Read idoma ÚKLƆ́ KÚ ĀCOTƐ̄HƆ̄ 21 Bible Online

ÚKLƆ́ KÚ ĀCOTƐ̄HƆ̄ 21 - idoma bible

ÚKLƆ́ KÚ ĀCOTƐ̄HƆ̄ 21

¹Alɔ le ńŋmóó tá anyākwɔ́cɛ kú Ɛ́fēsɔsi, anɔ́ɔ alɔ nyɛ̄ɛ̄ á. Úgbéenyi ā le yɛ kpaakpa i tá ɔlíidɔ kú Ukósi. Oŋmɔ́ɔ̄cī nū alɔ gāājɛ Uródesi, anɔ́ɔ o ŋmá abɔ́ɔ ā alɔ gāājɛ Upátāra.

²Abɔ́ɔ alɔ le úgbéenyi éyi má nōo yɔ̄ ī ga Ufinísīya ā, anɔ́ɔ alɔ le tá ipú nū le yɛ á.

³Alɔ gā ɛga nɛ̄ alɔ le ɔlíidɔ kú Usáyíprɔ̄si má eyī, alɔ le gla anú abɔ̄lúfīyē le yɛ tá Usiríya. Alɔ le pɛ́ wāajɛ Utáya ɛga nɛ̄ úgbéenyi ā gáā kpó iyó báajɛ.

⁴Alɔ le ayíkpó ōhī má, anɔ́ɔ alɔ bá abɔ́ɔ mla uwá ɛ̄cī ahāapa. É bī ɔfú kú Alelékwū Ihɔ le da Upɔ́lu kóō nyɔ̄ Ujerúsālɛm ŋ́.

⁵Eko nɛ̄ ɛ̄cī nɛ̄ alɔ í yá abɔ́ɔ ā mɛ ā, alɔ nyɛ̄ɛ̄ gbɔɔ́ ō nyɔ̄. Anɔ́ɔ odúúdú uwā mɛ́mla anyā uwā mɛ́mla ayí uwā, lɛ alɔ bītá jāā gbéeko nɛ̄ alɔ le bɛ̄cɛ ŋmá igelī nɛ̄hi ā ga ɔkónu ísu, ɛga nɛ̄ alɔ le okwúukwu kpó kwajɛ le ɔkɔ gbā lɛ Ɔwɔicō.

⁶Anɔ́ɔ ɔnyɔɔnyɛ le ńŋmóō tá ɔ́mpa nū, anɔ́ɔ alɔ le tá ipú úgbéenyi abɔ̄ ācɛ ā kwúcē ga ɔlɛ́ ā.

⁷Alɔ yɔ̄ ī yɛ gɔbū ipú iyāwu kú alɔ, ŋmá Utáya gā ajɛ Utolɛ́māyisi, ɛga nɛ̄ alɔ lɛ okónu hɛ́tū ayínɛ́ ā klla yɔ̄ mla uwá ɛ̄cī éyi.

⁸ Oŋmɔ́ɔ̄cī nū alɔ gbɔɔ́ kóō nyɔ̄ ajɛ Usísarīya. Alɔ yɛ tá ɔlɛ́ Ufílīpu otɔ́ɔna kú okōolɔhi, nōo kē wɛ éyi kú ipú ācɛ ahāapa nēe fu kéē kɔ̄ ɔdōlé ā nyɔ̄ í le gbɔga.

⁹Ó lɛ ayínɔ̄nyā ɛnɛ nēé lɛ ɔbá ŋ́, nēe kē ī mɛ́ɛbɛ.

¹⁰ Abɔ̄ alɔ bá abɔ́ɔ ɛ̄cī alɛwa ā, ɔ̄comɛ́ɛbɛ éyi nēé hī ka Ágābɔsi gā ŋmá Ujudíya.

¹¹Abɔ̄ ó gā ɛgiyí alɔ ā, ó kwú ɔkpōkwɛ́nyɔ́ kú Upɔ́lu ú, anɔ́ɔ ó lɛ iyī nū ikpó mɛ́mla abɔ̄ gbō. Anɔ́ɔ ó kahíníī, “Ɛ̄nyā wɛ ɔdā nɛ̄ Alelékwū Ihɔ ka á, ‘Ɛ́gɛ́nyā nɛ̄ ācɛ Ujíyu géē gbō ɔ̄cɛ nōo lɛ ɔkpókwɛ́nyɔ́ nyā ajɛ Ujerúsālɛm á, é klla géē je ɔ́ tū aílɔ́wá abɔ̄.’”

