Read idoma 1 ĀCƐ UKƆ́RĪNTI 10 Bible Online

1 ĀCƐ UKƆ́RĪNTI 10 - idoma bible

1 ĀCƐ UKƆ́RĪNTI 10

¹Aá híīī mlanyī ŋ́, ayínɛ́ um, ɔdā nōo yá aádáádā alɔ eko nēé tá Umósīsi ɔkwu ā. Ojuja gbō uwā ɛyí, anɔ́ɔ é le yɛ le hɛ́ ísu igwɛ̄bɛ́ ā igbó ga abɔ̄ ɔhá mɛɛ́lɛ á.

²É lɛ uwā yá ubatísim ɛ́gɛ́nɛ̄ ɔ̄cɛ ī kɛla ā, ipú opīyatɔ̄há mla Umósīsi ipú ojuja mɛ́mla ipú ísu.

³Odúúdú uwā lé ɔdōlé nōo wɛ ɛyɛ́ɛ́yí hī ɔdōlé ɔlamu tá.

⁴É kē gwá éŋkpɔ̄ ŋmá ápátɛ́cɔ̄ kú alelékwū nōo nyɔ̄ mla uwá ā. Ápátɛ́cɔ̄ ɔ́ɔmā kē wɛ Ohɔ́nyɛtá ā, Ujísɔ̄si abɔ̄yīnū.

⁵Nááná, nɛ̄ Ɔwɔicō lɛ aɔ́dā nɛ̄hi nēe bá ā kpó yá lɛ uwá ā, ɔtu í he ɔ́ lɛyíkwu ɛyínɛ̄hi kú uwā ŋ́. É le pɛ́ gekwú anɔ́ɔ okwū kú uwā le fíyákátā bá ɛga dóódu kú ipú ígbíli á.

⁶Abālɔbányā, odúúdú ɔdā nōo yɔ̄ nyā yá kóō wɛ ɔdā o bī cābɔ̄ lɛ alɔ, kóō pi alɔ ahɔ̄ ká alɔ yúnwū ɔdā obɔ̄bí ɛ́gɛ́nɛ̄ uwá yá ā ŋ́.

⁷Amáŋ ká alɔ pɛ̄cí ɛ́gɛ́nɛ̄ ācɛ ōhī kú uwā pā ā ŋ́. Ɛ́gɛ́nɛ̄ é tá ipu Ɔkpíihɔ ā kahíníī, “Ācɛ ā cīce ajɛ gbɔɔ́ ō lé ucɛ, anɔ́ɔ é nyaŋ́jɛ gbɔɔ́ ō jīije ɔdīcííci á.”

⁸Ālɔ̄ híīī lɛ́pɔ̄bí kú ikpɔnyā ɔhá ō ce ŋ́, ɛ́gɛ́nɛ̄ ācɛ ōhī kú uwā lɛpɔ̄bī nū nɛ̄ ipú ɛcí ékpónú Ɔwɔicō lɛ ācɛ úlā ofɛpa cigwáahāapa cofigwó kú uwá kpó ŋmó ā ŋ.

⁹Ālɔ̄ híīī jé Óndú ā má ŋ́, ɛ́gɛ́nɛ̄ ācɛ ōhī kú uwā yá nɛ̄ ɛgwā kpó uwā ŋmó ā ŋ́.

¹⁰Alɔ híīī ka iŋini ŋ́, ɛ́gɛ́nɛ̄ ācɛ ōhī kú uwā ka anɔ́ɔ alelékwū kú ikwū le uwá kpó ŋmó ā ŋ́.

¹¹Odúúdú aɔ́dā nēe bá nyá yá uwā, cɛ́ɛ́ kóō wɛ ɔdā ō bī lɛ kwu ita lɛ ācɛ ɔhá. É klla kē tá uwā táajɛ kéē wɛ ɔdā ōpi alɔ ahɔ̄. Ohígbū ka alɔ yɔ̄ eko nɛ̄ oŋmɛ́yí kú ɔdā dóódu má kwajaajɛ ɛɛ́.

