Read idoma ĀCƐ URÓM 4 Bible Online

ĀCƐ URÓM 4 - idoma bible

ĀCƐ URÓM 4

¹Ɔdí nɛ̄ alɔ í ka lɛyíkwu Ébrahām ádáádā odúúdú alɔ mɛ́ɛ̄ ā?

²Ɔ́dāŋ́ ka Ɔwɔicō mīyɛ Ébrahām wā ɛgiyí nū ohígbū úklɔ́ nōó yá ā nɛɛ, Ébrahām géē yɛ í lɛ ɔdā ō bī lɛ gwō, amáŋ ó lɛ ɔdā ō bī gwō iyɔ̄bū Ɔwɔicō ŋ́.

³Ohígbū kéē tá ipú ɛlɔ̄ɔwɔicō kahíníī, “Ébrahām kē cɛ̄ɛ̄lā Ɔwɔicō, é kē lɛ ɔ́ katú ipú ācɛ nɛ̄ Ɔwɔicō hɛ́pɔ̄hi lɛ uwá ā”.

⁴É gē gbā ulé lɛ ācɛ nēe le úklɔ́ yá kwɛyí, é je ulé ā bɛ̄ɛka ɔdā ɛhi ā ŋ́, amáŋ ó wɛ ɔdā nēé yúklɔ́ nū.

⁵Ɔwɔicō ī mīyɛ ācɛ wā ɛgiyí nū ohígbū keé cɛ̄ɛ̄lā nū, ó wɛ ohígbū úklɔ́ nēé yá ā ŋ́.

⁶Ɛ̄nyā nɛ̄ Udéfīdi gbɛlá eko nōó ka ka ɔ̄cɛ nɛ̄ Ɔwɔicō mīya wā ɛgiyí nū nōó wɛ ohígbū úklɔ́ nɛ̄ ɔ̄cɛ ɔ́ɔmā yá ā ŋ́ mā gwéeyē á.

⁷“Ācɛ nēé kwú ɔdōbɔ̄bí nēé yá í yá uwā ɛhi gwéeyē, ācɛ nēé kwú íne nēé bīya ā í yá uwā ɛhi ā gwéeyē.

⁸Ɔ̄cɛ nɛ̄ Óndú ā í tá íne nōó bīya ā tāajɛ ŋ́ mā gwéeyē.”

⁹Ó wɛ ācɛ nēé le uwá apī hɛ́ ā ōfōōfū uwā ī gwéeyē ɛdɔ nɛ̄ Udéfīdi kɛlā lɛyíkwu ɔ́ ā ŋ́. Ācɛ nēé ī hápī ŋ́ mā ī gwéeyē dúú. Alɔ le ka ŋmá ipú ɛlɔ̄ɔwɔicō kahíníī, “Ébrahām cɛ̄ɛ̄lā Ɔwɔicō, anɔ́ɔ ohígbū ɔtū nɛ̄ ó kpóce Ɔwɔicō ā, ó mīyɛ anú wā ɛgiyí nū.”

¹⁰Ɔwɔicō mīyɛ Ébrahām wā ɛgiyí nū eko nōó hɛ́ apī ɛ́ɛ́ ŋ́ mā.

¹¹Ó le apī hɛ́ igbīhāajɛ, kóō mafú ka Ɔwɔicō mīyɛ anú wā ɛgiyí nū ohígbū kóō cɛ̄ɛ̄lā nū gbɔbū ɛ́ɛ́ kóō kōō hápī. Anɔ́ɔ Ébrahām le lɛbɛ̄ɛka ádáádā kú odúúdú ācɛ nēe cɛ̄ɛ̄lā Ɔwɔicō nōó kē mīyɛ uwá wā ɛgiyí nū nááná nēé hápī ŋ́ mā ā.

¹²Ó kē lɛbɛ̄ɛka aádáádā kú ācɛ nēe le apī hɛ́, amáŋ ɔ́dāŋ nēé cɛ̄ɛ̄lā ɔwɛ ékpónú nɛ̄ Ébrahām cɛ̄ gbɔbū ɛ́ɛ́ nēé hɛ́ ɔ̄ apī ā.

¹³Eko nɛ̄ Ɔwɔicō cokónu lɛ Ébrahām mɛ́mla ayááyí nū ka anúɔ géē je odúúdú ɛcɛ lɛ uwá ā, ó ŋmá lɛ íne kú Ɔwɔicō nēé le tū ā ŋ́, amáŋ ohígbū kóō cɛ̄ɛ̄lā Ɔwɔicō, anɔ́ɔ ó mīyɛ ɔ́ wā ɛgiyí nū á.

¹⁴Ohígbū ka ɔ́dāŋ ka okónu nɛ̄ Ɔwɔicō ce ā wɛ ákú ācɛ nēe ī lɛ íne ā tū ā nɛɛ, ó lɛ ā ɛlā Ɔwɔicō nɛ̄ alɔ cɛ̄ ā í wɛ ɔdā dúúmā ŋ́, cɛ́ɛ́ okónu nɛ̄ Ɔwɔicō ce ā kē wɛ áncā.