¹²Abɔ̄ alɔ le ɛ̄nyā pó ā, alɔ mɛ́mla ācɛ nēe bá abɔ́ɔ ā le ɔkɔ gbā lɛ Upɔ́lu ká ɔ̄ híī nyɔ̄ Ujerúsālɛm ŋ́.

¹³Anɔ́ɔ Upɔ́lu tóohi kahíníī, “Ɔdí nɛ̄ aá yɔ̄ ī yá ā, o jikwū ɛ́gɛ́nyā kú aá bīya um ɔtū nɛɛ? N le tútū, ó kóō lɛ um tū agbá ōfōōfūnū ŋ́, amáŋ ká n̄ gekwú dúú ipú Ujerúsālɛm ohígbū iyē kú Óndú Ujísɔ̄si.”

¹⁴Abɔ̄ alɔ í yá ɔdā dúú nōo gē pīya odo kú nū abɔ̄ glá ŋ́ má, alɔ habɔ̄ ɔ̄ tá, kē kahíníī, “Ɔdā nɛ̄ Óndú ā dɔɔ̄kā ā kóō le yá.”

¹⁵Abɔ̄ alɔ bá abɔ́ɔ yɛɛ ā, alɔ le iyó kú alɔ tútū, anɔ́ɔ alɔ le yɛ tá Ujerúsālɛm.

¹⁶Ācɛ ōhī kú ayíkpó nēe ŋmá Usísarīya āa le yɛ mla alɔ. É le alɔ kpó nyɔ̄ ɔlɛ́ Uminásɔn, ɔ̄cɛ Usáyíprɔ̄si, nōo wɛ ɔ̄cocɛ̄lɔ̄ɔwɔicō ŋmá ajaajɛ ā gáā gbɔga.

¹⁷Eko nɛ̄ alɔ gā Ujerúsālɛm ā, ayínɛ́ ā mīyɛ alɔ lɔɔlɔhi.

¹⁸Oŋmɔ́ɔ̄cī nū Upɔ́lu mɛ́mla alɔ le yɛ tá ɛgiyí Ujémīsi, ɛjɛ̄ɛ̄jī anyākwɔ́cɛ ā ké bá abɔ́ɔ.

¹⁹Upɔ́lu le okónu hɛ́ tū uwā, anɔ́ɔ ó gbɔɔ́ ō ka lɛ uwá ɔgbace ɔgbace ɔdā nɛ̄ Ɔwɔicō bī ɔ̄ yá ɔtāhɛ̄ aílɔ́wá ā.

²⁰Abɔ̄ é le ɛlā kú nū pó ā, é cɛ̄tra Ɔwɔicō. Anɔ́ɔ é da ɔ́ kahíníī, “Ɔyínɛ́ alɔ, a lɔfú jé úlúúlā kú ācɛ Ujíyu nēe je pīya ācocɛ̄lɔ̄wɔicō ā, ā kē má ɛ́gɛ́nɛ̄ odúúdú uwā í bī Íne ā le hiijā ŋ́ mā a.

²¹É kē lɛ ɔ̄kā kú uwɔ kā uwā ka awɔ gē nwū odúúdú ācɛ Ujíyu nēe bá ɔtāhɛ̄ aílɔ́wá ā ɛlā kéē lɛ igbīhi cē kwu íne kú Umósīsi, ka a gē da uwá kéē híī hɛ́ ayí uwā apī ámāŋ ka o lɛ uculo kú ācɛ Ujíyu tū ŋ́ má.

²²Ɔdí nɛ̄ alɔ géē yá mɛ́ɛ̄ ā? Ohígbū ka ó wɛ o piíí kéē géē pó piíí ka a gā ɛɛ́.

²³Ohígbū ɛ́gɔ́ɔmā ɔdā dúúmā nɛ̄ alɔ da uwɔ ā, lɛ ɔ̄ yá. Alɔ lɛ ācɛ ɛnɛ, nēe le oji ce.

