Read idoma ÚKLƆ́ KÚ ĀCOTƐ̄HƆ̄ 24 Bible Online

ÚKLƆ́ KÚ ĀCOTƐ̄HƆ̄ 24 - idoma bible

ÚKLƆ́ KÚ ĀCOTƐ̄HƆ̄ 24

¹Eko nɛ̄ ɛ̄cī ɛhɔ̄ le gla ā, Ananíyāsi, otrɛ̄yí kú ācogwɛ́ɛya, mɛ́mla ācɛ ōhī kú anyākwɔ́cɛ mɛ́mla ulɔ́ya, ɔ̄cɛ nēé hī ka Utatúlɔ̄si le pɛ́ wā. Anɔ́ɔ é lɛ ɔkwɛ̄lā kú uwā nēé kpó ce Upɔ́lu ā ka báajɛ iyɔ̄bū Igbómína ā.

²Eko nēé lɛ Upɔ́lu hīgwú ā, Utatúlɔ̄si gbɔɔ́ ō kpɛ́lā ce ɔ́ ka, “Ɛ́nɛ́nɛ̄ Igbómína ojīlīmā, Ufélīsi. Abɔ̄ a wɛ otrɛ̄yí ojéeyī nɛ̄hi ā, alɔ bá ɛbɔ́ gbojī ajɛ nɛ̄hi, a klla yɔ̄ ī yá ɔdōlɔhi ɛ̄yīpɛ̄ ocɛgbá alɛwa ohígbū olɔhi kú ajɛ ɔlɛ́ alɔ.

³Alɔ tá uwɔ ahínyá nɛ̄hi ohígbū ɛjɛ̄ɛ̄jī ɔdā nēe bá ā.

⁴Amáŋ ɛ́gɛ́nɛ̄ ń tíne ká n̄ kpó eko kú uwɔ bónū gɔbū gɛ ŋ́ mā, n gē ba uwɔ ká ā bī ogbonɛnɛ kú uwɔ lɛ ɔkɔ kú alɔ nyā pó lígíí lɛ alɔ.

⁵Alɔ má ka ɔ̄cɛ ā wɛ ɔ̄cɛ ugbālū, gē cɛ̄ le ācɛ Ujíyu kéē cīlɛ̄fú ɛjɛ̄ɛ̄jī ɛcɛ nyā, ó klla kē wɛ otrɛ̄yí kú ɔwá Unásarín.

⁶Ó yá kóō nyīla Agblīihɔ-nɛ̄hi ā, amáŋ alɔ lɛ ɔ́ kwú gáā kɛpɔ̄ tū ɔ̄ ɛ́gɛ́nɛ̄ íne kú alɔ lɛ ā.

⁷Amáŋ Ulisíyāsi, otrɛ̄yí kú aícɔ́ɔja ā, gaá lɛ ɔ́ nú abɔ̄fú ŋmá abɔ̄ kú alɔ. Anɔ́ɔ ó da ācɛ nēe kpó ɔ̄ ɛpɔ̄ ā kéē wā ɛgiyí uwɔ.

⁸Ɔ́dāŋ́ nāa le ɔ̄kā da ɔ̄cɛ ā abɔ̄yī uwɔ, a géē jé ŋmá ɛgiyí nū odúúdú ɔdā nɛ̄ alɔ kpó ce ɔ́ ā.

⁹Ācɛ Ujíyu ā kē cɛ̄ tɔ̄há le ɛdɔ ɛlā ékpó ɔ́ɔmā kpó ce Upɔ́lu dúú.

¹⁰Igbómína ā le abɔ̄ yá lɛ Upɔ́lu kóō kɛlā, anɔ́ɔ Upɔ́lu kahíníī, “Ɛ́gɛ́nɛ̄ n jé ka a húmáyī kɛpɔ̄ ajɛ nyā iháyí alɛwa ā, ɔtū he um nɛ̄hi bá n gē kɔkɔ kú um ā.

¹¹Ɛ́gɛ́nɛ̄ a lɔfú bɔkwu nū í jé fíya glá ā, ó fíyɛ́ ɛ̄cī igwɛ́ɛpa nɛ̄ n nyɔ̄ Ujerúsālɛm gaá gbā Ɔwɔicō ɛ̄gbā ā ɛ́ɛ́ ŋ́.

¹²É kē má um bā n yɔ̄ gē táafú mla ɔ̄cɛ dúúmā ámāŋ ka ō wu ɔtū kú ɛwa klíicō ŋ́, ó kōō wɛ ipú Agblīihɔ-nɛ̄hi ámāŋ Ɛgogbɔ̄ɔkɔ ámāŋ ɛga dóódu kú igelī nɛ̄hi ā ŋ́.

¹³É kōō lɛ ijáalí kú ɛlā nēé kpó ce um ā ŋ́.

¹⁴Amáŋ n kē cɛ̄ ɛ̄nyā iyɔ̄bū uwɔ. N gē gbō Ɔwɔicō kú aádáádā alɔ ɛ̄gbā o ŋmá lɛ ō cɛ̄ɛ̄lā kú ɔwɛ ɔ́ɔmā nēé ka kóō wɛ ɛ̄kɛ̄mgbɛ̄ ā. N klla kē cɛ̄ɛ̄lā kú ɛjɛ̄ɛ̄jī ɔdā dóódu nēé tá ipú íne kú Umósīsi mɛ́mla ɛ̄nɛ̄ é tá tū ipú ɔkpá kú ācomɛ́ɛbɛ ā.

