Read idoma ÚKLƆ́ KÚ ĀCOTƐ̄HƆ̄ 15 Bible Online

ÚKLƆ́ KÚ ĀCOTƐ̄HƆ̄ 15 - idoma bible

ÚKLƆ́ KÚ ĀCOTƐ̄HƆ̄ 15

¹Ācɛ éyi ŋmá Ujudíya wā Ántiyɔ̄ku, é kē bá ī nwū ācocɛ̄lɔ̄wɔicō ā ɛlā, kahíníī, “N táafú ŋ́ ayíka é lɛ aá apī hɛ́ ɛ́gɛ́nɛ̄ uculo kú Umósīsi lɛ ā, é gáā hɛ́ aá tá glá ŋ́.”

²Amáŋ Upɔ́lu mɛ́mla Ubánābasi táafu lɔfúlɔfú mla ācɛ ā lɛyíkwu ɛlā nēé ka ā, anɔ́ɔ é le ɔ́ miya kú Upɔ́lu mɛ́mla Ubánābasi mɛ́mla ācocɛ̄lɔ̄wɔicō kú Ántiyɔ̄ku ōhī kéē ga Ujerúsālɛm gaá lɛ ayíkpó ā mɛ́mla anyākwɔ́cɛ má lɛyíkwu ɛlā nyā.

³Anɔ́ɔ ācɛ icɔ́ɔci ā tá uwā ikpó ga ɔwɛ, abɔ̄ é bū Ufinísīya mɛ́mla Usamérīya, é kɛlā kú ɛ́gɛ́nɛ̄ aílɔ́wá pīyeyī tū Ɔwɔicō lɛ ā. Ɔ̄kā nyā yá kú odúúdú ācocɛ̄lɔ̄wɔicō ā kéē gwéeyē nɛ̄hi.

⁴Eko nēé gāājɛ Ujerúsālɛm ā, ācɛ icɔ́ɔci mɛ́mla ācotɛ̄hɔ̄ mɛ́mla anyākwɔ́cɛ ā mīyɛ uwá lɔɔlɔhi. Anɔ́ɔ é le odúúdú ɔdā nɛ̄ Ɔwɔicō bī uwā yá ā kpó ka lɛ uwá á.

⁵Amáŋ ayínɛ́ ōhī nēe wɛ ígwu nēé hī ka Ufárisīi ā cāŋjɛ kahíníī, “Ó cɛgbá kéē lɛ uwá apī hɛ́ kéē klla da uwá kéē lɛ íne kú Umósīsi tū.”

⁶Ācotɛ̄hɔ̄ ā mɛ́mla anyākwɔ́cɛ ā le jīla tɔ̄há kéē téyī tá ɛlā ā.

⁷Abɔ̄ é lɛ áafú tá gbojī ajā, Upíta cāŋjɛ anɔ́ɔ ó kahíníī, “Ayínɛ́ um, aá jé ka o ŋméko nōo yɛ ā, Ɔwɔicō lɛ um fu ɔtāhɛ̄ aá ká n̄ tɔ́ɔna ká Ɔ̄kōolɔhi ā lɛ aílɔ́wá, cɛ́ɛ́ kéē le pó kéē klla mīyɛ cɛ̄.

⁸Anɔ́ɔ Ɔwɔicō, nōo jé ɔtū kú ɔ̄cɛ ā, cɛ̄ ijáalí lɛ uwá ŋmá lɛ ōje Alelékwū Ihɔ lɛ uwá dúú ɛ́gɛ́nɛ̄ ó je lɛ alɔ ā.

⁹Ó kē má eyīgoo yá alɔ lɔhi fíyɛ́ uwā ŋ́, amáŋ ó je íne nēé bīya ā yá uwā ɛhi ohígbū kéē cɛ̄ɛ̄lā nū.

¹⁰Ohígbū ɛ́gɔ́ɔmā, ɔdíyá nɛ̄ aá ī já Ɔwɔicō má ŋmá lɛ ō lɛ iyó ōgbɛnú nɛ̄ aádā alɔ ámāŋ alɔ abɔ̄ alɔ í bī glá ŋ́ mā ce ayíkpó ā ɛyí ā?

¹¹Ó wɛ ɛ́gɔ́ɔmā nōó cíkā ō wɛ ā ŋ́, alɔ cɛ̄ anɔ́ɔ Ɔwɔicō le alɔ nyatá o ŋmá lɛ ogbonɛnɛ kú Óndú Ujísɔ̄si lɛ alɔ, ɛ́gɛ́nɛ̄ nɛ̄ ó lɛ lɛ uwá dúú ā.”

