Read idoma ĀCƐ URÓM 11 Bible Online

ĀCƐ URÓM 11 - idoma bible

ĀCƐ URÓM 11

¹Anɔ́ɔ n da ɔ̄kā ka, Ɔwɔicō tá ācɛ ɔlɛ́ nū nɛɛ? Ó lɔwɛ ŋ́! Ami abɔ̄yī um, n wɛ ɔ̄cɛ kú Ísrɛ̄lu, ɔyɔ́ɔ́yí kú Ébrahām, ɔ̄cɛ ipɔ́ɔma kú Ubénjamīn.

²Ɔwɔicō í tá ācɛ ɔlɛ́ nū nōó fu ŋmá ajaajɛ ā ŋ́. Aá gbɛlá kwu ɔdā nēé ka ipú ɔkpá kú ɛlɔ̄ɔwɔicō lɛyíkwu Ɛláyíja ɔ̄comɛ́ɛbɛ ā, ɛ́gɛ́nɛ̄ ó gbɔ̄ɔkɔ lɛ Ɔwɔicō lɔfú lɔfú lɛyíkwu ācɛ kú Ísrɛ̄lu, anɔ́ɔ ó kahíníī,

³ “Óndú, uwá lɛ ācomɛ́ɛbɛ kú uwɔ kpó ŋmó ɛɛ́, é le ɛgogwɛ́ɛya kú uwɔ ca tāajɛ ɛɛ́. Ami ōfōōfū um wɛ ɔ̄comɛ́ɛbɛ nōo hile mɛ́ɛ̄ á, é kē ī dɔɔ̄kā ō je um ŋmó.”

⁴Amáŋ ɔdí wɛ ohi nɛ̄ Ɔwɔicō tá ɔ̄ ā? “N lɛ ācɛ ulá igwáahāapa nēé lɛ okwúukwu kwajɛ lɛ Ubáalu jééjéē ɛ́ɛ́ ŋ́ mā tū lɛ iyī um.”

⁵Ɛ́gɔ́ɔmā nōó lɛ abālɔbányā dúú á. Ó lɛ ācɛ olígíí nēe hile nɛ̄ Ɔwɔicō fu ohígbū kóō ī ményinyi íbí.

⁶Ācɛ nōó ī fu ā, ó fu uwá ŋmá eyīnyinyi uwā nōó má ā nɛ̄ n, ó ŋmá lɛ úklɔ́ nēé yá ā ŋ́. Ohígbū ka ɔ́dāŋ́ ka Ɔwɔicō ī fu ācɛ ŋmá lɛ úklɔ́ nēé yá nɛɛ, ó lɛ ā ó ményinyi ācɛ ɔkwɔ̄ɔ̄kwɛ̄yi ŋ́.

⁷Ɔdí mɛ́ɛ́nɛ? Ācɛ kú Ísrɛ̄lu í má ɔdā nēé yɔ̄ ī dɔɔ̄kā ā ŋ́. Amáŋ ígwu olígíí nɛ̄ Ɔwɔicō fu ā le ɔ́ pīyɛ̄, amáŋ Ɔwɔicō lɛ ācɛ ohile ā ahɔ̄ du, cɛ́ɛ́ kéē pó igwú kú nū ŋ́.

⁸Ɛ́gɛ́nɛ̄ é tá ɔ̄ ipú ɔkpá kú ɛlɔ̄ɔwɔicō kahíníī, “Ɔwɔicō lɛ odo mɛ́mla ɔtū kú uwā yá kéē híī jɛ́yí ɔdā dúúmā ŋ́. O jāā í kwu ícɛ nyā é ī mɛ́ɛbɛ ŋ́ ɛ́ɛ́ nēé klla kōō bī ahɔ̄ kú uwā lɛ pó ɛlā ŋ́.”

⁹Udéfīdi klla kē kahíníī, “N gbɔ̄ɔkɔ lɛ Ɔwɔicō cɛ́ɛ́ kóō lɛ uwá kwú, kóō lɛ ukpa jē lɛ uwá eko kú ucɛ kú uwā, kéē má gwōtū ukpa, kú Ɔwɔicō kóō lɛ italā yá uwā.

