Read idoma 1 ĀCƐ UKƆ́RĪNTI 11 Bible Online

1 ĀCƐ UKƆ́RĪNTI 11 - idoma bible

1 ĀCƐ UKƆ́RĪNTI 11

¹Aá gbla ucē kú um yá, ɛ́gɛ́nɛ̄ n gbla ucē kú Ohɔ́nyɛtá ā yá ā.

²N gē cɛ̄tra aá ohígbū ka aá gē blakwu um. Aá klla gē bī ɔdā nɛ̄ n nwū aá ā le yúklɔ́.

³Amáŋ n tíne ká aá le jé ka Ohɔ́nyɛtá ā wɛ otrɛ̄yí kú ācɛnyīlɔ dóódu á, ɔbá wɛ otrɛ̄yí kú ɔnyā nū, anɔ́ɔ Ɔwɔicō kē wɛ otrɛ̄yí kú Ohɔ́nyɛtá ā á.

⁴Ɔ̄cɛnyīlɔ dúúmā nōo ī gbɔ̄ɔkɔ ámāŋ yɔ̄ í cɛ̄ olɛhɔ̄ kú Ɔwɔicō tɛ́ɛcɛ ɛgogbɔ̄ɔkɔ nōo lɛ odée klá ɛyí gē je uwēyī lɛ Ohɔ́nyɛtá ā.

⁵Amáŋ ɔ̄cɛnyā gē je uwēyī lɛ ɔbá nū, ɔ́dāŋ koó ī gbɔ̄ɔkɔ ámāŋ koó yɔ̄ ī cɛ̄ olɛhɔ̄ kú Ɔwɔicō tɛ́ɛcɛ ɛgogbɔ̄ɔkɔ nōó lɛ odée klá ɛyí ŋ́. Ɔdā dúú í kē wɛ ɛyɛ́ɛ́yí ɔtāhɛ̄ kú nū mla ɔ̄cɛnyā nōo lɛ ɛyí kú nū plla ā ŋ́.

⁶Ɔ́dāŋ koó lɛ odée klá ɛyí ŋ́, ayíka ó lɛ ɛyí kú nū wā tāajɛ béekpóó. Abɔ̄ ó kē wɛ ɔdūwēyī lɛ ɔ̄cɛnyā kóō lɛ ɛyí kú nū plla tāajɛ ā, ayíka ó cíkā ō lɛ odée klá ɛyí kú nū.

⁷Ɔ̄cɛnyīlɔ í cíkā ō lɛ odée klá ɛyí ŋ́, ohígbū keé yá ɔ̄ gbla Ɔwɔicō, ó klla kē í ma ɛgahi kú Ɔwɔicō fú.

⁸Ohígbū kéē yá ɔ̄cɛnyīlɔ ŋmá ɔ̄cɛnyā ŋ́, amáŋ é yá ɔ̄cɛnyā ŋmá ɔ̄cɛnyīlɔ.

⁹É yá ɔ̄cɛnyīlɔ ohígbū ɔ̄cɛnyā ŋ́, amáŋ é yá ɔ̄cɛnyā ohígbū ɔ̄cɛnyīlɔ.

¹⁰Ohígbū ɛ̄nyā yā ɛ́ɛ́ nɛ̄ ɔ̄cɛnyā cíkā ō lɛ odée klá ɛyí kóō mafú koó yɔ̄ ɛháajɛ íkwu kú ɔbá nū á.

¹¹Abɔ̄ alɔ yɔ̄ ipú opīyatɔ̄há mla Óndú ā, ɔ̄cɛnyā í yɔ̄ ɛyɛ́ɛ́yí hɛ̄ ɔ̄cɛnyīlɔ tá ŋ́, ɛ́ɛ́ nɛ̄ ɔ̄cɛnyīlɔ kē ī yɔ̄ ɛyɛ́ɛ́yí hɛ̄ ɔ̄cɛnyā tá ŋ́ dúú.

¹²Ohígbū ka abɔ̄ é yá ɔ̄cɛnyā ŋmá ɔ̄cɛnyīlɔ ā, ɔwɛ ékpó ɔ́ɔmā, abālɔbányā ɔ̄cɛnyā gē ma ɔ̄cɛnyīlɔ mɛ́ɛ́ á.

