Read idoma ĀCƐ URÓM 8 Bible Online

ĀCƐ URÓM 8 - idoma bible

ĀCƐ URÓM 8

¹É gáā ŋmá ācɛ nēe pīyatɔ̄há mla Ohɔ́nyɛtá Ujísɔ̄si abālɔbányā ɛpɔ̄bí dúúmā gɛ ŋ́.

²Ohígbū ka Alelékwū ā le um hɛ́tá, o ŋmá lɛ opīyatɔ̄há mla Ohɔ́nyɛtá Ujísɔ̄si ā, ŋmá íkwu kú ínoōbīya mɛ́mla ikwū ɛɛ́.

³Ɔwɔicō lɛ ɔdā nēe íne ā í yá glá ŋ́ ohígbū ka ɔkpíyē i gbagbafú ā yá. Ó lɛ ɛpɔ̄bí ŋmó ínoōbīya nōo ī yúklɔ́ ipú ɔtū kú ɔlɛɛcɛ ā, o ŋmá le o tū ɔyí abɔ̄yīnū, nōo wɛ ɛ́gbla kú ɔlɛɛcɛ nōo ī bīyíne ā wā ipú ɛcɛ, cɛ́ɛ́ kóō lɛ íne nɛ̄ alɛɛcɛ bīya ā kpó nyɔ̄.

⁴Ɔwɔicō yá ɛ̄nyā cɛ́ɛ́ kéē lɛ ɔdā nōo i kpaakpa, nɛ̄ íne ā dɔɔ̄kā ā, yá jīla ipú alɔ nēe ī yá ɔdā nɛ̄ Alelékwū ā ī dɔɔ̄kā ā, amáŋ alɔ í yɛce ɔkpíyē kú ɔlɛɛcɛ ōbīyíne ā gɛ ŋ́.

⁵Ācɛ nēe ī yɛce ɔdā nɛ̄ ɔkpíyē kú uwā da uwá ā, gē yá ɔdā nɛ̄ ɔkpíyē kú uwā dɔɔ̄kā ā, amáŋ ācɛ nēe ī yɛce ɔdā nɛ̄ Alelékwū Ihɔ da uwá ā, gē lɛ ɔtū kú uwā kwu ɔdā nɛ̄ Alelékwū dɔɔ̄kā ā.

⁶Ɔ́dāŋ́ ka ɔ̄cɛ ī gbɛlá ɔdā nɛ̄ ɔkpíyē kú nū ī dɔɔ̄kā ōfōōfūnū, ó géē kwú, amáŋ ɔ́dāŋ ka ɔ̄cɛ ī gbɛlá ɔdā nɛ̄ Alelékwū kú Ɔwɔicō ī dɔɔ̄kā ā, ó géē yēeyī klla í lɛ ɛbɔ́.

⁷Ācɛ nēe ī yá ɔdā nɛ̄ ɔkpíyē kú uwā dɔɔ̄kā ā kwú pīya aólɛlā kú Ɔwɔicō, ohígbū kéē lɛyítáajɛ lɛ íne kú Ɔwɔicō glá ŋ́, ɔkwɔ̄ɔ̄kwɛ̄yi é lɛyítáajɛ lɛ ɔ́ glá ŋ́.

⁸Ācɛ nēe gē yá ɔdā nɛ̄ ɔkpíyē kú uwā dɔɔ̄kā ā í gáā yá ɔdā dúú nōo he Ɔwɔicō ɔtū glá ŋ́.

⁹Ɔ́dāŋ́ ka Alelékwū kú Ɔwɔicō lā ipú aá ɔkwɔ̄ɔ̄kwɛ̄yi, aá gáā yá ɔdā nɛ̄ ɔkpíyē kú ɔlɛɛcɛ ī dɔɔ̄kā ā ŋ́. Amáŋ aá híī yɔ̄ gē yá ɔdā nɛ̄ ɔkpíyē kú aá dɔɔ̄kā ā ŋ́, ikɔkɔ ɔ́ɔmā aá yá ɔdā nɛ̄ Alelékwū kú Ɔwɔicō da aá ā. Ɔ̄cɛ dúúmā nōo lɛ Alelékwū kú Ohɔ́nyɛtá ŋ́, í wɛ ákú nū ŋ́.