¹⁰Eyī kú uwā kóō kwú kpó pu, cɛ́ɛ́ kéē híī mɛ́ɛbɛ ŋ́, ká ōwē kóō lɛ uwá ohí pú wāajɛ dɔɔlɔ eko dóódu.”

¹¹Anɔ́ɔ n dɔɔ̄kā ka, eko nɛ̄ ācɛ Ujíyu tígagá ā, é má gwōnū nɛɛ? Ó lɔwɛ ŋ́! Amáŋ ohígbū ka abɔ̄ é le íne bīya ā, aílɔ́wá ā gbɔɔ́ ō má ɔdā nɛ̄ onyatá wɛ ā, cɛ́ɛ́ kú ācɛ Ujíyu kéē kpópú aílɔ́wá ā.

¹²Íne nɛ̄ ācɛ Ujíyu bīya ā le yá kéē lɛ ɔhā nɛ̄hi hɛ́ce ācɛ kú ipú ɛcɛ, ogwōnū kú uwā kē le yá kéē lɛ ɔhā nɛ̄hi hɛ́ ce aílɔ́wá. Ó i lɛ ā ɔhā ā í nwuné nɛ̄hi eko nēé lɛ odúúdú áluka kú ācɛ Ujíyu ka tū ipú ācɛ nēé le nyatá ā!

¹³Abālɔbányā n yɔ̄ ī kɛlā nēe bá ā lɛ aá nēe wɛ aílɔ́wá ā. N géē cɛ̄tra úklɔ́ kú um, ɔdā nōo yá ɛ́ɛ́ nɛ̄ n wɛ ɔ̄cocɛ̄hɔ̄ kú aílɔ́wá ā.

¹⁴Ɔ̄cɛ í jé ŋ́ n lɔfú yá ká ācɛ ɔlɛ́ um kéē kpópú aílɔ́wá ā glá, cɛ́ɛ́ ká Ɔwɔicō kóō lɛ ācɛ ōhī kú uwā hɛ́tá ohígbū úklɔ́ kú um.

¹⁵Ohígbū ka eko nɛ̄ Ɔwɔicō tá ācɛ Ujíyu ā, Ɔwɔicō le alɛɛcɛ ɔhá kú ɛcɛ kagwó mla iyīnū. Abɔ̄ ó i lɛ ā mɛ́ɛ̄ ā, eko nēé í mīyɛ uwá ā. Ó géē lɛbɛ̄ɛka oyēeyī lɛ ācɛ nōo gekwú āa.

¹⁶Ɔ́dāŋ́ ka ɔ̄cɛ dóódu kwú ámú igbō aflɛ́yí ā ú lɛ Ɔwɔicō, ayíka odúúdú igbō ā wɛ ákú nū dúú. Ɔ́dāŋ́ kéē kwú ɛgba kú ɔcí ú lɛ Ɔwɔicō, ayíka ābɔ̄ kú ɔcí ā kē wɛ ákú nū dúú.

¹⁷É lɛ ābɔ̄ ōhī kú ɔcí nēé hī ka ólīifu nēé hí ā gwó bónū, anɔ́ɔ é lɛ ābɔ̄ kú ólīifu kú ipácí hɛ́ kwu ɔ́, cɛ́ɛ́ kú ābɔ̄ ā kóō lū ŋmá enyi ō pi ŋmá ipú ɛ́nɛ́ ɔcí ā. Aá nēe wɛ aílɔ́wá ā lɛbɛ̄ɛka ɔcí kú ólīfu kú ipácí ā, abālɔbányā ā lɛ ukpɛ̄ kú ɔdā olɔhi nɛ̄hi kú ācɛ Ujíyu ā lɛ dúú ɛ́ɛ́.

