Read idoma ĀCƐ URÓM 3 Bible Online

ĀCƐ URÓM 3 - idoma bible

ĀCƐ URÓM 3

¹Ɔwɛ nyá nɛ̄ ācɛ Ujíyu bī le fíyɛ́ aílɔ́wá mɛ́ɛ̄ ā? Amáŋ ɔdā olɔhi nyá nɛ̄ apī nɛ̄ ācɛ Ujíyu hɛ́ ā yá lɛ uwá ā?

²Ó yá ɔdā olɔhi alɛwa abɔ̄ dóódu. Ohígbū ka aflɛ́yí, Ɔwɔicō kwú olɛhɔ̄ ā ú le ācɛ Ujíyu kéē le ɔ́ tū.

³Amáŋ ɔ́dāŋ ka ācɛ ōhī kú uwā í kē cɛ̄ɛ̄lā ŋ́ bɛ́ɛ? Ɔ́ɔmā le ka Ɔwɔicō í tōō lɔtūce ŋ́ kɛ̄ɛ?

⁴Ó lɛ ɔwɛ ŋ́! Aá kē jé ka Ɔwɔicō ī ka ɔkwɛ̄yi eko dóódu, nááná nɛ̄ ɔ̄cɛ dóódu ī kɛ̄mgbɛ̄ ā. É tá ɔ̄ ipú ɛlɔ̄ɔwɔicō kahíníī, “Ká ācɛ kéē mafú ka ákú uwɔ ā le kpaakpa á eko nāa ī kɛlā. A kē ī yá káā lɛ ɛpɔ̄hi lé eko nēe ī kɛpɔ̄ tū uwɔ.”

⁵Amáŋ ɔ́dāŋ ka ɔdōbɔ̄bí nɛ̄ alɔ gē yá ā, gē mafú péee ka Ɔwɔicō yɔ̄ ī yá ɔdā okpaakpa ā, Alɔ lɔfú ka Ɔwɔicō yá ɔdōbɔ̄bí eko nōó le alɔ yá italā nɛɛ? (Ɛ̄nyā wɛ ɔ̄kā kú ɔ̄cɛ ɔlamu nɛɛ n.)

⁶Áafú nyā í lɛyí ŋ́! Ohígbū ka ɔ́dāŋ ka Ɔwɔicō í gē kɛpɔ̄ ɔkwɛ̄yi ŋ́, ó lɛ ā ɔwɛ nyá nōó géē kɛpɔ̄ tū ācɛ kú ɛcɛ ā glá ā.

⁷Amáŋ ɔ̄cɛ í jé ŋ́ n gē yá ɔdōbɔ̄bí. Aá gbɛlá ka ɛ̄nyā í yá kú ācɛ kéē lɛ ojīlīmā ce Ɔwɔicō fíyɛ́ ŋ́ nɛɛ? Ohígbū ka ācɛ géē má ɔ̄ péee ka Ɔwɔicō gē yá ɔdōlɔhi.

⁸Abɔ̄ ó le lɛ ā, ācɛ ōhī gē táafú ka, aá kóō yá ɔdōbɔ́bí kóō lɛbɛ̄ɛka ɔwɛ o lɛ ojīlīmā ce Ɔwɔicō ā. Ācɛ ōhī le ɛcá cá um ɔkwɛ̄yi, é le ije cē bá um ka ami ɔ́ɔ bī ɛlā nyā tɔ́ɔna piíí á! Ɔwɔicō kóō lɛ uwá ŋmɛ́pɔ̄bí, ɛdɔ nōo cíkā lɛ uwá āa.

⁹Ɔdí mɛ́ɛ̄ ā? Alɔ nēe wɛ ācɛ Ujíyu bá lɔhi fíyɛ́ ācɛ ɔhá nɛɛ? Ó lɛ ā fúlufúlu ŋ́. Ohígbū ka n tɛtɛ lɛ ɛlā kpóce ācɛ Ujíyu mɛ́mla aílɔ́wá ka ínoōbīya kwu odúúdú uwa ɔtū.

¹⁰Ɛ́gɛ́nɛ̄ é tá ɔ̄ lɛ ā, “Ɔ̄cɛ dúúmā í le kpaakpa tū Ɔwɔicō ŋ́, ó kōō wɛ ɔ̄cɛ ékpónú ŋ́.

¹¹Ɔ̄cɛ dúúmā í jɛ́yí ɔdā nōo le kpakpa ŋ́, ɔ̄cɛ dúúmā í dɔɔ̄kā ō yɔ̄ mla Ɔwɔicō ŋ́.

¹²Odúúdú ācɛ kwú igbīhi í cē kwu Ɔwɔicō, é le nyíleyī.

¹³Ɛlā nōo ŋmá okónu kú uwā ī ŋmó ɔ̄cɛ. É gē kɛlā obɔ̄bí ŋmá okónu.”

¹⁴Ɛcá mɛ́mla ɛlā ō kwu odo nyaá gē ŋmá okónu kú uwā á.”

¹⁵É gē nwúleyīkwū kéē nyɔ̄ í ŋmó ɔ̄cɛ.

¹⁶Ɛga dúú nēé nyɔ̄ ā, é gē habɔ̄ ífi mɛ́mla ɔdā ō cataajɛ tá abɔ́ɔ.

¹⁷É jé ɔwɛ nɛ̄ ɔ̄cɛ gē lā ɛbɔ́ ā ŋ́.

¹⁸“É kōō jé ɛ́gɛ́nɛ̄ ɔ̄cɛ gē lɛ ojīlīmā ce Ɔwɔicō ŋ́.”

