Read idoma ÚKLƆ́ KÚ ĀCOTƐ̄HƆ̄ 18 Bible Online

ÚKLƆ́ KÚ ĀCOTƐ̄HƆ̄ 18 - idoma bible

ÚKLƆ́ KÚ ĀCOTƐ̄HƆ̄ 18

¹Igbīhi ɛ̄nyā Upɔ́lu nyɛ̄ɛ̄ ŋmá Átɛnsi, anɔ́ɔ ó le tá Ukɔ́rīnti.

²Ajɛ abɔ́ɔ ā ó gaá le Ɔ̄cɛ Ujíyu éyi nēé hī ka Akwíla, ɔ̄cɛ ajɛ kú Upɔ́ntɔ̄si ā jé iyē, Ɔ̄cɛ ā mɛ́mla ɔnyā nū Uprisílaí ŋmá Ítāli gbojī ɛ́ɛ́ ŋ́. Ohígbū ɔ́da nɛ̄ Uklɔdíyɔ̄si Usísa je ka odúúdú ācɛ Ujíyu kéē le pɛ́ nyɛ̄ɛ̄ ŋmá ajɛ Uróm ā. Upɔ́lu le yɛ kóō lɛ uwá má.

³Ó gaá yɔ̄ mla uwá gē yúklɔ́ mla uwá, ohígbū kóō gē yá ije o bī lá ɔdōlé kú nū ŋmá áklɔ̄kpɛ īlī nōó gē gɔ́ ā, ɛ́gɛ́nɛ̄ ācɛ ā gē yá dúú ā.

⁴Ó ī kɛlā Ɔwɔicō gē táafú mla ācɛ Ujíyu mɛ́mla Ācɛ Ugríisi ipú Ɛgogbɔ̄ɔkɔ ā ɛ̄cī Usábāti dóódu, yɔ̄ ī yá kéē cɛ̄ ɛlɔ̄ɔwɔicō.

⁵Eko nɛ̄ Usáyílāsi mɛ́mla Utímōti gā ŋmá Umasɛdónīya ā, Upɔ́lu kwú eko kú nū ú táajɛ yɔ̄ ī tɔ́ɔna kú olɛhɔ̄ lɛyíkwu Ujísɔ̄si, klla yɔ̄ ī mafú péee lɛ ācɛ Ujíyu mɛ́mla Ācɛ Ugríisi ka Ujísɔ̄si ɔ́ɔ wɛ Ohɔ́nyɛtá á.

⁶Eko nēé lɛyí bū kwu ɔ́ klla lɛ ije cē bá ɔ̄ ā, ó le úmúlá kú úwé kú nū gwō bónū, anɔ́ɔ ó da uwá kahíníī, “Oyī ká aá kóō ce aá ikpɛ̄yí! N lɛ ɛpɔ̄hi kú aá lé ɛɛ́. O ŋmá abālɔbányā n géē kwúcē ga ɛgiyí aílɔ́wá ā.”

⁷Anɔ́ɔ ó nyɛ̄ɛ̄ ŋmá abɔ́ɔ gaá lā ɔlɛ́ ɔ̄cɛ éyi nēé hī ka Utáyítɔ̄si Ujɔ́stɔ̄si, nōo ī gbā Ɔwɔicō ɛ̄gbā ā. Ɔlɛ́ nū yɔ̄ kwu Ɛgogbɔ̄ɔkɔ ā ajaajɛ.

⁸Ukríspɔ̄si, otrɛ̄yí kú Ɛgogbɔ̄ɔkɔ ā, cɛ̄ɛ̄lā Óndú ā, anú mɛ́mla ācɛ ɔlɛ́ nū dóódu. Anɔ́ɔ ācɛ alɛwa kú Ukɔ́rīnti, nēé pó ɛlā kú Upɔ́lu ā cɛ̄, é kē le ubatísim yā uwā.

⁹Otú éyi, Óndú ā da Upɔ́lu ipu ɔ̄na kahíníī, “Ā yúufi ācɛ nēe bá nyā ŋ́, amáŋ yɔ̄ ī kɛlā lɛ uwá kpɔ́, ā híī lɛ okónu klá ŋ́.

¹⁰Ohígbū ka n yɔ̄ mla awɔ, ɔ̄cɛ dúúmā í kē lɛ abɔ̄ kwu uwɔ glá ŋ́, ohígbū ka ācɛ alɛwa wɛ ācɛ ɔlɛ́ um igelī nyā.”

¹¹Anɔ́ɔ ó yɔ̄ abɔ́ɔ iháyí éyi ce ɔyā ɛhīlī, yɔ̄ gē nwū ācɛ ā ɛlā kú Ɔwɔicō á.

¹²Eko nēé kwú Ugalíyo ú yá igbómína kú ajɛ kú Akáya ā, odúúdú ācɛ Ujíyu le pīyatɔ̄há le Upɔ́lu kwú, anɔ́ɔ é le ɔ́ bī ga inɛ́pɔ̄ á.

¹³Anɔ́ɔ é kahíníī, “Ɔ̄cɛ ā gē pīya ācɛ ɔtū kéē gbā Ɔwɔicō ɛ̄gbā ɔwɛ nōó wɛ ɛ́gɛ́nɛ̄ íne ka lɛ ā ŋ́.”

