Read idoma 1 ĀCƐ UKƆ́RĪNTI 12 Bible Online

1 ĀCƐ UKƆ́RĪNTI 12 - idoma bible

1 ĀCƐ UKƆ́RĪNTI 12

¹Abālɔbányā, n tíne ō tóohi ɛlā nɛ̄ aá tá lɛyíkwu ɛhi nɛ̄ Alelékwū ihɔ gē je lɛ ācɛ ā. N tíne kú aá lɛ ɛlā ɔkwɛ̄yi lɛyíkwu ɔdā ā jé,ayínɛ́ um.

²Aá jé ka eko nɛ̄ aá je pīya ācɛ kú Ɔwɔicō ɛ́ɛ́ ŋ́ mā, é lɛ aá bī bí kú aá pā aɛ́cí nōó yēeyī ŋ́ mā.

³Ohígbū ɔ́ɔmā, n tíne kú aá le jé ka ɔ̄cɛ nɛ̄ Alelékwū kú Ɔwɔicō ī bītá í gáā lɔfú ka kahíníī, “N tókónu lɛ Ujísɔ̄si” ŋ́. Ɔ̄cɛ lɔfú ka kahíníī, “Ujísɔ̄si wɛ Óndú ā” glá ōfōōfūnū ɔ́dāŋ ka Alelékwū ihɔ yɔ̄ ī bī ɔ̄ tá.

⁴Ɛdɔ ɛhi ɛyɛ́ɛyɛ́yí kú alelékwū yɔ̄ á. Amáŋ Alelékwū ékpó ā gē je ɛhi ā á.

⁵Ó lɛ ɔwɛ ɛyɛ́ɛyɛ́yí nēé gē cɛ̄hɔ̄, amáŋ Óndú ékpó ā nēé gē cɛ̄ ɔ̄ ɛhɔ̄ á.

⁶Ɔfú ɛyɛ́ɛyɛ́yí nɛ̄ ɔ̄cɛ gē bī le yá ɔdā ɛyɛ́ɛyɛ́yí ā yɔ̄, amáŋ Ɔwɔicō ékpónú ā gē je ɔfú lɛ ācɛ kéē bī le yá ɛdɔ kú úklɔ́ kú uwā á.

⁷Ɔwɔicō í je ɔdōcābɔ̄ kú Alelékwū kú Ɔwɔicō éyi amáŋ ka ɔhá lɛ ɔnyɔɔnyɛ, ohígbū kóō tīile lɛ odúúdú ācɛ.

⁸Alelékwū kú Ɔwɔicō ā gē je olɛhɔ̄ nōo le mu mla íjééyī nɛ̄hi lɛ ɔ̄cɛ éyi. Alelékwū kú Ɔwɔicō ékpó ɔ́ɔmā kē je olɛhɔ̄ nōo le mu mla ɔdōōjé lɛ ɔ̄cɛ ɔhá.

⁹Alelékwū kú Ɔwɔicō ékpónú ɔ́ɔmā piíí ā je ɔtōōce lɛ ɔ̄cɛ éyi á. Ó kē ī je ɔfú ō bī le hɛ́ ācɛ tá ŋmá ōcē lɛ ɔ̄cɛ ɔhá.

¹⁰Alelékwū kú Ɔwɔicō ā ī je ɔfú ō bī le yúklɔ́ kú idáagó lɛ ɔ̄cɛ éyi, ó klla kē ī je ɛhi kú ɛbɛ ō má ka tɛ́ɛcɛ lɛ ɔ̄cɛ ɔhá. Ó gē je ɛhi kú ɔfú o bī le jé ɛyɛ́ɛyɛ́yí kú alelékwū nōo yɔ̄ ī yúklɔ́ ā lɛ ɔ̄cɛ ɔhá. Ó gē je ɔfú lɛ ɔ̄cɛ ōhī kóō ka ucē nɛ̄ ācɛ í jɛ́ɛyí nū ŋ́. Ó klla kē je ɔfú lɛ ɔ̄cɛ ɔhá kóō cɔ̄ɔ̄wɔ kú ucē ɔhá nēé ka ā.

¹¹Alelékwū kú Ɔwɔicō ékpónú ɔ́ɔmā í yá odúúdu aɔ́dā nēe bá nyā á. Ɛ́gɛ́nɛ̄ ó tíne ā nōó gē je ɛhi ɛyɛ́ɛyɛ́yí le ɔnyɔɔnyɛ á.

¹²Ohɔ́nyɛtá ā lɛbɛ̄ɛka iyē ékpónú, nōo lɛ āyā alɛwa ā. Ó kē wɛ iyē ékpónú kpɔ́ nááná nōó lɛ āyā ɛyɛ́ɛyɛ́yí ā.

¹³Alɔ wɛ ācɛ alɛwa, alɔ kē wɛ ācɛ ɛyɛ́ɛyɛ́yí. Ācɛ ōhī wɛ Ujíyu, ācɛ ɔhá wɛ aílɔ́wá. Ācɛ ōhī wɛ aɔ́fiyɛ, ācɛ ōhī kē lɛ iyī uwā. Amáŋ Alelékwū kú Ɔwɔicō ékpónú nēé le kpó ɛka Ɔwɔicō tū alɔ ɛyí á, nɛ̄ alɔ le pīya iyē ékpónú á. Odúúdú alɔ kē mīyɛ Alelékwū kú Ɔwɔicō ékpónu ā.

¹⁴Ohígbū ka iyē ā í lɛ āyā ékpó ōfūnū ŋ́, amáŋ ó lɛ āyā alɛwa.