¹³Aá leyī yɛ ɔ́ abɔ̄yī aá kú aá má ɔ̄ ɔ́dāŋ koó lɔhi kú ɔ̄cɛnyā ō gbā Ɔwɔicō ɛgba ipú ɛwa cíkā ō lɛ odée klá ɛyí kɛ̄ɛ kóō le klá ɛyí ŋ́.

¹⁴Ɔwɛ nɛ̄ Ɔwɔicō yá ɛcɛ ā, í nwū alɔ ka ɔ́dāŋ ka ɔ̄cɛnyīlɔ mabɔ̄ īnyīlɛyí kú nū tá kóō le gwā līkpō wāajɛ ó wɛ ɔdūwēyī lɛ ɔ́.

¹⁵Amáŋ ɔ́dāŋ ka ɔ̄cɛnyā lɛ īnyīlɛ̄yí ogwā līkpō lɛ, ó wɛ ɔdā ɔhi kú nū. Ohígbū kéē je īnyīlɛ̄yí ogwā līkpō ā lɛ ɔ́ kóō lɛbɛ̄ɛka ɔdā ō klá ɛyí ā.

¹⁶Amáŋ ɔ́dāŋ ka ɔ̄cɛ dúúmā tíne ō táafú ɛlā nyā, ayíka ō le jé ka alɔ ámāŋ ka icɔ́ɔci kú Ɔwɔicō í lɛ ucē ɔhá ō bī le gbā Ɔwɔicō ɛ̄gbā ŋ́.

¹⁷Amáŋ ipú aɔ́dā nēé nwū nēe bá nyā, n cɛ̄tra aá ŋ́, ohígbū ka ojīleyī kú aá gbā Ɔwɔicō ɛ̄gbā gē bī ɔbɔ̄bí wɛ̄ɛcɛ fíyɛ́ olɔhi.

¹⁸Aflɛ́yí kú ɛlā ā, é da um ka aá le kɔ̄ ígwíígwu nēe bá ī bɛ̄yíkwu iyī aá eko nɛ̄ aá gē jīla ipú icɔ́ɔci. N kē gbɛlá koó wɛ ɔkwɛ̄yi.

¹⁹Ó lɛ áafú ŋ́, ācɛ o kɔ ígwíígwu ā géē yɔ̄ ipú aá piíí, cɛ́ɛ́ kéē géē lɛ ācɛ nēe cɛ̄ɛ̄lā Ɔwɔicō ɔkwɛ̄yi ā jé.

²⁰Eko nɛ̄ aá gē jīla ígwu ā, ɔdōlé nɛ̄ aá gē lé ā í wɛ ɔdōlé ɔ̄nɔ̄ɔ̄nɛ̄ kú ihɔ ŋ́, ɔdā ɔhá nɛ̄ aá ī lé á.

²¹Ohígbū ka abɔ̄ aá gē lé ɔdōlé ā, aá gē gbēyī ɔ́mpa aá ŋ́, ɔnyɔɔnyɛ gbɔɔ́ ō lé ɔdōlé kú nū. Cɛ́ɛ́ ɛmiyɛ gē ŋmó ācɛ ōhī, ejé kē lɛ ācɛ ɔhá kwú.

²²Aá lɛ ɔlɛ́ abɔ̄yī aá nɛ̄ aá gē le ɔdōlé klla í gwá ejé ŋ́ nɛɛ? Ohígbū ɔ́ɔmā aá híīī yá ɛ́gɛ́nyā ipú ojīleyī kú aá ŋ́. Ohígbū ka ɛ̄nyā ī mafú ka aá gē leyī gwū icɔ́ɔci kú Ɔwɔicō tá, anɔ́ɔ aá gē yá kú uwēyī kóō kwú ācɛ nɛ̄ ɛgbá odée ī ce uwá ā á. Ɔdí nɛ̄ a gbɛlá ká n̄ ka lɛyíkwu ɛlā nyā ā? N cɛ̄tra aá nɛɛ? N gáā cɛ̄tra áa glá ŋ́.

²³Ohígbū ka ɔdā nɛ̄ n mīyɛ ŋmá ɛgiyí Óndú ā nɛ̄ n gē nwū aá á. Ka Óndú Ujísɔ̄si, kwu igbo ú otú nēé yíbīyājɛ tū ɔ̄ ā.