²⁴Nyɔ̄ mla uwá ga ipú Agblīihɔ-nɛ̄hi ā kéē lɛ aá iyē gwu ɛ́gɛ́nɛ̄ uculo ā lɛ ā, ká ā lɛ ije kú uwā gbā, cɛ́ɛ́ kéē lɛ ɛyí púla[12] ó i lɛ ā, odúúdú ācɛ géē le jé ka ɔdā nēé da uwá lɛyíkwu uwɔ ā, wɛ ɛ̄kɛ̄mgbɛ̄, amáŋ ka awɔ abɔ̄yī uwɔ gē yēeyī ɛ́gɛ́nɛ̄ íne kú Umósīsi dɔɔ̄kā ā.

²⁵ Ɛjī kwɛjī lɛ aílɔ́wá nēe je pīya ācocɛ̄lɔ̄wɔicō ā nɛɛ, alɔ lɛ ɔkpá tá fu uwá yɔ̄ ī da uwá ka alɔ le ɔ́ miya kéē híī lé ɔdōlé dúúmā nēé le gwɛ́ɛya lɛ ɛcí gbɔbū ŋ, ámāŋ ka o lé oyī kú ɛbɛ́ ŋ́, ámāŋ ka o lé ɛbɛ́ dúú nēé le ɔ́ ɔkɔ nyacē gbuúlú le ɔ́ ŋmó ŋ́. É klla í lɛ iyī uwā tū ŋmá ajā ō gbo mɛ́mla ikpó ɔnyā ɔhá oōce.”

²⁶Upɔ́lu lɛ ācɛ ā kpó, anɔ́ɔ oŋmɔ́ɔ̄cī nū ó lɛ anú mɛ́mla uwá iyē gwu. Anɔ́ɔ ó le yɛ tá ipú Agblīihɔ-nɛ̄hi ā gaá ka tɛ́ɛcɛ lɛ uwá ɛ̄cī nɛ̄ iyē nēé yɔ̄ ī gwu ā í mɛ ā mɛ́mla eko nēé géē gwɛ́ɛya ohígbū ɔnyɔɔnyɛ kú uwā a.

²⁷Eko nēé le ɛ̄cī ahāapa ā yá jīla ā, ācɛ Ujíyu nēe ŋmá Ésiya ā le Upɔ́lu má ipú Agblīihɔ-nɛ̄hi ā. É le útú hɛ́ ɔtāhɛ̄ odúúdú ɛwa lɛyíkwu Upɔ́lu, anɔ́ɔ é le ɔ́ kwú.

²⁸É dɛ̄gba kahíníī, “Ācɛ kú Ísrɛ̄lu, aá tá alɔ abɔ̄! Ɛ̄nyā wɛ ɔ̄cɛ nōo gē nwū ācɛ ɛlā ɛbɛɛbɛ lɛyíkwu ācɛ Ujíyu mla íne kú Umósīsi mɛ́mla Agblīihɔ-nɛ̄hi nyā á. Ɛ̄nɛ̄ o fíyɛ́ dúú ā, ó kē le ācɛ Ugríisi kpó wā ipú Agblīihɔ-nɛ̄hi nyā dúú, kē le ɛgotīihɔ nyā nyílá.”

²⁹É ka ɛ̄nyā ohígbū ka é tɛtɛ má Utrofímɔ̄si, ɔ̄cɛ Ɛ́fēsɔsi mɛ́mla Upɔ́lu ipu igelī, anɔ́ɔ é kpéyīce ka Upɔ́lu ɔ́ɔ kē le ɔ̄ bī wā ipú Agblīihɔ-nɛ̄hi ā nɛɛ.

³⁰Útú le hɛ́ ɛga dóódu kú ipú igelī nɛ̄hi ā, anɔ́ɔ ācɛ gbɔɔ́ ō cīlɛ̄fú nɛ̄ɛ̄nɛ̄hi á. Ācɛ le inya pɛ́ kwu ŋmá ɛga dóódu gaá le Upɔ́lu kwú le ɔ́ pi wɛ̄ɛcɛ ŋmá ipú Agblīihɔ-nɛ̄hi ā, anɔ́ɔ ikpííkpó ɔ́ɔmā é le ɛjɛ̄ɛ̄jī aódūngwɔ̄wɛ kú Agblīihɔ-nɛ̄hi ā kpó kwu.

