Read idoma ÚKLƆ́ KÚ ĀCOTƐ̄HƆ̄ 5 Bible Online

ÚKLƆ́ KÚ ĀCOTƐ̄HƆ̄ 5 - idoma bible

ÚKLƆ́ KÚ ĀCOTƐ̄HƆ̄ 5

¹Amáŋ ɔ̄cɛ éyi nēé hī ka Ananíyāsi mɛ́mla ɔnyā nū Usafíra kwú ɔdā agbénú éyi nēé lɛ ā ú lá,

²O ŋmá lɛ ɛ́gɛ́nɛ̄ anú mɛ́mla ɔnyā nū cɛ̄ ŋmá igbīhi lɛ āa, ó kwú āyā kú ɔlá nū ā í tayínū. Anɔ́ɔ ó lɛ ohile ā bī wā gé lɛ ācotɛ̄hɔ̄ ā.

³Amáŋ Upíta kahíníī, “Ananíyāsi, ɔdíyá nɛ̄ Usétan le mu uwɔ ɔtū ká ā kɛ̄mgbɛ̄ lɛ Alelékwū Ihɔ ā, ká ā kē je āyā kú ɔlá kú ɔdā agbénú ā tayínū ā?

⁴Agbénú nyā wɛ ákú uwɔ eko nɛ̄ á je ɔ́ lá ɛ́ɛ́ ŋ́ mā. Eko nāa kē kwú ɔ̄ ú lá ā, ije ā kē wɛ ákú uwɔ. Ɔdíyá nāa miya ká ā yá ɔdā ɛ́gɛ́nyā ipú ɔtū kú uwɔ ā? Á kɛ̄ŋmgbɛ̄ lɛ ācɛ ŋ́ amáŋ a le ɛ̄kɛ̄mgbɛ̄ ka lɛ Ɔwɔicō.”

⁵Eko nɛ̄ Ananíyāsi le ɛlā nēe bá nyā pó ā, ó má fíyɛ́ ajɛ, anɔ́ɔ ó gekwú á. Anɔ́ɔ odúúdú ācɛ nēe pó ɔdā nōo yá ā yúufi nɛ̄ɛ̄nɛ̄hi.

⁶Ayípɛ̄ oklóbīya le pɛ́ wā gaá lɛ ɔ́ gbō, anɔ́ɔ é lɛ ɔ́ hɛ́ cabɔ̄ gaá kwú ɔ̄ ú nyi á.

⁷Ɛplá nɛ̄ eko le gla bɛ̄ɛka áwa ɛtá ā, ɔ̄nya nū nōó jé ɔdā nōo yá ɛ́ɛ́ ŋ́ mā, le bēhé wā ipú inu.

⁸Anɔ́ɔ Upíta da ɔ́ kahíníī, “Le da um, ɛ̄nyā wɛ odúúdú ije nɛ̄ aá je ɔdā agbénú ā lá ā?” Ó tóohi kahíníī, “Īī, odúúdú ije ā nɛ.”

⁹Anɔ́ɔ Upíta da ɔ́ kahíníī, “Ɔdíyá nɛ̄ awɔ mɛ́mla ɔbá uwɔ le miya kú aá já Alelékwū kú Óndú ā má ā? Ācɛ nēe nyɔ̄ í nyi ɔbá uwɔ ā bá okómpīinu ɔ̄wɛ, é kē í je uwɔ nyɛ̄ ɛcɛ dúú!”

¹⁰Ɔkwɔɔkwu ɔ́ɔmā ɔnyā ā fīyɛ̄ ajɛ gekwú iyɔbū Upíta. Eko nɛ̄ ayípɛ̄ oklóbīya ā gā inu ā, é má kóō gekwú, anɔ́ɔ é lɛ ɔ́ hɛ́ cabɔ̄ ga ɛcɛ, klla nyɔ̄ í lɛ ɔ́ nyi áklō kú ɔbá nū.

¹¹Ufi gbɔɔ́ ō yá ācɛ icɔ́ɔci dóódu mɛ́mla ācɛ dóódu nēe pó ɔdā nēe yá nyā ā.

¹²Ɛpléeko ɔ́ɔmā ā, ācotɛ̄hɔ̄ ā yá ɔdōcābɔ̄ mɛ́mla ɔdídáagó alɛwa ɔtāhɛ kú ācɛ ā. Ɛjɛ̄ɛ̄jī uwā gē jīla ɛ̄cī dóódu ipú inu nēé hi ka okómpīinu Áklɔ̄kpɛ kú Usólōmɔn ā.

¹³Amáŋ ɔ̄cɛ dúúmā kú ācɛ nēé wɛ ipú ɔ́wá ā ŋ́ mā í lɔtū pīyatɔ̄há mla uwá ŋ́, nááná nɛ̄ ācɛ cɛ̄tra uwá ā.

