Read idoma ĀCƐ URÓM 9 Bible Online

ĀCƐ URÓM 9 - idoma bible

ĀCƐ URÓM 9

¹Ɛlā nɛ̄ n ka ā wɛ ɔkwɛ̄yi, ń gē kɛ̄mgbɛ̄ ŋ́, ohígbū ka n wɛ ákú Ohɔ́nyɛtá. Ɔtū kú um nɛ̄ Alelékwū Ihɔ gē gbō ā, da um mla ɔtū ékpó lɔfú lɔfú ka ń yɔ̄ ī kɛ̄mgbɛ̄ ŋ́,

²eko nɛ̄ n ka ɔtūnōbí nɛ̄hi mɛ́mla ɔnɔ kú ɔtū nɛ̄ n lɛ ohígbū ācɛ ɔlɛ́ um ā nwuné nɛ̄hi.

³O yá ɛ́ɛ́ ká n̄ tá ācɛ ɔlɛ́ um, ācɛ Ujíyu abɔ̄ ā, eyī yá um ká Ɔwɔicō abɔ̄yī nū kóō lɛ okónu tá gā um cɛ́ɛ́ ká n̄ híī wɛ ákú Ohɔ́nyɛtá gɛ ŋ́.

⁴É wɛ ācɛ kú ɔlɛ́ Ɔwɔicō nɛ. Ó kwú uwā í pīya ayí nū, anɔ́ɔ ó lɛ ɛgahi mɛ́mla ojīlīmā nɛ̄hi kú nū mafú lɛ uwá. Ó le oji cē uwā, anɔ́ɔ ó kwú íne ú lɛ uwá á. É gē gbā ɔ̄ ɛ̄gbā ɔwɛ okpaakpa, ó kē cokónu ɛyɛ́ɛyɛ́yí lɛ uwá.

⁵É ŋmá ipɔ́ɔma kú aádáádā nɛ̄hi ā. Ohɔ́nyɛtá ipú ɔkpíyē kú ɔlɛɛcɛ ŋmá ipɔ́ɔma kú uwā. Odúúdú ācɛ kéē cɛ̄tra Ɔwɔicō nōo ī leyīkwu ɛjɛ̄ɛ̄jī ɔdā dóódu ā. Aamí.

⁶Amáŋ ń yɔ̄ ī ka ka okónu nɛ̄ Ɔwɔicō ce ā kóō yá ɛ́ɛ́ ŋ́ nɛ̄ ŋ́. Ohígbū kóō wɛ odúúdú ācɛ nɛ̄ Ísrɛ̄lu ma ā ōfōōfūwā wɛ ācɛ nɛ̄ Ɔwɔicō fu ā ŋ́,

⁷ɛ́ɛ́ nōó wɛ ācɛ dóódu nēe wɛ ayááyí kú Ébrahām ā kē wɛ ayí Ɔwɔicō ā ŋ́. Ohígbū ka Ɔwɔicō kahíníī, “Ó ŋmá iyē kú Áyísīki nāa géē lɛ ayááyí nɛ̄ n cokónu ō je gā awɔ á”.

⁸Ɔ́ɔmā lé kóō wɛ odúúdú ayí nɛ̄ Ébrahām tíyē ma ā wɛ ayí Ɔwɔicō ā ŋ́, amáŋ ayí nɛ̄ Ɔwɔicō cokónu lɛ Ébrahām ā wɛ ayí nū á.

⁹Ɛlā nɛ̄ Ɔwɔicō ka lɛ Ébrahām eko nɛ̄ ó cokónu lɛ ɔ́ ā yɔ̄ á, “Ɛpléeko nyā iháyí ɔhá n géē kwúcē wā, Usára kē í ma ɔyínɔ̄nyīlɔ.”

¹⁰Ɔyínɔ̄nyīlɔ nyā wɛ ádáádā alɔ Áyísīki. Eko nōó le jɛ̄ kwɛyí ā, ó le Urebɛ́ka lɛ, anú ma áplɛ́ lɛ ɔ́ á.

