Read idoma ĀCƐ URÓM 15 Bible Online

ĀCƐ URÓM 15 - idoma bible

ĀCƐ URÓM 15

¹Alɔ nēe kē kpɔ́tūce lɔfú lɔfú ā cíkā ō tá ācɛ nēé lɔfú ŋ mā abɔ̄ ipú unwalu kú uwā. Ālɔ̄ yá ɔdā nōo í he iyī alɔ ɔtū ōfūnū ŋ́.

²Ɔnyɔɔnyɛ kú alɔ kóō yá ɔdā nōo í lɔhi lɛ ɔ́mpā nū mɛ́mla o yá ɔdā nōo he ɔ́ ɔtū.

³Ohígbū ka Ohɔ́nyɛtá í yá ɔdā nōo he ɔ́ ɔtū ā ŋ́, amáŋ ɛ́gɛ́nɛ̄ ē tá ɔ̄ ipú ɔkpá ɛlɔ̄ɔwɔicō ā kahíníī, “Ɛcá nɛ̄ ācɛ cá aá ā, le pīya ɛcá kú um.”

⁴Ɛjɛ̄ɛ̄jī ɔdā dóódu nēé tá tū ipú ɔkpá kú ɛlɔ̄ɔwɔicō ā wɛ ɔdā ō bī nwū alɔ ɛlā, cɛ́ɛ́ ká ālɔ̄ lɛ eyīyōce lɛ ŋmá lɛ ɔtū ō lé mɛ́mla ɔtū ō tū kwu ɔtū nɛ̄ ɔkpá kú ɛlɔ̄ɔwɔicō ā ī je lɛ alɔ ā.

⁵N gē gbɔ̄ɔkɔ lɛ Ɔwɔicō nōo ī yá kú ālɔ̄ lɛ ɔtōōlé ā mɛ́mla o tá ɔ̄cɛ ɔtū kwu ɔtū ā kóō yá kú ɔnyɔɔnyɛ kú aá kóō yá ɛdɔ ucē kú Ujísɔ̄si Ohɔ́nyɛtá lɛyíkwu aɔ́mpa aá,

⁶cɛ́ɛ́ ká odúúdú aá kéē bī ɔkɔ ékpónú le wóófu Ɔwɔicō mɛ́mla Ádā kú Óndú alɔ Ujísɔ̄si Ohɔ́nyɛtá.

⁷Aá mīyɛ ɔ́mpa aá wā ipú ɔtū kú aá ɛ́gɛ́nɛ̄ Ohɔ́nyɛtá mīyɛ aá ā, cɛ́ɛ́ ká ācɛ kéē cɛ̄tra Ɔwɔicō.

⁸Ohígbū ka n da aá ka Ohɔ́nyɛtá wā kóō tá ācɛ Ujíyu abɔ̄ kóō le mafú ka Ɔwɔicō í yá ɔdā nōó cokónu lɛ aádáádā uwā ka anúɔ ī yá ā, kóō lɛ ɔ́ yá ɔkwɛ̄yi.

⁹Anɔ́ɔ ó le yá ká aílɔ́wá ā kéē cɛ̄tra Ɔwɔicō ohígbū kóō gē ményinyi ɔ̄cɛ. Ɛ́gɛ́nɛ̄ é tá ɔ̄ ipú ɔkpá kú ɛlɔ̄ɔwɔicō ā kahíníī, “Ohígbū ɔ́ɔmā n géē cɛ̄tra awɔ ipéeyī aílɔ́wá, ká n̄ kē gwííjē ocɛ̄tra iyē kú uwɔ.”

¹⁰É klla kē tá ipú ɔkpá kú ɛlɔ̄ɔwɔicō kahíníī, “Aá nēe wɛ aílɔ́wá ā, aá gwéeyē mla ācɛ nɛ̄ Ɔwɔicō fu ā.”

¹¹Igbɔhá, é klla kē tá kahíníī, “Aá nēe wɛ aílɔ́wá ā, aá cɛ̄tra Óndú ā, odúúdú ācɛ ā kéē kē cɛ̄tra ɔ́.”

