Read idoma ÚKLƆ́ KÚ ĀCOTƐ̄HƆ̄ 26 Bible Online

ÚKLƆ́ KÚ ĀCOTƐ̄HƆ̄ 26 - idoma bible

ÚKLƆ́ KÚ ĀCOTƐ̄HƆ̄ 26

¹Eko nēé le Upɔ́lu bī iyɔ̄bū aɔ́cɛ́ ā. Anɔ́ɔ Ágirīpa da Upɔ́lu kahíníī, “É je ɛga ga awɔ ká ā kɛlā kú uwɔ abɔ̄yī uwɔ.” Anɔ́ɔ Upɔ́lu je abɔ̄ gicō, anɔ́ɔ ó gbɔɔ́ ō kɔko kú iyī nū ɔwɛ ɛ́gɛ́nyā á.

²“N hī iyī um ka ɔ̄cɛ nɛ̄ iyē kú nū fú nɛ̄hi, Ágirīpa Ɔcɛ́, nōó wɛ iyɔ̄bū uwɔ nɛ̄ n gáā kɔkɔ kú um ícɛ ohígbū ɔdā dóódu nɛ̄ ācɛ Ujíyu kpó ce um ā,

³ohígbū ka awɔ abɔ̄yī uwɔ ā jé ucē mɛ́mla áafú dóódu nɛ̄ ācɛ Ujíyu gē tá ā lɔɔlɔhi. Ó lɛ ā n gbɔ̄ɔkɔ gā awɔ kā lɛ ahɔ̄ jē gā um pɛtɛɛ.

⁴“Odúúdú ācɛ Ujíyu jé ɛ́gɛ́nɛ̄ n lā oyēeyī kú um ŋméeko nɛ̄ n wɛ ɔyípoklóbīya ā. É jé ɛ́gɛ́nɛ̄ n lā odúúdú oyēeyī kú um lɛ ā, aflɛ́yí ɔtāhɛ ajɛ ɔlɛ́ um mɛ́mla ipú Ujerúsālɛm ā.

⁵Ɔ́dāŋ kéē í cɛ̄ í ce um ijáalí, é jé ŋmá eko aflɛ́yí ka n wɛ ɔ́wá kú Ufárisīi nēe leyī kwɛcɛ gɛɛ fíyɛ́ dúú ā.

⁶Anɔ́ɔ abālɔbányā n háyi amānyā kéē kɛpɔ̄ tū um ohígbū ka n kpɔ́tūce yɔ̄ ī gbēyī ka Ɔwɔicō géē yá okónu nōó ce lɛ aádáádā alɔ ā.

⁷Okónu ɛdɔ ékpó nɛ̄ Ɔwɔicō ce nyā nɛ̄ ipɔ́ɔma igwɛ́ɛpa kú ɔlɛ́ alɔ ā leyīce ka Ɔwɔicō ɔ́ɔ géē yá lɛ uwá ā nēé gē gbā ɔ̄ ɛ̄gbā ɛnɔ mla otú á. Ohígbū ɔtōkpóce nyā, ágábáidu, nɛ̄ ācɛ Ujíyu mbáa kpɛ́lā ce um á!

⁸Ɔdíyá nōó lɔnɔ tū aá nēe bá amānyā ká aá cɛ̄ ka Ɔwɔicō je ɔ̄cɛ héyi ŋmá ɔlékwū glá ā?

⁹“Ami abɔ̄yī um gē gbɛlá ka n lɔfú lɛ ɔdā dóódu yá ká n̄ lɛ ɛyí bū kwu iyē kú Ujísɔ̄si kú Unásārēti.

¹⁰Ɔ́ɔmā wɛ ɔdā nɛ̄ n yá ipú Ujerúsālɛm á. N le íkwu mīyɛ ŋmá abɔ̄ kú otrɛ̄yí kú ācogwɛ́ɛya, anɔ́ɔ n le ācɛ alɛwa kú ācɔ̄lóhɔ́nyɛtá kpó tū agbá. Eko nēé le ɛpɔ̄ ɔ̄cɛ ō ŋmó ka tū uwā nɛ̄, n gē ka dúú ka n cɛ̄ mla uwá.

