Read idoma ĀCƐ URÓM 1 Bible Online

ĀCƐ URÓM 1 - idoma bible

ĀCƐ URÓM 1

¹Ami Upɔ́lu, ɔ̄cocɛ̄hɔ̄ kú Ujísɔ̄si Ohɔ́nyɛtá, nɛ̄ Ɔwɔicō fu ká n̄ wɛ ɔ̄cocɛ̄hɔ̄ ā, ó kē tū um ɛhɔ̄ gɛcɛ ká n̄ tɔ́ɔna kú Ɔ̄kōōlɔhi lɛ ācɛ.

²Ɔwɔicō bī okónu kú ācomɛ́ɛbɛ le okónu kú Ɔ̄kōōlɔhi ā ce ipú Ɛlɔ̄ɔwɔicō ō tū Ihɔ ā.

³Ɔ̄kōōlɔhi nyā kɛlā lɛyíkwu Ɔyínɔ̄nyīlɔ kú Ɔwɔicō, nēé ma bɛ̄ɛka ɔlɛɛcɛ wā ipɔ́ɔma kú Udéfīdi.

⁴Ó lɛyíkwu ɛ́gɛ́nɛ̄ ó tīihɔ lɛ ā, Ɔwɔicō bī ɔfú nɛ̄hi kú Alelékwū Ihɔ kú nū le ɔ́ héyī ŋmá ɔlékwū.

⁵Ɔwɔicō yá ɛ́ɛ́ nɛ̄ Ohɔ́nyɛtá fɛ̄ɛga tá gā um kú um le pīya ɔ̄cotɛ̄hɔ̄ á. Ó yá ɛ̄nyā o yá ɛ́ɛ́ kú um lɛ ɛjɛ̄ɛ̄jī éwo kpɛ́mm kpó kéē cɛ̄ɛ̄lā kú nū, cɛ́ɛ́ kéē klla lɛyítáajɛ lɛ ɔ́.

⁶Aá nēé hīgwú ka aá le pīya ācɛ kú Ujísɔ̄si Ohɔ́nyɛtá ā, wɛ ipú uwā dúú.

⁷N tɔ́kpá ā gé lɛ odúúdú ācɛ nēe he Ɔwɔicō ɔtū nēe bá Uróm ā, nēé kē hīgwú kéē wɛ ācɔ̄lóhɔ́nyɛtá ā. N yɔ̄ ī ba Ɔwɔicō Ádā alɔ mɛ́mla Óndú ā Ujísɔ̄si Ohɔ́nyɛtá kéē ményinyi aá.

⁸Gbɔbū ɛ́ɛ́ ká n ka ɔdā dúúmā, n tíne ō ka aflɛ́yí ka, n tá Ɔwɔicō kú um ahínyá ohígbū ɔdā nɛ̄ Ujísɔ̄si Ohɔ́nyɛtá yá tɔ́ɔtɛ́ lɛ aá ohígbū ka odúúdú ācɛ kú ɛcɛ yɔ̄ ī pó ka aá cɛ̄ɛ̄lā Ujísɔ̄si Ohɔ́nyɛtá.

⁹Ɔwɔicō nɛ̄ n gē cɛ̄ ɔ̄ ɛhɔ̄ ŋmá lɛ o tɔ́ɔna kú Ɔ̄kōōlɔhi lɛyíkwu Ɔyínɔ̄nyilɔ kú nū ŋmá ipú odo kú um ā wɛ ijáalí kú um ka ɛlā nɛ̄ n ka ā wɛ ɔkwɛ̄yi. Ɔwɔicō kē jé ka n yɔ̄ ī blakwu aá eko dóódu nɛ̄ n gē gbɔ̄ɔkɔ lɛ ɔ́.

¹⁰N gē ba ɔ́ kóō géē cɛ̄ ká n̄ wā abālɔbányā gaá lɛ aá má.

¹¹Ohígbū ka n tíne ō lɛ aá má, cɛ́ɛ́ ká n̄ lɛ ɛhi nōo ŋmá ɛgiyí Alelékwū Ihɔ kú Ɔwɔicō ā kɔ̄ mla aá, kóō lɛ ɔfú tū aá iyē.

¹²Ɔdā nɛ̄ n gbɛlá ā wɛ ka n̄ lɔfú tū aá iyē, cɛ́ɛ́ aá kē lɔfú tū um iyē ipú ɛ̄lā ā nɛ̄ alɔ cɛ̄ tɔ̄há ā.