¹⁴Amáŋ eko nɛ̄ Upɔ́lu gáā kɛlā ā, Ugalíyo da ācɛ Ujíyu kahíníī, “Ɔ́dāŋ́ kóō wɛ ɔdōbɔ̄bí nōó yá ámāŋ íne nōó bīya nɛ̄hi á nɛɛ, ń géē yɛ í má ɔdā ō lɛ abɔ̄ bī ɔ̄ ɛ́ɛ́ ká n̄ jāhɔ̄ diili lɛ aá ācɛ Ujíyu.

¹⁵Amáŋ abɔ̄ ó le pīya ikpɛ́la kú ɛlā okónu mɛ́mla iyē mla íne kú aá ā, aá tá eyī tū ɔ̄ abɔ̄ aá. N tá ka n wɛ ohɛ́pɔ̄ kú ɔdā nēe bá ā ŋ́.”

¹⁶Anɔ́ɔ ó lɛ uwá nū ŋmá inɛ̄pɔ̄ ā.

¹⁷Anɔ́ɔ odúúdú uwā lɛ Usɔsténesi, otrɛ̄yí kú Ɛgogbɔ̄ɔkɔ ā kwú, anɔ́ɔ é lɛ ɔ́ ŋmíjē iyɔ̄bū ācɛ ohɛ́pɔ̄ ā. Amáŋ Ugalíyo í lɛ ɛlá wu ɛ̄nyā ŋ́.

¹⁸Upɔ́lu klá mla ācocɛ̄lɔ̄ɔwɔicō kú Ukɔ́rīnti ɛ̄cī alɛwa, anɔ́ɔ anú mɛ́mla Uprísila mɛ́mla Akwíla le pɛ́ tá ipú úgbéenyi le pɛ́ tá Usiríya. Ipú ajɛ kú Ukenkiríya Upɔ́lu lɛ ɛyí plla ohígbū oji nōó tɛtɛ hɛ́ ā.

¹⁹Eko nēé wā Ɛ́fēsɔsi ā, Upɔ́lu habɔ̄ Uprisíla mɛ́mla Akwíla tá abɔ́ɔ. Amáŋ anú abɔ̄yī nū le tá ipú ɛgogbɔ̄ɔkɔ ā gaá yɔ̄ ī miya ɛlā mla ācɛ Ujíyu.

²⁰Eko nɛ̄ ācɛ ā da ɔ́ kóō yɔ̄ líígíí ā, ó tá.

²¹Amáŋ eko nōó yɔ̄ ī habɔ̄ uwā tá ā, ó da uwá kahíníī, “N géē kwúcē wā ɛgiyí aá igbɔhá ɛ́ɛ́, ɔ́dāŋ ka Ɔwɔicō cɛ̄.” Anɔ́ɔ ó le tá úgbéenyi ŋmá Ɛ́fēsɔsi á.

²²Eko nōó gā ajɛ kú Usísarīya ā, ó le yɛ ga Ujerúsālɛm gaá le okónu hɛ́ tū ācɛ kú icɔ́ɔci ā, anɔ́ɔ ó le tá Ántīyɔ̄ku á.

²³Eko nōó dēē yɔ̄ abɔ́ɔ yɛɛ ā, ó nyɛ̄ɛ̄ yɔ̄ ī yɛ ipú ajɛ kú Ugalésīya mɛ́mla Ufrayigíya, yɔ̄ ī lɔfú tū odúúdú ayíkpó ā iyē.

²⁴Ɛplá nyā, ɔ̄cɛ Ujíyu nēé hī ka Apólosi, ɔ̄cɛ kú Alesáŋdrīya ā, gā Ɛ́fēsɔsi. Ó wɛ ɔ̄cɛ ojokónu nɛ̄hi, ó kē jɔ́kpá kú ɛlɔ̄ɔwɔicō nɛ̄hi.

²⁵É tɛtɛ le ɔwɛ kú Óndú ā nwū ɔ̄, ó bī ɔtūcaaca le tɔ́ɔna kú ɛlɔ̄ɔwɔicō klla kē nwū ɛlɔ̄kwɛ̄yi lɛyíkwu Ujísɔ̄si. Amáŋ ubatísim kú Ujɔ́ni ōfōōfūnū nōó jé á.

²⁶Ó le ɔtū lɛ, gbɔɔ́ ō kɛlā ipú Ɛgogbɔ̄ɔkɔ ā pāālā. Eko nɛ̄ Uprisíla mɛ́mla Akwíla le ɛlā kú nū pó ā, é kwú ɔ̄ ú ga ɔlɛ́, anɔ́ɔ é lɛ ɔwɛ kú Ɔwɔicō nwūleyī lɛ ɔ́ kpaakpa á.

²⁷Apólosi le ɔ́ ŋmótū kóō ga Akáya, ācocɛ̄lɔ̄wɔicō nēe bá Ɛ́fēsɔsi ā le ɔtū tū ɔ̄ ɔtū, anɔ́ɔ é lɛ ɔkpá tá gé lɛ ayíkpó nēe yɔ̄ Akáya ā kéē mīyɛ anú. Eko nōó le táajɛ ā, ó tá ācɛ nōo ŋmá lɛ eyīnyinyi kú Ɔwɔicō cɛ̄ ɛlɔ̄ɔwɔicō ā abɔ̄ nɛ̄hi.

²⁸Ohígbū ka ipú áafú nōó tá lɔfú lɔfú mla ācɛ Ujíyu ɔgbɔ́ kú ójīla ā, ó le mafú lɛ uwá ŋmá ipú ɛlɔ̄ɔwɔicō ā ka Ujísɔ̄si ɔ́ɔ wɛ Ohɔ́nyɛtá á.