Read idoma ÚKLƆ́ KÚ ĀCOTƐ̄HƆ̄ 22 Bible Online

ÚKLƆ́ KÚ ĀCOTƐ̄HƆ̄ 22 - idoma bible

ÚKLƆ́ KÚ ĀCOTƐ̄HƆ̄ 22

¹Upɔ́lu gɔkɔ gicō anɔ́ɔ ó kahíníī, “Ayínɛ́ mɛ́mla aádā um, aá jāhɔ̄ abɔ̄ nɛ̄ n gáā kɔɔkɔ kú um iyɔ̄bū aá abālɔbányā ā.”

²Abɔ̄ é le pó kóō gē kɛlā lɛ uwá ɔkɔ kú ucē kú ācɛ Ujíyu ā, é bá cíí fíyɛ́. Anɔ́ɔ ó kahíníī,

³ “N wɛ ɔ̄cɛ Ujíyu, nēé ma Utásɔsi ipú Usilísiya, amáŋ é bī um jɛ̄ igelī nɛ̄hi nyā, n ke jɔ́kpá abɔ̄ kú Ugamálīyelu. É kē nwū um ɛlā ká n̄ yɛce īkpɛ̄la dóódu kú ipú íne kú aádā alɔ ā, n gē ya ɔtū caacaa kú ɛlā kú Ɔwɔicō ɛ́gɛ́nɛ̄ odúúdú aá gē yá ícɛ nyā.

⁴N kpó íkpɛ́lā kwu ācɛ o yɛ ɔwɛ nyā ā kōō yá kéē lɛ ācɛ ōhī kú uwā kpó ŋmó dúú, n gē kwú ācɛnyīlɔ mɛ́mla ācɛnyā kú ɔwɛ nyā, gē kpó uwā tū agbá,

⁵Otrɛ̄yí kú ācogwɛ́ɛya mɛ́mla odúúdú ukánsulu lɔfú cɛ̄ um ijáalí ka n yɔ̄ ī kɛlā ɔ̄kwɛ̄yi. N mīyɛ ɔkpá nēé tá gé lɛ ayínɛ́ alɔ kú Ujíyu nēe bá Udamásikɔ̄si ā ŋmá ɛgiyí uwā gē bī gé lɛ uwá. Anɔ́ɔ n le yɛ tá Udamáskɔ̄si gáā kwú ācɛ nēe bá abɔ́ɔ ā ká n̄ lɛ uwá kpó wā Ujerúsālɛm kéē lɛ italā yá uwā.

⁶Abɔ̄ n yɔ̄ gē nyɔ̄ le bá lɛ Udamásikɔ̄si ā, ɛplá ɛnɔ oyɛ̄ɛyí, igbɛ ékpó ɔlá ōceyī nɛ̄hi ŋmá ɔkpáncō, le cɛ̄ jīla um tá.

⁷N mágwōnū gblugudu, anɔ́ɔ n pó ɔkɔ nōo da um ka, ‘Usɔ́lu, Usɔ́lu, ɔdíyá nāa ī yá um ŋmó ā?’

⁸Anɔ́ɔ n tóohi ka, ‘A wɛ ɔ̄nyɛ nɛ̄, Óndú?’ Anɔ́ɔ ó da um ka, ‘Ami wɛ Ujísɔ̄si kú Unásārēti nāa gē yá ŋmó á.’

⁹Ācɛ nēe bá mla um ā mɛ́ɛbɛ ā, amáŋ é pó ɔkɔ kú ɔ̄cɛ nōo kɛlā gā um ā ŋ́.

¹⁰“N ka, ‘Ɔdí nɛ̄ n géē yá ā, Óndú?’ Anɔ́ɔ Óndú ā da um ka, ‘Cāŋjɛ ká ā ga Udamásikɔ̄si, abɔ́ɔ nēé géē da uwɔ ɔdā dóódu nēé miya táajɛ gā awɔ ka ā yá ā á.’

¹¹Ɔlá nɛ̄hi nōo fíyajɛ nyaá nyaá ɛgiyí um mā í cɛ̄ gā um mɛ́ɛbɛ ŋ́, anɔ́ɔ aɔ́mpa um le abɔ̄ tū um abɔ̄ ga ipú Udamásikɔ̄si á.

¹²Ɔ̄cɛ éyi lé ka Ananíyāsi lā abɔ́ɔ, ɔ̄cɛ o yúufi Ɔwɔicō nōo gē lɛ íne kú alɔ tū, ó klla kē wɛ ɔ̄cɛ nɛ̄ odúúdú ācɛ Ujíyu nēe lā abɔ́ɔ ā ka olɔhi nū.

¹³Anɔ́ɔ ó gā ɛgiyí um gaá háyi pī um, anɔ́ɔ ó da um ka, ‘Ɔyínɛ́ um, Usɔ́lu, lɛ eyī nwūla ká ā mɛ́ɛbɛ. ‘Ɛpléeko ɔ́ɔmā n gbɔɔ́ ō mɛ́ɛbɛ.

¹⁴Anɔ́ɔ ó ka, ‘Ɔwɔicō kú aádā alɔ le uwɔ fu ká ā jé ɔdā nōó miya kóō yá ā, ká ā má ɔ̄cocɛ̄hɔ̄ kú nū oyólɔhi ā, ká ā klla kē pó ɔkɔ kú nū, abɔ̄ ó yɔ̄ ī kɛlā gā awɔ abɔ̄yī nū ā.

¹⁵Ohígbū ka a géē wɛ ijáalí kú nū ká ā ka lɛ ɛjɛ̄ɛ̄jī ācɛ ɔdā nāa má, nāa kē pó ā.