¹²Ɔ̄cɛ dúúmā nōo gbɛlá ka anúɔ lɔtūce Ɔwɔicō lɔfú lɔfú kóō leyī kwɛcɛ cɛ́ɛ́ kóō híīī gwōnū ŋ́.

¹³Ɛdɔ kú ojámá dúú nēe yá aá ā wɛ ɛdɔ kú ojámá ɔlamu nōo gē wā ī yá ɛjɛ̄ɛ̄jī ācɛ ā. Amáŋ Ɔwɔicō gē lɛ okónu nōó ce ā tū. Ɔwɔicō í gáā já aá má fíyɛ́ ɔfú kú aá ŋ́. Ó géē lɛ ɔfú tū aá iyē kú aá lɔtūlé, ó klla géē ma ɔwɛ nɛ̄ aá géē yɛ bɛ̄cɛ ā fú lɛ aá.

¹⁴Ohígbū ɔ́ɔmā, ācohumɔtū, aá híīī pɛ̄cí ŋ́.

¹⁵N kɛlā lɛ aá bɛ̄ɛka ācɛ o lɛ ohílīpú ā. Aá leyī yɛ ɔdā nɛ̄ n ka abɔ́ɔ ā.

¹⁶Ikókwū nɛ̄ alɔ ī bī le lé ɔdōlé ihɔ, nɛ̄ alɔ ī tá Ɔwɔicō ahínyá ohígbū nū ā, eko nɛ̄ alɔ gē gwá ŋmá ipú nū, oyī kú Ujísɔ̄si nɛ̄ alɔ gē kɔ̄ gwá abɔ́ɔ á, ɛ́gɛ́nɛ̄ ɔ̄cɛ í kɛla ā. Anɔ́ɔ igbō nɛ̄ alɔ gē ce lɛ iyī alɔ ā, eko nɛ̄ alɔ gē lé, alɔ yɔ̄ í kɔ̄ ɔkpíyē kú Ohɔ́nyɛtá ā lé.

¹⁷Alɔ wɛ ācɛ alɛwa, amáŋ alɔ wɛ ɔkpíye ékpó, ohígbū ka alɔ gē kɔ̄ ámú igbō ékpónú eko nɛ̄ alɔ gē lé ɔdōlé ihɔ.

¹⁸Aá leyī yɛ ācɛ Ísrɛ̄lu, ācɛ nēe gē lé ɔdā nēé le gwɛ́ɛya ā, gē lɛ ukpɛ̄ kú úklɔ́ kú ɛyí ede ā.

¹⁹N yɔ̄ ī ka ka ojíbó kú aɛ́cí wɛ ɔwɔ ɔkwɔ̄ɔ̄kwɛ̄yi nɛɛ? Kɛ̄ɛ ka ɔdōlé nēé je lɛ ɛcí ā wɛ ɛya ōgwó kú ɔkwɔ̄ɔ̄kwɛ̄yi nɛɛ? Ehée!

²⁰Ɔdā nɛ̄ n yɔ̄ ī ka ā wɛ ka ɔdā nēé le gwɛ́ɛya ɛyí ede kú ācopɛ̄cí ā wɛ ákú ebilíi nɛ̄ n, ó wɛ ákú Ɔwɔicō ŋ́. Ń kē tíne kú aá báana ɔdā dúú mɛ́mla ebilíi ŋ́.

²¹Ó tɔ́ɔtɛ́ lɛ aá ká aá gwá ejé nēé le yá ɔdōlé ihɔ ā, cɛ́ɛ́ kú aá klla nyɔ̄ í gwá ejé ɛga nēé ī yɔ̄ í lé ɛbɛ́ ɛcí glá ŋ́.

²²Ɔ́dāŋ ka alɔ gē yá lɛ a, ɛ̄nyā ī yá kú Óndú ā kóō mímálānyī. Alɔ kē jé ka alɔ í lɔfú fíyɛ́ ɔ̄ ŋ́.