¹¹Igbo alɛwa n gē cɛ̄ kéē yá uwā italā ipú Ɛgogbɔ̄ɔkɔ dóódu, n kē ī cēyītīkwū ká n̄ yá kéē cɛ̄ɛ̄lā Ɔwɔicō gɛ ŋ́. N kē cɔ̄nū nɛ̄ɛ̄nɛ̄hi lɛyíkwu uwá nōo kōō cɛ̄ ga um ga ipú igelī kú aílɔ́wá ká n yá uwā ŋmó.

¹²“Ohígbū ɛ̄nyā nɛ̄ n mīyɛ íkwu mɛ́mla ɔ́da ŋmá ɛgiyí otrɛ̄yí kú ācogwɛ́ɛya ga ajɛ Udamásikɔ̄si á.

¹³Ɛplá ɛnɔ oyɛ̄ɛyí ā, Ɔcɛ́ ágábáidu, n má ɔlá ōfíyajɛ nōo fíyajɛ fíyɛ́ ɛnɔ, ŋmá ɔkpáncō, anɔ́ɔ ó le cɛ̄ klá ami mɛ́mla ācɛ nēe bá ī yɛ tɔ̄há mla um ɔwɛ ā.

¹⁴Anɔ́ɔ eko nɛ̄ odúúdú alɔ mágwōnū bá ajɛ ā, n pó ɔkɔ éyi nōo da um ɔkɔ Uhíbru ka, ‘Usɔ́lu, Usɔ́lu, ɔdíyá nāa ī yá um ŋmó ā? Ó í lɔnɔ tū uwɔ nɛ̄hi ká ā bɛyí kwu ɔdā nɛ̄ n miya táajɛ ā n.’

¹⁵Anɔ́ɔ n ka, ‘A wɛ ɔ̄nyɛ nɛɛ, Óndú?’ Anɔ́ɔ Óndú ā da um ka, ‘Ami Ujísɔ̄si nāa gē yáŋmó á.

¹⁶Amáŋ cāŋjɛ ká ā háyi ikpó abɔ̄yī uwɔ. Ohígbū ka n wā gáā ma iyī um fú gā awɔ ká n̄ lɛ uwɔ yá ɔ̄cocɛ̄hɔ̄ kú um.

¹⁷N géē nya uwɔ tá ŋmá abɔ̄ kú ācɛ Ísrɛ̄lu mɛ́mla o ŋmá abɔ̄ kú aílɔ́wá nɛ̄ n yɔ̄ ī tū uwɔ ɛhɔ̄ ga ɛgiyí uwā ā.

¹⁸Awɔ ā kóō le uwá eyī nwūla cɛ́ɛ́ ká ā lɛ uwá eyī pīya ŋmá ɛgiyí Ebilíi ga ɛgiyí Ɔwɔicō, cɛ́ɛ́ o ŋmá lɛ o cɛ̄ɛ̄lā kú um, é géē je íne nēé bīya ā yá uwā ɛhi, cɛ́ɛ́ kéē lɛ ɛga éyi lɛ ɔtāhɛ̄ ayípɛ̄ ɔlɛ́ Ɔwɔicō.’

¹⁹“Ohígbū ɔ́ɔmā, Ágrīpa Ɔcɛ́, ń yá īkpɛ̄yí olɔfú ɛgiyí ɔdā nɛ̄ n má ŋmá ɔkpáncō ā ŋ́.

²⁰Amáŋ n ka tɛ́ɛcɛ aflɛ́yí lɛ ācɛ nēe bá Udamásikɔ̄si, n kē ka tɛ́ɛcɛ ajɛ Ujerúsālɛm mɛ́mla odúúdú ajɛ kú Ujudíya. N ka tɛ́ɛcɛ ipú aílɔ́wá ā kéē pīyabɔ̄ kéē kwú eyī pīya tá ɛgiyí Ɔwɔicō, kéē yúklɔ́ nōo géē mafú kéē le pīyabɔ̄ ɛɛ́.

