Read idoma ÚKLƆ́ KÚ ĀCOTƐ̄HƆ̄ 20 Bible Online

ÚKLƆ́ KÚ ĀCOTƐ̄HƆ̄ 20 - idoma bible

ÚKLƆ́ KÚ ĀCOTƐ̄HƆ̄ 20

¹Eko nɛ̄ ocīlɛ̄fú kú ācɛ ā mɛ tāajɛ ā, Upɔ́lu lɛ ɛhɔ̄ tū fu ācocɛ̄lɔ̄wɔicō ā, anɔ́ɔ eko nɛ̄ ó lɛ ɛlā otɔtūlé ka lɛ uwā ā, o lɛ uwá tá mŋmóō. Anɔ́ɔ ó nyɛ̄ɛ̄ i tá Umasɛdónīya á.

²Abɔ̄ ó yɔ̄ ī nyɔ̄ ā, ó le ɔtū tū ācɔ̄lóhɔ́nyɛtá nēe bá ipú odúúdú igelī nɛ̄hi ā ɔtū. Anɔ́ɔ ó le táajɛ Ugríisi,

³ɛga nōó yɔ̄ ɔyā ɛtá ā. Ó yɔ̄ ī tútū kóō ga Usiríya ɛ́ɛ́ nɛ̄ ó le jé ka ācɛ Ujíyu lɛ ujɔ tū tū anúɔ, anɔ́ɔ ó le ɔ́ miya ka anúɔ le cīgbīhi bū Umasɛdónīya.

⁴Usopéta, ɔ̄cɛ kú Ubéríya, ɔyínɔ̄nyīlɔ kú Upírɔ̄si mɛ́mla Arístākɔsi mɛ́mla Usekóndɔsi, ācɛ kú Utesalónīka mɛ́mla Ugáyɔ̄si ɔ̄cɛ kú Udábi mɛ́mla Utímōti, mɛ́mla Utayikíkɔ̄si mɛ́mla Utrofímɔ̄si, ācɛ kú Ésīya, tīkpó mla anú.

⁵Ācɛ nēe bá ā le gbɔbū, anɔ́ɔ é bá ī gbēyī alɔ ajɛ kú Utrɔ́wasi.

⁶Amáŋ alɔ abɔ̄yī alɔ le tá ipú úgbéenyi ŋmá Ufilípayi igbīhi ɛ̄cī kú ucɛ igbō nōo ī nū ŋ́ mā. Anɔ́ɔ ipú ɛ̄cī ɛhɔ̄, alɔ gā ɛgiyí uwā ajɛ kú Utrɔ́wasi, ɛga nɛ̄ alɔ bá ɛ̄cī ahāapa ā.

⁷Ɛ̄cī aflɛ́yí kú aláadi[9] eko nɛ̄ alɔ le jīla tɔ̄há ká ālɔ̄ cē igbō lé ā, Upɔ́lu le ɛlā ka mla uwá, abɔ̄ ó tíne kóō nyɛ̄ɛ̄ oŋmɔ́ɔ̄cī nū ā. Anɔ́ɔ ó kɛlā piyóó gbó ahāpōtú

⁸Agege alɛwa bá inīcō ɛga nɛ̄ alɔ jīla tɔ̄há ā.

⁹Anɔ́ɔ ɔyípōklóbīya éyi nēe hī ka Uyutíkɔ̄si yāajɛ uwíndo. Iyɔ̄lā kwú ɔ̄ ú lipú lipú, abɔ̄ Upɔ́lu yɔ̄ ī kɛlā gbojī ajɛ ā. eko nɛ̄ iyɔ̄lā le fíyɛ́ ɔ̄ abɔ̄ ā, ó le míya wāajɛ ŋmá inīcō ɔ́mɛtá ā. Eko nēé kwú ɔ̄ ú ŋmá ajɛ ā ó gekwú ɛɛ́.

¹⁰Amáŋ Upɔ́lu le hīlatá wāajɛ gaá kwu ɔtū ú bá ɔ̄ ɔtū. Anɔ́ɔ ó kahíníī, “Aá híī yúufi ŋ́ ó yēeyī kpɔ́ ɛ́ɛ́.”

¹¹Anɔ́ɔ eko nɛ̄ Upɔ́lu kwúcē ga inīcō klla le igbō cē lé ā, ó kɔ̄ɔ̄kā mla uwá gbojī ajɛ jāā gbéeko nɛ̄ eyī le nyā, anɔ́ɔ ó nyɛ̄ɛ̄ á.