³¹Abɔ̄ é bá ī yá kéē gé ē ŋmó ɔ̄ ā, olɛhɔ̄ le táajɛ ahɔ̄ kú otrɛ̄yí kú ɔ́wá kú aícɔ́ɔja ka ācɛ ɛ́ɛ bá yɔ̄ ī cīlɛ̄fú ipú odúúdú igelī nɛ̄hi kú Ujerúsālɛm.

³²Ikpííkpó ɔ́ɔmā ó lɛ aícɔ́ɔja mɛ́mla aótrɛ̄yí kú aícɔ́ɔja ofɛ̄hɔ̄ kpó, anɔ́ɔ é le kwu nyɔ̄ ɛgiyí uwā. Abɔ̄ é kē lɛ otrɛ̄yí mɛ́mla aícɔ́ɔja ā má ā, é mā ijē ō ŋmó Upɔ́lu tá.

³³Otrɛ̄yí ā nyɔ̄ gaá le Upɔ́lu kwú, le ɔ́da je lɛ uwá kéē lɛ agbá ɛpa kpó kwu ɔ́. Ó le ɔ̄kā da ójila ā ɛdɔ ɔ̄cɛ nɛ̄ Upɔ́lu wɛ ā mɛ́mla ɔdā nōó yá ā.

³⁴Ācɛ ōhī kú ipú ɛwa ā le ɔkɔ cɛyí le odée ka, ācɛ ɔhá kē le ɔdā ɔhá ka. Abɔ̄ otrɛ̄yí kú aícɔ́ɔja ā í lɔfú jé ɔdā nōo yá ā glá ŋ́ ohígbū ígbájí nōo yɔ̄ ā, ó lɛ ɔ́da je kéē lɛ Upɔ́lu bī ga ɔlɛ́ aícɔ́ɔja.

³⁵Abɔ̄ ó gaá kwú ikpó ú ce agidigbé kú inu gáā ticō ā, aícɔ́ɔja ā kwú ɔ̄ ú cɔɔkɔ ohígbū ka ɛwa ā í tōō kwútū gɛ ŋ́.

³⁶Ɛwa ā le yá klá uwá gē dɛ̄gba kahíníī, “Lɛ ɔ́ ŋmó, lɛ ɔ́ ŋmó!”

³⁷Abɔ̄ é gáā bī Upɔ́lu ga ipú ɔlɛ́ aícɔ́ɔja ā, ó da otrɛ̄yí ā kahíníī, “N̄ lɛ ɔdée da uwɔ mɛ́ɛ̄ ŋŋ?” Anɔ́ɔ otrɛ̄yí ā da ɔ́ ɔ̄kā kahíníī, “Á jé ō ka ucē kú Ācɛ ugríisi nɛɛ?

³⁸Ó wɛ awɔ wɛ ɔ̄cɛ Íjīpiti nōo tɛtɛ yá ká ācɛ kéē cāŋjɛ lɛyíkwu igɛ́mɛ́nti klla kē kpó ācoŋmácɛ úlā igwó ga ipú ígbíli ā ŋ́ nɛɛ?”

³⁹Upɔ́lu tá ohi kahíníī, “N wɛ ɔ̄cɛ Ujíyu, nōo ŋmá Utásɔsi ipú Usilísiya, ɔ̄cɛ kú igelī ocɛgbá nɛ̄hi. N gē ba uwɔ kā ā lɛ ɛga je gā um ká n̄ lɛ ɛlā ka lɛ ācɛ nēe bá ā.”

⁴⁰Otrɛ̄yí kú aícɔ́ɔja ā le ɛga je lɛ ɔ́, anɔ́ɔ Upɔ́lu māháyi icō agidigbé ā le abɔ̄ yá lɛ ācɛ ā pɛɛ. Anɔ́ɔ eko nɛ̄ odúúdú uwā mā uya ā, ó gbɔɔ́ ō kɛlā lɛ uwá ɔkɔ kú ucē kú ācɛ Ujíyu.