄ kahíníī, “Cāŋjɛ háyi icō kpaakpa!” Anɔ́ɔ ɔnyīlɔ ā le ómbli tá gicō kpá, gbɔɔ́ ō yāwu.

¹¹Anɔ́ɔ eko nɛ̄ ójila ā lɛ ɔdā nɛ̄ Upɔ́lu yá ā má ā, é je ɔkɔ kú uwā gicō anɔ́ɔ é ka ɔkɔ Ulayikónīya kahíníī, “Aɔ́wɔ ā le pɛ́ wāajɛ gé lɛ alɔ bɛ̄ɛka ācɛ ā ɛɛ́!”

¹²Anɔ́ɔ é hī Ubánābasi ka Uséyɔ̄si, anɔ́ɔ é hī Upɔ́lu ka Uhémēsi ohígbū ka anú wɛ ɔkɛ̄lā kú ācɛ ɛpa ā á.

¹³Anɔ́ɔ ɔ̄cogwɛ́ɛya kú Uséyɔ̄si nɛ̄ Agblīihɔ-nɛ̄hi kú nū yɔ̄ iyɔ̄bū kú igelī ā bī ɛna nēé le o tátɔ̄há kú ododó tū uwā ɔkɔ ā wā okómpinu, anɔ́ɔ anú mla ɛwa kú ācɛ ā tínē kéē lɛ ɛya gwó lɛ ayíkpó ā.

¹⁴Amáŋ eko nɛ̄ Ubánābasi mla Upɔ́lu, ɔ̄cocɛ̄hɔ̄ ā, le pó á, é lɛ úwé kú uwā híla, anɔ́ɔ é le pɛ́ bɛ̄cɛ ga ɛgiyí ācɛ ā, bá yɔ̄ ī dɛ̄gba ka,

¹⁵ “Aóklóbīya, ɔdí nɛ̄ aá yɔ̄ ī yá ā? Alɔ wɛ ācɛ bɛ̄ɛka aá ā nɛ, ācɛ nēe ī kwú bɛ̄ɛka aá ā dúú. Alɔ bī Ɔ̄kōolɔhi gé lɛ aá, ká aá habɔ̄ ɔdā icííci nēe bá ā tá, ká aá pīyeyī tá Ɔwɔicō oyēeyī, ɔ̄cɛ nōo yá ɔkpáncō mɛ́mla ɛcɛ mɛ́mla ísu mɛ́mla ɔdā dóódu nēe bá ipú uwā ā.

¹⁶Eko otɛtɛ ā, ó cɛ̄ ka éwo dóódu kéē yāwu ɔwɛ kú ɔtú uwā.

¹⁷Amáŋ, ó kē habɔ̄ iyī nū tá icííci nōó lɛ ijáalí ŋ́ nɛɛ ŋ́. Ohígbū kóō gē ma ogbonɛnɛ kú nū fú ŋmá lɛ ɔwɔ nōo ī yā ŋmá ɔkpáncō mɛ́mla aɔ́dɛ̄hɔ̄ ō yá eko kú uwā. Ó kē je ɔdōlé lɛ aá klla ī yá ká ɔtū kóō he aá.”

¹⁸É bī ɛlā nēe bá ā ɔkābɔ̄fú le ɛya nēé gáā gwó lɛ uwá ā ci.

¹⁹Ācɛ Ujíyu ōhī le pɛ́ ŋmá Ántiyɔ̄ku mɛ́mla Ikónīyɔm anɔ́ɔ é gaá lɛ ācɛ ā ɔtū pīya tá iyī uwā, anɔ́ɔ é le ɛcɔ̄ tá klá Upɔ́lu á. Abɔ̄ é gbɛlá ka ɔ́ɔ gekwú ɛɛ́ mā, é lɛ ɔ́ pi tɛ́ɛcɛ ŋmá igelī ā.

²⁰Amáŋ eko nɛ̄ ayíkpó ā le jīla pīya anú tá ā, ó cāŋjɛ, le tá igelī ā. O ŋmɔ́ɔ̄cī nū, anú mla Ubánābasi le yɛ tá Udábi.

²¹Upɔ́lu mɛ́mla Ubánābasi le ɔna kú Ɔ̄kōolɔhi ā tá ipú igelī kú Udábe anɔ́ɔ é le ācɛ alɛwa pīya ayíkpó á. Anɔ́ɔ é kwúcē ga Ulístra, é le tá Ikónīyɔm mɛ́mla Ántīyɔ̄ku kú Upisídiya.

²²Abɔ́ɔ ā é lɔ́fú tū ācocɛ̄lɔ̄wɔicō ā iyē. É kē bá ī tū uwā ɔtū kwɔtū kéē yɔ̄ ī cɛ̄lɔ̄ɔwɔicō kpɔ́. Anɔ́ɔ é le nwū uwā ka o ŋmá ōwē nɛ̄hi piíí ɛ́ɛ́ nɛ̄ alɔ géē gā ajɔ̄ɔ̄cɛ́ kú Ɔwɔicō glá á.

²³Upɔ́lu mɛ́mla Ubánābasi le anyākwɔ́cɛ fu ipú icɔ́ɔci dóódu, anɔ́ɔ eko nēé le okónu gwū le ɔkɔ gbā le Ɔwɔicō ā, é le ācɛ ā kpó tū Ondú nēé lɔtūce ā abɔ̄.

²⁴Eko nēé le yɛ bū ajɛ kú Upisídīya ā, é gā ajɛ kú Upamfílīya.

²⁵Eko nēé le ɔna kú olɛhɔ̄ ā tá kwɛyí ipú Upɛ́ga ā, anɔ́ɔ é le pɛ́ tá Atálīya á.

²⁶O ŋmá abɔ́ɔ ā é le yɛ úgbéenyi kwúcē wā Ántiyɔ̄ku, ɛga nēé kpó uwā tū Ɔwɔicō abɔ̄ kóō leyīkwu uwá ohígbū úklɔ́ nēé yá kwɛyí ā.

²⁷Anɔ́ɔ eko nēe gāājɛ ā, é lɛ ācɛ kú icɔ́ɔci ā hīgwú tɔ̄há, anɔ́ɔ é le odúúdú ɔdā nɛ̄ Ɔwɔicō bī uwā yá ā kpó ka lɛ uwá, mɛ́mla ɛ́gɛ́nɛ̄ ó nwūla ɔwɛ lɛ aílɔ́wá kéē cɛ̄ɛ̄lā nū lɛ ā.

²⁸Anɔ́ɔ é kē yɔ̄ mla ācocɛ̄lɔ̄wɔicō ā abɔ́ɔ ɔyā alɛwa.