¹²Odúúdú ójila ā bá hímm le ahɔ̄ jē lɛ Ubánābasi mɛ́mla Upɔ́lu abɔ̄ é bá ī kā ɔ̄kā kú ɔdōcābɔ̄ mɛ́mla ɔdídáagó dóódu nɛ̄ Ɔwɔicō bī uwā yá ɔtāhɛ̄ aílɔ́wá ā.

¹³Eko nēé lɛ ɛlā ka kwɛyí ā, Ujémīsi tóohi kahíníī, “Ayínɛ́ um, aá jāhɔ̄ gā um.

¹⁴Usáyímɔ̄ni le ɔ̄kā kú ɛ́gɛ́nɛ̄ Ɔwɔicō gbɔbū le māfú ka anúɔ lɛlá kwu aílɔ́wá o ŋmá lɛ ō je ācɛ ŋmá ipú uwā kéē kwú pīya ācɛ ɔlɛ́ nū ɛɛ́.

¹⁵Ɛlā kú ācomɛ́ɛbɛ ā cɛ̄tra ɛ̄nyā. Ɛ́gɛ́nɛ̄ é tá ɔ̄ kahíníī,

¹⁶“Igbīhi ɛ̄nyā n géē kwúcē, n kē í gwó inu kú Udéfīdi nōo ca ā. N géē je ɛga nēe yíífi ā túgwó. N kē í gwó ɔ̄ gicō,

¹⁷ká ācɛ o hile ā kéē dɔɔ̄kā Óndú ā, uwá mɛ́mla aílɔ́wá dóódu nēé bī iyē kú um hī uwā igwú ā.

¹⁸Óndú ā le yá ká ācɛ kéē lɛ odée nyā jé gbojī ɛɛ́.’

¹⁹Abɔ̄ ó i lɛ ā, ɛ́gɛ́nɛ̄ n hɛ́pɔ̄ ā wɛ ka ālɔ̄ híī junwalu lɛ aílɔ́wá nēe pīyeyī tá Ɔwɔicō ā ŋ́.

²⁰Amáŋ ó cíkā ká ālɔ̄ lɛ ɔkpá tá fu uwá ká ālɔ̄ da uwá kéē tá ɔdā dóódu nēe lɛ iyē kwu ɛcí mɛ́mla ikpɔ́nyā ōce mɛ́mla ajā ōgbo mɛ́mla ɛbɛ́ nēé ŋmó ŋmá o lɛ ɔ́ ɔkɔ jílacē mɛ́mla ɛ̄nɛ̄ oyī yɔ̄ anú kpɔ́.

²¹Ohígbū ka, é gē jé íne kú Umósīsi tɛ́ɛcɛ ipú Ɛgogbɔ̄ɔkɔ ɛ̄cī Usábāti dóódu ŋmá íkííkée, e kē ī bī ɛlā kú nū le tɔ́ɔna ipú igelī dóódu ā.”

²²Anɔ́ɔ ɔ̄cotɛ̄hɔ̄ mɛ́mla anyākwɔ́cɛ mɛ́mla ɛjɛ̄ɛ̄jī ācɛ icɔ́ɔci ā cɛ̄ kɔ́ɔ̄ lɔhi kú aá lɛ ācɛ fu ŋmá ɔtāhɛ̄ aá, kú aá lɛ uwá tū mla Upɔ́lu mɛ́mla Ubánābasi nyɔ̄ Ántīyɔ̄ku ā. Anɔ́ɔ é lɛ Usáyílāsi mɛ́mla Ujúdasi nōo lé ka Ubasábasi dúú ā fu,

²³anɔ́ɔ ē kwú ɔkpá nyā ú tū uwā ɛhɔ̄ nyɔ̄ á. Ɔdā nēé tá tū ipú ɔkpá ā yɔ̄ á, “Alɔ, ācotɛ̄hɔ̄ ā mɛ́mla anyākwɔ́cɛ, ayínɛ́ aá, hokónu tū ayínɛ́ alɔ nēe wɛ aílɔ́wá, nēe ī bá ajɛ Ántīyɔ̄ku mɛ́mla Usiríya mɛ́mla Usilísīya.

²⁴Alɔ le pó ka ācɛ ōhī kú alɔ gáā kɛlā nōo le aá ɔtū wuklíicō, ó kē junwalu lɛ aá ipú odo, nááná nōó wɛ alɔ je íkwu lɛ uwá ŋ́ mā ā.

²⁵Ipú ójila kú alɔ, alɔ má ka ó cíkā ká ālɔ̄ lɛ ācɛ fu, lɛ uwá tɛ̄hɔ̄ fu aá mɛ́mla Ubánābasi mɛ́mla Upɔ́lu, ācɛ nēe he alɔ ɔtū,

²⁶nɛ̄ úklɔ́ kú Óndú ā Ujísɔ̄si Ohɔ́nyɛtá hile ligíí o je uwá ɛyí.