¹⁰Amáŋ ɔ́dāŋ́ ka Ohɔ́nyɛtá yɔ̄ ipú aá, nááná nɛ̄ ɔkpíyē ká aá géē kwú ohígbū ínoōbīya ā, alelékwū ká aá yēeyī ohígbū kéē le aá kagwó mla Ɔwɔicō.

¹¹Ɔ́dāŋ́ ka Alelékwū kú Ɔwɔicō nōo je Ujísɔ̄si héyī ŋmá ɔlékwū ā lā ipú aá, anú nōo je Ohɔ́nyɛtá Ujísɔ̄si héyī ŋmá ɔlékwū ā, géē je oyēeyī lɛ ɔkpíyē kú aá nēe ī kwú ā dúú, ŋmá lɛ Alelékwū kú nū nōo lā ipú aá ā.

¹²Ó lɛ ā mɛ́ɛ̄ ā, aóklóbīya um, alɔ í lā ɛ́gɛ́nɛ̄ Alelékwū kú Ɔwɔicō da alɔ lɛ piíí ā, ó wɛ o lā kú ālɔ̄ yá ɔdā nɛ̄ ɔkpíyē kú alɔ dɔɔ̄kā ā ŋ́.

¹³Ohígbū ka ɔ́dāŋ ka aá yēeyī yɔ̄ ī yá ɔdā nɛ̄ ɔkpíyē kú aá dɔɔ̄kā ā, aá géē kwú, amáŋ ɔ́dāŋ́ ka o ŋmá lɛ ɔfú kú Alelékwū nɛ̄ aá mā ucē kú ínoōbīya tá, aá géē yēeyī.

¹⁴Ācɛ nēe yɛce Alelékwū kú Ɔwɔicō ā wɛ ayí Ɔwɔicō á.

¹⁵Ohígbū ka, Alelékwū nɛ̄ Ɔwɔicō je lɛ aá í lɛ aá yá ɔfiyɛ ká aá klla kwúcē ga ufi ō yá kpɔ́ gɛ ŋ́, ikɔkɔ ɔ́ɔmā, Alelékwū ā kwú aá ú pīya ayí Ɔwɔicō, anɔ́ɔ Alelékwū ā ī yá kú ālɔ̄ da Ɔwɔicō kahíníī, “Ádā! Ádā alɔ!”

¹⁶Alelékwū kú Ɔwɔicō ā abɔ̄yī nū mla alelékwū kú alɔ cɛ̄ ijáalí ka ālɔ̄ ā wɛ ayí Ɔwɔicō.

¹⁷Abɔ̄ alɔ wɛ ayí nū ā, ayíbɛ ó géē hɔ́hā nōó le tū gbēyī ācɛ ɔlɛ́ nū ā ce alɔ, alɔ mɛ́mla Ohɔ́nyɛtá géē mīyɛ ɔdā nɛ̄ Ɔwɔicō le tū gbēyī nū ā. Ɔ́dāŋ́ ka alɔ móōwē mla anú alɔ kē í lɛ ɛgahi mla ojīlīmā nɛ̄hi mla anú dúú.

¹⁸N jé cāā ka ōwē nɛ̄ alɔ ī má abālɔbányā í wɛ ɔdā dúú ŋ́ ɔ́dāŋ ka alɔ lɛ ɔ́ gbla ɛgahi mɛ́mla ojīlīmā nɛ̄hi nēé gáā je lɛ alɔ ā.

¹⁹Ɛjɛ̄ɛ̄jī ɔdā nɛ̄ Ɔwɔicō yá ā leyī kwɛcɛ gɛɛ gē gbēyī Ɔwɔicō ka o lɛ ayí nū mafú.

²⁰Ohígbū ka é kwú ɔdā nēé yá ā ú pīya ɔdā ɛflɛ́ɛfu, ɛ̄nyā í wɛ ɔdā nɛ̄ ó dɔɔ̄kā ŋ́, amáŋ Ɔwɔicō lɛ ɔ́ miya kóō le lɛ ā. Nááná ā Ɔwɔicō leyī ce,

²¹ká ɛ̄cī éyi Ɔwɔicō géē lɛ ɔdā nōó yá ā abɔ̄yī nū wútá ŋmá agbá, cɛ́ɛ́ kóō híī wa gɛ ŋ́, kéē lɛ uwá hɛ́tá ɔwɛ ohéyī fuú nɛ̄hi kú ayí Ɔwɔicō ā.

