Read idoma ÚKLƆ́ KÚ ĀCOTƐ̄HƆ̄ 7 Bible Online

ÚKLƆ́ KÚ ĀCOTƐ̄HƆ̄ 7 - idoma bible

ÚKLƆ́ KÚ ĀCOTƐ̄HƆ̄ 7

¹Anɔ́ɔ otrɛ̄yí kú ācogwɛ́ɛya da ɔ́ ɔ̄kā kahíníī, “Ɛ̄nyā wɛ ɔkwɛ̄yi kɛ̄ɛ?”

²Anɔ́ɔ Usitífin tóohi kahíníī, “Ayínɛ́ mɛ́mla aádā alɔ, aá jāhɔ̄ gā um. Ɔwɔicō kú ɛgahi le iyī nū mafú lɛ ádā alɔ Ébrahām eko nɛ̄ ó yɔ̄ ajɛ kú Umɛsopotémīya gbɔbū ɛ́ɛ́ nōó nyɔ̄ í lā ajɛ kú Uháran ā.

³Anɔ́ɔ ó da ɔ́ kahíníī, “Nyɛ̄ɛ̄ ŋmá ajɛ ɔlɛ́ uwɔ mɛ́mla ipɔ́ɔma kú uwɔ ká ā nyɔ̄ ajɛ nɛ̄ n géē mafú gā uwɔ ā.”

⁴Anɔ́ɔ ó nyɛ̄ɛ̄ ŋmá ajɛ kú ācɛ kú Ucáldii, anɔ́ɔ ó gaá lā ajɛ kú Uháran. Eko nɛ̄ ádā nū gekwú ā, Ɔwɔicō kwú ɔ̄ ú ŋmá abɔ́ɔ wā ajɛ ɛga nɛ̄ aá lā abālɔbányā.

⁵Nááná ā, Ɔwɔicō í je ajɛ dúúmā lɛ Ébrahām kóō wɛ ákú nū ŋ́, ó kōō wɛ īkpō éyi nááná. Amáŋ Ɔwɔicō le okónu ce ka anúɔ géē je ajɛ ā lɛ anú mɛ́mla ayááyí nū, nááná nōó ma ɔyí eko ɔ́ɔmā ɛ́ɛ́ ŋ́ mā.

⁶Ɛ̄nyā wɛ ɛlā nɛ̄ Ɔwɔicō ka lɛ ɔ́ á, “Ayááyí uwɔ géē lā ajɛ éwɔhá ɛga nēé géē yá uwā ōwē bɛ̄ɛka ɔfiyɛ ā iháyí úlā.”

⁷Ɔwɔicō kahíníī, “Amáŋ, N géē hɛ́pɔ̄ kú éwo nēé gē cɛ̄ uwā ɛhɔ̄ bɛ̄ɛka ɔfiyɛ ā, cɛ́ɛ́ igbīhi ɔ́ɔmā é géē pɛ́ wɛ̄ɛcɛ ŋmá éwo ɔ́ɔmā, cɛ́ɛ́ é géē gba um ɛ̄gbā amānyā.”

⁸Anɔ́ɔ Ɔwɔicō lɛ uculo kú ɛka kú apī ō hɛ́ kpó lɛ Ébrahām á, anɔ́ɔ abɔ̄ é lɛ Áyísīki ma ā, Ébrahām lɛ ɔ́ apī hɛ́ ɛ̄cī ɔ́mahātá. Anɔ́ɔ Áyísīki le Ujékɔ̄pu ma le ɔ́ apī hɛ́, anɔ́ɔ Ujékɔ̄pu le ayínɔ̄nyīlɔ igwɛ́ɛpa nēe wɛ ohútu kú ipɔ́ɔma igwɛ́ɛpa kú Ísrɛ̄lu ā ma klla uwá apī kpó hɛ́.

⁹Anɔ́ɔ ayínɔ̄nyīlɔ igwɛ́ɛpa nyā, gbɔɔ́ ō mímálānyī ɔyínɛ́ uwā nɔ̄nyilɔ, Ujósɛ̄fu, anɔ́ɔ é kwú ɔ̄ ú lá ga Íjīpiti. Amáŋ Ɔwɔicō yɔ̄ kwu ɔ́,

¹⁰anɔ́ɔ ó lɛ ɔ́ nyatá ŋmá ɛ́kɛma kú nū dóódu á. Ó je íjééyī lɛ ɔ́, klla yá ká ɔtū nū kóō he Uféro, ɔcɛ́ kú Íjīpiti. Anɔ́ɔ Uféro lɛ ɔ́ yá igbómína kú Íjīpiti mɛ́mla ɛjɛ̄ɛ̄jī ɔlɛ́ nū á.