¹⁴Amáŋ é lɛ ɛwa kú ācɛnyīlɔ mɛ́mla ācɛnyā nēe cɛ̄lɔ̄ɔwɔicō ā katū ɔ̄ lɛ Óndú ā kpɔ́,

¹⁵Ohígbū ɔdā nɛ̄ ayíkpó ā bá gē yá ā, é lɛ ācɛ odoōcē kpóbá ɛyí agōdō mɛ́mla ákplata lɛ uwá kpó gaá bá ɔwɛ, cɛ́ɛ́ ká eko nɛ̄ Upíta gaá yɛ ā, ká ofu kú nū kóō ce aóhī kú uwā.

¹⁶Ācɛ kē le jīla tɔ̄há ŋmá ɔlɛ́ alɛwa nōo kwu Ujerúsālɛm ajaajɛ ā, klla le ācɛ odoōcē mɛ́mla ācɛ nɛ̄ aálelékwū obɔ̄bí gē junwalu lɛ uwá kpó wā. É kē lɛ ɛjɛ̄ɛ̄jī uwā kpó hɛ́tá.

¹⁷Amáŋ otrɛ̄yí kú ācogwɛ́ɛya ā mɛ́mla ācɛ nēe bá pī ɔ̄ ā (aɛ́nɛ̄ e yɔ̄ ipú ígwu kú ācɛ Usádusīi ā) le mu mla ímálānyī.

¹⁸É gaá lɛ ācotɛ̄hɔ̄ ā kpó kwú klla lɛ uwá kpó bá agbá kú ójīla ā.

¹⁹Amáŋ otú ā Alelékwū otɛ̄hɔ̄ kú Óndú ā lɛ ɔwɛ kú agbá ā kpó nwūla, klla lɛ uwá kpó wɛ̄ɛcɛ, anɔ́ɔ ó da uwá ka,

²⁰“Aá nyɔ̄ gaá háyi ipú Agblīihɔ-nɛ̄hi ā kú aá gbɔɔ́ ō nwū ācɛ ɛlā lɛyíkwu oyēeyī ɛ̄yīpɛ̄ nyā.”

²¹Eko nēé lɛ ɛ̄nyā pó ā, é le yɛ tá ipú Agblīihɔ-nɛ̄hi ā ɔlɛ́ɛnɔ, gaá yɔ̄ ī nwū ācɛ ɛlɔ̄ɔwɔicō. Anɔ́ɔ otrɛ̄yí kú ācogwɛ́ɛya āa mɛ́mla aɛ́nɛ̄ e bá pī ɔ̄ ā le ójīla ohɛ́pɔ̄ mla odúúdú ukánsulu kú Ísrɛ̄lu ā hīgwú tɔ̄há, é le ɛhɔ̄ tū ga agbá kéē lɛ ācotɛ̄hɔ̄ ā kpó wā.

²²Eko nɛ̄ ācogbāājɛ ā gā a, é má uwā ipú agbá gɛ ŋ́, anɔ́ɔ é kwúcē wā gaá kahíníī,

²³“Alɔ má agbá ā abɔ̄ ó le gwu lɔɔlɔhi ā, alɔ kē má ācɛ nēe gē gbō ɔ̄ ā abɔ̄ é kē háyi pī ɔwɛ dóódu ā, amáŋ eko nɛ̄ alɔ lɛ ɔwɛ nwūla ā, alɔ í má ɔ̄cɛ dúúmā ipú inu ŋ́.”

²⁴Eko nɛ̄ ācogbāājɛ kú Agblīihɔ-nɛ̄hi ā mɛ́mla aótrɛ̄yí kú ācogwɛ́ɛya ā lɛ ɛlā nēe bá nyā pó ā, ó le yá uwā eyījii ohígbū ka é jé ɛ́gɛ́nɛ̄ ɔdā nyā í ŋmɛ́yí lɛ ā ŋ́.

²⁵Anɔ́ɔ ɔ̄cɛ éyi gaá da uwá kahíníī, “Má, ācɛ nɛ̄ aá kpó tū agbá ā bá ipú Agblīihɔ-nɛ̄hi gē nwū ācɛ ɛlɔ̄ɔwɔicō.”

²⁶Anɔ́ɔ ācogbāājɛ mɛ́mla aícɔ́ɔja ā le pɛ́ nyɔ̄ gaá lɛ uwá kpó wā, ó wɛ abɔ̄fú ŋ́, abɔ̄ uwá gē yúufi ācɛ ā kéē géē tɛ́cɔ̄ klá uwá ā.

²⁷Eko nēé lɛ uwá kpó wā ā, é lɛ uwá kpó háyi iyɔ̄bū ójīla okɛ̄pɔ̄. Anɔ́ɔ otrɛ̄yí kú ācogwɛ́ɛya da uwá ɔ̄kā ka,

²⁸“Alɔ tɛtɛ le abɔ̄ pi aá ahɔ̄ ka aá kóō híī nwɛ̄lā ŋmá lɛ iyē nyā ŋ́. Amáŋ aá má ɛ́gɛ́nɛ̄ ɔdā nɛ̄ aá nwū ā le mu Ujerúsālɛm kwɛcɛ ā. Aá tíne ká aá je oyī kú ɔ̄cɛ ā ce alɔ ɛyí.”