¹¹Amáŋ gbɔbū kéē ma uwá, ɛ́ɛ́ kéē jé ɔdā olɔhi ŋmá obɔ̄bí ā, Ɔwɔicō kɛlā lɛ Urebɛ́ka kahíníī, “Ɔyí uwɔ ɔ̄nyākwɔ́cɛ ā í cɛ̄ ɔyí uwɔ nɛ̄ŋ́cɛ́ ā ɛhɔ̄.” Ɛ̄nyā mafú ka ɔ̄cɛ nɛ̄ Ɔwɔicō gē fu ā í ŋmá lɛ ɔdā nɛ̄ ɔ̄cɛ ā yá ā ŋ́, amáŋ ó ŋmá lɛ ɔdā nɛ̄ Ɔwɔicō tɛtɛ miya táajɛ ā nɛ̄ n.

¹³Ɛ́gɛ́nɛ̄ é tá ɔ̄ tāajɛ ipú ɛlɔ̄ɔwɔicō lɛ ā, “Ujékɔ̄pu he um ɔtū, amáŋ Ísɔ í he um ɔtū ŋ́.”

¹⁴Ó lɛ ā ālɔ̄ ka ka Ɔwɔicō í gē yá ɔdā olɔhi ŋ́ kɛ̄ɛ? Ó lɔwɛ ŋ́!

¹⁵Ohígbū ka ó da Umósīsi kahíníī, “N géē ményinyi ɔ̄cɛ nōo he um ɔtū. N kē í yíhɔtū tú ɔ̄cɛ nōo he um ɔtū.”

¹⁶Ɔ́dāŋ́ ka Ɔwɔicō fu ɔ̄cɛ oo, ó fu ɔ̄cɛ nóo, ó gbolóce ɔdā nɛ̄ ɔ̄cɛ ɔ́ɔmā dɔɔ̄kā ā ŋ́ ámāŋ ka ɔdā nōó yá ā ŋ́, amáŋ ohígbū ka Ɔwɔicō ī dɔɔ̄kā ō ményinyi nū nɛ̄ n.

¹⁷Ohígbū ka Ɔwɔicō da Uféro ɔcɛ́ kú Íjīpiti ipú ɔkpá ɛlā kú nū kahíníī, “Ɛ̄nyā wɛ ɔdā nɛ̄ um bī ɔtū ɛ́ɛ́ nɛ̄ n je uwɔ lé ɔcɛ́ á, ohígbū ká n̄ bī uwɔ le ma ɔfú kú um fú, cɛ́ɛ́ kú ofu kú iyē kú um kóō le nyīla ga odúúdú ɛcɛ.”

¹⁸Ohígbū ɔ́ɔmā mɛ́ɛ̄ ā Ɔwɔicō ī ményinyi ɔ̄cɛ dúúmā nɛ̄ ó dɔɔ̄kā, ó kē i je ɔtū olɔfú lɛ ɔ̄cɛ dúúmā nōó dɔɔ̄kā ā.

¹⁹Ɔ̄cɛ éyi kú aá géē da um ɔ̄kā kahíníī, “Ɔ́dāŋ́ ka ó lɛ ā, ɔdíyá nɛ̄ ó klla ī ŋmó ɔ̄cɛ ɛpɔ̄bí kpɔ́ ɛ́ɛ́ mā? Ɔ̄nyɛ í tá ɔdā nɛ̄ Ɔwɔicō dɔɔ̄kā ā?”

²⁰Amáŋ ɔ̄nyɛ nɛ̄ a gbɛlá ka anúɔ wɛ ā, ɔlɛɛcɛ icííci, nɛ̄ ā ī tá Ɔwɔicō áafú glá ā? Ɛtɛ́ kú ɔmɛ lɛ íkwu ō da ɔ̄cɛ nōo ī ma ɔ́ ā kahíníī, “Ɔdíyá nāa ma um lɛ āā?” glá ā.

²¹Alɔ kōō ī ka ā, omɛtɛ́ lɛ íkwu kóō bī ɔmɛ lɛ ma ɔdā dóódu nōo he ɔ́ ɔtū, anɔ́ɔ ó lɔfú bī ámú kú ɔmɛ ékpónú le ma ɛtɛ́ ɛpa, éyi o bī wɛ̄ɛcɛ eko ɔkwɛ̄yi, anɔ́ɔ ɔhá ā o bī wɛ̄ɛcɛ eko ɔlamu.

