Read idoma ÚKLƆ́ KÚ ĀCOTƐ̄HƆ̄ 6 Bible Online

ÚKLƆ́ KÚ ĀCOTƐ̄HƆ̄ 6 - idoma bible

ÚKLƆ́ KÚ ĀCOTƐ̄HƆ̄ 6

¹Eko le gla yɛ ā, abɔ̄ áluka kú ayíkpó ā gbɔɔ́ ō nyīla ā, ācɛ Ujíyu nēe ī ka ucē kú Ugríisi ā gbɔɔ́ ō ka iŋini lɛyíkwu ācɛ nēe ī ka Uhíbru ā, ohígbū kéē lɛ ɛlā kwu anyōkwū kú uwā ipú ɔdōlé kú ɛ̄cī dóódu nēé ī kɔ̄ ā ŋ́.

²Ācotɛ̄hɔ̄ igwɛ́ɛpa ā lɛ odúúdú ayíkpó ā kpó hīgwú tɔ̄há, anɔ́ɔ é da uwá kahíníī, “Ó cíkā nɛ̄ alɔ ī habɔ̄ ɛlā Ɔwɔicō tá ká ālɔ̄ kɔ̄ ɔdōlé ŋ́.

³Abɔ̄ ó i lɛ ā ā, ayínɛ́ alɔ, aá lɛ ācɛ ɔkwɛ̄yi ahāapa fu ŋmá ipú aá, ɛ̄nɛ̄ e le mu mla Alelékwū Ihɔ mɛ́mla ohílīpú, nɛ̄ alɔ géē je úklɔ́ nyā tū uwā abɔ̄.

⁴Alɔ ā, kē í je iyī alɔ táajɛ ká ālɔ̄ gbɔ̄ɔkɔ mɛ́mla o tɔ́ɔna kú Ɔ̄kōolɔhi ā.”

⁵Ɛlā nɛ̄ ayíkpó ā ka ā le he odúúdú ɛwa ā ɔtū. Anɔ́ɔ é lɛ Usitífin, ɔ̄cɛ nōo cɛ̄lɔ̄ɔwɔicō lɔfú lɔfú klla le mu mla Alelékwū Ihɔ ā fu mɛ́mla Ufílīpu mɛ́mla Uporokórɔ̄si mɛ́mla Unikánɔ mɛ́mla Utáyímɔn mɛ́mla Upámēnāsi mɛ́mla Uníkɔ̄lɔsi kú Ántiyɔ̄ku, ɔ̄cɛ nōo je pīya tá ɔwɛ o gbā ɔwɔicō ɛ̄gbā kú ācɛ Ujíyu dúú ā.

⁶É kwú ācɛ nēe bá ā ú háyi iyɔ̄bū ācotɛ̄hɔ̄ ā, anɔ́ɔ é le abɔ̄ ce uwá ɛyí le ɔkɔ gbā lɛ Ɔwɔicō á.

⁷Anɔ́ɔ ɛlā kú Ɔwɔicō le nyīla, áluka kú ayíkpó ā le nyīla nɛ̄hi ipú Ujerúsālɛm. Ācogwɛ́ɛya alɛwa cɛ̄ɛ̄lā olɔhi ā.

⁸Usitífin nɛ̄ Ɔwɔicō hɔ́hā ce ɔ́ nɛ̄ɛ̄nɛ̄hi klla le ɔfú nɛ̄hi je lɛ ɔ́ ā, yá ɔdā idáagó mɛ́mla ɔdōcābɔ̄ nɛ̄hi alɛwa ɔtāhɛ̄ ācɛ ā.

⁹Amáŋ ācɛ ōhī kú Usayírīni mɛ́mla ákú Aálesáŋdrīya mɛ́mla aɛ́nɛ̄ e ŋmá Usilísīya mɛ́mla Ésīya nēe wɛ ācɛ kú Agblīihɔ-nɛ̄ŋcɛ́ kú ācɛ nēé hɛ́tá [2] ŋmá ɔfiyɛ ā, cāŋjɛ gbɔɔ́ ō táafú mla Usitífin.

¹⁰Amáŋ Alelékwū le ɛdɔ íjééyī nɛ̄hi je lɛ Usitífin ka eko nɛ̄ ó le ɛlā ka, é má ɔdā dúú ka mla anú ŋ́.

¹¹Anɔ́ɔ é le yɛ igbīhi gaá lɛ ācɛ pllā, nēe kahíníī, “Alɔ pó eko nōó gē bīya iyē kú Umósīsi mɛ́mla Ɔwɔicō ā.”

¹²Anɔ́ɔ é le ɔtū kú ācɛ Ujúu mɛ́mla anyākwɔ́cɛ mɛ́mla aítíca kú íne je gicō. É wúla klá Usitífin lɛ ɔ́ kwú ga iyɔ̄bū kú ójīla ohɛ́pɔ̄ ā.

¹³Anɔ́ɔ é lɛ ācɛ ōhī kpó wā kéē cē ijáalí ɛ̄kɛ̄mgbɛ̄, é kahíníī, “Ɔ̄cɛ ā í habɔ̄ ɛlā ō ka lɛyíkwu ɛga otīihɔ nyā mɛ́mla íne ā tá jéjéē ɛ́ɛ́ ŋ́.

¹⁴Ohígbū ka alɔ pó abɔ̄ ó yɔ̄ ī ka ka Ujísɔ̄si kú Unásārēti nyā géē bīya amānyā, ó kē í pīya uculo nɛ̄ Umósīsi je lɛ alɔ ā abɔ̄.”

¹⁵Abɔ̄ ācɛ dóódu nēe bá ipú ójila ohɛ́pɔ̄ ā bá ī héyī kwu ɔ́ ā, é má ka eyī kú nū le pīya bɛ̄ɛka eyī kú Alelékwū ōtɛ̄hɔ̄ ā.