Read idoma ĀCƐ URÓM 12 Bible Online

ĀCƐ URÓM 12 - idoma bible

ĀCƐ URÓM 12

¹Ohígbū ɔ́ɔmā ā ayínɛ́ um, ohígbū eyīnyinyi ce eyīnyinyi alɔ nɛ̄ Ɔwɔicō má ā n gē lɛ abɔ̄ tɛ́yīpɛ̄ lɛ aá, ká aá kwú iyī aá ú bɛ̄ɛka ɛya nēé gwó oyēeyī lɛ Ɔwɔicō ā, ká aá kwú ɔtū ká aá ú tá ká aá cɛ̄ ɔ̄ ɛhɔ̄ ɔwɛ nōo í he ɔ́ ɔtū. Ɛ̄nyā wɛ ɔwɛ ɔkwɛ̄yi nɛ̄ aá cíkā ō gbā Ɔwɔicō ɛ̄gbā á.

²Aá híī yá ucē gbla ācɛ kú ipú ɛcɛ nyā ŋ́, amáŋ je ɛga lɛ Ɔwɔicō kóō lɛ ɔwɛ nɛ̄ a gē gbɛlá ā pīyabɔ̄. Cɛ́ɛ́ a géē jé odúúdú aɔ́dā nēe lɔhi klla he Ɔwɔicō ɔtū ā.

³Ohígbū ɛhi nɛ̄ Ɔwɔicō je gā um mā, n da ɛjɛ̄ɛ̄jī aá ka, aá híī gbɛlá je iyī aá gicō fíyɛ́ ɛ́gɛ́nɛ̄ o cíkā ā ŋ́. Amáŋ aá gbēyī gɔɔ cɛ́ɛ́ ká aá je iyī aá ɛ́gɛ́nɛ̄ aá kpɔ́tūce Ɔwɔicō lɛ ā.

⁴Ɛ́gɛ́nɛ̄ ɔnyɔɔnyɛ kú alɔ lɛ ɔkpíyē nōo lɛ ābɔ̄ ɛyɛ́ɛyɛ́yí alɛwa nēe kē ī yúklɔ́ ɛyɛ́ɛyɛ́yí ā.

⁵Ɔwɛ ékpónú ɔ́ɔmā, nááná nɛ̄ alɔ wɛ ācɛ ɛyɛ́ɛyɛ́yí alɛwa ā, alɔ lɛbɛ̄ɛka ɔ̄cɛ ékpónú mla Ohɔ́nyɛtá ā. Ɔnyɔɔnyɛ kú alɔ kē wɛ ābɔ̄ kú ɔ́mpā nū, nēe cɛgbá ācɛ ohile.

⁶Ohígbū ɔ́ɔmā alɔ bī ɛhi ɛyɛ́ɛyɛ́yí nɛ̄ ɔnyɔɔnyɛ ká alɔ lɛ ā le yúklɔ́ ɛ́gɛ́nɛ̄ Ɔwɔicō je ɔ́ lɛ alɔ lɛ ā. Ɔ́dāŋ ka ɛhi kú alɔ wɛ ō bī olɛhɔ̄ kú Ɔwɔicō tɔ́ɔna nɛɛ, ālɔ̄ bī ɔ̄ tɔ́ɔna í kwu ɛ̄jīla nɛ̄ alɔ cɛ̄ɛ̄lā Ɔwɔicō í kwu ā.

⁷Ɔ́dāŋ́ ka ó wɛ ō cɛ̄ ācɛ ɔhá ɛhɔ̄ nɛɛ, ayíbɛ ālɔ̄ cɛ̄ ācɛ ɔhá ɛhɔ̄. Ɔ́dāŋ ka ó wɛ o nwū ācɛ ɔdā nɛɛ, ayíbɛ ālɔ̄ kwú iyī alɔ í tá ɔdā ō nwū ā.

⁸Ɔ́dāŋ́ ka ó wɛ ō tá ācɛ ɔhá ɔtū kwu ɔtū nɛɛ, ayíbɛ ālɔ̄ yá lɛ ā. Ɔ̄cɛ nōo kē ī yɛ́ɛhi kóō yá nwuné nwuné. Ɔ́dāŋ́ ka a wɛ otrɛ̄yí nɛɛ, a cíkā ō cēyītīkwū. Ɔ̄cɛ nōo kē ī yá ɔdā dúúmā ohígbū eyīnyinyi kóō bī ɔtū nɛ̄hɛ́ le yá ɔ̄.

