Read idoma ÚKLƆ́ KÚ ĀCOTƐ̄HƆ̄ 25 Bible Online

ÚKLƆ́ KÚ ĀCOTƐ̄HƆ̄ 25 - idoma bible

ÚKLƆ́ KÚ ĀCOTƐ̄HƆ̄ 25

¹Oŋmɔ́ɔ̄cī ɔ̄mɛtá nɛ̄ Ufɛ́sitɔ̄si ga Usísarīya gaá mīyɛ ɔkwu Ufílīsi, ó le yɛ tá Ujerúsālɛm.

²Ɛga nɛ̄ aótrɛ̄yí kú ācogwɛ́ɛya mɛ́mla ācɛ nɛ̄hi kú ācɛ Ujíyu ā lɛ ɛlā nwū tā ɔ̄ ipú lɛyíkwu Upɔ́lu. É le ɔkɔ gbā le Ufɛ́sitɔ̄si,

³gē ba ɔ́ kɔ́ɔ̄ lɛ ɔdōlɔhi nyā yá lɛ aá ŋmá ō lɛ Upɔ́lu tū wā Ujerúsālɛm. É kē le miya ka aá géē ŋmó ɔ́ ɔwɛ.

⁴Ufɛ́sitɔ̄si tóohi ka Upɔ́lu ɔ́ɔ yɔ̄ ijaló ajɛ Usísarīya, ka anú ɔ tíne ō nyɔ̄ abɔ́ɔ eko kpií.

⁵Anɔ́ɔ ó kahíníī, “Ohígbū ɔ́ɔmā, aótrɛ̄yí kú aá kéē wā Usísarīya mla um cɛ́ɛ́ kéē géē lɛ ɛlā kpó ce ɔ́ ɔdāŋ́ kóō le ɔdōbɔ̄bí dóódu yá.”

⁶Ufɛ́sitɔ̄si le ɛ̄cī ahātá ámāŋ ka ɛ̄cī igwó yá Ujerúsālɛm mla uwá, anɔ́ɔ ó kwúcē wā Usísarīya á. Oŋmɔ́ɔ̄cī nū ó gaá cīce úgādā ɔcɛ́ kóō hɛ́pɔ̄, anɔ́ɔ ó le ɔ́da je kéē lɛ Upɔ́lu bī wā.

⁷Eko nɛ̄ Upɔ́lu gā a, ācɛ Ujíyu nēe wā ŋmá Ujerúsālɛm ā le jīla tū ɔ̄, gē cē ɛlā okwíyē alɛwa, nɛ̄ uwá í kē lɛ ijáalí dúú nōo lɔfú cɛ̄ ka ɛlā kú uwā wɛ ɔkwɛ̄yi ŋ́.

⁸Amáŋ Upɔ́lu le ɔkɔ kú nū ka kahíníī, “Ń yá ɔdōbɔ̄bí dúú lɛyíkwu íne kú ācɛ Ujíyu ámāŋ ka o yá unwalu dúú lɛyíkwu Agblīihɔ-nɛ̄hi ámāŋ ka o yá ɔdōbɔ́bí lɛyíkwu Ɔcɛ́ nɛ̄hi kú Uróm ŋ́.”

⁹Amáŋ Ufɛ́sitɔ̄si tíne kóō téeyī olɔhi kú ācɛ Ujíyu ā, da Upɔ́lu kahíníī, “Ó he uwɔ ɔtū ká ā nyɔ̄ Ujerúsālɛm kéē lɛ ɛpɔ̄ kú ɔdā alɛwa nēé kpó ce uwɔ ā ka abɔ́ɔ iyɔ̄bū um m?”

¹⁰Amáŋ Upɔ́lu kahíníī, “N háyi únɛ́pɔ̄ kú Ɔcɛ́ nɛ̄hi kú Uróm, ɛga nōo cíkā kéē ka ɛpɔ̄ kú um ā. Ń yá ācɛ Ujíyu ɔdōbɔ̄bí dúúmā ŋ́, awɔ abɔ̄yī uwɔ jé lɛ ā lɔɔlɔhi.

¹¹Ɔ́dāŋ́ ka n lɛ ɔdōbɔ̄bí yá nɛ̄ n kē lɛ íne bīya nōo cíkā lɛ ikwū kú um, ń ka kéē ŋmó um ŋ́ nɛɛ ŋ́. Amáŋ ɔ́dāŋ ka ɛlā ɔ̄kwɛ̄yi dúúmā í yɔ̄ ipú ɛlā nēé kpó ce um ā ŋ́, ɔ̄cɛ dúúmā í gáā je um lɛ uwá glá ŋ́. N le apíili yá ga ɛgiyí Usísa.”

¹²Eko nɛ̄ Ufɛ́sitɔ̄si mɛ́mla aúkánsulu le ahɔ̄ bá ahɔ̄ āa, ó tóohi kahíníī, “Awɔ ā ka anúɔ i yá apíili ga ɛgiyí Usísa á, ɛgiyí Usísa nāa géē nyɔ̄ á.”

¹³Ó lé ɛ̄cī tū ipú lígíí, Ɔcɛ́ Ágrīpa mɛ́mla Ubénisi fu ajɛ Usísarīya gaá blla Ufɛ́sitɔ̄si.

¹⁴Abɔ̄ é kē bá abɔ́ɔ ɛ̄cī alɛwa ā, Ufɛ́sitɔ̄si kwú ɛlā kú Upɔ́lu ā ú tá ajɛ iyɔ̄bū ɔcɛ́ ā kahíníī, “Ó tū olagbá éyi nɛ̄ Ufélīsi mā ɔ̄ tá ipú agbá.

