Read idoma ÚKLƆ́ KÚ ĀCOTƐ̄HƆ̄ 17 Bible Online

ÚKLƆ́ KÚ ĀCOTƐ̄HƆ̄ 17 - idoma bible

ÚKLƆ́ KÚ ĀCOTƐ̄HƆ̄ 17

¹Abɔ̄ é gaá le gla Amfipólīsi mɛ́mla Apoloníya ā, anɔ́ɔ é gā ajɛ Utesalónīka ɛga nɛ̄ Ɛgogbɔ̄ɔkɔ kú ācɛ Ujíyu éyi yɔ̄ ā.

²Ɛ́gɛ́nɛ̄ ó wɛ ucē kú Upɔ́lu ā, ó le yɛ tá Ɛgogbɔ̄ɔkɔ ā, anɔ́ɔ ɛplá Usábāti ɛtá ó yɔ̄ ī kɛlā lɛ uwá gē je ɛlā ŋmá ɛlɔ̄ɔwɔicō.

³Ó gē ka ɛyí ɛlɔ̄ɔwɔicō ā lɛ uwá gē mafú lɛ uwá ɛ́gɛ́nɛ̄ ó cɛgbá ká Ohɔ́nyɛtá kóō móōwē piíí, klla í héyī ŋmá ɔlékwū. Ó klla gē da uwá kahíníī, “Ujísɔ̄si nɛ̄ n gē da aá ɛlā kú nū nyā, anú wɛ Ohɔ́nyɛtá á.”

⁴Ācɛ ōhī kú uwā cɛ̄ɛ̄lā nɛ̄ Upɔ́lu mɛ́mla Usáyílāsi ka ā, anɔ́ɔ é kwú pīya tɔ̄há mla Upɔ́lu mɛ́mla Usáyílāsi á ɛ́gɔ́ɔmā nɛ̄ ó lɛ lɛ alɛwa kú ācɛ Ugríisi, nēe ī gbā Ɔwɔicō ɛ̄gbā, mɛ́mla ācɛnyā alɛwa nēe cɛgbá ipú igelī ā á.

⁵Amáŋ ācɛ Ujíyu ōhī kē má uwā ímálānyī, anɔ́ɔ é lɛ ācɛ ɛflɛ́ɛfu nēe kē bɔ̄bíipú ā kpó ŋmá ipú úláyi, anɔ́ɔ uwá mɛ́mla ācɛ Ujíyu le túbá kéē hútú. É le yá ká odúúdú ācɛ kú igelī ā kéē cīlɛ̄fú. Anɔ́ɔ é le cɛ̄tū ɔlɛ́ Ujásin kéē dɔɔ̄kā Upɔ́lu mɛ́mla Usáyílāsi cɛ́ɛ́ kéē lɛ uwá kpó pi wā gé lɛ aígabɔ̄ ā.

⁶Amáŋ eko nēé má uwā gɛ ŋ́ mā a, é lɛ Ujásin mɛ́mla ācɛ ōhī kú ācocɛ̄lɔ̄wɔicō ā kpó pi wā iyɔ̄bū aígabɔ̄ kú igelī ā, anɔ́ɔ é le ɔkɔ cɛyí dɛ̄gba kahíníī, “Ācɛ nēe bá nyā, ge hɛ́ unwalu táajɛ ɛga dóódu nēé nyɔ̄ ā! Abālɔbányā é kē gā ɔlɛ́ alɔ amānyā dúú ɛɛ́.

⁷Ujásin kē mīyɛ uwá tū ɔlɛ́ nū. Odúúdú uwā bá yɔ̄ ī bīya íne kú Usísa, yɔ̄ ī ka ka ɔcɛ́ ɔhá ɔ́ɔ yɔ̄, nēé hī ka Ujísɔ̄si.”

⁸Eko nɛ̄ ɛwa kú ācɛ ā mɛ́mla aígabɔ̄ kú igelī ā le ɛlā nyā pó ā, ɔtū kú ɛjɛ̄ɛ̄jī uwā le wuklíicō.

⁹Anɔ́ɔ eko nɛ̄ Ujásin mɛ́mla aɔ́mpa nū lɛ ɛfiyɛ gbo a é lɛ uwā hɛ́tá.

¹⁰Otóótú ɔ́ɔmā ayínɛ́ ā lɛ Upɔ́lu mɛ́mla Usáyílāsi tíkpó ga Uberíya. Abɔ̄ é gāājɛ ā, é le tá ipú Ɛgogbɔ̄ɔkɔ kú ācɛ Ujíyu.

¹¹Amáŋ ācɛ Ujíyu nēe bá nyā kē lɛ ojīlīmā fíyɛ́ aɛ́nɛ̄ e bá Utesalónīka á, ohígbū ka uwá ā mīyɛ ɛlā ā lɔfú lɔfú. É kē ī jila ɛlɔ̄ɔwɔicō ā ɛ̄cī dóódu kéē má ɔ́dāŋ ka ɛlā nɛ̄ Upɔ́lu ka ā wɛ ɔkwɛ̄yi.