¹³Amáŋ n tíne ká aá le jé, ayínɛ́ um, ka igbo alɛwa nɛ̄ n le miya ka n gē wā ɛgiyí aá, odée gē ce um anú. N tíne ká n̄ yá ká aá yɛce Ujísɔ̄si Ohɔ́nyɛtá ɛ́gɛ́nɛ̄ n yá ɔtāhɛ̄ kú aílɔ́wá ɔhá ā.

¹⁴N wɛ ɔ̄cotɛ̄hɔ̄ ká n tá odúúdú ācɛ abɔ̄, ācɛ o nwūleyī mɛ́mla ācɛ nēé nwūleyī ŋ́, ācɛ o jɔ́kpá mɛ́mla aógwuda.

¹⁵Ohígbū ɔ́ɔmā ó kwu um ɔtū nɛ̄ɛ̄nɛ̄hi ká n̄ le ɔna kú Ɔ̄kōōlɔhi ā tá lɛ aá nēe bá Uróm ā dúú.

¹⁶N kpɔ́tūce ɔkōōlɔhi ā dúúdú, ohígbū ka ó wɛ ɔfú kú Ɔwɔicō nōó gē nyā ɔ̄cɛ dóódu nōo cɛ̄ɛ̄lā nū ā tá. Aflɛ́yí, ācɛ Ujíyu, cɛ́ɛ́ ācɛ Ugríisi dúú.

¹⁷Ohígbū ka ɔkōōlɔhi ā mafú ɛ́gɛ́nɛ̄ Ɔwɔicō bī ācɛ cīgbīhi wā ɛgiyí nū ɔwɛ okpaakpa nōo cíkā ā. Aɔ́dā nēe bá nyā yá ohígbū ka ācɛ ā cɛ̄ɛ̄lā nū. Ɛ́gɛ́nɛ̄ é tá ɔ̄ ipú ɔkpá kú ɛlɔ̄ɔwɔicō lɛ ā, “Ɔ̄cɛ nɛ̄ Ɔwɔicō lɛ ɛpɔ̄hi hɛ́ lɛ ɔ́ ohígbū ka ó cɛ̄ɛ̄lā nū ā géē yēeyī ɔkwɔ̄ɔ̄kwɛ̄yi.”

¹⁸Ɔwɔicō le mafú ɛ́gɛ́nɛ̄ ó géē cɔ̄nū í kɛpɔ̄ tū ācɛ ohígbū ɛjɛ̄ɛ̄jī íne nēé bīya mɛ́mla ɔ́bíipú nēé bī ā. Ucē obɔ̄bí kú uwā ā í cɛ̄ lɛ ācɛ jé ɛlā ɔkwɛ̄yi lɛyíkwu Ɔwɔicō ŋ́.

¹⁹Ɔwɔicō géē yá uwā italā ohígbū ka ɔdā dóódu kú Ɔwɔicō, nɛ̄ ɔ̄cɛ jé glá ā, tá péée lɛ uwā, ohígbū ka Ɔwɔicō lɛ ɔ́ yá kóō tá péee lɛ uwá.

²⁰Ó kōō ŋmífī nɛ̄ Ɔwɔicō yá ɛcɛ ā, ācɛ le ɔkpáncō mɛ́mla ɛcɛ mɛ́mla odúúdú aɔ́dā nōó yá kpɛ́mm ā má ɛɛ́. O bū ipú aɔ́dā nēe bá ā, alɛɛcɛ lɔfú má péee ɛdɔ ɔ̄cɛ nɛ̄ Ɔwɔicō wɛ ā, ɔfú kú nū nōó mɛ glá ŋ́ mā mɛ́mla ɛ́gɛ́nɛ̄ ó tīihɔ lɛ ā. Ohígbū ɔ́ɔmā é lɛ ɔdā ō lɛ abɔ̄ bá ɔ̄ ka aá jé Ɔwɔicō ŋ́ nɛɛ ŋ́.

²¹É jé Ɔwɔicō nááná ā, é í le ojīlīmā kú ɛ́gɛ́nɛ̄ ó wɛ ā ce ɔ́ ŋ́, ɛ́ɛ́ nēé gē tá ɔ̄ ahínyá ŋ́. Ikɔkɔ ɔ́ɔmā é gē gbɛlá ɔdā nōó ī tīile ŋ́, ɛ̄nyā í cɛ̄ lɛ ɔtū kú uwā gbɛlá kpaakpa glá ŋ́.

²²Abɔ̄ é ī yá ɔbɔ́ɔ̄cɛ ī ka ka aá jé odée ā, é kwú pīya aólíla.