¹⁵Anɔ́ɔ eko nɛ̄ n yɔ̄ Ujerúsālɛm ā, aótrɛ̄yí kú ācogwɛ́ɛya mɛ́mla anyākwɔ́cɛ kú ācɛ Ujíyu gaá le ɛlā nwū tū um otū ohígbū nū, gē ba ká amíyɔ̄ɔ̄ lɛ ɛpɔ̄bí ŋmó ɔ̄.

¹⁶N tá uwā ohi ka alɔ nēe wɛ ācɛ Uróm ā í gē ŋmó ɔ̄cɛ nēé kpó ɛlā ce ɔ́ ā ɛpɔ̄bí gbɔbū kú ālɔ̄ jɛga lɛ ɔ́ kóō leyī mééyī mla ācɛ nēe kpó ɛlā ce ɔ́ ā kóō kɔkɔ kú nū ŋ́.

¹⁷Eko nēé wā amānyā a, ń kpéeko bónū ŋ́, amáŋ oŋmɔ́ɔ̄cī piíí ā n gaá cīce kú um kɛpɔ̄ ā, anɔ́ɔ n le ɔ́da je kéē lɛ Upɔ́lu bī wā.

¹⁸Eko nɛ̄ ācɛ nēé kpó ɔ̄ ɛpɔ̄ ā cāŋjɛ háyi icō ā, é kē kpó ɛdɔ ɛlā obɔ̄bí ce ɔ́ ɛ́gɛ́nɛ̄ n kpéyīce ŋ́.

¹⁹Amáŋ é lɛ ɔwɛ ɛlā ōhī nɛ̄ uwá táafú mla anú ohígbū ɔwɔ ōgbā kú uwā mɛ́mla ohígbū Ujísɔ̄si éyi nōo gekwú, amáŋ Upɔ́lu kē ka lɔfú lɔfú ka ɔ́ɔ yēeyī.

²⁰Ɛ́gɛ́nɛ̄ ń jé ɔwɛ nɛ̄ n gē bū ɔkwu ɛlā nēe bá ā ŋ́ mā, anɔ́ɔ n da ɔ́ ɔ̄kā ɔ́dāŋ kóō he ɔ́ ɔtū kóō ga nyɔ̄ Ujerúsālɛm gaá lɛ ɔkɔ kú nū ka abɔ́ɔ lɛyíkwu ɛlā nēe kpó ce ɔ́ ā.

²¹Amáŋ eko nɛ̄ Upɔ́lu gbɔ̄ɔkɔ kéē kwú anúɔ ú tá ijaló gbéeko nɛ̄ Ɔcɛ́ nɛ̄hi ā géē lɛ ɛpɔ̄ ā hɛ́ ā, n lɛ íkwu je lɛ uwá kéē bī ɔ̄ jāā gbéeko nɛ̄ n géē tū ɔ̄ nyɔ̄ gé lɛ Usísa.”

²²Anɔ́ɔ Ágirīpa da Ufɛ́sitɔ̄si kahíníī, “Ó géē he um ɔtū ō lɛ ɔkɔ kú ɔ̄cɛ ā pó abɔ̄yī um.” Anɔ́ɔ Ufɛ́sitɔ̄si kahíníī, “Óócí, ā géē pó ɔkɔ nū.”

²³Anɔ́ɔ oŋmɔ́ɔ̄cī nū ā, Ágrīpa mɛ́mla Ubénisi gā mla ojīlīmā nɛ̄hi, anɔ́ɔ é le bēhé mla aótrɛ̄yí kú aícɔ́ɔja mɛ́mla ācɛ nɛ̄hi kú igelī ā wā ipú agbla ōjīla kú ójila. Anɔ́ɔ Ufɛ́sitɔ̄si le ɔ́da je lɛ uwá kéē lɛ Upɔ́lu bī wā.

²⁴Ufɛ́sitɔ̄si kahíníī, “Ágirīpa, Ɔcɛ́, mɛ́mla odúúdú ācɛ nēe bá amānyā mla alɔ ā, aá má ɔ̄cɛ ā, anú nɛ̄ odúúdú ācɛ Ujíyu kwu aɛ́nɛ̄ e bá amānyā mɛ́mla aɛ́nɛ̄ e bá Ujerúsālɛm gē dɔɔ̄kā ikwū kú nū á.

²⁵Amáŋ n má ka ó yá ɔdā dúúmā nōo cíkā kéē ŋmó ɔ̄ ŋ́. Ɛ́gɛ́nɛ̄ ó ka ka anúɔ kē í yá apíili ga ɛgiyí Ɔcɛ́ nɛ̄hi ā, anɔ́ɔ n lɛ ɔ́ ŋmótū kú um lɛ ɔ́ tū nyɔ̄ á.

²⁶Amáŋ ń kē lɛ ɔdā dóódu kpɔ́cíí nɛ̄ n géē tá fu óndú um ohígbū nū ŋ́, ó lɛ ā anɔ́ɔ n bī ɔ̄ wā iyɔ̄bū odúúdú aá, o fíyɛ́ dúú ā, iyɔ̄bū uwɔ, Ágirīpa Ɔcɛ́, cɛ́ɛ́ ká eko nɛ̄ alɔ lɛ ɔ́ jīla kpó ɛɛ́ n géē má ɔdā nɛ̄ n géē tāajɛ.

²⁷Ohígbū ka n gbɛlá kóō lɔhi ká n̄ lɛ olagbá tɛ̄hɔ, ká n̄ kē tá ɔdā nōó yā ā ŋ́ nɛ̄ ŋ́.”