Read idoma ÚKLƆ́ KÚ ĀCOTƐ̄HƆ̄ 16 Bible Online

ÚKLƆ́ KÚ ĀCOTƐ̄HƆ̄ 16 - idoma bible

ÚKLƆ́ KÚ ĀCOTƐ̄HƆ̄ 16

¹Upɔ́lu le tá Udábi mɛ́mla Ulístra dúú. Ɔyíkpó éyi yɔ̄ abɔ́ɔ, nēé hī ka Utímōti, ɔyínɔ̄nyīlɔ kú ɔnyā Ujíyu éyi nōo wɛ ɔyíkpó, amáŋ ádā nū wɛ ɔ̄cɛ Ugríisi.

²Ayínɛ́ nēe bá Ulístra mɛ́mla Ikoníyɔm ā ka olɔhi kú nū nɛ̄hi.

³Upɔ́lu tínē ká Utímōti kóō yɛce ɔ́, anɔ́ɔ ó cɛ̄ kéē lɛ ɔ́ apī hɛ́ á, ohígbū ka ācɛ Ujíyu nēe bá igelī abɔ́ɔ ā jé ka ádā nū wɛ ɔ̄cɛ Ugríisi.

⁴Abɔ̄ é bá ī yɛ ŋmá igelī éyi ga igelī ɔhá yɔ̄ ī da ācocɛ̄lɔ̄wɔicō kéē lɛ ɔdā nɛ̄ ācotɛ̄hɔ̄ mɛ́mla anyākwɔ́cɛ nēe bá Ujerúsālɛm ā yātū lɛyíkwu aíne ā tū.

⁵Anɔ́ɔ é lɔfú tū ācɛ icɔ́ɔci ā iyē kéē cɛ̄ɛ̄lā ā lɔɔlɔhi, anɔ́ɔ áluka kú ācɛ nēe ī cɛ̄lɔ̄ɔwɔicō gē lɛwa tōōtɔ̄ɔ̄ ɛ̄cī dóódu á.

⁶É bá ī yɛ ipú ajɛ kú Ufrayigíya mɛ́mla Ugalésīya ohígbū ka Alelékwū Ihɔ ā í cɛ̄ lɛ uwá tɔ́ɔna kú olɛhɔ̄ ā ajɛ kú Ésīya ŋ́.

⁷Eko nēé gā ocojōnjīlɛ̄ kú Umísīya ā, é yá kéē ga Ubitiníya, amáŋ Alelékwū kú Ujísɔ̄si í cɛ̄ lɛ uwá ŋ́.

⁸Anɔ́ɔ é le yɛ nyɔ̄ gaá bū ipú Umísīya ā, anɔ́ɔ é le yɛ ga Utrɔ́wasi á.

⁹Upɔ́lu le ɔ̄na nā otú ɔ́ɔmā. Ó má ɔ̄cɛ Umasɛdónīya éyi háyi yɔ̄ gē gbɔ̄ɔkɔ lɛ ɔ̄ kahíníī, “Le yɛ wā Umasɛdónīya gaá tá alɔ abɔ̄.”

¹⁰Ɔkwɔɔkwu nɛ̄ Upɔ́lu lɛ ɔ̄na nyā nā kwɛyí ā, alɔ le tútū ká ālɔ̄ nyɔ̄ Umasɛdónīya, Ohígbū ka alɔ le ɔ́ ŋmótū ka Ɔwɔicō hī alɔ igwú ká ālɔ̄ í tɔ́ɔna kú Ɔ̄kōolɔhi ā lɛ uwá á.

¹¹Alɔ le tá úgbéenyi ŋmá Utrɔ́wasi anɔ́ɔ alɔ le yɛ kpaakpa le tá Usamótrēsi, anɔ́ɔ oŋmáɔ́ɔ̄cī nū alɔ le yɛ tá Unēyapólisi.

¹²Alɔ le yɛ ŋmá abɔ́ɔ i tá Ufilípayi, nōo yɔ̄ ipú ajɛ kú igelī nɛ̄hi kú Umasɛdónīya ɛga nɛ̄ ācɛ Uróm lā ā. Alɔ bá igelī nyā ɛ̄cī alɛwa.

¹³Ɛ̄cī Usábāti alɔ le bɛ̄cɛ ŋmá igelī ā le tá okónu ísu ɛga nɛ̄ alɔ leyīce ka ɛga nɛ̄ ācɛ Ujíyu gē túbá ī gbɔ̄ɔkɔ ā yɔ̄ ā. Alɔ má báajɛ le ɛlā ka lɛ ācɛnyā nēe wā í jīla tɔ̄há abɔ́ɔ ā.

¹⁴Ɔ̄cɛnyā éyi, nɛ̄ iyē nū lé ka Ulidíya, nōo ŋmá Utayatíra, ɔ̄cɛnyā nōo ī tɔ́hí īlī nōo wɛ oblúu bllábllá, nōo ī gbā Ɔwɔicō ɛ̄gbā ā. Anɔ́ɔ Óndú ā lɛ ɔ ɔtū túkwu ɛlā nɛ̄ Upɔ́lu yɔ̄ ī ka ā.