²³ Ikɔkɔ nēé gē gbā Ɔwɔicō nɛ̄ ó ī kwú ŋ́ mā ɛ̄gbā ā, é gbɔɔ́ ō gbā íkpékwūja nɛ̄ ācɛ bī abɔ̄ kú uwā yá gbla ɔlɛɛcɛ nōo ī kwú ā, ámāŋ ka ɛbɛ́ ámāŋ ka ígbáanɔ ámāŋ ka ɔdāpīyajɛ ā ɛ̄gbā.

²⁴Anɔ́ɔ Ɔwɔicō le ɛga je lɛ ācɛ nēe bá nyā kéē yá ɔdīcíci dúúmā nɛ̄ ɔtū kú uwā tíne ā, é gē yá ɔdā ōtūwēyī mla ɔ́mpa ūwā.

²⁵É tá kóō cɛ̄ɛ̄lā ɔkwɛ̄yi lɛyíkwu Ɔwɔicō, ikɔkɔ ɔ́ɔmā é cɛ̄ɛ̄lā ɛ̄kɛ̄mgbɛ̄. É gē gbā aɔ́dā nɛ̄ Ɔwɔicō yá ā ɛ̄gbā, klla ī cɛ̄ ūwā ɛhɔ̄, ikɔkɔ Ɔwɔicō nōo yá aódée ā abɔ̄yī nū ā, nōo cíkā kéē cɛ̄tra anú piyóó ā! Aamí.

²⁶Ohígbū ɔ́ɔmā Ɔwɔicō kwú uwā ú lɛ únwū obɔ̄bí nōo ī bīya ācɛ. Ācɛnyā kú uwā nyɛ̄ɛ̄ ŋmá ɔwɛ nɛ̄ Ɔwɔicō yá ka ɔ̄cɛnyīlɔ kóō cikpó uwā ā, anɔ́ɔ uwá nēe wɛ ācɛnyā gē cikpó ācɛnyā ɔ́mpā uwā á.

²⁷Ɔwɛ ékpónú ɔ́ɔmā ācɛnyīlɔ kú uwā le fō ŋmá ɔwɛ nɛ̄ Ɔwɔicō yá kú ɔ̄cɛnyīlɔ kóō cikpó ɔ̄cɛnyā ā tá, anɔ́ɔ é gē yúnwū ō cikpó ācɛnyīlɔ ɔ́mpa ūwā á. Ācɛnyīlɔ mɛ́mla ɔ̄cɛnyīlɔ bá ī yá ɔdōtūwēyī mla ɔ́mpa ūwā, ohígbū ɔ́ɔmā Ɔwɔicō í yá uwā ɛdɔ kú italā nōo cíkā lɛ ɔdā nēé yá ā.

²⁸Abɔ̄ é gbɛlá ka, ó cíkā kéē hī Ɔwɔicō ɔdée ŋ́ mā, anɔ́ɔ Ɔwɔicō kwú uwā ú lɛ ɔtū nōó ī gbɛlá ɔdā nɛ̄ ó cíkā ŋ́, anɔ́ɔ é kē yá ɔdā nēé cíkā ō yá ŋ́ mā á.

²⁹Otū kú uwā le mu mla ɛdɔ ɔbíipú dóódu, obɔ̄bí, eyī ōkwu ɔdā, okónu ō ŋmó ɔ̄cɛ dóódu. Uwá le mu mla imálānyī, é gē ŋmó ācɛ, gē yíkpɛ́lā, gē plla ācɛ, gē híla ācɛ, gē ka obɔ̄bí kú ācɛ.

³⁰É gē bīya ācɛ iyē, é gē tū Ɔwɔicō eyījii, é gē lɛ ojīlīmā cē ācɛ ŋ́. É gē gwō ī yɔ́bɔ́ɔcɛ. É gē hútū ɔwɛ o yá ɔdōbɔ̄bí ɛ̄yīpɛ̄, é ī yíkpɛ̄yí olɔfú tá ācɛ nēe ma uwá ā.

³¹Ɔtū kú uwā í gē ŋmó uwā ɛpɔ̄bí ŋ́; é tōō lɔtūce ŋ́, é lɔnɔ ɔtū, é ī ményinyi ācɛ ŋ́.

³²Uwá jé ka íne kú Ɔwɔicō ka ācɛ nēe yá ɔdā ɛ́gɛ́nyā ā, ikwū yɔ̄ ī gbēyī uwā, nááná é mā ō yá ɔdā nēe bá nyā ōfūnū ŋ́, amáŋ é gē (cɛ̄ɛ̄lā) ācɛ nēe ī yá ɔdōbɔ̄bí ā dúú.