²³Aá ka kahíníī, “É jé ɛga lɛ alɔ ká alɔ yá ɔdā dóódu.” Ɔ́ɔmā wɛ ɔkwɛ̄yi, amáŋ ó wɛ ɛjɛ̄ɛ̄jī ɔdā dóódu ī tá ɔ̄cɛ abɔ̄ ā ŋ́. “É je ɛga lɛ alɔ ká alɔ yá ɛjɛ̄ɛ̄jī ɔdā dóódu.” Amáŋ ó wɛ ɛjɛ̄ɛ̄jī ɔdā dóódu ī tīile ā ŋ́.

²⁴Ɔ̄cɛ kú Ohɔ́nyɛtá ā dúú kóō yá ɔdā dúú nōo géē tīile lɛ anú ā ōfōōfūnū ŋ́, amáŋ ó gbɛlá ɔdā nōo í tīile lɛ ācɛ ɔhá dúú.

²⁵Aá lé ɛbɛ́ dóódu nēé ī je lá olihī ā. Aá híīī dɔɔ̄kā ɛga nōó ŋmá ā ŋ́, ohígbū nɛ̄ ɔtū kú aá géē gbɔɔ́ ō junwalu lɛ aá.

²⁶Ohígbū ka, ɛ́gɛ́nɛ̄ Ɔkpíihɔ ka lɛ ā, “Ɛcɛ ā mɛ́mla ɛjɛ̄ɛ̄jī ɔdā dóódu nōo bá ipú nū ā wɛ ákú Óndú ā nɛ̄.”

²⁷Ɔ́dāŋ ka ɔ̄cɛ nóō wɛ ɔ̄cɛ kú Ohɔ́nyɛtá ā ŋ́ lɛ uwɔ hīgwú wā ɔlɛ́ nū gaá lé ɔdōlé, anɔ́ɔ a lɛ ɔ́ ka ŋmó ipú ɔtū kú uwɔ ka anúɔ í nyɔ̄, lé ɔdā dúú nēé bī gé lɛ uwɔ ā. Á híīī dɔɔ̄kā ɛga nōó ŋmá ā ŋ́, ohígbū ɔtū ō junwalu gā awɔ.

²⁸Amáŋ ɔ́dāŋ, ka ɔ̄cɛ éyi le ka ga awɔ kahíníī, “Ɔdōlé nyā wɛ ɛ̄nɛ̄ é je lɛ ɛcí nɛ̄ n.” Ó le lɛ ā, a híīī lé ɔdōlé ɔ́ɔmā ŋ́, ohígbū ɔ̄cɛ nōo da awɔ ā mɛ́mla ohígbū ɔtū ō junwatu.

²⁹Ɔ́ɔmā lé koó wɛ ohígbū ɔtū kú uwɔ ŋ́, amáŋ ohígbū ɔtū kú ācɛ ɔhá. Ɔdíyá nɛ̄ ohígbū ɔ̄cɛ nɛ̄ ɔtū kú nū í lɔfú ŋ́ mā ī gwu ɔwɛ tū um ká n̄ híīī yá ɔdā nōo he um ɔtū ŋ́ mā ā?

³⁰Ɔ́dāŋ ka n lɛ ahínyá tá Ɔwɔicō kú ɔdōlé ā, ɔdíyá nɛ̄ ɔ̄cɛ éyi ī ŋmó um okónu lɛyíkwu ɔdōlé nɛ̄ n lɛ ahínyá tá Ɔwɔicō ohígbū nū ā?

³¹Ohígbū ɔ́ɔmā, ɔdā dúú nɛ̄ aá ī yá, ka aá lé ɔdōlé ámāŋ gwá ɔdā dóódu, aá yá ɔ̄ cɛ́ɛ́ kú ācɛ kéē cɛ̄tra Ɔwɔicō.

³²Aá híīī bī unwalu gé lɛ ācɛ Ujíyu, aílɔ́wá ámāŋ ka icɔ́ɔci kú Ɔwɔicō ŋ́.

³³Ɛ́gɛ́nɛ̄ n gē yá ā, ipú ɔdā dóódu nɛ̄ n gē yá ā, ń gē dɔɔ̄kā itene kú abɔ̄yī um ŋ́, amáŋ ohígbū itene kú ācɛ alɛwa, cɛ́ɛ́ kéē le nyatá.