²²Alɔ jé ka odúúdú ɔdā nēé yá ā yɔ̄ gē tíifu ī jɔ́ɔnɔ, bɛ̄ɛka ɔnɔ kú ɔyí ō ma ā.

²³ Amáŋ ó wɛ ɔdā nēé yá ā ī tīifu ī jɔ́ɔnɔ ōfōōfūnū ā ŋ́, amáŋ alɔ nēe mīyɛ Alelékwū bɛ̄ɛka ɛhi kú aflɛ́yí nɛ̄ Ɔwɔicō je lɛ alɔ ā dúú, alɔ gē tíifu ipíípú, abɔ̄ alɔ gē gbēyī kóō kwú alɔ ú pīya ayí nū mɛ́mla ɛjɛ̄ɛ̄jī okpíyē kú alɔ dúú ā.

²⁴Ohígbū ka o ŋmá lɛ eyīyōce kú alɔ nēé nya alɔ tá á. Amáŋ ɔ́dāŋ ka alɔ lɛ ɔdā nɛ̄ alɔ leyī ce ɔ́ ā má, ɔ́ɔmā lé ka ɔdā ō leyī ce ɔ́ í yɔ̄ gɛ ŋ́. Ohígbū ka ɔ̄nyɛ gē leyī ce ɔdā nōó ī má ɛɛ́ mā?

²⁵Amáŋ ɔ́dāŋ ka alɔ ī leyī ce ɔdā nɛ̄ alɔ í má ɛ́ɛ́ ŋ́, alɔ gē lɔtū lé ī gbēyī nū.

²⁶Ɔwɛ ékpónú ɔ́ɔmā Alelékwū wā í tá alɔ nēe le gbagbafú ā abɔ̄. Ohígbū ka alɔ í jé ɛ́gɛ́nɛ̄ alɔ cíkā ō gbɔ̄ɔkɔ ā gɛ ŋ́, amáŋ Alelékwū abɔ̄yī nū ā í má okónu kɛlā ŋ́ gē tíifiifu gē gbɔ̄ɔkɔ ohígbū alɔ.

²⁷Anɔ́ɔ Ɔwɔicō, nōo ī má ipú ɔtū kú ācɛ ā, jé ɛlā nɛ̄ Alelékwū ā yɔ̄ ī ka ā, ohígbū ka Alelékwū ā gē gbɔ̄ɔkɔ lɛ Ɔwɔicō lɔfú lɔfú ohígbū ācɔ̄lóhɔ́nyɛtá ɔwɛ nōo he Ɔwɔicō ɔtū ā.

²⁸Alɔ jé ka ipú ɔdā dóódu Alelékwū kú Ɔwɔicō gē yúklɔ́ ohígbū olɔhi kú ācɛ nōó he uwá ɔtū ā, ācɛ nōó hīgwú o yá ɛ́ɛ́ kóō lɛ ɔdā nōo bī ɔtū ā yá ā.

²⁹Ācɛ nɛ̄ Ɔwɔicō tɛtɛ le fu táajɛ ā, ó lɛ uwá fukɔ̄ cɛ́ɛ́ kéē kwú pīya bɛ̄ɛka ɔyí nū ā. O yá ɛ́ɛ́ kú ɔyínɔ̄nyīlɔ kú nū nyā kóō kwú pīya ɔ́kplá kú ayínɛ́ nɔ̄nyā mɛ́mla ayínɛ́ nū nɔ̄nyīlɔ alɛwa.

³⁰Anɔ́ɔ ācɛ nōó tɛtɛ fu táajɛ mīya ɔdā tū lɛ uwá ā, nōó kē hīgwú dúú ā. Ācɛ nōo kē hīgwú ā, ó kē le uwá kagwó mla iyī nū, anɔ́ɔ ó kwú ɛgahi mɛ́mla ojīlīmā nɛ̄hi kú nū ú lɛ uwá á.