²¹Ohígbū ɔdā nyā nɛ̄ ācɛ Ujíyu nēe bá nyā le um kwú ipú Agblīihɔ-nɛ̄hi, klla tíne kéē lɛ um ŋmó á.

²²Amáŋ o jāā gaá kwu ícɛ nyā piíí ā, Ɔwɔicō le um tábɔ̄, n kē yēeyī, cɛ́ɛ́ ká n̄ háyi amānyā ká n̄ cɛ̄ odúúdú ācɛ ijáalí, ācɛ nɛ̄ŋ́cɛ́ mɛ́mla ācɛ nɛ̄hi. Ɔdā nɛ̄ n ka ā wɛ ɛdɔ ékpó mɛ́mla ɔdā piíí nɛ̄ ācomɛ́ɛbɛ mɛ́mla Umósīsi le ka koó géē yá ā.

²³ Ó ka Ohɔ́nyɛtá géē móōwē, ka ɛ́gɛ́nɛ̄ ó géē wɛ ɔ̄cɛ aflɛ́yí nōo géē héyī ŋmá ɔlékwū ā, ó géē tɔ́ɔna kú ɔlá ofíyajɛ ā lɛ ācɛ Ujíyu mɛ́mla aílɔ́wá dúú.”

²⁴Abɔ̄ Upɔlu yɔ̄ gē kɔkɔ kú nū ā, Ufɛ́sitɔ̄si le ɛgba dɛ̄ kahíníī, “Upɔ́lu, a gē jɛɛ́lɛ́! Ɔdōjé nɛ̄hi kú uwɔ yɔ̄ ī je uwɔ jɛɛ́lɛ́!”

²⁵Amáŋ Upɔ́lu kahíníī, “Ń jɛɛ́lɛ́ ŋ́, ɛ́nɛ́nɛ̄ Igbómína ɔ̄cojīlīmā, Ufɛ́sitɔ̄si. Eyī gbum gɔɔ abɔ̄ n yɔ̄ ī kɛlā ɔkwɛ̄yi nyā.

²⁶Ɔcɛ́ Ágrīpa! N lɔfú kɛlā gā awɔ tɛ́ɛcɛ péee glá. N jé cāā ka a jé aɔ́dā nēe bá nyā, é kē wɛ ɛ̄yīpɛ̄ tū uwɔ ŋ́, ohígbū ka aɔ́dā nēe yá ā í yá ipú ajoodobū ŋ́.

²⁷Ɔcɛ́ Ágrīpa, a cɛ̄ɛ̄lā kú ācomɛ́ɛbɛ ā? N jé ka a cɛ̄.”

²⁸Ágrīpa da Upɔ́lu kahíníī, “Ɛpléeko kpií nyā a dɔɔ̄kā ká ā je um pīya ɔ̄cɔ̄lohɔ́nyɛtá nɛɛ?”

²⁹Upɔ́lu tóohi kahíníī, “Ó kōō wɛ eko kpií ámāŋ eko dóódu n gbɔ̄ɔkɔ lɛ Ɔwɔicō ka ó wɛ awɔ ōfōōfū uwɔ ŋ́, Amáŋ odúúdú ācɛ nēe ī pó ɛlā kú um ícɛ ā kéē le lɛbɛ̄ɛka ami ā dúú, amáŋ í tíne ká ā wɛ olagbá ŋ́.”

³⁰Anɔ́ɔ Ɔcɛ́ ā cāŋjɛ mla igbómína ā mɛ́mla Ubenísi mɛ́mla ācɛ nēe bá ajɛ mla uwá ā.

³¹Anɔ́ɔ eko nēé le hɛ́ gɛcɛ ā, é da iyī uwā kahíníī, “Ɔ̄cɛ ā í yá ɔdā dúúmā nōo cíkā lɛ ikwū ámāŋ ka agbá ŋ́.”

³²Anɔ́ɔ Ágrīpa da Ufɛ́sitɔ̄si kahíníī, “Alɔ í yɛ í lɛ ɔ̄cɛ ā hɛ́tá ɔ́dāŋ kóō hɔ́būtá pi ɛpɔ̄ ga ɛgiyí Usísa ŋ́.”