¹⁵Ohígbū ka íne ā ī cɛ̄ lɛ Ɔwɔicō cɔ̄nū, amáŋ ɛga nɛ̄ íne í yɔ̄ ŋ́, ācɛ í kē gáā bīyíne ŋ́.

¹⁶Ɔ́ɔmā yá ɛ́ɛ́ nɛ̄ okónu nɛ̄ Ɔwɔicō ce lɛ Ébrahām ā ŋmá lɛ ɛlā Ɔwɔicō nōó cɛ̄ ā n. É géē jé okónu nɛ̄ Ɔwɔicō ce ā ŋmá lɛ ɛhi alahá nōó je lɛ odúúdú ayááyí kú Ébrahām ā. Ó wɛ ācɛ nēe lɛyítáajɛ lɛ íne ā ōfōōfū uwā ŋ́, amáŋ ó je lɛ ācɛ nēe cɛ̄ ɛ́gɛ́nɛ̄ Ébrahām cɛ̄ ā.

¹⁷Ɛ́gɛ́nɛ̄ é tá ɔ̄ ipú ɔkpá kú ɛlɔ̄ɔwɔicō kahíníī, “N le yá ká ā kwú pīya ádā kú aéwo alɛwa.” Ókónu nēé ce ā lɔhi ohígbū ka Ɔwɔicō nɛ̄ Ébrahām cɛ̄ɛ̄lā nū ā, wɛ Ɔwɔicō nōo gē kpó ācɛ nēe pɛ́ kwú ā héyī ŋmá ɔlékwū, nōo klla ī je ɔ́da ká ɔdā nōó yɔ̄ jééjéē ɛ́ɛ́ ŋ mā kéē le yɔ̄ ā.

¹⁸Eko nɛ̄ Ɔwɔicō le okónu ce le Ébrahām ka ɔ́ɔ géē je pīya ádā kú éwo alɛwa ā, Ébrahām cɛ̄ɛ̄lā nū yɔ̄ ī kpɔ́tūce nááná nōó lɛ ɔdā nōó í kpɔ́tūce ɔ́ ŋ́ mā. Ɔwɔicō klla da ɔ́ kahíníī, “Ayááyí kú uwɔ géē lɛwa bɛ̄ɛka aínyílɔ́wɔ ā.”

¹⁹Ébrahām yɔ̄ gē kpɔ́tūce Ɔwɔicō lɔfú lɔfú kpɔ́ nááná nōó lɛbɛ̄ɛka iháyí ofɛ̄hɔ̄, nōó kōō le jé ka ɔkpíyē kú anúɔ í je ɔnyā ipú glá gɛ ŋ́ mā, nɛ̄ Usára í kē gáā ma ɔyí glá gɛ ŋ́ mā.

²⁰Ébrahām yɔ̄ gē kpɔ́tūce kpɔ́, ɔtū kú nū í kē bɛ́ɛpa lɛyíkwu okónu nɛ̄ Ɔwɔicō ce lɛ ɔ́ ā ŋ́, amáŋ ɔtū nōó le ce Ɔwɔicō ā lɔfú tū ɔ̄ iyē, anɔ́ɔ ó le mafú ka Ɔwɔicō wɛ idáagó á.

²¹Ó kē jé kpɔ́cíí ka Ɔwɔicō ɔ́ɔ géē yá ɔdā nōó cokónu nū ā glá.

²²Ɔ́ɔmā yá ɛ́ɛ́ nɛ̄ ohígbū ɔtū nɛ̄ Ébrahām kpóce Ɔwɔicō ā nōó bī le hɛ́pɔ̄hi lɛ ɔ́ á.

²³Amáŋ ɛlā nēé ka kahíníī, “É lɛ ɛpɔ̄hi hɛ́ lɛ ɔ́ ā,” é tá ɔ̄ ohígbū anú ōfūnū ŋ́.

²⁴Amáŋ é tá ɔ̄ ohígbū alɔ nɛ̄ Ɔwɔicō géē hɛ́pɔ̄hi lɛ alɔ dúú, ɔ́dāŋ ka alɔ cɛ̄ɛ̄lā anú nōo je Ujísɔ̄si Óndú alɔ héyī ŋmá ɔlékwū ā.

²⁵É kwú ɔ̄ ú tá ācɛ abɔ̄ kéē lɛ ɔ́ ŋmó ohígbū íne nɛ̄ alɔ bīya ā, anɔ́ɔ Ɔwɔicō kē kwú ɔ̄ ú héyī ŋmá ɔlékwū, o yá ɛ́ɛ́ kóō lɛ ɛpɔ̄hi hɛ́ lɛ alɔ.