Read idoma ÚKLƆ́ KÚ ĀCOTƐ̄HƆ̄ 3 Bible Online

ÚKLƆ́ KÚ ĀCOTƐ̄HƆ̄ 3 - idoma bible

ÚKLƆ́ KÚ ĀCOTƐ̄HƆ̄ 3

¹Ɛ̄cī éyi Upíta mɛ́mla Ujɔ́ni bá gē nyɔ̄ ipú Agblīihɔ-nɛ̄hi, ɛplá oje ɛtá kú ɔlɛ́ɛnɔ, eko nɛ̄ ācɛ gē gbɔ̄ɔkɔ ā.

²É gē bī ɔ̄cɛ éyi nōo wɛ ocīkpó ŋmá ipú kú ɛ́nɛ́ nū wā í táajɛ ɛ̄cī dóódu okómpīinu kú Agblīihɔ-nɛ̄hi nēé hī ka Okómpinu Ohéyifuú ā, kóō gaá ba ɔdā ŋmá abɔ̄ ācɛ nēe ī bēhé ga ipú Agblīihɔ-nɛ̄hi ā.

³Eko nōó lɛ Upíta mɛ́mla Ujɔ́ni má yɔ̄ ī bēhé ga ipú Agblīihɔ-nɛ̄hi ā, ó le ɛ̄ba ba uwá.

⁴Upíta mɛ́mla Ujɔ́ni leyī hɛ́ kwu ɔ́ klīklī, anɔ́ɔ Upíta da ɔ́ kahíníī, “Pīyeyī má alɔ!”

⁵Anɔ́ɔ ó le eyī hɛ́ kwu uwá, yɔ̄ ī leyīce ka anúɔ géē lɛ ɔdée ŋmá abɔ̄ uwā.

⁶Amáŋ Upíta da ɔ́ kahíníī, “Ń lɛ ije nɛ̄hɛ́ mɛ́mla ugóolu (oje ɔdɔ) nóó, amáŋ ɔdā nɛ̄ n lɛ ā, nɛ̄ n géē je gā uwɔ á. O ŋmá iyē Ujísɔ̄si Ohɔ́nyɛtá, ɔ̄cɛ Unásārēti, yāwu!”

⁷Anɔ́ɔ ó bī ɔ̄ abɔ̄lɔ́ná klla kwú ɔ̄ ú cāŋjɛ. Ɔkwɔɔkwu ɔ́ɔmā ā, ikpó mɛ́mla oŋmíkpālī kú nū kwú lɔfú iyē.

⁸Ó le ómbili tá gicō, māháyi klla gbɔɔ́ ō yāwu. Anɔ́ɔ ó le bēé tá ipú Agblīihɔ-nɛ̄hi ā mla uwá. Ó yɔ̄ ī yāwu klla ī tó ómbili klla yɔ̄ ī cɛ̄tra Ɔwɔicō.

⁹Odúúdú ācɛ nēe bá abɔ́ɔ ā má ɔ̄ yɔ̄ ī yāwu klla ī cɛ̄tra Ɔwɔicō,

¹⁰anɔ́ɔ eko nēé lɛ ɔ́ jé ka anú wɛ ɔ̄cɛ nōo gē cīce gē ba ɛ̄ba Okómpīinu Ohéyīfuú kú Agblīihɔ-nɛ̄hi ā, ɔdā nēe yá lɛ ɔ́ ā le hɛ́ uwā idáagó klla yá uwā eyījii nɛ̄hi.

¹¹Abɔ̄ ɔ̄cɛ ā le abɔ̄ flá tū Upíta mɛ́mla Ujɔ́ni ipú okómpīinu kú Usólōmɔn nēé cē áklɔ̄kpɛ ce ɔ́ ā. Ó le hɛ́ ācɛ ā idáagó nɛ̄hi anɔ́ɔ é le inya kwu ga ɛgiyí uwā á.

¹²Eko nɛ̄ Upíta lɛ ācɛ ā má ā, ó da uwá kahíníī, “Aɔ́máapú um, Ísrɛ̄lu, abɔ̄ ó yá nɛ̄ aá le hídáagó ā, ámāŋ nɛ̄ aá kē leyīkwu alɔ glīglī bɛ̄ɛka ɔdā nōó wɛ oŋmá ɔfú kú alɔ ámāŋ ka otīihɔ kú alɔ nɛ̄ alɔ yá ɔ̄ kóō yāwu ā?

¹³Ɔwɔicō kú Ébrahām mɛ́mla Áyísīki mɛ́mla Ujékɔ̄pu, Ɔwɔicō kú aádā alɔ ā cɛ̄tra Ujísɔ̄si, ɔ̄cocɛ̄hɔ̄ kú nū. Amáŋ aá kwú ɔ̄ ú tū ācɛ abɔ̄ kéē lɛ ɔ́ ŋmó, aá klla le híhó ka aá jé ɔ̄ ŋ́ ipú eyī Upáyílēti nōo tíne kóō lɛ ɔ́ hɛ́tá ā.