⁹Eko nɛ̄ aá í yíihɔtū, óō wɛ ihɔtū ɔkwɛ̄yi. Aá tá ɔdā nōo bɔ̄bí, aá lɛ abɔ̄ flá tū ɔdā nōo lɔhi.

¹⁰Aá yíihɔtū tá ɔ́mpa aá bɛ̄ɛka ayínɛ́ ékpónú ā. Aá híī kpéeko bónū ō lɛ ojīlīmā ce ɔ́mpa aá ŋ́.

¹¹Aá cēyītīkwū, aá híī kwáahi ŋ́. Aá cɛ̄ Óndú ā ɛhɔ̄ mla ɔtū ékpónú.

¹²Aá yɔ̄ ī gwéeyē ohígbū ka aá lɛ eyīyōce. Aá lɔ́tūle eko nɛ̄ ācɛ ɔhá ī junwalu lɛ aá. Aá híī hɛ́ bené ŋmá ɔkɔ nɛ̄ aá ī gbā ā ŋ́.

¹³Aá je ɔdā nōo ce aɔ́mpa aá nēe wɛ ācɔ̄lóhɔ́nyɛtá ɛgbá ā lɛ uwá. Aá mīyɛ ayínɛ́ aá ācɔ̄lóhɔ́nyɛtá nēe wɛ ugbɔga ā wā ɔlɛ́ aá.

¹⁴Aá ba Ɔwɔicō cɛ́ɛ́ kóō hɔ́hā ce ācɛ nēe ī yá aá ŋmó ā. Aá da ɔ́ kóō hɔ́hā ce uwá, óō híī wɛ o da ɔ́ kóō tá okónu lɛ uwá ŋ́.

¹⁵Aá gwéeyē mla ācɛ nēe gē gwéeyē, aá jikwū mla ācɛ nēe ī jikwū ā.

¹⁶Aá lā ɛbɔ́ mla ɔ́mpa aá. Aá híī yá ɔbɔ́ɔ̄cɛ ŋ́, amáŋ aá tíyē kwu ācɛ nēe gbɛhá ā, ɔ̄cɛ dúú kóō híī gbɛlá ka anúɔ je odúúdú ɔdā dóódu ŋ́.

¹⁷Aá híī bī obɔ̄bí le cíla ulé obɔ̄bí dúúmā ŋ́, amáŋ aá cēyītīkwū kú aá yá ɔdā nɛ̄ ɛjɛ̄ɛ̄jī ācɛ ka kóō wɛ ɔdā olɔhi ā.

¹⁸Aá yá ɔdā dúúmā nōo tɔ́ɔtɛ́ lɛ aá kú aá lā ɛbɔ́ mla odúúdu ācɛ.

¹⁹19 Ācɛ ō he um ɔtū, aá híī gwɔ̄ɔ́ci ŋ́, ikɔkɔ ɔ́ɔmā aá lɛ ɛga je lɛ Ɔwɔicō kóō ŋmó ɔ̄cɛ ɔ́ɔmā ɛpɔ̄bí. Ohígbū kéē tá ipú ɔkpá kú ɛlɔ̄ɔwɔicō kahíníī, “Ami í gwō ɔ́ci á, n géē cíla ulé, abɔ̄ Óndú ā ka lɛ á.”

²⁰Aá híī gwɔ̄ɔ́ci ŋ́, amáŋ “ɔ́dāŋ ka ɛmiyɛ í ŋmó olɛlā kú uwɔ, je ɔdōlé lɛ ɔ́. Ɔ́dāŋ́ ka ijēēnyi ī ŋmó ɔ̄, je éŋkpɔ̄ lɛ ɔ́. Ohígbū ka o ŋmá lɛ ɛ́gɛ́nyā nɛ̄ aá ī yá, í cɛ̄ lɛ uwēyī í kwú ɔ̄.”

²¹Aá bī ɔdā olɔhi ō yá le yá ɔdōbɔ̄bí lé.