¹¹Ɔkpɛtá nɛ̄hi gbɔɔ́ ō ŋmó ajɛ kú Íjīpiti mɛ́mla ajɛ kú Ukénan dóódu. Anɔ́ɔ ɛ́kɛma nɛ̄hi klla yɔ̄ á. Aádā alɔ í má ɔdōlé dóódu ŋ́.

¹²Anɔ́ɔ eko nɛ̄ Ujékɔ̄pu le pó ka īkpɔ̄dā yɔ̄ ajɛ kú Íjīpiti ā, ó lɛ aádā alɔ ā tɛ̄hɔ̄ nyɔ̄ iyāwu aflɛ́yí kú uwā ga abɔ́ɔ.

¹³Eko nēé kwúcē nyɔ̄ igbo ɔ́mpa ā, Ujósɛ̄fu lɛ iyī nū mafú lɛ uwá, anɔ́ɔ ó klla yá kú Uféro kóō lɛ ācɛ kú ɔlɛ́ ádā nū jé.

¹⁴Ujósɛ̄fu lɛ ɛhɔ̄ tū kéē lɛ ádā nū Ujékɔ̄pu mɛ́mla aɔ́máapú nū dóódu kpó wā. É wɛ ofɛtá cigwó.

¹⁵Anɔ́ɔ Ujékɔ̄pu le tá ajɛ kú Íjīpiti á. Abɔ́ɔ ā nɛ̄ anú mɛ́mla aádā alɔ ɔhá ā pɛ́ kwú dúú á.

¹⁶É lɛ okwū kú uwā kpó kwúcē nyɔ̄ ga Ussɛ́kɛm, lɛ uwá kpó nyī ipú únóji nɛ̄ Ébrahām bī ije nɛ̄hɛ́ lá ŋmá abɔ̄ kú ayí kú Uhámɔ ipú Ussɛ́kɛm ā.

¹⁷“Abɔ̄ eko gbɔɔ́ ō túblá ajaajɛ kú okónu nɛ̄ Ɔwɔicō ce lɛ Ébrahām ā kóō le yá jīla ā, ayí kú Ísrɛ̄lu gbɔɔ́ ō nyīla lɛwa lɛwa ipú ajɛ kú Íjīpiti

¹⁸Igbīhāajɛ ɔcɛ́ éyi nɛ̄ ó jé ɔdā dúú lɛyíkwu Ujósɛ̄fu ŋ́ mā wā í cɔcɛ́.

¹⁹ Ó bī ula nɛ̄hi le aádā alɔ plla, ó klla yá uwā ōwē nɛ̄hi. Ó le uwá pi ɔbɔ̄fú kéē lɛ ayípɛ̄nɛ̄ŋcɛ́ kú ɔlɛ́ uwā kpó bónū, cɛ́ɛ́ kéē le pɛ́ gekwú.

²⁰Ɛpléeko nyā nēé ma Umósīsi á, ó wɛ ɔyí nōo lɔhi nɛ̄hi. É bī ɔ̄ ɔyā ɛtá ɔlɛ́ ádā nū.

²¹Anɔ́ɔ eko nēé kwú ɔ̄ ú tɛ́ɛcɛ ā, adá Uféro lɛ ɔ́ pīyɛ̄, kwú ɔ̄ ú pīya ɔyí nū.

²²É le íjééyī dóódu kú ācɛ Íjīpiti kpó nwū ɔ̄, anɔ́ɔ ó kwú pīya ɔ̄cɛ nɛ̄hi ipú ɛlā nōó ī ka mɛ́mla ipú ɔdā nōó ī yá ā.

²³ Usitífin klla kɛlā gɔbū kahíníī, “Eko nɛ̄ Umósīsi le pīya iháyí ofɛpa ā, ó le ɔ̄ ŋmótū ipú ɔtū kú nū kóō le aha tá gaá má ācɛ Ísrɛ̄lu, ayínɛ́ nū.