²⁹Upíta mla ācotɛ̄hɔ̄ ā tóohi kahíníī, “Ɔwɔicō nɛ̄ alɔ géē pó ɛlā kú nū fíyɛ́ ákú alɛɛcɛ á.

³⁰Ɔwɔicō kú aádā alɔ le yá ká Ujísɔ̄si ɔ̄cɛ nɛ̄ aá ŋmó pla ɔcí ā kóō le héyī ŋmá ɔlékwū.

³¹Ɔwɔicō je ɔ́ gicō ga abɔ̄lɔ́ná kú nū cɛ́ɛ́ kóō wɛ Otrɛ̄yí mɛ́mla Ohɔ́nyɛtá, kóō kē je ɛga lɛ ācɛ kú Ísrɛ̄lu kéē pīyabɔ̄, cɛ́ɛ́ kéē habɔ̄ íne nēé bīya ā tá lɛ uwá.

³²Alɔ abɔ̄ alɔ kē wɛ ijáalí kú ɔdā nēe bá nyā. Alelékwū Ihɔ nɛ̄ Ɔwɔicō gē je lɛ ācɛ nēe cɛ̄ɛ̄lā kú nū ā ke wɛ ijáalí dúú.”

³³Eko nēé lɛ ɛ̄nyā pó ā, ó le kwú uwā ɔtū, anɔ́ɔ é dɔɔ̄kā kéē lɛ uwá kpó ŋmó.

³⁴Anɔ́ɔ ɔ̄cɛ Ufárisīi éyi nēé hī ka Ugamalīyelu, itíca kú íne, ɛ̄nɛ̄ odúúdú ācɛ gē lɛ ojīlīmā ce ɔ́, cāŋjɛ ɔtāhɛ̄ kú ójila ohɛ́pɔ̄. Anɔ́ɔ ó da uwá kéē lɛ uwá nū gɛɛcɛ eko lígíí ɛ́ɛ́.

³⁵Anɔ́ɔ ó da uwá kahíníī, “Aá ācɛ Ísrɛ̄lu, aá lɛlá kwu iyī aá ohígbū ɔdā nɛ̄ aá tíne ká aá yá ācɛ nēe bá ā.

³⁶Otɛtɛ, Utɛ́dāsi cāŋjɛ gē jɔfú ka anúɔ wɛ ɔ̄cɛ éyi. Anɔ́ɔ áluka ācɛ nōo lɛbɛ̄ɛka úlá éyi cēkplá mla anú. É lɛ ɔ́ ŋmó, anɔ́ɔ ācɛ dóódu nēe cēkplá mla anú ā le fíyákátā, anɔ́ɔ ofú kú uwā mɛ á.

³⁷Igbīhi Utɛ́dāsi, Ujúdasi kú Ugálīli cāŋjɛ eko ɔlɛ́-ōka, anɔ́ɔ ó lɛ ācɛ ōhī pi blla iyī nū. É kē le ɔ́ ŋmó dúú, ācɛ dóódu nēe kē yɛce ɔ́ ā le pahīla.

³⁸Ipú ɛlā kú abālɔbányā ā, n pi aá ahɔ̄ ká aá lɛ iyī aá hɛ́ ŋmá ɛgiyí ācɛ nēe bá ā, ká aá kē habɔ̄ uwā tá cíí. Ohígbū ka ɔ́dāŋ ka ɔdā nēé miya klla yá nyā ŋmá ɛgiyí ācɛ, ó géē mɛtāajɛ.

³⁹Amáŋ ɔ́dāŋ nōó ŋmá ɛgiyí Ɔwɔicō, aá lɔfú yá uwá lé glá ŋ́. Á jé ní, aá géē yɔ̄ ī bɛ́yíkwu Ɔwɔicō.”

⁴⁰Aígabɔ̄ ā cɛ̄ɛ̄lā nɛ̄ Ugamáliyel ka ā. É le ācotɛ̄hɔ̄ ā hīgwú wā inu, anɔ́ɔ é le uwá gɔ́, le ukɔ́ tū uwā kéē bī iyē kú Ujísɔ̄si kɛlā gɛ ŋ́. Anɔ́ɔ é habɔ̄ uwā tá kéē nyɔ̄ á.

⁴¹Abɔ̄ é nyɛ̄ɛ̄ ŋmá iyɔ̄bū aígabɔ̄ ā, é bá ī gwéeyē ohígbū ka Ɔwɔicō le uwá fu kéē cíkā nēé ī juwēyī lɛ uwá ohígbū Ujísɔ̄si ā.

⁴²É habɔ̄ ō nwū ācɛ mla o tɔ́ɔna kú Ɔkōolɔhi kú Ujísɔ̄si Ohɔ́nyɛtá ā tá ipú Agblīihɔ-nɛ̄hi mɛ́mla ɔlɛ́ ɛ̄cī dóódu ŋ́.