¹⁵N yɔ̄ ī gbēyī ī kpɔ́tū ce ka Ɔwɔicō géē je odúúdú ācɛ nēe gekwú ā, kwu ācɛ oyólɔhi mɛ́mla ācɛ o yá ɔdōbɔ̄bí, héyī ŋmá ɔlékwū.

¹⁶Anɔ́ɔ ohígbū ɔ́ɔmā n gē cēyītīkwū eko dóódu ká n̄ lɛ ɔtū ōbɛ́ɛpa ipú oyēēyī kú um ɛgiyí Ɔwɔicō mɛ́mla alɛɛcɛ ŋ́.

¹⁷Abɔ̄ ń yɔ̄ ŋ́ iháyí alɛwa ā, n pīyɛyí wā Ujerúsālɛm mla ije nɛ̄ n bī gé lɛ ācɛ ɔlɛ́ um ā, cɛ́ɛ́ kú n̄ géē lɛ ɛya gwó dúú.

¹⁸Eko nɛ̄ n yɔ̄ gē yá lɛ ā, é má um bā n lɛ iyē gwu ipú Agblīihɔ-nɛ̄hi, ɛwa í bá abɔ́ɔ ŋ́ mā ā, útú í ke hɛ́ ŋ́ dúú.

¹⁹É cíkā kéē bá amānyā iyɔ̄bū uwɔ kéē kpɛlā ce um ɔ́dāŋ kéē bī ɛlā dúúmā lɛyíkwu um.

²⁰Ó lɛ ā ŋ́ nɛɛ ācɛ nēe bá ā abɔ̄yī uwā kéē ka ɔdōbɔ̄bí dúúmā nēé má ɛgiyí um ā tɛ́ɛ́cɛ eko nɛ̄ n háyi iyɔ̄bū Ukánsulu ā.

²¹Ɔdā ékpónú nēe má ā wɛ ɛgba nɛ̄ n dɛ̄ abɔ̄ n yɔ̄ ɔtāhɛ̄ uwā ka, ‘Ohígbū ohéyī ŋmá ɔlékwū nēe gē kɛpɔ̄ tū um iyɔ̄bū aá ícɛ nyā ā.’”

²²Amáŋ Ufɛ́līsi, abɔ̄ ó kē jé ɛlā kú ɔwɛ ā lɔhi ā, ó lɛ ɛpɔ̄ ā pi tá kahíníī, “Eko nɛ̄ Ulisíyāsi, otrɛ̄yí kú aícɔ́ɔja ā gā, ɛ́ɛ́ nɛ̄ n géē hɛ́pɔ̄ á.”

²³Ó le ɔ́da je lɛ otrɛ̄yí aícɔ́ɔja ofɛhɔ̄ ā kóō kwú Upɔ́lu ú tá ijaló, amáŋ kɔ́ɔ̄ kē bēē je ɛga lɛ ɔ́, ká ɔ̄ kē lɛ ɛga je lɛ aóklóbīya nū kéē bēē nyɔ̄ í tá ɔ́ abɔ̄ ɔwɛ dúú nōo he uwá ɔtū.

²⁴Abɔ̄ ɛ̄cī dēē yɛ ā, Ufélīsi mɛ́mla ɔnyā nū Udurusíla, nōo wɛ ɔyínɔ̄nyā kú ɔ̄cɛ Ujíyu ā le pɛ́ wā. Ó lɛ ɛhɔ̄ tū kéē lɛ Upɔ́lu bī wā, anɔ́ɔ ó le ahɔ̄ je lɛ ɔ́ abɔ̄ ó kɛlā ohígbū ocɛ̄ɛla kú Ohɔ́nyɛtá Ujísɔ̄si ā.

²⁵Amáŋ abɔ̄ Upɔ́lu yɔ̄ gē miya ɛlā mla uwá lɛyíkwu ɔdā olɔhi nɛ̄ ɔ̄cɛ ī yá, o cīyɔ̄cɛ-bī, mɛ́mla ɛ̄cī nɛ̄ Ɔwɔicō géē hɛ́pɔ̄ kú ācɛ kú ɛcɛ ā, ufi le Ufɛ́līsi kwú, anɔ́ɔ ó kahíníī, “Nyɔ̄ abālɔbányā ɛ́ɛ́. Eko nɛ̄ n lɛ ɛga lɛ, n géē hī uwɔ igwú.”

²⁶Ó kē kpéyī ce ka Upɔ́lu ɔ́ɔ géē je ómíci lɛ anúɔ. Anú yá nōó gē tɛ̄hɔ̄ fu ɔ́ kóō kɔ̄kā lɛ ɔ́ eko tééko á.

²⁷Amáŋ eko nɛ̄ iháyí ɛpa le gla ā, Upɔsíyɔ̄si Ufɛ́sitɔ̄si miyɛ ɔkwu Ufɛ́līsi. Abɔ̄ Ufɛ́līsi gē tíne kóō yá olɔhi lɛ ācɛ Ujíyu ā, Ufɛ́līsi habɔ̄ Upɔ́lu tá ipú agbá.