¹⁴ Aá le ɔ̄cɛ otīihɔ mɛ́mla oyólɔhi ā híhó, amáŋ aá dɔɔ̄kā kéē habɔ̄ ɔ̄cɛ nōo ŋmó ɔ̄cɛ ā tá lɛ aá.

¹⁵Aá lɛ ɔ̄cɛ nɛ̄ oyēeyī ŋmá ɛgiyí nū ā ŋmó, amáŋ Ɔwɔicō kwú ɔ̄ ú héyī ŋmá ɔlékwū, alɔ kē wɛ ijáalí kú ɛ̄nyā.

¹⁶É yá ɔdā nɛ̄ aá má klla jé nyā ŋmá le ɔtū okpóce iyē nū, ocɛ̄ɛ̄lā kú Ujísɔ̄si yá nɛ̄ ɔ̄cɛ ā lɔfú iyē, ɛ́gɛ́nɛ̄ odúúdú aá má ɔ̄ nyā á.

¹⁷“Abālɔbányā, aɔ́máapú um Ísrɛ̄lu, n jé cāā ka ɔdā nɛ̄ aá yá Ujísɔ̄si ā, aá yá ɔ̄ ipú ɔdā-á-jé-ŋ́ nɛ̄, ɛ́gɛ́nɛ̄ aótrɛ̄yí kú aá kē yá ā.

¹⁸Amáŋ ɔdā nɛ̄ Ɔwɔicō tɛtɛ ka tɛ́ɛcɛ bū okónu kú odúúdú ācomɛ́ɛbɛ ā ka Ohɔ́nyɛtá kú ɔlɛ́ anúɔ ɔ́ɔ géē móōwē ā, ó bī ɔwɛ nyā lɛ ɔ́ yá jīla.

¹⁹Aá le pīyabɔ̄ kú aá kwúcē wā ɛgiyí Ɔwɔicō, cɛ́ɛ́ kóō kwú íne nēé bīya ā í yá aá ɛhi. Ɔ́dāŋ́ ka aá le yá lɛ ā,

²⁰eko nɛ̄ alelékwū kú aá géē lūgwū í wā ŋmá ɛgiyí Óndú ā, ó géē tū Ujísɔ̄si ohɔ́nyɛtá nɛ̄ ó fu lɛ aá ā ɛhɔ̄.

²¹Ó í klá ɔkpáncō jāā gbéeko nēé tū kéē lɛ aɔ́dā dóódu yá ɛ̄yīpɛ̄ ɛ́gɛ́nɛ̄ Ɔwɔicō ka ɔ́ tɛ́ɛcɛ bū okónu kú ācomɛ́ɛbɛ otīihɔ nēe yɔ̄ íkée ā.

²²Ohígbū ka Umósīsi ka, ‘Ɔwɔicō, Óndú ā géē tū ɔ̄comɛ́ɛbɛ éyi ɛhɔ̄ ŋmá ipú aá ɛ́gɛ́nɛ̄ ó tū ami abɔ̄yī um ɛhɔ̄ ā. Aá géē jāhɔ̄ lɛ ɔdā dúúmā nōó géē da aá ā.

²³Ɔ̄cɛ dóódu nóō jāhɔ̄ lɛyítáajɛ lɛ ɔ̄comɛ́ɛbɛ ɔ́ɔmā ŋ́ mā a, é géē lɛ ɔ́ hɛ́ ŋmá ācɔ̄lóhɔ́nyɛtá, cɛ́ɛ́ é lɛ ɔ́ yíífi.’

²⁴Odúúdú ācomɛ́ɛbɛ nēe kɛlā tɛ́ɛcɛ ā, ŋmá Usámūwɛ̄lu jāā gaá kwu aɛ́nɛ̄ o wā igbīhāajɛ ā, kɛlā tɛ́ɛcɛ lɛyíkwu aɔ́dā nēé yá ipú ɛ̄cī nēe bá nyā.

²⁵Aá wɛ ayí kú ācomɛ́ɛbɛ ā mɛ́mla ákú ɛka nɛ̄ Ɔwɔicō gbo mla aádā aá eko nōó da Ébrahām ka, ‘O ŋmá lɛ īkpō kú uwɔ ā é géē hɔ́hā ce ipɔ́ɔma dóódu kú ɛcɛ nyā’ ā

²⁶Eko nɛ̄ Ɔwɔicō fu ɔ̄cocɛ̄hɔ̄ kú nū ā, ó lɛ ɔ́ tɛ̄hɔ̄ ga ɛgiyí aá aflɛ́yí kóō hɔ́hā ce aá ŋmá lɛ o yá kú éyééye ká aá kóō leyī pīya ŋmá íne nōó bīya ā.”