¹²É kwú ɔyípōklóbīya ā ú ŋmá abɔ́ɔ oyēeyī, anɔ́ɔ ɛ́gɛ́nɛ̄ ɔtu he uwá lɛ ā ó lɛ ɛjī ŋ́ má.

¹³Alɔ le yɛ ipú úgbéenyi gɔbū i tá Assósi, ɛga nɛ̄ ó miya ká ālɔ̄ nyɔ̄ í tá ɔ̄ ā, ohígbū ka ó gáā yɛ ajɛ wā abɔ́ɔ.

¹⁴Eko nɛ̄ ó wā í tá alɔ ajɛ Assósi ā, alɔ kwú ɔ̄ ú wā ipú úgbéenyi. Anɔ́ɔ alɔ gā Umitilín á.

¹⁵Alɔ ga úgbéenyi ŋmá abɔ́ɔ, anɔ́ɔ alɔ gā ocojonjlɛ kú Ukáyɔ̄si oŋmá ɔ̄cī nū ā. Oŋmá ɔ̄cī nū alɔ gāājɛ Usámɔ̄si. Anɔ́ɔ ɛ̄cī nōo gboce ɔ́ ā, alɔ gā ajɛ Umilétɔ̄si.

¹⁶Upɔ́lu le miya kóō le yɛ úgbéenyi gla ajɛ kú Ɛ́fēsɔsi, cɛ́ɛ́ kóō híī kpéko bónū ajɛ kú Ésīya ŋ́. Ó yɔ̄ ī ŋmúleyīkwū kóō gāājɛ kú Ujerúsālɛm, ɔ́dāŋ kóō tɔtɛ́, ɛ̄cī ucɛ kú Upɛ́ntīkɔ̄si.

¹⁷Amáŋ eko nɛ̄ alɔ gāājɛ Umilétɔ̄si ā, ó lɛ ɛhɔ̄ tū ga Ɛ́fēsɔsi fu anyākwɔ́cɛ kú icɔ́ɔci kú Ɛ́fēsɔsi, yɔ̄ ī da uwá kéē le pɛ́ wā í jīla mla anúɔ eyī.

¹⁸Eko nēé gā ɛgiyí nū ā, ó da uwá kahíníī, “Aá abɔ̄yī aá jé ɛ́gɛ́nɛ̄ n yɔ̄ ɔtāhɛ̄ aá eko dóódu ŋmá ɛ̄cī aflɛ́yí nɛ̄ n lɛ ikpó ba ajɛ Ésīya ā,

¹⁹N le iyī um tū wāajɛ dúúdú, n bī ɔtūnōbí mɛ́mla ojámá nōo wā ɛgiyí um ŋmá lɛ ujɔ̄ nɛ̄ ācɛ Ujíyu tū tū um ā le cɛ̄ Óndú ā ɛhɔ̄.

²⁰Aá jé ka ń le ɔdā dúúmā nōo géē tá aá abɔ̄ tayínū lɛ aá eko nɛ̄ n tɔ́ɔna kú ɛlɔ̄ɔwɔicō lɛ aá ɔlɛ́ aá mɛ́mla ɔgbɔ́ kú ójila ŋ́.

²¹N cɛ̄ olɛhɔ́ ékpó lɛ ācɛ Ujíyu mɛ́mla Ācɛ ugríisi, ka ó cɛgbá kéē le pīyabɔ̄ ŋmá íne nēé bīya ā cɛ́ɛ́ kéē lɛ eyī pīya ga ɛgiyí Ɔwɔicō, kéē klla cɛ̄ɛ̄lā kú Óndú alɔ Ujísɔ̄si.

²²Abālɔbányā n le ɛyí táajɛ lɛ Alelékwū ihɔ ā gē nyɔ̄ Ujerúsālɛm, amáŋ ń jé ɔdā nōo géē yá um abɔ́ɔ ŋ́.

²³Ɔdā nɛ̄ n jé ōfōōfūnū ā lé ka Alelékwū Ihɔ ā gē kɛlā ga um igelī nɛ̄hi dóódu ka agbá mla ōwē gē gbēyī um.

²⁴Amáŋ ń je oyēeyī kú um bɛ̄ɛka ɔdā nōó tīile ga um ŋ́ mā. Ɔdā nɛ̄ n tíne ōfōōfūnū ā wɛ ka n̄ lɛ úklɔ́ nōo kwu um ɔtū ā yá kwɛyí cɛ́ɛ́ ká n klla le úklɔ́ nɛ̄ Óndú Ujísɔ̄si je gā um ā yá kwɛyí, nōo wɛ úklɔ́ kú o tɔ́ɔna kú Ɔ̄kōolɔhi ohígbū eyīnyinyi kú Ɔwɔicō.