²⁴Ó lɛ ahínyá tá Ɔwɔicō, lɛ ɔ́ cē, anɔ́ɔ ó kahíníī, “Ɛ̄nyā wɛ ɔkpíyē kú um nōo wɛ ákú aá ā á. Aá yá ɛ̄nyā kú aá bī le blakwu um.”

²⁵Ɔwɛ ékpó ɔ́ɔmā, abɔ̄ é lɛ ɔdōlé ɔ̄nɔ̄ɔ̄nɛ̄ ā lé kwɛyí ā, ó kwú ikókwū ā ú anɔ́ɔ ó kahíníī, “Ikókwū nyā wɛ ɛka ɛ̄yīpɛ̄, nēé le abɔ̄ bá ɔ̄ mla oyī kú um ā. Eko dúú nɛ̄ aá lɛ ɔ́ gwá, aá yá lɛ ā ká aá bī le blakwu um.”

²⁶Ɛ̄nyā cābɔ̄ ka eko dúú nɛ̄ aá lɛ igbō ā lé nɛ̄ aá klla lɛ ejé kú ɔdōlé ɔ̄nɔ̄ɔ̄nɛ̄ kú Óndú ā gwá, ayíka aá yɔ̄ ī yá kú ācɛ kéē jé ikwū kú Óndú ā jāā gbéeko nōó í wā.

²⁷Ɔ́dāŋ ka ɔ̄cɛ dúú í lé igbo klla ī gwá ejé kú ɔdōlé ɔ̄nɔ̄ɔ̄nɛ̄ kú Óndú ā ɔwɛ nōó je ojīlīmā lɛ ɔ́ ŋ́, ayíka ó géē lé ɛpɔ̄bí kú ínoōbīya lɛyíkwu ɔkpíyē mɛ́mla oyī kú Ujísɔ̄si.

²⁸Ohígbū ɔ́ɔmā ɛjɛ̄ɛ̄jī ācɛ kóō lɛ ɔtū kú uwā jila gbɔbū ɛ́ɛ́ kéē lé igbō ā ámāŋ gwá ŋmá íkókwū ā.

²⁹Ohígbū ka ɔ́dāŋ koó jé ɔ̄ kéē kwɛyí ɔkpíyē mɛ́mla oyī kú Ujísɔ̄si ŋ́ eko nōó í lé klla gē gwá ŋmá íkókwū ā, ayíka Ɔwɔicō géē yá ɔ̄ italā.

³⁰Ɔ́ɔmā yá ɛ́ɛ́ nɛ̄ ācɛ alɛwa kú aá bá gē doōcē klla kē le yá gbɛnɛkɛɛ ā. Ācɛ alɛwa kē le pɛ́ kwú ɛɛ́.

³¹Amáŋ ɔ́dāŋ ka alɔ lɛ ɔtū kú alɔ jila má gbɔbū, Ɔwɔicō í gáā kɛpɔ̄ tū alɔ ŋ́.

³²Amáŋ Óndú ā ī kɛpɔ̄ tū alɔ klla ī yá alɔ italā, o yá ɛ́ɛ́ kéē híīī ŋ́mó alɔ ɛpɔ̄bí tɔ̄hā mla ācɛ kú ɛcɛ nyā ŋ́.

³³Ohígbū ɔ́ɔmā, ayínɛ́, eko dúúmā nɛ̄ aá le jīla tɔ̄há gáā lé ɔdōlé ɔ̄nɔ̄ɔ̄nɛ̄ kú Óndú ā nɛɛ, aá gbēyī ɔ́mpa aá.

³⁴Amáŋ ɔ́dāŋ ka ɛmiyɛ gē ŋmó ɔ̄cɛ dúú nɛɛ, ó cíkā ō lɛ ɔdōlé lé ŋ́má ɔlɛ́, o yá ɛ́ɛ́ kú Ɔwɔicō kóō kɛpɔ̄ tū aá abɔ̄ aá gē jīla tɔ̄há ā ŋ́. N géē da aá ɔdā nɛ̄ aá cíkā ō yá lɛyíkwu aɔ́dā ohile ā eko nɛ̄ n gā.