¹⁵Anɔ́ɔ eko nēé lɛ anú mɛ́mla ācɛ ɔlɛ́ nū yá ubatísim kwɛyí ā, ó gbɔ̄ɔkɔ lɛ alɔ kahíníī, “Ɔ́dāŋ́ ka aá cɛ̄ ipú ɔtú kú aá ka n le pīya ɔ̄cocɛlɔ̄ɔwɔicō ɛɛ́, ayíka aá wā í gbɔga ɔlɛ́ um.” Ó yá jāā gbéeko nōó lɛ alɔ ɔtū pīyeyī gaá le gbɔga abɔ́ɔ.

¹⁶Ɛ̄cī éyi abɔ̄ alɔ bá gē nyɔ̄ ɛga ogbɔ̄ɔkɔ ā, ɔyípɛ̄nɔ̄nyā ɔfiyɛ éyi nōo lɛ anjɛnū nōo ī cɛ lɛ ɔ́ mɛ́ɛbɛ ā le yɛ jīla alɔ ɔwɛ. Ó gē yá ije nɛ̄hi gé lɛ aóndú nū ŋmá lɛ o má ācɛ ɛbɛ.

¹⁷Ó yɔ̄ ī kwūcē Upɔ́lu mɛ́mla alɔ yɔ̄ gē dɛ̄gba ī kahíníī, “Ācɛ nēe bá ā wɛ ācocɛ̄hɔ̄ kú Ɔwɔicō o lɔfú fíyɛ́ dúú! É gē tɔ́ɔna kú ɔwɛ nōó géē nya aá tá ā.”

¹⁸Ó yá ɛ̄nyā ɛ̄cī alɛwa, jāā gbéeko nɛ̄ Upɔ́lu le cɔ̄nū, anɔ́ɔ ó pīyeyī le ɛlā ka lɛ anjɛnū ā kahíníī, “N bī iyē kú Ujísɔ̄si Ohɔ́nyɛtá da uwɔ ká ā bɛ̄cɛ ŋmá ipú nū!” Anɔ́ɔ alelekwū nōo ī cɛ̄ lɛ ɔ́ mɛ́ɛbɛ le bɛ̄cɛ ŋmá ipú nū eko ɔ́ɔmā piíí ā á.

¹⁹Amáŋ eko nɛ̄ aóndú nū le má ka ile nēé lɔtūce ā le yɛ ā, é lɛ Upɔ́lu mɛ́mla Usáyílāsi kwú, anɔ́ɔ é lɛ uwá pī ga ōlihī iyɔ̄bū ācogbāājɛ.

²⁰É lɛ uwá bī gé lɛ ācohɛ́pɔ̄. Anɔ́ɔ é kahíníī, “Ācɛ nēe bá ā wɛ ācɛ Ujíyu, é yɔ̄ ī junwalu ipú igelī kú ɔlɛ́ alɔ.

²¹É gē nwū uculo nōó yɔ̄ ipú íne nɛ̄ alɔ gē le tū ŋ́, abɔ̄ alɔ wɛ ācɛ Uróm ā.”

²²Anɔ́ɔ ɛwa ā le cētū ipú uwā gbɔɔ́ ō ŋmó uwā ijē. Ācohɛ́pɔ̄ ā lɛ otógwō kú uwā híla ŋmá uwá iyē, anɔ́ɔ é le íkwu je kéē bī itali le uwá gɔ́ á.

²³Eko nēé lɛ uwá gɔ́ igbo alɛwa ā, é lɛ uwá kpótū ijaló, é kē da ɔ̄cɛ ogbō-alagbá ā kɔ́ɔ̄ leyī hɛ́tū uwā lɔɔlɔhi.

²⁴Abɔ̄ é lɛ íkwu nyā je lɛ ɔ́ ā, ó lɛ uwá kpótu ināgbá eyīpú, kē lɛ uwá ikpó kpó wū odó.

²⁵Amáŋ ɛplá ahāpotú, Upɔ́lu mɛ́mla Usáyílāsi bá gē gbɔ̄ɔkɔ yɔ̄ ī gwííjē lɛ Ɔwɔicō, aálagbá ohile ā kē bá gē pó tā ɔ̄ lɛ uwá.

²⁶Igbeékpónú ajɛ gbɔɔ́ ō jíliyē nɛ̄ɛ̄nɛ̄hi, nōo yá ká ināgbá ā kóō jíliyē ŋmá ajīlɛ̄yí inu ga itikpa kú nū. Ikpíkpó ɔ́mā, ɔdōgwɔ̄wɛ dóódu le kpó nwūla, anɔ́ɔ agbá kú ɔnyɔɔnyɛ kē le kpó wī.