¹⁸Anɔ́ɔ abɔ̄ nōó le ā, aá híī leyī gwō ācɛ nēé hɛ́ bónū bɛ̄ɛka ābɔ̄ ɔcí ā ŋ́. Ɔwɛ nyá nɛ̄ aá í gwō ā? Aá wɛ ābɔ̄ ōfōōfūnū nɛ̄ n, aá gē tá ɛgba ā abɔ̄ ŋ́, ɛgba ɔcí ā gē tá aá abɔ̄ á.

¹⁹Amáŋ ācɛ ōhī kú aá géē kahíníī, “Īī, amáŋ é gwó ābɔ̄ ā bónū kéē yá ɛga gā um.”

²⁰Ɔ́ɔmā wɛ ɔkwɛ̄yi nɛ. É gwó uwā bónū ohígbū kéē cɛ̄ ŋ́, amáŋ awɔ ā kē háyi lɔfú ohígbū ka a cɛ̄ɛ̄lā Ɔwɔicō. Amáŋ aá híī bī ɔ́ɔmā gwō ŋ́, ikɔkɔ ɔ́ɔmā aá yúufi.

²¹Ɔ́dāŋ́ ka Ɔwɔicō í habɔ̄ ācɛ Ujíyu, nēe lɛbɛ̄ɛka ɔcí ō tū ā tá ŋ́, aá gbɛlá ka ó géē habɔ̄ aá tá nɛɛ?

²²Aá má ɔ̄ ka abɔ̄ Ɔwɔicō gbonɛnɛ ā nōó klla ī kɛpɔ̄ olɔfú tū ācɛ ā. Ó gē kɛpɔ̄ olɔfú tū ācɛ o yíkpɛ̄yí olɔfú, amáŋ ó gbonɛnɛ lɛ aá, ɔ́dāŋ ka aá yɔ̄ ī gɔbū ō yá ɔdā nōo í yá kóō gbonɛnɛ lɛ aá, Amáŋ ɔ́dāŋ́ nōó lɛ ā ŋ́, ó géē hɛ́ aá bónū dúú.

²³Anɔ́ɔ ɔ́dāŋ ka ācɛ Ujíyu ā le pīyabɔ̄ nēé kē cɛ̄ɛ̄lā Ɔwɔicō, ó géē je uwá kwúcē í kwu ɔcí ɛga nēé kwu gbɔbū ā. Ohígbū ka Ɔwɔicō lɔfú yá lɛ ā glá kpɔ́.

²⁴Aá aílɔ́wá ā lɛbɛ̄ɛka ābɔ̄ ɔcí ólīfu kú ipácí nēé hɛ́ kwu ɔcí kú ólīfu nēé tū abɔ̄yīnū ā, nōo wɛ ɛyɛ́ɛ́yí gwō ɔdūwā tá ā. Ācɛ Ujíyu ā lɛbɛ̄ɛka ɔcí ólīfu nēé tū ā. Ó géē tɔ́ɔtɛ́ lɛ Ɔwɔicō fíyɛ́ kóō kwú ābɔ̄ nēé hɛ́ ā ú kwúcē í kwu ɔcí abɔ̄yī nū.

²⁵Ó lɛ ɛlā ɔkwɛ̄yi ōtayínū éyi yɔ̄ nɛ̄ n dɔɔ̄kā ká aá lɛ ɔ́ jé, aóklóbīya um, ɔ́dāŋ ka alɔ lɛ ɛ̄nyā jé, alɔ í gáā ka ipú ɔtū kú alɔ ka, ɔkwɔ̄ɔ̄kwɛ̄yi alɔ jɔ́dā íbí ŋ́. Ɛlā ā yɔ̄ á, ācɛ kú Ísrɛ̄lu í gáā yɔ̄ ī tá ka aá í gáā cɛ̄ ŋ́ piyóó nóó n, amáŋ ó géē yɔ̄ lɛ ā jāā gbéeko nɛ̄ áluka kú aílɔ́wá nɛ̄ Ɔwɔicō miya ā gā ɛgiyí nū.

