Read idoma ÚKLƆ́ KÚ ĀCOTƐ̄HƆ̄ 9 Bible Online

ÚKLƆ́ KÚ ĀCOTƐ̄HƆ̄ 9 - idoma bible

ÚKLƆ́ KÚ ĀCOTƐ̄HƆ̄ 9

¹Amáŋ, Usɔ́lu yɔ̄ gē lɔfú lɛyíkwu ayíkpó kú Óndú ā kóō le uwá kpó ŋmó. Ó le tá ɛgiyí otrɛ̄yí kú ācogwɛ́ɛya,

²anɔ́ɔ ó gaá mīyɛ ɔkpá ŋmá abɔ̄ nū kóō bī nyɔ̄ Ɛgogbɔ̄ɔkɔ kú Udamásikɔ̄si, cɛ́ɛ́ ɔ́dāŋ ka ó lɛ ɔ̄cɛ dúú nōo ī yɛce ɔwɛ kú Óndú ā má, kwu ācɛnyīlɔ kwu ācɛnyā, kóō lɛ uwá kpó wā Ujerúsālɛm.

³Abɔ̄ ó yɔ̄ gē nyɔ̄, klla i bá lɛ ajɛ Udamásikɔ̄si ajaajɛ ā, igbeékpónú ɔlá ofíyajɛ ŋmá ɔkpáncō le fíyajɛ jīla anú tá maá.

⁴Ó mágwōnū wāajɛ gblágádá, anɔ́ɔ ó pó ɔkɔ kú ɔ̄cɛ éyi nōo da ɔ́ kahíníī, “Usɔ́lu, Usɔ́lu, ɔdíyá nāa gē bɛ́yíkwu um ā mɛ́ɛ̄?”

⁵Anɔ́ɔ ó dɔɔ̄kā kahíníī, “A wɛ ɔ̄nyɛ nɛ̄, Óndú?” Anɔ́ɔ ɔkɔ ā tóohi kahíníī, “N wɛ Ujísɔ̄si nāa gē bɛ́yíkwu á.”

⁶Amáŋ cāŋjɛ ká ā nyɔ̄ igelī nɛ̄ŋcɛ́ ā, abɔ́ɔ ā é kē í da uwɔ ɔdā nāa géē yá piíí ā.”

⁷Ācɛ nēe bá ī yāwu mla anú ā háyi í lɔfú kɛlā ŋ́, abɔ̄ é le ɔkɔ kú ɔ̄cɛ pó nēé kē má ɔ̄cɛ dúú ŋ́ mā.

⁸Usɔ́lu cāŋjɛ ŋmá ajɛ le eyī nwūla, amáŋ ó má ɔdā dúúmā gla ŋ́. É le abɔ̄ tū ɔ̄ abɔ̄ ga Udamásikɔ̄si.

⁹Ó yɔ̄ ɛ̄cī ɛtá, ó kē mɛ́ɛbɛ ŋ́, anɔ́ɔ ɛplá eko nyā ó lé ɔdā dúúmā ŋ́ māa ó kē gwá ɔdā dúúmā ŋ́ dúú.

¹⁰Ɔyíkpó éyi yɔ̄ Udámásikɔ̄si, nēé hī ka Ananíyāsi. Óndú ā da ɔ́ ipú ɔ̄na kahíníī, “Ananíyāsi.” Anɔ́ɔ ó tóohi kahíníī, “Ami yɔ̄ á, Óndú.”

¹¹Óndú ā da ɔ́ kahíníī, “Cāŋjɛ ká ā nyɔ̄ ga ɔlɛ́ kú Ujúdasi nōo yɔ̄ úláyi nēé hī ka Okpaakpa ā, cɛ́ɛ́ ká ā dɔɔ̄kā ɔ̄cɛ éyi nēé hī ka Usɔ́lu, ɔ̄cɛ kú Utásɔsi. Ó yɔ̄ ī gbɔ̄ɔkɔ,

¹²anɔ́ɔ ipú ɔ̄na ó le ɔ̄cɛ éyi nēé hī ka Ananíyāsi ā má abɔ̄ ó bēhé gáā le abɔ̄ ce ɔ́ ɛyí, cɛ́ɛ́ kóō klla lɔfú mɛ́ɛbɛ kpɔ́ á.”