²⁷Eko nɛ̄ ɔ̄cɛ ogbō-alagbá ā le héyī kē le má bā odúúdú ɔwɛ kú ināgbá ā le kpó nwūla ā, ó lɛ ɛ̄wā kú nū pi ŋmá apɛ́ kóō gaá ŋmó iyī nū, abɔ̄ ó gbɛlá ka aálagbá ā é le pɛ́ kwu ā.

²⁸Amáŋ Upɔ́lu dɛ̄gba kahíníī, “Ā híī yá iyī uwɔ ɔdā dúúmā ŋ́, ohígbū ka odúúdú alɔ bá amānyā ā.”

²⁹Anɔ́ɔ ó ka kéē lɛ agege bī wā, anɔ́ɔ ó le inya kwu fíya ga eyīpú, le okwúukwu kpó kwajɛ gblugudu iyɔ̄bū Upɔ́lu mɛ́mla Usáyílāsi gē yúufi ī fīyégbúlú kpákpákpá.

³⁰Anɔ́ɔ ó lɛ uwá kpó wɛ̄ɛcɛ, anɔ́ɔ ó kahíníī, “Aɔ́kpani um, ɔdí nɛ̄ n géē yá ɛ́ɛ́ kéē lɛ um nyatá ā?”

³¹É tóohi kahíníī, “Cɛ̄ɛ̄lā kú Óndú Ujísɔ̄si cɛ́ɛ́ é géē lɛ uwɔ nyatá, awɔ mɛ́mla ācɛ ɔlɛ́ uwɔ.”

³²Anɔ́ɔ é le ɛlā kú Óndú ā ka lɛ anú mɛ́mla ɛjɛ̄ɛ̄jī ācɛ ɔlɛ́ nū.

³³Áwa ékpó ɔ́ɔmā piíí ā, ogbō-alagbá ā le uwá kpó, le uwá ágbe na. Anɔ́ɔ é lɛ ubatísim yá anú mɛ́mla ɛjɛ̄ɛ̄jī ācɛ ɔlɛ́ nū ikpííkpó ɔ́ɔmā á.

³⁴Ó kē lɛ uwá kpó wā ɔlɛ́ nū, lɛ ɔdōlé je lɛ uwá. Anú mɛ́mla ɛjɛ̄ɛ̄jī ācɛ ɔlɛ́ nū gwéeyē nɛ̄hi ohígbū kéē cɛ̄ɛ̄lā Ɔwɔicō ɛɛ́.

³⁵Amáŋ abɔ̄ eyī le nyā ā, ācohɛ́pɔ̄ ā lɛ idáhandā tū nyɔ̄ kahíníī, “Lɛ ācɛ ā hɛ́tá.”

³⁶Anɔ́ɔ ogbō-alagbá ā lɛ ɛlā ā da Upɔ́lu kahíníī, “Ācohɛ́pɔ̄ ā lɛ ɛhɔ̄ tū wā kéē lɛ aá hɛ́tá ɛɛ́. Ohígbū ɛ́gɔ́ɔmā, aá le bɛ̄cɛ kú aá nyɔ̄ ɛbɔ́.”

³⁷Amáŋ Upɔ́lu da uwá kahíníī, “É ŋmó alɔ ɛpɔ̄bí kú ɔdōbɔ̄bí dúú nɛ̄ alɔ yá ŋ́, nááná é kē le alɔ gɔ́ ɔtāhɛ̄ ɛwa, alɔ nēe wɛ ācɛ ajɛ kú Uróm! Anɔ́ɔ ē kē lɛ alɔ kpótú ipú ināgbá. Anɔ́ɔ abālɔbányā é tínē kéē kpó alɔ bɛ̄cɛ wɛɛlɛ ɛkwūbá āā? Alɔ tá. Éē gā abɔ̄yī uwā gaá kpó alɔ bɛ̄cɛ.”

³⁸Idáhandā ā gaá lɛ ɛpɔ̄ ɛlā nyā kpó lɛ ācohɛ́pɔ̄ ā, anɔ́ɔ ufi yá uwā abɔ̄ é le pó kéē wɛ ācɛ ajɛ kú Uróm ā.

³⁹Anɔ́ɔ é le pɛ̄ wā gaá le abɔ̄ kwajɛ lɛ uwá, anɔ́ɔ é lɛ uwa kpó wɛ̄ɛcɛ ŋmá ipú agbá. Anɔ́ɔ é ké lē da uwá kéē nyɛ̄ɛ̄ ŋmá igelī kú ɔlɛ́ aá á.

⁴⁰Abɔ̄ é nyɛ̄ɛ̄ ŋmá ināgbá ā, é le pɛ́ ga ɔlɛ́ Ulidíya. É le ācocɛ̄lɔ̄wɔicō má abɔ́ɔ, é le ɛlā ō tū ɔ̄cɛ ɔtū kwɔtū ka lɛ uwá, anɔ́ɔ é kē nyɛ̄ɛ̄ á.