²⁴Anɔ́ɔ ó má ɔ̄cɛ Ísrɛ̄lu éyi nɛ̄ ɔ̄cɛ Íjīpiti yɔ̄ gē yá ɔ̄ ŋmó, ó le ɛpɔ̄ nū cɛ̄ lɛ ɔdée fīyɛ̄ ɔ̄cɛ Íjīpiti ā le ɔ́ ŋmó.

²⁵Ó gbɛlá ka ācɛ ɔlɛ́ anúɔ jé ka Ɔwɔicō ɔ́ɔ géē bī anúɔ le hɛ́ uwā tá nɛ̄, amáŋ uwá í jé ŋ́.

²⁶Oŋmɔ́ɔ̄cī nū, ó má ācɛ Ísrɛ̄lu ɛpa bā gē gbapɔ̄, anɔ́ɔ ó tíne kóō lɛ uwá kagwó á. Anɔ́ɔ o kahíníī, ‘Anyīlɔ, aá wɛ ayínɛ́ nɛ. Ɔdíyá nɛ̄ aá ī yá ikpɛ́lā tá iyī aá?’

²⁷Anɔ́ɔ ɔ̄cɛ nōo tíne ɛlā ɔ́mpā nū ā cē ɔ̄ gbɔɔ́ gbɔɔ́ gɛcɛ, ka, ‘Ɔ̄nyɛ yá uwɔ otrɛ̄yí ámāŋ ɔ̄cohɛ́pɔ̄ kú alɔ ā?

²⁸A tíne ō ŋmó um ɛ́gɛ́nɛ̄ a ŋmó ɔ̄cɛ Íjīpiti ɛ́nɛ̄ ā nɛɛ?’

²⁹ Eko nɛ̄ Umósīsi lɛ ɛ̄nyā pó ā, ó lɛ kwu nyɔ̄ gaá lā ajɛ kú Umídīya. Abɔ́ɔ ā ó le ayínɔ̄nyīlɔ ɛpa ma.

³⁰Eko nɛ̄ iháyí ofɛpa le yɛ ā, ó má alelékwū-ōtɛ̄hɔ̄ ipú ígblɛ́nyī ɔlá nōo gē yi ɛyí ácí ipú ígbíli pī ɛfu kú Usáyínāyi.

³¹Eko nɛ̄ Umósīsi le ɔdā nyā má ā, ó le hɛ́ ɔ̄ idáagó. Anɔ́ɔ ó le tá ajaajɛ kóō le ɔ̄ má lɔhi lɔhi. Anɔ́ɔ ó pó ɔkɔ kú Óndú ā ka,

³²‘Ami wɛ Ɔwɔicō kú aádáádā awɔ á, Ɔwɔicō kú Ébrahām mɛ́mla Áyísīki mɛ́mla Ujékɔ̄pu.’ Anɔ́ɔ Umósīsi gbɔɔ́ ō fīyégbúlú, ó lɛ ɔtū má ɔ̄ eyī glá ŋ́.

³³Anɔ́ɔ Óndú ā da ɔ́ ka, ‘Lɛ áblákpá kú uwɔ plla ŋmá ikpó, ohígbū ka ajɛ ɛga nāa háyi āa wɛ ajɛ otīihɔ.

³⁴N le ɛ́gɛ́nɛ̄ é bá ī yá ācɛ ɔlɛ́ um ōwē ajɛ kú Íjīpiti ā má ɛɛ́. N kē lɛ ifu nēé yɔ̄ ī tá ā pó ɛɛ́, n gā ajɛ gaá hɛ uwa ta ɛɛ́. Wā abālɔbányā, n géē tū uwɔ ɛhɔ̄ ga Íjīpiti.’

³⁵Umósīsi nyā piíí nɛ̄ ācɛ ā tá yɔ̄ ī da ɔ́ ɔ̄kā kahíníī, “Ɔ̄nyɛ yá uwɔ otrɛ̄yí mɛ́mla ohɛ́pɔ̄ kú alɔ ā?” Anú ā nɛ̄ Ɔwɔicō bī abɔ̄ kú alelékwū-ōtɛ̄hɔ̄ nōó má ipácí ā le ɔ́ fu klla lɛ ɔ́ yá otrɛ̄yí mɛ́mla ohɔ́nyɛtá á.

³⁶Anú ɔ́ɔmā kpɔ́ klla lɛ uwá kpó wɛ̄ɛcɛ, yá ɔdā idáagó mɛ́mla ɔdōcābɔ̄ ɛyɛ́ɛyɛ́yí ipú ajɛ kú Íjīpiti mɛ́mla eyī ísu igwɛ̄bɛ́ ā mɛ́mla ipú ígbíli ā iháyí ofɛpa.