³¹Ɔdí nɛ̄ alɔ í ka lɛyíkwu aɔ́dā nēe bá ā mɛ́ɛ̄ ā? Ɔ́dāŋ́ ka Ɔwɔicō yɔ̄ lɛ alɔ, ɔ̄nyɛ yɔ̄ géē bɛ́yí kwu alɔ glá ā?

³²Ɔ̄cɛ nōó cē ɔyí nū nɔ̄nyīlɔ tá ŋ́, amáŋ nōo kwú ɔ̄ ú gwɛ́ɛya ohígbū odúúdú alɔ ā, ó lɛ ā Ɔwɔicō nōo je ɔyí nū lɛ alɔ ā, í gáā kpó ɔdā dóódu lɛ alɔ alahá dúú ŋ́ nɛɛ?

³³Ɔ̄nyɛ géē cīije dúúmā bá ācɛ nɛ̄ Ɔwɔicō le fu ā? Ɔwɔicō Abɔ̄yī nu lɛ ɛpɔ̄hi hɛ́ lɛ uwá.

³⁴Ɔ̄nyɛ géē ŋmó alɔ ɛpɔ̄bí glá ā? Ohɔ́nyɛtá Ujísɔ̄si, nōo kwú ohígbū alɔ, nēé je héyī ŋmá ɔlékwū, nōo yɔ̄ abɔ̄lɔ́ná kú Ɔwɔicō, yɔ̄ ī gbɔ̄ɔkɔ ohígbū alɔ ā, í kē gáā ŋmó alɔ ɛpɔ̄bí ŋ́.

³⁵Ɔdí géē hɛ́ alɔ ŋmá ihɔtū kú Ohɔ́nyɛtá glá ā? Ɛ́kɛma kɛ̄ɛ ka íwɔ́tū, kɛ̄ɛ ka oyáŋmó, kɛ̄ɛ ka ɔkpɛtā, kɛ̄ɛ ka ohɛ́ɛwa, kɛ̄ɛ ka ɔdā ō kwu ikwū ajaajɛ ámāŋ ka ikwū kɛ̄ɛ?

³⁶Ɛ́gɛ́nɛ̄ é tá ɔ̄ ipú ɔkpá kú ɛlɔ̄ɔwɔicō lɛ ā, “Ohígbū uwɔ é gē ŋmó alɔ ɛ̄cī dóódu, é je alɔ bɛ̄ɛka aálá nēé gáā hɛ́ ɔkɔ ā.”

³⁷Ehée, ipú ɔdā dóódu nēe yá alɔ nēe bá ā kpɛ́mm ā, ɔ̄cɛ nōo yíihɔtū tá alɔ ā le yá kú ālɔ̄ le yálé.

³⁸Ohígbū ka n jé cāā ka ɔdā dúú í gáā hɛ́ alɔ ŋmá ihɔtū kú nū glá ŋ́. Alɔ kōō gekwú ámāŋ ka alɔ yēeyī, ámāŋ alelékwū-ōtɛ̄hɔ̄, ámāŋ aígbómína, ámāŋ aɔ́dā nēe lɛ ɔfú kú ɔkpáncō í hɛ́ alɔ ŋmá ihɔtū kú nū glá ŋ́. Ɔdā nēe bá ī yá abālɔbányā mɛ́mla ɔdā nōo í yá ɛ̄cɔ̄bū ā í gáā hɛ́ alɔ ŋ́má ihɔtū kú nū glá ŋ́.

³⁹Ó kōō wɛ ɛcɛ nōo yɔ̄ icō kú alɔ ámāŋ ɛcɛ nōo nɛ̄ yɔ̄ ɛháajɛ kú alɔ ā, ámāŋ ɔdā dúú nōo yɔ̄ ipú ɛjɛ̄ɛ̄jī ɔdā nēé yá ā, í lɔfú hɛ́ alɔ ŋmá ihɔtū kú Ɔwɔicō nōó mafú lɛ alɔ ŋmá ɛgiyí Ohɔ́nyɛtá Ujísɔ̄si, Óndú alɔ ā glá ŋ́.