¹²Anú yá nɛ̄ alɛwa kú uwā cɛ̄ á. Alɛwa kú ācɛnyā ōcɛgbá nɛ̄hi kú Ugríisi mɛ́mla ācɛnyīlɔ kú Ugríisi cɛ̄ dúú.

¹³Amáŋ eko nɛ̄ ācɛ ujíyu, nēe lā Utesalɔ́nīka, le pó ka Upɔ́lu ɔ́ɔ yɔ̄ ī kɛlā Ɔwɔicō ajɛ Ubéríya dúú ā, é klla le pɛ́ nyɔ̄ abɔ́ɔ, gbɔɔ́ ō tū ɛwa ā okónu gē da uwá kéē yíkpɛ́lā.

¹⁴Ikpííkpó ɔ́ɔmā, ācocɛ̄lɔ̄wɔicō ā le Upɔ́lu bītá nyɔ̄ okónu ísu, amáŋ Usáyílāsi mɛ́mla Utímōti bá Uberíya kpɔ́.

¹⁵Ācɛ nēe le Upɔ́lu bíyē ā lɛ̄ ɔ́ bītá jāā gaajɛ Átɛnsi. Anɔ́ɔ é kwúcē ga Uberíya mla ukɔ́ nɛ̄ Upɔ́lu tū kéē le ɔ́ yá tɔ́ɔtɛ́ lɛ Usáyílāsi mɛ́mla Utímōti kéē wā í tá anúɔ abɔ́ɔ.

¹⁶Abɔ̄ Upɔ́lu yɔ̄ gē gbēyī uwā Átɛnsi ā, eko nɛ̄ ó le má ka igelī ā ɔ́ɔ le mu mla ɛcí ā, ɔtū kú nū le bīya nɛ̄hi.

¹⁷Ó le yɛ tá ipú Ɛgogbɔ̄ɔkɔ ā gaá kɛlā lɛ ācɛ Ujíyu mɛ́mla aílɔ́wá nēe ī gbā Ɔwɔicō ɛ̄gbā ā, ó kē ī kɛlā lɛ uwā ipú olihī ɛ̄cī dóódu, ó klla ī kɛlā lɛ ācɛ nēe hɛ́dēēlē í yɛ abɔ́ɔ ā.

¹⁸Aítíca ōhī nēe yɛ ɔgwu kú íjééyī kú Epikúrīn mɛ́mla Usitóyīki wā í táafú mla Upɔ́lu dúú. Anɔ́ɔ aóhī kú uwa kahíníī, “Ɔdí nɛ̄ ogwuda nyā bī gáā ka mɛ́ɛ̄ ā?” Aɔ́há kē kahíníī, “Ó lɛbɛ̄ɛka ɔ̄cɛ nōo gē tɔ́ɔna lɛ ɔwɔ kú aílɔ́wá ā.” É ka lɛ ā, ohígbū ka Upɔ́lu kɛlā lɛyíkwu Ujísɔ̄si mɛ́mla ohéyī ŋmá ɔlékwū kú nū.

¹⁹Anɔ́ɔ é kwú Upɔ́lu, le ɔ́ bī wā iyɔ̄bū aígabɔ̄ kú igelī ā, nēé hī ka Arɛyopágɔ̄si, anɔ́ɔ é kahíníī, “Á géē lɔfú da alɔ ɔdā ɛ̄yīpɛ̄ nāa gē nwū nyā glá ā?

²⁰Ɛlā ɛ̄yīpɛ̄ nāa gē bī wā ahɔ̄ kú alɔ yɔ̄ á. Ohígbū ɔ́ɔmā alɔ tíne ká ālɔ̄ lɛyí ɛlā nēe bá nyā jé.”

²¹Ɔdā nōo he odúúdú ācɛ Átɛnsi mɛ́mla aílɔ́wá nēe lā abɔ́ɔ ā ɔtū ā wɛ ka o bī eko kú uwā yɔ̄ ī kā klla yɔ̄ ī pó ɛlā ɛ̄yīpɛ̄.

²²Anɔ́ɔ Upɔ́lu má háyicō iyɔ̄bū aígabɔ̄ kú igelī ā, anɔ́ɔ ó kahíníī, “Ācɛ Átɛnsi, n má kóō he aá ɔtū nɛ̄hi kú aá gbā aɔ́wɔ alɛwa ɛ̄gbā.

²³Ohígbū ka abɔ̄ n yɔ̄ ī yɛ ipú igelī kú ɔlɛ́ aá ā, n má aɔ́dā nēé i gbā uwā ɛ̄gbā ā, n má ede éyi, nēé tá ɔkpá tū ɔ̄ ka, ‘Ákú ɔwɔ nɛ̄ ɔ̄cɛ i jé ŋ́.’ Ó lɛ ā, ɔdā nɛ̄ aá gē gbā ɔ̄ ɛ̄gbā ɔ́ɔmā, nɛ̄ aá jé ɔ̄ ŋ́ mā, nɛ̄ n gē tɔ́ɔna nū abālɔbányā lɛ aá á.