³⁷Ɛ̄nyā kē wɛ Umósīsi ékpónú ɔ́ɔmā nōo da ācɛ Ísrɛ̄lu kahíníī, ‘Ɔwɔicō géē fu ɔ̄cɛ éyi ŋmá ɔtāhɛ̄ ayínɛ́ kú aá kóō le pīya ɔ̄comɛ́ɛbɛ bɛ̄ɛka ami ā; Ó kē géē wɛ éyi kú ācɛ kú ɔlɛ́ á.’

³⁸Anú ā wɛ ɔ̄cɛ nōo yɔ̄ ipú ójila kú ācɛ Ísrɛ̄lu mɛ́mla aádā alɔ mɛ́mla alelékwū-ōtɛ̄hɔ̄ ā nōo kɛlā lɛ ɔ́ ɛyí ɛfu kú Usáyínāyi ipú ígbíli ā. Anɔ́ɔ ó mīyɛ ɛlā nōo yēeyī nēé je lɛ alɔ ā á.

³⁹Amáŋ aádā alɔ tá ka aá jāhɔ̄ lɛ ɛlā kú nū ŋ́; é klla lɛ igbīhi cē kwu ɔ́, anɔ́ɔ eyī yá uwā ipú odo kú uwā kéē kwúcē ga Íjīpiti.

⁴⁰Anɔ́ɔ é da Árɔ̄ni ka, ‘Lɛ ɔwɔ yá lɛ alɔ, nōo géē gbō alɔ. Umósīsi nyā nōo kpó alɔ ŋmá Íjīpiti ā, alɔ í jé ɔdā nōo yá ɔ̄ ā ŋ́.’

⁴¹Anɔ́ɔ eko ɔ́ɔmā é lɛ ojibó éyi ma bɛ̄ɛka ɔyí ɛna ā, anɔ́ɔ é gwɛ́ɛya lɛ ojibó ā, bá ī yá ucɛ ī gwéeyē lɛ ɔdā nēé bī abɔ̄ kú uwā ma ā á.

⁴²Anɔ́ɔ Ɔwɔicō lɛ igbīhi ú cē kwu uwá, habɔ̄ uwā tá kéē gbō aínyílɔ́wɔ kú ɔkpáncō ɛ̄gbā, ɛ́gɛ́nɛ̄ é tá ɔ̄ tū ɔkpá kú ācomɛ́ɛbɛ ka, ‘Ɛhɛ́ɛ, ācɛ kú Ísrɛ̄lu, ó wɛ ami nɛ̄ aá ŋmó ɛbɛ́ le gwɛ́ɛya gā um ipú ígbíli iháyí ofɛpa ā ŋ́.

⁴³Ikpɛ̄cí kú Umɔ́lɛ̄ki mɛ́mla ínyílɔ́wɔ kú ɔwɔ Uréfan nɛ̄ aá kpó nyɔ̄ á, aójibó kú ɛcí nɛ̄ aá yá ká aá gbā uwā ɛ̄gbā á. Ó lɛ ā, n géē nū aá ŋmá ɔlɛ́ aá ga Ubábīlɔn.’

⁴⁴‘Ádáádā alɔ lɛ Áklɔ̄kpīihɔ o mafú ka Ɔwɔicō yɔ̄ pī uwā ā ipú ígbíli. É yá ɔ̄ ɛ́gɛ́nɛ̄ Ɔwɔicō da Umósīsi kɔ́ɔ̄ yá ɔ̄ gbla ɛ̄nɛ̄ é tɛtɛ mafú lɛ ɔ́ ā.

⁴⁵Igbīhāajɛ ā, aádáádā alɔ nēe mīyɛ áklɔ̄kpɛ ā ŋmá ɛgiyí ádā uwā le ɔ́ kpó mla iyī uwā eko nēé yɛ mla Ujóssuwa nyɔ̄ í mīyɛ ajɛ kú aéwo nɛ̄ Ɔwɔicō nū ŋmá ajɛ ā hīla uwá abɔ̄ é yɛ ī wā ā. Áklɔ̄kpīihɔ ā kē yɔ̄ abɔ́ɔ jāā gbéeko kú Udéfīdi.