¹³Amáŋ Ananíyāsi tóohi kahíníī, “Óndú, n tɛtɛ le ɔ̄kā kú ɔ̄cɛ ā pó ŋmá ɛgiyí ācɛ alɛwa ɛɛ́, ɛ́gɔ́dā obɔ̄bí nɛ̄hi nōó yá ācɛ otīihɔ kú uwɔ nēe bá Ujerúsālɛm ā.

¹⁴Ó kōō bī íkwu nɛ̄ ó mīyɛ ŋmá abɔ̄ aótrɛ̄yí kú ācogwɛ́ɛya ā kóō lɛ ācɛ dóódu nēe ī gbō uwɔ ɛ̄gbā kpó kwú mla iyī nū.”

¹⁵Amáŋ Óndú ā da ɔ́ kahíníī, “Nyɔ̄, ohígbū ka ó wɛ ɔ̄cɛ nɛ̄ n le fu kóō cɛ̄ um ɛhɔ̄, kóō yá ká aílɔ́wá, aɔ́cɛ́ mɛ́mla ācɛ kú Ísrɛ̄lu kéē lɛ iyē kú um jé.

¹⁶Ohígbū ka, Ami abɔ̄yī um géē mafú lɛ ɔ́ ɛ́gɛ́nɛ̄ ó géē móōwē nɛ̄hi piíí ohígbū um ā.”

¹⁷Anɔ́ɔ Ananíyāsi le yɛ, le bēhé ga ipú inu ɛga nɛ̄ Usɔ́lu yɔ̄ ā. Ó kwú abɔ̄ ú ce ɔ́ ɛyí, anɔ́ɔ ó kahíníī, “Usɔ́lu, ɔyínɛ́ um, Óndú ā Ujísɔ̄si nōo wā ɛgiyí uwɔ ɔwɛ ɛga nāa yɛ ŋmá ā, lɛ um tɛ̄hɔ̄ wā, cɛ́ɛ́ ká ā gbɔɔ́ ō mɛ́ɛbɛ kpɔ́, ká ā klla le mu mla Alelékwū Ihɔ.”

¹⁸Anɔ́ɔ ɔkwɔɔkwu ɔ́ɔmā, odée nōo lɛbɛ̄ɛka āpū ā gāājɛ ŋmá eyī kú Usɔ́lu, anɔ́ɔ ó gbɔɔ́ ō mɛ́ɛbɛ kpɔ́ á. Ó cāŋjɛ anɔ́ɔ é lɛ ubatísim yá ɔ̄ á.

¹⁹Igbīhi ɛ̄nyā ó le ɔdōlé lé, anɔ́ɔ ó le ɛ́nyɔ́ má á. Ó yɔ̄ mla ayíkpó nēe bá Udamáskɔ̄si ā ɛ̄cī alɛwa.

²⁰Ó le tá ipú ɛgogbɔ̄ɔkɔ ā gbɔɔ́ ō tɔ́ɔna kú Ujísɔ̄si ka ɔ́ɔ wɛ Ɔyínɔ̄nyīlɔ kú Ɔwɔicō.

²¹Anɔ́ɔ odúúdú ācɛ nēe pó ɛlā kú nū ā le kpó hídáagó, bá ī dɔɔ̄kā kahíníī, “Ó wɛ ɔ̄cɛ ā yɔ̄ ī kpó ācɛ nēe gbā Ujísɔ̄si ɛ̄gbā ā ŋmó ipú Ujerúsālɛm ā yɔ̄ ā ŋ́ nɛɛ? Ó wā amānyā ohígbū ɔdā ékpó nyā ŋ́ nɛɛ, kóō lɛ uwá kpó kwú gé lɛ aótrɛ̄yí kú ācogwɛ́ɛya ŋ́ nɛɛ?”