²⁶Ɔwɛ ɛ́gɛ́nyā nɛ̄ Ɔwɔicō géē hɛ́ odúúdú ācɛ Ísrɛ̄lu tá á. Ɛ́gɛ́nɛ̄ é tá ɔ̄ ipú ɔkpá kú ɛlɔ̄ɔwɔicō lɛ ā, “Ohɔ́nyɛtá ā géē wā ŋmá Usáyɔn, ó géē nū odúúdú ucē kú ɔ́bíipú ŋmá ipú ayááyí kú Ujékɔ̄pu.”

²⁷“Anɔ́ɔ Ɔwɔicō ka, n géē gbɛka nyā lɛ uwá eko nɛ̄ n kwú íne nēé bīya ā í yá uwā ɛhi.”

²⁸Ohígbū ka ācɛ Ujíyu tá Ɔ̄kōolɔhi ā, é kwú pīya aólɛlā kú Ɔwɔicō, amáŋ ɛ̄nyā kwú pīya ɔdā nōo tá aá nēe wɛ aílɔ́wá ā abɔ̄. Amáŋ ācɛ Ujíyu, ācɛ nɛ̄ Ɔwɔicō fu kpɔ́ ohígbū okónu nōó ce lɛ aádáádā uwā ka anúɔ í wɛ oklóbīya uwá ā.

²⁹Ohígbū ka Ɔwɔicō í gē piyɔtū kú nū abɔ̄ lɛyíkwu ɔ̄cɛ nōó le fu klla le ɔhā hɛ́ ce ɔ́ ŋ́.

³⁰Aá nēe wɛ aílɔ́wá ā, aá tɛtɛ yíkpɛ̄yí olɔfú tá Ɔwɔicō, amáŋ abālɔbányā ó le eyīnyinyi aá má ohígbū ikpɛ̄yí olɔfú nɛ̄ ācɛ Ujíyu yá ā.

³¹Ɔwɛ ékpó ɔ́ɔmā, ohígbū eyīnyinyi aá nɛ̄ Ɔwɔicō má ā abālɔbányā, ācɛ Ujíyu le ikpɛ̄yí olɔfú yá tá Ɔwɔicō, o yá ɛ́ɛ́ kú Ɔwɔicō kóō lɛ eyīnyinyi uwā má abālɔbányā dúú.

³²Ɔwɔicō le yá kú odúúdú ācɛ kéē kwú pīya bɛ̄ɛka alagbá a ohígbū ikpɛ̄yí olɔfú nēé yá ā.

³³Ɛ́gɛ́nyā nɛ̄ eyīnyinyi kú Ɔwɔicō nwuné lɛ ā! Íjééyī mɛ́mla ɔdōojé kú Ɔwɔicō ī mɛ glá ŋ́! Ɔ̄cɛ dúú í jɛ́yí ɛ́gɛ́nɛ̄ ó ī miya ɛlā kú nū ŋ́! Ɔ̄nyɛ jɛ́yí ɔwɛ nōó ī yá odée kú nū ā?

³⁴“Ɛ́gɛ́nɛ̄ é tá ɔkpá kú ɛlɔ̄ɔwɔicō lɛ ā, ɔnyɛ jé ɔtū kú Óndú ā, “Ɔnyɛ jé ɔdā nɛ̄ Ɔwɔicō yɔ̄ ī gbɛlá? Ɔ̄nyɛ jé odée jɛ̄ nōo nwū ɔ̄ ɛlā ā?”

³⁵“Ɔ̄nyɛ lɔfú yá Ɔwɔicō ɛhi gbɔbū, cɛ́ɛ́ kú Ɔwɔicō kóō í cíla ɔ̄ ulé nū ā?”

³⁶Ohígbū ka Ɔwɔicō yá odúúdú ɔda dóódu á, ɛjɛ̄ɛ̄jī ɔdā dóódu ŋmá ɛgiyí nū, é kéē yɔ̄ lɛ ɔ́. Ālɔ̄ cɛ̄tra Ɔwɔicō ŋmá eko tá eko. Aamí.