¹²Ɔ̄comɛ́ɛbɛ Ayisáya klla kē kahíníī, “Ɔ̄cɛ éyi géē wā ŋmá ipɔ́ɔnū kú Ujése, ó í wā gaá gbō aílɔ́wá ā. Anú nɛ̄ aílɔ́wá ā kē í kpɔ́tūce á.”

¹³N gē gbɔ̄ɔkɔ lɛ Ɔwɔicō nōo ī yá kú ālɔ̄ leyīce ā, kóō yá kú aá gwéeyē nɛ̄ɛ̄nɛ̄hi kú aá lɛ ɛbɔ́ lɛ dúúdú, o ŋmá lɛ o cɛ̄ɛ̄lā Ɔwɔicō, cɛ́ɛ́ kú ɔfú kú Alelékwū Ihɔ ā kóō cɛ̄ lɛ aá lɛ eyīyōce.

¹⁴Aá nēe cɛ̄ɛ̄lā Ɔwɔicō mla um ā, ami abɔ̄yī um jé kpɔcii, ka aá abɔ̄yī aá jé ɔdā nɛ̄ aá cíkā ō yá lɔɔlɔhi nɛ̄hi. Aá jé aɔ́dā nēé bá nyā lɔɔlɔhi nɛ̄ aá cíkā ō nwū ācɛ ɔ́mpa aá.

¹⁵Amáŋ ipú ɔkpá nyā n gē tá ɔdā ōhī tɛ́ɛcɛ péee, cɛ́ɛ́ ká n̄ tū aá ɛlá kwu āyā kú ɔkpá nyā. N lɔtū ohígbū úklɔ́ ɛfiyɛ nɛ̄ Ɔwɔicō jē gā um,

¹⁶ká um wɛ ɔ̄cotɛ̄hɔ̄ kú Ohɔ́nyɛtá Ujísɔ̄si lɛ aílɔ́wá ā. N yúklɔ́ kú um bɛ̄ɛka ɔ̄cogwɛ́ɛya ipú ɔna kú ɔkōōlɔhi nōo ŋmá ɛgiyí Ɔwɔicō nɛ̄ n tá ā. O yá ɛ́ɛ́ ká aílɔ́wá ā kéē le pīya bɛ̄ɛka ofídákā nɛ̄ Ɔwɔicō í mīyɛ lɔhi glá ā, nɛ̄ Alelékwū Ihɔ ā je lɛ ɔ́ ā.

¹⁷Ohígbū ka abɔ̄ n le bɔ́há mla Ohɔ́nyɛtá Ujísɔ̄si ā, n gē yɔ́bɔ́ɔcɛ ohígbū úklɔ́ nɛ̄ n gē yá lɛ Ɔwɔicō ā.

¹⁸N géē lɔtū ī kɛlā ohígbū ɔdā nɛ̄ Ohɔ́nyɛtá bī um yá ŋmá ɛlā nɛ̄ n ka mla úklɔ́ nɛ̄ n yá ā, nōo le yá ká aílɔ́wá ā kéē lɛyí túwāajɛ lɛ Ɔwɔicō ā.

¹⁹O ŋmá ɔfú kú ɔdōcābɔ̄ mɛ́mla ɔdōhídáagó, o ŋmá lɛ úklɔ́ olɔfú nɛ̄hi nɛ̄ Alelékwū Ihɔ yá ā. Anɔ́ɔ n yɛ ga ɛga dóódu, o ŋmá Ujerúsālɛm ga Iliríkúm ā, n lɛ Ɔ̄kōōlɔhi kú Ohɔ́nyɛtá ā bī tɔ́ɔna gaajɛ ɛɛ́.

²⁰Ɔdā ékpó nōo kwu um ɔtū ā wɛ o bī Ɔ̄kōōlɔhi ā tɔ́ɔna ɛga nɛ̄ ɔ̄cɛ dóódu í pó iyē kú Ujísɔ̄si Ohɔ́nyɛtá jéjéē ɛ́ɛ́ ŋ́, o yá ká um gwó ce ikpínu nɛ̄ ɔ̄cɛ ɔhá le táajɛ ā ŋ́.