²⁵“Abālɔbányā n kē jé ka ó lɛ ɔ̄cɛ dúúmā nɛ̄ n tɔ́ɔna kú Ajɔ̄ɔ̄cɛ́ kú Ɔwɔicō lɛ ɔ́ nōo géē má um gbóógbóō gɛ ŋ́.

²⁶Ohígbū ɔ́ɔmā n gē kɛlā tɛ́ɛcɛ ícɛ nyā ka, ɔ́dāŋ ka ɔ̄cɛ dúúmā ká aá le nyíleyī ŋmá ɔwɛ ā, abɔ̄ kú um í yɔ̄ ipú oyī kú nū ŋ́,

²⁷ohígbū kóō le ɔdā dúú nɛ̄ Ɔwɔicō miya táajɛ nɛ̄ ń ka lɛ aá ŋ́ nɛɛ ŋ́.

²⁸Aá leyīkwu iyī aá mɛ́mla odúúdú aálá, nɛ̄ Alelékwū Ihɔ yá aá ká aá wɛ ācɛ oleyī kwu uwá ā, kú aá bī icɔ́ɔci kú Óndú[10] ā, nōó bī oyī kú ɔyí nū[11] lá ā.

²⁹N jé ka igbīhi nɛ̄ n nyɛ̄ɛ̄, ɔgwú ōtūufi géē wā ɔtāhɛ̄ aá, é kē gáā habɔ̄ álá ā tá ŋ́.

³⁰Eko géē wā nɛ̄ ācɛ ōhī géē ŋmá ipú ígwu kú aá géē kɛ̄mgbɛ̄ cɛ́ɛ́ kéē lɛ ācocɛ̄lɔ̄wɔicō kpó tū ɔkwu nyɛ̄ɛ̄.

³¹Ohígbū ɔ́ɔmā, aá leyī kwɛcɛ gɛɛ, ká aá kē bla ka ɛplá iháyí ɛtá, ń mlɛ́nyɔ́ ŋ́, n bī otú mɛ́mla ɔlɛ́ɛnɔ le nwū éyééye kú aá ɛlā, n klla kē bī ɔtūnōbí nɛ̄hi le yúklɔ́ ā.

³²Ámōōmɛ ā n kwú aá ú tū Ɔwɔicō abɔ̄. Aá gbɛlá kwu ogbonɛnɛ nɛ̄hi kú nū! Olɛhɔ̄ nyā lɔfú tá aá abɔ̄ kú aá le ɔdā nōo wɛ ukpɛ̄ kú aá ŋmá ɛgiyí Ɔwɔicō ā lɛ, abɔ̄ aá le pīya ācɛ ɔlɛ́ nū ā.

³³Ń má ɔ̄cɛ dúúmā ímálānyī kú ije nɛ̄hɛ́ ámāŋ ugóolu (oje ɔdɔ) ámāŋ úwé kú nū ŋ́.

³⁴Aá abɔ̄ aá jé ka n gē bī abɔ̄ kú um nēe bá ā le yúklɔ́ ɛgbá kú um mla ákú ācɛ nēe bá mla um ā.

³⁵N le mafú le aá ipú ɔdā dóódu nɛ̄ n gē yá ā ká n̄ le pīya ɔ̄cɛ nɛ̄ aá cíkā ō má gbla ká ɛ́gɛ́nɛ̄ aá í yúklɔ́ lɔfú lɛ ā, kú ālɔ̄ tá ācɛ ogbɛhá abɔ̄ piíí. Aá kē blakwu ɛlā kú Óndú ā, Ujísɔ̄si ɛ́gɛ́nɛ̄ ó kahíníī, “Aɔ́dā olɔhi kóō yɔ̄ lɛ ɔ̄cɛ nōo gē je ā fíyɛ́ ɔ̄cɛ nōo gē mīyɛ ā.”

³⁶Eko nōó le ka lɛ ā, ó lɛ okwúukwu kpó kwajɛ, anɔ́ɔ ó le ɔkɔ gbā mla odúúdú uwā á.

³⁷Odúúdú uwā bá yɔ̄ ī jikwū, é kē lɛ ɔtū má Upɔ́lu ɔtū.

³⁸Ó kwú uwā iyē nɛ̄hi, o fíyɛ́ dúú ohígbū ɛlā nōó ka kéē gáā má eyī kú anúɔ igbɔhá gɛ ŋ́ mā. Anɔ́ɔ é le ɔ́ bītá ga ipú úgbéenyi á.