²²Amáŋ ɔna kú Ɔ̄kōolɔhi nɛ̄ Usɔ́lu yɔ̄ ī tá ā le lɔfú iyē nɛ̄ɛ̄nɛ̄hi. Ɔfú kú Usɔ́lu klla gɔbū fíyɛ́. Anɔ́ɔ ɔwɛ nōó gē mafú ka Ujísɔ̄si ɔ́ɔ wɛ Ohɔ́nyɛtá cēyī gēdēē nɛ̄ɛ̄nɛ̄hi nōo yá kú ācɛ Ujíyu nēe bá Udamásikɔ̄si ā kéē má ɛlā dúú ka mla anú glá ŋ́.

²³Eko nɛ̄ ɛ̄cī alɛwa le gla ā, ācɛ Ujíyu lɛ ujɔ̄ tū kéē ŋmó ɔ̄.

²⁴Amáŋ Usɔ́lu lɛ ujɔ̄ kú uwā ā jé. É gē gbō okónu igá kú igelī nɛ̄ŋcɛ́ ā otú mla ɛnɔ kéē lɛ ɔ́ ŋmó.

²⁵Amáŋ ayíkpó kú nū kwú ɔ̄ ú tá ipú ómblí, kwú ɔ̄ ú bī gla ɛyí ɔ́gba kú igelī ā wā ajɛ otú éyi.

²⁶Eko nɛ̄ Usɔ́lu gā Ujerúsālɛm ā, ó tíne kóō wā í tá ipú ayíkpó ā. Amáŋ é yúufi nū ohígbū kéē cɛ̄ kóō wɛ ɔyíkpó ŋ́.

²⁷Amáŋ Ubánābasi kwú ɔ̄ ú, anɔ́ɔ ó lɛ ɔ́ bī wā gé lɛ ācotɛ̄hɔ̄ ā. Anɔ́ɔ ó le da uwá ɛ́gɛ́nɛ̄ Usɔ́lu má Óndú ā ɔwɛ lɛ ā. Ó da uwá ka Ondú ā kē le ɛlā ka mla anú dúú. Ó klla da uwá ɛ́gɛ́nɛ̄ Usɔ́lu bī iyē kú Ujísɔ̄si tɔ́ɔna pāālā ipú Udamásikɔ̄si lɛ ā.

²⁸Anɔ́ɔ ayíkpó ā mīyɛ Usɔ́lu, anɔ́ɔ ó gbɔɔ́ ō nyíliyētá ipú uwā, gē ga ɛga dóódu kú Ujerúsālɛm yɔ̄ ī tɔ́ɔna kú ɛlɔ̄ɔwɔicō o ŋmá lɛ iyē kú Óndú ā.

²⁹Ó klla kɛlā gē táafú mla ācɛ Ujíyu nēe ī ka Ugríiki ā, amáŋ é dɔɔ̄kā ɔwɛ nēé géē lɛ ɔ́ ŋmó.

³⁰Anɔ́ɔ eko nɛ̄ ayínɛ́ ā lɛ ɛ̄nyā jé ā, é kwú ɔ̄ ú ga ajɛ kú Usísarīya, anɔ́ɔ é le ɔ̄ bītá ga ajɛ kú Utásɔsi.

³¹Anɔ́ɔ odúúdú icɔ́ɔci nēe bá ajɛ kú Ujúdíya mɛ́mla Ugálīli mɛ́mla Usamérīya lɛ ɛbɔ́ lɛ, é klla lɔfú lɛ fíyɛ́. É yēeyī ipú ufi kú Óndú ā, Alelékwū Ihɔ ā tá uwā abɔ̄. Anɔ́ɔ é le nyīla ikpó ācɛ á.

³²Upíta yɔ̄ ī yɛ ɛbɛɛbɛ, anɔ́ɔ ɛ̄cī éyi ó gā ɛgiyí ācocɛ̄lɔ̄wɔicō nēe lā ajɛ kú Ulída ā.