²²Ɔdā nɛ̄ Ɔwɔicō yá nyā wɛ ɔkwɛ̄yi. Ó dɔɔ̄kā ō ma ícɔ̄nū kú nū fú. Ó klla dɔɔ̄kā ō yá kú ācɛ kéē lɛ ɔfú kú nū jé. Amáŋ ó lɛ ɔtū lé nɛ̄hi mla ācɛ nōó gáā cɔ̄nū kɛpɔ̄ tū uwā ā, ācɛ nōó cíkā ō je kpó yíífi bónū ā.

²³Ó klla dɔɔ̄kā ō lɛ ɛgahi mɛ́mla ojīlīmā nɛ̄hi kú nū ā kɔ̄ mla alɔ nōó ményinyi alɔ ā. Alɔ nōó le tútū kóō kɔ̄ ɛgahi mla ojīlīmā kú nū mla alɔ ā.

²⁴Ohígbū ka alɔ ā nōó hīgwú á, ó hī ācɛ igwú ŋmá ipú ācɛ Ujíyu ōfōōfūnū ŋ́. Amáŋ ó hī ācɛ igwú ŋmá ipú aílɔ́wá dúú.

²⁵ Ɛ́gɛ́nɛ̄ ó ka ipú ɔkpá kú Uhosíya kahíníī, “Ācɛ nēé wɛ ācɛ ɔlɛ́ um ŋ́ mā ā, N géē hī ūwā ka ācɛ ɔlɛ́ um. Éwo nēé kē he um ɔtū ŋ́ mā ā, n géē hī ɔ̄ ka éwo o he um ɔtū.

²⁶Ɛga piíí nēé da uwá ka, ‘Aá wɛ ācɛ ɔlɛ́ um ŋ́ mā ā,’ abɔ́ɔ nēé géē hī uwā ka ayí Ɔwɔicō oyēeyī ā á.’”

²⁷Ayisáya ɔ̄comɛ́ɛbɛ kē ka tɛ́ɛcɛ kahíníī, “Ayí kú Ísrɛ̄lu kōō lɛwa bɛ̄ɛka īkpō ɔjɛ kú okónu ísu ā nááná, é géē nya ācɛ olígíí kú uwā tá,

²⁸ohígbū ka Óndú ā géē kɛpɔ̄ tū ācɛ kú ɛcɛ nyā fíya fíya.”

²⁹Ayisáya klla tɛtɛ le ka ɛgɔhá kahíníī, “Ɔ́dāŋ́ ka Óndú nōo lɔfú fíyɛ́ dúú í habɔ̄ ācɛ ōhī tá lɛ alɔ ŋ́ nɛɛ, alɔ í géē yɛ í le lɛbɛ̄ɛka igelī kú Usɔ́dɔm ā, alɔ kē í yɛ í le lɛbɛ̄ɛka igelī kú Ugomóra ā.”

³⁰Ɛ̄nyā wɛ ɔdā nɛ̄ alɔ gbɛlá á, ka aílɔ́wá nēé dɔɔ̄kā ō le kagwó mla Ɔwɔicō ŋ́ mā, Ɔwɔicō lɛ ɛpɔ̄hi hɛ́ lɛ uwá, ohígbū kéē cɛ̄ɛ̄lā nū.

³¹Ābɔ̄ ɔhá kú nū ā, ācɛ Ujíyu bá ī dɔɔ̄kā íne nōo géē ka uwá gwó mla Ɔwɔicō, amáŋ é pīyɛ̄ ɔ̄ ŋ.

³²Ɔdí ī yá ā? Ohígbū kéē kwú ɔtū kú uwā í kpó ce ɔdā nēe í yɔ̄ ī yá ā ikɔkɔ ō kpɔ́tūce Ɔwɔicō. É le ikpó gbo ɛcɔ̄ nɛ̄hi nōo tá ɔwɛ kú uwā ā.

³³Ɔwɔicō le uwá ahɔ̄ pi ipú ɔkpá kú ɛlɔ̄ɔwɔicō kahíníī, “Aá jāahɔ̄ lɔɔlɔhi, ń kwú ɛcɔ̄ ú tá Usáyɔn, nōo géē yá ká ācɛ kéē gwōnū. Ɔ̄cɛ dúú nōo kē lɔtūce ɔ́ ā, uwēyī í gáā kwú ɔ̄ ŋ́.”