⁴⁶Udéfīdi le he Ɔwɔicō ɔtū, anɔ́ɔ ó da Ɔwɔicō ɔ̄kā ka anúɔ lɛ ɛga nɛ̄ Ɔwɔicō kú Ujékɔ̄pu [3] géē lā ā gwó lɛ ɔ́.

⁴⁷ Amáŋ Usólōmɔn gwó inu lɛ ɔ́ á.

⁴⁸Amáŋ Ɔwɔicō nōo lɔfú fíyɛ́dúú ā í gē lā inu nēé bī abɔ̄ gwó ŋ́, ɛ́gɛ́nɛ̄ ɔ̄comɛ́ɛbɛ ka ā,

⁴⁹‘Ɔkpáncō wɛ úgādā ɔcɛ́ kú um á, ɛcɛ wɛ uka ō lɛ ikpó ce ɔ́ kú um. Inu nyá nɛ̄ ā géē gwó gā um ā, Óndú ā ka á, ámāŋ iní wɛ ɛga omlɛ́nyɔ́ kú um?

⁵⁰Ó wɛ ami abɔ̄yī um yá aɔ́dā nēe bá nyā dúú ā ŋ́ nɛɛ?’

⁵¹ “Aá ācɛ o līkpɛ̄yí ōlɔfú, aá tá ka aá mīyɛ ɛlā Ɔwɔicō ŋ́, aá klla kwú ahɔ̄ kú aá ú gwū ɛlɔ̄ɔwɔicō bónū! Aá lɛbɛ̄ɛka aádā aá. Aá abɔ̄yī aá gē tá ɛlā Alelékwū Ihɔ ojigógó dúú.

⁵²Ɔ̄comɛ́ɛbɛ nyá nɛ̄ aádā aá ī yáŋmó ŋ́ mā? É le ācotɛ̄hɔ̄ nēe wā í ka tɛ́ɛcɛ ka ācōtɛ̄hɔ oyókpaakpa éyi yɔ̄ ī wā ā kpó ŋmó. Anɔ́ɔ abālɔbányā aá le ibīyājɛ yá tū ɔ̄ le ɔ́ ŋmó.

⁵³Aá wɛ ācɛ néē mīyɛ íne kú Ɔwɔicō ŋmá ɛgiyí Aálelékwū otɛ̄hɔ̄ á, amáŋ aá lɛ ɔ́ tū ŋ́.”

⁵⁴Eko nēé lɛ ɛ̄nyā pó ā, é le kpó cɔ̄nū nɛ̄hi lɛyíkwu ɔ́.

⁵⁵Anɔ́ɔ Usitífin nōo le mu mla Alelékwū Ihɔ ā, pīyeyī má ɔkpáncō, anɔ́ɔ ó le ojīlīmā kú Ɔwɔicō mɛ́mla Ujísɔ̄si má háyi abɔ̄lɔ́ná kú Ɔwɔicō.

⁵⁶Anɔ́ɔ ó kahíníī, “Má ɔ̄, n má ɔkpáncō abɔ̄ ó le nwūla, anɔ́ɔ Ɔyínɔ̄nyīlɔ kú Ɔ̄cɛ háyi abɔ̄lɔ́ná kú Ɔwɔicō á.”

⁵⁷Anɔ́ɔ é dɛ̄gba gbōmgbōm, lɛ abɔ̄ kpó gwū ahɔ̄, odúúdú uwā kwinya tɔ̄há lɛyíkwu ɔ́.

⁵⁸É lɛ ɔ́ pi tɛ́ɛcɛ ŋmá igeli ā, lɛ ɛcɔ̄ tá klá ɔ́. Anɔ́ɔ aíjáalí ā lɛ úwé kú uwā kpóbá ajɛ ɛgiyí ikpó kú ɔyípōklóbīya éyi nɛ̄ iyē nū lé ka Usɔ́lu.

⁵⁹Anɔ́ɔ eko nēé yɔ̄ gē tá ɛcɔ̄ klá Usitífin ā, ó gbɔ̄ɔkɔ ka, ‘Óndú Ujísɔ̄si, mīyɛ alelékwū kú um.’

⁶⁰Anɔ́ɔ ó lɛ okwúukwu kpó kwajɛ, dɛ̄gba gbōmgbōm kahíníī, “Óndú, ā je íne nēé bīya nyā ce uwá ɛyí nóó.” Anɔ́ɔ eko nɛ̄ ó lɛ ɛ̄nyā ka ā, ó mā owu.