²⁴Ɔwɔicō nōo yá ɛcɛ mɛ́mla ɔdā dóódu nóō yɔ̄ ipú nū ā, ɛ́gɛ́nɛ̄ ó wɛ Óndú kú ɔkpáncō mɛ́mla ɛcɛ ā, ó gē lā ipú áklɔ̄kpɛ nɛ̄ ɔ̄cɛ gwó ā ŋ́.

²⁵Ɛ́ɛ́ nɛ̄ ɔ̄cɛ ɔlamu ī bī abɔ̄ kú nū yá ɔdā nōo ce ɔ́ ɛgbá glá ŋ́, ohígbū ka anú abɔ̄yī nū gē je oyēeyī mɛ́mla owu nɛ̄ ɔ̄cɛ ī fu mɛ́mla ɔdā dóódu lɛ ācɛ dóódu á.

²⁶Ɔwɔicō yá odúúdú ācɛ ɛdɔ ɛyɛ́ɛ́yí ŋmá ɛgiyí ɔ̄cɛ ékpó. Ó klla le yá kéē lā ɛga ɛyɛ́ɛ́yí kú ipú ɛcɛ nyā ā. Ó lɛ eko nēé í yɔ̄ piíí mɛ́mla ɛga piíí nēé yɔ̄ ā miya táajɛ gbɔbū ɛ́ɛ́ nōó yá uwā á.

²⁷Ó le uwá yá cɛ́ɛ́ kéē dɔɔ̄kā nū, cɛ́ɛ́ ɔ̄cɛ í jé ŋ́ kéē lɛ ɔ́ pīyɛ̄ abɔ̄ é gē tíne nū ɛ́gɛ́nɛ̄ ɔ̄cɛ le abɔ̄ maajɛ pɛɛpɛ ī tíne odée ā. Nááná ā, Ɔwɔicō í kē yɔ̄ ligbó lɛ ɔ̄cɛ dúúmā kú alɔ ŋ́,

²⁸Ohígbū ka ipú opīyatɔhā mla anú ā yá nɛ̄ alɔ yēeyī, klla gē yɛ, nɛ̄ alɔ klla lɛ oyēeyī á, ɛ́gɛ́nɛ̄ ācɛ otɔ́kpá ōhī kú aá ka ā, ‘Alɔ wɛ ayí nū dúú nɛ.’

²⁹Ɛ́gɛ́nɛ̄ alɔ wɛ ayí kú Ɔwɔicō ā, ó cíkā nɛ̄ alɔ gē gbɛlá ka Ɔwɔicō ā wɛ íkpékwūja kú ugóolu (oje ɔdɔ) ámāŋ oje nɛ̄hɛ́ ámāŋ ɛcɔ̄ nɛ̄ alɛɛcɛ gbɛlá nū klla bī abɔ̄ kú uwā le yá ā ŋ́.

³⁰Ɔwɔicō leyī gwū eko nɛ̄ ācɛ í jé ɔ̄ ŋ́ mā bónū, amáŋ abālɔbányā ó je ɔ́da lɛ odúúdú ācɛ ɛga dóódu kéē le pīyabɔ̄.

³¹Ohígbū kóō lɛ ɛ̄cī éyi tū, kóō bī ɔ̄cɛ éyi nōó fu ā lɛ ɛpɔ̄ okpaakpa ka tū odúúdú ācɛ kú ɛcɛ ā. Ó kē le mafú lɛ odúúdú ācɛ ɛdɔ ɔ̄cɛ nɛ̄ ɔ̄cɛ ɔ́ɔmā wɛ ā oŋmá lɛ ō je ɔ́ héyī ŋmá ɔlékwū.”

³²Eko nēé lɛ o héyī ŋmá ɔlékwū kú ācɛ nēe gekwú ā pó ā, ācɛ ōhī le ɛhɛ yɛ tū ɔ̄, amáŋ ɔhá kahíníī, “Alɔ klla géē pó ɔkɔ kú uwɔ igbɔhá ohígbū ɛlā nyā ɛ́ɛ́.”

³³Abɔ̄ ó i lɛ āā, Upɔ́lu nyɛ̄ɛ̄ ŋmá ɛgiyí uwā.

³⁴Ācɛ ōhī wā í le cɛ̄ tɔ̄há mla anú kē cɛ̄ ɛlā nōó ka ā. Udiyonisíyɔ̄si, ɔ̄cɛ éyi kú aígabɔ̄ mɛ́mla ɔ̄cɛnyā éyi nēé hī ka Udamárīsi, mɛ́mla ācɛ ɔhá nēe bá mla uwá ā wɛ ipú ācɛ nēe cɛ̄ ā dúú.