²¹Ɛ́gɛ́nɛ̄ é tá ɔ̄ ipú ɔkpá kú ɛlɔ̄ɔwɔicō ā kahíníī, “Ācɛ nēé kɛlā nū lɛ uwá jéjéē ɛ́ɛ́ ŋ́ mā ā, é géē mɛ́ɛbɛ. Ācɛ nēé pó ɛlā ohígbū nū jéjéē ɛ́ɛ́ ŋ́ mā géē jɛ́yí ká ɛlā ā.”

²²Igbɛ alɛwa ó tɔ́ɔtɛ́ gā um kú um wā ɛgiyí aá glá ŋ́.

²³Amáŋ abālɔbányā, abɔ̄ n lɛ úklɔ́ nɛ̄ n cíkā ō yá ā yá kwɛyí ipú aígelī nēe bá amānyā ɛ́ɛ́ mā, abɔ̄ n kē húmáyī dɔɔ̄kā iháyí alɛwa ká n̄ wā í lɛ aá má ā,

²⁴n leyī ce ka n géē būce aá abālɔbányā, ká n̄ lɛ aá má eko nɛ̄ n gáā yɛ ga Usipéni ā, kú aá kē tá um abɔ̄ ká n̄ pīya tá ɔwɛ kú um, eko nɛ̄ n dēē klá mla aá lígíí.

²⁵Amáŋ abālɔbányā n gē bī ɛhi nēé da ohígbū ācɔ̄lóhɔ́nyɛtá ā nyɔ̄ Ujerúsālɛm.

²⁶Ohígbū ka ó he ācɛ icɔ́ɔci kú Umasɛdónīya mɛ́mla Akáya ɔtū kéē da ɔdā ohígbū ācɛ ogbɛhá nēe bá ipú ācɔ̄lóhɔ́nyɛtá nēe bá Ujerúsālɛm ā.

²⁷ Ó he uwá abɔ̄yīwā ɔtū kéē yá lɛ ā, ɔkwɔ̄ɔ̄kwɛ̄yi é cíkā ō yá lɛ ā. Ohígbū ka ācɛ Ujíyu ā lɛ ɔhā kú Alelékwū kú uwā kɔ̄ mla aílɔ́wá ā, o lɛ ā aílɔ́wá ā cíkā ō bī agbénú kú uwā kú ɛcɛ nyā le tá ācɛ Ujíyu ā abɔ̄.

²⁸Eko nɛ̄ n lɛ ɛ̄nyā yá mɛ, nɛ̄ n kwú ije nēé le tū um ɛhɔ̄ ā í lɛ uwá, n géē būce aá eko nɛ̄ n gáā yɛ ga Usipéni ā.

²⁹N kē jé ka eko nɛ̄ n géē wā ɛgiyí aá, n géē wā ká n̄ yá kú Ohɔ́nyɛtá kóō lɛ ɔhā nɛ̄ɛ̄nɛ̄hi hɛ́ ce aá.

³⁰N gē gbɔ̄ɔkɔ lɛ aá, ayínɛ́ um, n bī iyē kú Óndú alɔ Ujísɔ̄si Ohɔ́nyɛtá mɛ́mla ihɔtū kú Alelékwū Ihɔ ā, ká aá lɔfú tū iyē nwuné nwuné, ká aá lɛ abɔ̄ fúlɔhá mla um kú ālɔ̄ gbɔ̄ɔkɔ lɛ Ɔwɔicō.

³¹Aá gbɔ̄ɔkɔ cɛ́ɛ́ kú ācɛ Ujíyu nēé cɛ̄ɛ̄lā Ohɔ́nyɛtá ŋ́ mā kéē híī yá um ɔdā dúú ŋ́, cɛ́ɛ́ ka ācɔ̄lóhɔ́nyɛtá kē géē mīyɛ ɛhi nɛ̄ n yɔ̄ ī bī gé lɛ uwá,

³²cɛ́ɛ́ ká ɔ́dāŋ nɛ̄ Ɔwɔicō cɛ̄, ká um wā ɛgiyí aá mla éeyē, ká n̄ dēē lūgwū abɔ̄ n géē mlɛ́nyɔ́ mla aá ā.

³³N gē gbɔ̄ɔkɔ lɛ Ɔwɔicō nōo ī yá ká ālɔ̄ bá ɛbɔ́ ā kóō yɔ̄ kwu odúúdú aá. Aamí.