³³Abɔ́ɔ nɛ̄ ó má ɔ̄cɛ éyi nēé hī ka Énesi nōo húmáyī gwutá ɛyí agōdō iháyí ahātá. Ɔŋmɛ́ɛŋmɛ́ɛ le iyē yá ŋmɛnɛŋmɛnɛ.

³⁴Anɔ́ɔ Upíta da ɔ́ kahíníī, “Énesi, Ujísɔ̄si Ohɔ́nyɛtá lɛ uwɔ hɛ́tá ɛɛ́, cāŋjɛ ká ā lɛ agōdō kú uwɔ yá.” Anɔ́ɔ ɔkwɔɔkwu ɔ́ɔmā ó cāŋjɛ.

³⁵Odúúdú ācɛ nēe lā ajɛ kú Ulída mɛ́mla Ussárɔn ā le ɔ́ má, anɔ́ɔ é cɛ̄ɛ̄lā kú Óndú āá.

³⁶Eko nyā, ajɛ kú Ujɔ́pa, ɔyíkpó ɔ̄cɛnyā éyi yɔ̄, nēé hī ka Utabíta, nɛ̄ ɛyí nū le ka Udɔ́kasi. Ó le odúúdú eko kú nū táajɛ yɔ̄ ī yá ɔdā olɔhi klla yɔ̄ ī tá ācɛ ogbɛhá abɔ̄.

³⁷Ɛ̄cī éyi ó gbɔɔ́ ō doōcē, anɔ́ɔ ó gekwú á. É lɛ ɔ́ iyē gwā, kwú ɔ̄ ú ga inīcō.

³⁸Abɔ̄ Ulída í ligbó lɛ Ujɔ́pa ŋ́ mā, eko nɛ̄ ayíkpó ā le pó ka Upíta ɔ́ɔ yɔ̄ abɔ́ɔ ā. É le ācɛ ɛpa tɛ̄hɔ̄ fu ɔ́, kéē le ɔkɔ gbā lɛ ɔ kɔ́ɔ̄ wā fíya fíya.

³⁹Anɔ́ɔ Upíta cāŋjɛ le yɛ mla uwá. Eko nōó gā ajɛ ā, é le ɔ̄ bī ga inīcō. Odúúdú anyōkwū ā háyi pī ɔ̄ bá ī jikwū, anɔ́ɔ é le úwé ɛháajɛ mɛ́mla ɛhícō nɛ̄ Udɔ́kasi gɔ́ lɛ uwá eko nōó yēeyī ā kpó mafú lɛ ɔ́.

⁴⁰Amáŋ Upíta lɛ odúúdú uwā nū gɛɛcɛ, anɔ́ɔ ó lɛ okwúukwu kpó kwajɛ le ɔkɔ gbā lɛ Ɔwɔicō. Anɔ́ɔ ó le eyī pīya má okwū ā, anɔ́ɔ ó kahíníī, “Utabíta, cāŋjɛ.” Anɔ́ɔ Utabíta lɛ eyī nwūla á, abɔ̄ ó lɛ Upíta má ā, ó má pīya yāajɛ.

⁴¹Upíta le abɔ̄ nāndaa, kwú ɔ̄ ú nyāŋjɛ háyicō. Anɔ́ɔ ó lɛ ācocɛ̄lɔ̄wɔicō mɛ́mla anyōkwū ā kpó hīgwú, anɔ́ɔ ó le ɔ́ mafú lɛ uwá kóō oyēeyī á.

⁴²Ɔ̄kā nyā le nyīla ga odúúdú ajɛ kú Ujɔ́pa, ācɛ alɛwa kē cɛ̄ɛ̄lā Óndú ā.

⁴³Anɔ́ɔ Upíta yɔ̄ Ujɔ́pa ɛ̄cī alɛwa ɔlɛ́ ɔ̄cɛ éyi nēé hī iyē nū ka Usáyímɔ̄ni, oyúklɔ́ ɔkpɛ́bɛ́.