¹⁹Abālɔbányā alɔ jé ka é tá ɛjɛ̄ɛ̄jī ɔdā dóódu nēe yɔ̄ ipú íne ā tāajɛ lɛ ācɛ nēe ī lɛyítáajɛ lɛ íne ā, o yá ɛ́ɛ́ kú ācɛ kéē má ɔdā ō lɛ abɔ̄ bá ɔ̄ ŋ́ cɛ́ɛ́ kú Ɔwɔicō kóō lɛ ɛpɔ̄ ka tū ācɛ kú ipú ɛcɛ.

²⁰Ohígbū keé gáā hɛ́pɔ̄hi lɛ ɔ̄cɛ dúúmā iyɔ̄bū Ɔwɔicō, o ŋmá lɛ ō yá ɔdā nɛ̄ íne ā dɔɔ̄kā ā ŋ́, amáŋ íne ā gē yá ká ācɛ kéē jé ka aá le íne bīya.

²¹Amáŋ abālɔbányā Ɔwɔicō le ɔwɛ nōó í mīyɛ alɔ wā ɛgiyí nū ā mafú ɛɛ́. Íne ā í lɛ ɔdā dúú ō yá mla ɔwɛ ā ŋ́, nááná nɛ̄ ɔdā nēé tá ipú íne ā mɛ́mla ɔdā nɛ̄ ācomɛ́ɛbɛ ka ā wɛ ijáalí kú nū ā.

²²Ɔwɔicō mīyɛ ācɛ wā ɛgiyí nū ohígbū keé cɛ̄ɛ̄lā Ujísɔ̄si Ohɔ́nyɛtá. Ɔwɔicō yá ɛ̄nyā lɛ odúúdú ācɛ nēe cɛ̄ɛ̄lā kú Ohɔ́nyɛtá ā, ohígbū ka ɛyɛ́ɛ́yí í yɔ̄ ɔtāhɛ̄ kú ācɛ Ujíyu mɛ́mla aílɔ́wá ŋ́.

²³Ohígbū ka odúúdú ācɛ le íne bīya, anɔ́ɔ é le ligbó lɛ Ɔwɔicō nōo ī nya ɔ̄cɛ tá ā á.

²⁴Oŋmá lɛ eyīnyinyi kú Ɔwɔicō ā, ó le ɛpɔ̄hi hɛ́ lɛ alɔ. Ó yá ɛ̄nyā ohígbū Ujísɔ̄si nōo hɛ́ alɔ tá ŋmá ɛpɔ̄bí kú íne nɛ̄ alɔ bīya ā.

²⁵Ɔwɔicō kwú Ɔyínɔ̄nyīlɔ kú nū kwɛcɛ kéē kwú ɔ̄ ú gwɛ́ɛya, cɛ́ɛ́ o ŋmá lɛ ikwū kú nū ā, ó kwú pīya ɔwɛ nōó í je íne nɛ̄ ācɛ bīya ā yá uwā ɛhi, oŋmá lɛ ɛlā kú nū nēé cɛ̄ ā. Ɔwɔicō yá ɛ̄nyā kóō mafú ka anúɔ le kpaakpa. Eko nɛ̄ncɛ̄ ā, Ɔwɔicō lɔtū lé, anɔ́ɔ ó leyī gwō íne nɛ̄ ācɛ bīya ā bónū á.

²⁶Amáŋ eko kú abālɔbányā, Ɔwɔicō í leyī gwō íne nɛ̄ ācɛ bīya ā bónū gɛ ŋ́, cɛ́ɛ́ kóō mafú ka anúɔ ī yá ɔdā okpaakpa. Ó gē mīyɛ ɛjɛ̄ɛ̄jī ācɛ nēe cɛ̄ɛ̄lā Ujísɔ̄si ā wā ɛgiyí nū.

²⁷Ɔdí nɛ̄ alɔ ī gwō ohígbū nū mɛ́ɛ̄ ā? Ó wɛ ɔdā dúú ŋ́! Ɔdíyá nɛ̄ alɔ í cíkā ō gwō ŋ́ mā a? Ó wɛ ohígbū ka alɔ gē lɛ íne ā tū nɛɛ? Ehéee, amáŋ ohígbū ka alɔ cɛ̄ɛ̄lā ā.

²⁸Ohígbū ɔ́ɔmā Ɔwɔicō ī mīyɛ ɔ̄cɛ wā ɛgiyí nū ohígbū kóō cɛ̄ɛ̄lā nū nɛ̄ n, ó wɛ ohígbū kóō yá ɔdā nɛ̄ íne dɔɔ̄kā ā ŋ́.

²⁹Kɛ̄ɛ ka Ɔwɔicō wɛ Ɔwɔicō kú ācɛ Ujíyu ōfōōfū uwā? Ó wɛ Ɔwɔicō kú aílɔ́wá dúú ŋ́ nɛɛ? Īī gbóó, ó wɛ Ɔwɔicō kú aílɔ́wá dúú nɛ.

³⁰ Ɔwɔicō ékpónú yɔ̄ lɛ ācɛ Ujíyu mɛ́mla aílɔ́wá á. Anɔ́ɔ ó géē mīyɛ ācɛ wā ɛgiyí nū ohígbū kéē cɛ̄ɛ̄lā Ujísɔ̄si Ohɔ́nyɛtá.

³¹Ālɔ̄ leyī gwō íne ā bónū ohígbū ka alɔ cɛ̄ɛ̄lā Ujísɔ̄si Ohɔ́nyɛtá ā mɛ́ɛnɛɛ? Ó lɛ ɔwɛ ŋ́! Ikɔkɔ ɔ́ɔmā alɔ í tū íne ā háyi.