²⁷Anú yá nɛ̄ alɔ tū Ujúdasi mɛ́mla Usáyílāsi, ācɛ nēe géē da aá ɛlā nēe bá nyā abɔ̄yī uwā ŋmá okónu kú uwā ā.

²⁸Ó kē he Alelékwū Ihɔ mɛ́mla alɔ ɔtū kú alɔ je iyó ogbɛnú fíyɛ́ aíne nēe cɛgbá mbá nyā ce aá ɛyí ŋ́.

²⁹Aá híī lé ɔdā dúúmā nēé le gwɛ́ɛya lɛ ɛcí ŋ́, aá lé ɔdā dúúmā mla oyī kú nū ŋ́, aá lé ɛbɛ́ nēé ŋmó ŋmá lɛ o le ɔ́ ɔkɔ nyacē gbuúlú ŋ́, aá cikpɔ́nyā ɔhá ŋ́. Ɔ́dāŋ́ ka aá lɛ iyī aá kwú cíí ŋmá aɔ́dā nēe bá nyā, ó géē lɔhi lɛ aá. Aá mŋ́móō.”

³⁰É le ācotɛ̄hɔ̄ ā bītá anɔ́ɔ é le yɛ ga Ántīiyɔ̄ku, ɛga nēé lɛ ɛjɛ̄ɛ̄jī ígwu kú ācɛ nēe cɛ̄ɛ̄lā ā túbá ā, anɔ́ɔ é kwú ɔkpá ā ú lɛ uwá.

³¹Eko nēé lɛ ɔ́ jé ā, é gwéeyē ohígbū ɔfú nēé le tū uwā iye ā.

³²Ujúdasi mɛ́mla Usáyílāsi, nēe kē wɛ ācomɛ́ɛbɛ abɔ̄yī uwā ā, tá uwā ɔtū kwu ɔtū kē lɔfú tū uwā iyē ŋmá lɛ ɛlā nēé ka ā.

³³Abɔ̄ é bá ī yɛɛ ā, ayínɛ́ ā le mŋmóō tū uwā lɛ uwá tū nyɔ̄ ɛgiyí ācɛ nēe tū uwā ɛhɔ̄ ā.

³⁴Amáŋ Usáyílāsi má ka ó cɛgbá ká anúɔ géē yɔ̄ abɔ́ɔ.

³⁵Amáŋ Upɔ́lu mɛ́mla Ubánābasi mɛ́mla ācɛ alɛwa ɔhá bá Ántīyɔ̄ku gē nwū ācɛ klla ī kɛlā kú Óndú ā lɛ ācɛ.

³⁶Eko le gla yɛɛ ā, Upɔ́lu da Ubánābasi kahíníī, “Wā, ká ālɔ̄ cīgbīhi gaá jila ayínɛ́ nēe bá ipú igelī dóódu nɛ̄ alɔ tɔ́ɔna kú ɛlā kú Óndú lɛ uwa ā, ká ālɔ̄ má ɛ́gɛ́nɛ̄ é bá lɛ.”

³⁷Anɔ́ɔ Ubánābasi tíne ō bī Ujɔ́ni, nōo lé ka Umáki ā, nyɔ̄ mla uwá.

³⁸Amáŋ Upɔ́lu gbɛlá ka ɔ́ lɔhi ō bī ɔ̄cɛ nōo kwúcē igbīhi hī aá tá Upamfilíya, nɛ̄ ɔ́ɔ nyɔ̄ gaá yúklɔ́ mla aá ŋ́ mā tɔ́ɔkwu ŋ́.

³⁹Anɔ́ɔ ukanā nɛ̄hi gā lɛ uwá á, anɔ́ɔ é le kābɔ̄ hī iyī uwā tá á. Ubánābasi kwú Umáki ú bíyē le yɛ tá úgbéenyi nyɔ̄ Usáyíprɔ̄si.

⁴⁰Amáŋ Upɔ́lu kwú Usáyílāsi ú bíyē, anɔ́ɔ é nyɛ̄ɛ̄ igbīhi nɛ̄ ācocɛ̄lɔ̄ɔwɔicō ā kwú uwá ú kpó tū ipú abɔ̄ kú Óndú ā.

⁴¹Anɔ́ɔ ó yɛ gaá bū Usiríya mɛ́mla Usilísīya gē lɛ ɔfú tū ācɛ icɔ́ɔci nēe bá abɔ́ɔ ā iyē.