¹⁶Ɔdí nāa ī gbēyī nū abālɔbányā kpɔ́ gɛ? Cāŋjɛ kéē lɛ ubatísim yá uwɔ, cɛ́ɛ́ kéē kwú íne nāa bīya ā í yá uwɔ ɛhi o ŋmá lɛ o gbɔ̄ɔkɔ lɛ ɔ́.’

¹⁷“Eko nɛ̄ n pīyɛyí wā Ujerúsālɛm kē yɔ̄ ī gbɔ̄ɔkɔ ipú Agblīihɔ-nɛ̄hi ā, n le ɔ̄na nā,

¹⁸n le Ujísɔ̄si má abɔ̄ ó yɔ̄ ī da um ka, ‘Gbo ɔ́ páápá ká ā nyɛ̄ɛ̄ fíya fíya ŋmá Ujerúsālɛm, ohígbū kéē gáā mīyɛ ijáalí nāa gáā cɛ̄ ohígbū um ā ŋ́.’

¹⁹Anɔ́ɔ n ka, ‘Óndú, uwá abɔ̄yī uwā kē jé ka n ga ipú ɛgogbɔ̄ɔkɔ gaá kpó ācɛ nēe cɛ̄ɛ̄lā ā tū agbá klla ké ŋmó uwā ijē dúú.

²⁰Eko nēé kē ŋmó Usitífin nōo kɛlā lɛ ācɛ lɛyíkwu uwɔ ā, n kē māháyi ajaajɛ kē cɛ̄ kéē lɛ ɔ́ ŋmó, n klla kē leyīkwu úwé kú ācɛ nēe ŋmó ɔ̄ ā.’

²¹Óndú ā da um ka, ‘Nyɔ̄, n géē tū uwɔ ɛhɔ̄ nyɔ̄ ɛga oligbó ligbó ga ɛgiyí aílɔ́wá ā.’”

²²O jāā gaá kwu ɛlā nyā é le ahɔ̄ je lɛ ɔ́, anɔ́ɔ é le ɔkɔ cɛyí gbɔɔ́ ō dɛ̄gba kahíníī, “Lɛ ɔ̄cɛ ā bī nyɔ̄! Le ɔ́ ŋmó! Ohígbū kóō cíkā kóō yēeyī ŋ́!”

²³É bá yɔ̄ ī dɛ̄gba gē jíla úwé kú uwā icō klla gē tá úmlá gicō,

²⁴Otrɛ̄yí kú aícɔ́ɔja ā le íkwu je lɛ aícɔ́ɔja kéē kwú Upɔ́lu ú bī wā ipú ɔlɛ́ aícɔ́ɔja. Anɔ́ɔ ó le ɔ́da je lɛ uwá kéē lɛ ɔ́ gɔ́ o yá ɛ́ɛ́ kéē lɛ ɔkwu ɔdā nōo yá ɛ́ɛ́ nɛ̄ ācɛ Ujíyu bá yɔ̄ ī dɛ̄gba ɛ́gɔ́ɔmā ā jé.

²⁵Eko nēé lɛ ɔ́ gbō kéē gá ɔ̄ itali ā, Upɔ́lu da otrɛ̄yí kú aícɔ́ɔja ofɛhɔ̄, nōo háyi pī ɔ̄ ā kahíníī, “Íne ā jɛga ga awɔ ká ā gɔ́ ɔ̄cɛ nōo wɛ ɔyí ajɛ kú Uróm eko nɛ̄ á ŋmó ɔ́ ɛpɔ̄bí kú ɔdā dúú ŋ́ nɛɛ?”

²⁶Eko nɛ̄ otrɛ̄yí kú aícɔ́ɔja ofɛhɔ̄ ā lɛ ɔ́ɔmā pó ā, ó le tá ɛgiyí otrɛ̄yí ā gaá da ɔ́ kahíníī, “Ɔdí nɛ̄ aá yɔ̄ ī yá ā mɛ́ɛ̄ ā? Ɔ̄cɛ ɔ́ɔmā wɛ ɔyí ajɛ kú Uróm nɛ̄ n.”

²⁷Anɔ́ɔ otrɛ̄yí ā gaá da ɔ́ kahíníī, “Ka gā um, a wɛ ɔyí ajɛ kú Uróm nɛɛ?” Upɔ́lu tóohi kahíníī, “Īī n wɛ.”

²⁸Otrɛ̄yí ā tá ohi kahíníī, “N cíla ije nɛ̄hi ɛ́ɛ́ nɛ̄ n je pīya ɔyí ajɛ kú Uróm á.” Upɔ́lu kahíníī, “Ami ā é ma um ɔyí ajɛ.”

²⁹Anɔ́ɔ ācɛ nēe gáā da ɔ́ ɔ̄kā ā le hɛ́ gɛcɛ hɛ̄ ɔ̄ tá ikpííkpó ɔ́ɔmā. Ufi gbɔɔ́ ó yá otrɛ̄yí ā dúú, ohígbū kóō le jé ka Upɔ́lu wɛ ɔyí ajɛ kú Uróm mla ohígbū ka ó le agbá kwu ɔ́ abɔ̄.

³⁰Oŋmɔ́ɔ̄cī nū, abɔ̄ otrɛ̄yí ā tíne kóō bɔkwu ɛlā nɛ̄ ācɛ Ujíyu kpó ce ɔ́ ā, ó le agbá wī ŋmá Upɔ́lu abɔ̄. Ó le íkwu je lɛ aótrɛ̄yí kú ācogwɛ́ɛya mɛ́mla odúúdú aúkánsulu ā kéē le jīla. Anɔ́ɔ ó lɛ Upɔ́lu bī wāajɛ, kwú ɔ̄ ú háyi iyɔ̄bū uwā.