¹⁵Ɔ́dāŋ nɛ̄ ikpó kōō kahíníī, “Ohígbū ka ń wɛ abɔ̄ ŋ́ mā, ń wɛ ákú iyē ā gɛ ŋ́,” ɛ̄nyā í yá kóō híīī wɛ āyā kú iyē ŋ́ nɛɛ ŋ́.

¹⁶Ɔ́dāŋ nɛ̄ ahɔ̄ kōō kahíníī, “Ohígbū ka ń wɛ eyī ŋ́ mā, ń wɛ ákú iyē ā gɛ ŋ́,” ɛ̄nyā í yá kóō híīī wɛ āyā kú iyē ŋ́ nɛɛ ŋ́.

¹⁷Ɔ́dāŋ ka odúúdú iyē kē wɛ īkpēyī éyi nɛɛ, ɔwɛ nyá nōó ī páhɔ̄ ā? Ɔ́dāŋ nōó kē wɛ ahɔ̄ ōfōōfūnū, ɔwɛ nyá nōó í hípī odée glá ā?

¹⁸Amáŋ ɛ́gɛ́nɛ̄ ó lɛ abālɔbányā, Ɔwɔicō lɛ āyā dóódu kpó tū ipú iyē ā ɛ́gɛ́nɛ̄ ó tíne kéē wɛ ā.

¹⁹Ɔ́dāŋ ka iyē ā kóō wɛ āyā ékpó nɛɛ, iyē í kē í yɛ í yɔ̄ ŋ́.

²⁰Ɔkwɛ̄yi kú ɛlā ā wɛ ka āyā kú iyē wɛ alɛwa, amáŋ iyē ékpó nēé wɛ á.

²¹Eyī í lɔfú da abɔ̄ kahíníī, “Ń cɛgbá awɔ ŋ́” glá ŋ́. Ɛ́ɛ́ nɛ̄ īkpɛ̄yí gē da ikpó kahíníī, “Ń cɛgbá awɔ ŋ́” glá ŋ́.

²²Ikɔkɔ ɔ́ɔmā, alɔ í yɔ̄ glá ŋ́, ɔ́dāŋ nɛ̄ āyā kú iyē kú alɔ nōó lɔfú ŋ́ tū alɔ ā í yɔ̄ ŋ́.

²³Aáyā kú iyē nɛ̄ alɔ gbɛlá kéē cɛgbá íbí ŋ́ mā nɛ̄ alɔ gē leyīkwu uwá lɔhi fíyɛ́

²⁴aɛ́nɛ̄ e lɔhi nɛ̄hi ā á. Amáŋ Ɔwɔicō abɔ̄yīnū lɛ iyē ā kpótɔ̄há ɔwɛ nɛ̄ ācɛ géē je ojīlīmā lɛ aáyā nēé cɛgbá ojīlīmā ŋmā fíyɛ́.

²⁵Cɛ́ɛ́ kú āyā kú iyē ā kéē híīī kɔ̄ hɛ̄ īyī uwā tá ŋ́, amáŋ ikɔkɔ ɔ́ɔmā ká āyā dóódu kéē leyīkwu iyī uwā jōnjīlɛ̄.

²⁶Ɔ́dāŋ ka āyā éyi kú iyē ī móōwē, ayíka odúúdú āyā ohile ā gē móōwē dúú. Odúúdú āyā kú iyē ā ī gwéeyē ɔ́dāŋ kéē ī cɛ̄tra āyā kú iyē éyi.

²⁷Abālɔbányā, odúúdú aá wɛ iyē kú Ohɔ́nyɛtá ā, ɔnyɔɔnyɛ kú aá wɛ āyā kú iyē ā.

²⁸Ɔwɔicō lɛ aɛ́ga nɛ̄ ɔnyɔɔnyɛ géē yɔ̄ ipú ɔwá kú icɔ́ɔci ā kpó lɛ uwá. Ɛga kú aflɛ́yí ā wɛ ācotɛ̄hɔ̄, ɛga ɔ́mpa wɛ ācomɛ́ɛbɛ, ɔ́mɛtá wɛ ákú ācɛ nēe ī nwū ɛlā kú Ɔwɔicō. Cɛ́ɛ́ ācɛ o yúklɔ́ ohídáagó gboce uwá. Ācɛ nēé je ɔfú lɛ uwá kéē hɛ́ ācɛ tá ŋmá ōcē ā gboce uwá. Ācɛ nēe í tá ācɛ abɔ̄, ámāŋ nēe gē ma ɔwɛ fú lɛ uwá mɛ́mla ācɛ nēe í ka aúcē ɛyɛ́ɛyɛ́yí ā kwúcē uwá.

²⁹Ó wɛ odúúdú ācɛ wɛ ācotɛ̄hɔ̄ ā ŋ́, ɛ́ɛ́ nēé kē ī wɛ ācomɛ́ɛbɛ ámāŋ ka ācɛ o yúklɔ́ ō hídáagó ā ŋ́.

³⁰Ó wɛ odúúdú ācɛ í hɛ́ ācɛ tá ŋmá ōcē glá ā ŋ́ ámāŋ ka ucē ɛyɛ́ɛyɛ́yí glá ā ŋ́ ámāŋ kōō lɔfú cɔ̄ɔ̄wɔ kú ɔdā nēé ka ā ŋ́.

³¹Amáŋ aá kwú ɔtū kú aá ú kwu ɛhi ɛ̄nɛ̄ o cɛgbá fíyɛ́ dúú ā. Ɛ̄nɛ̄ o lɔhi fíyɛ́ dúú ā wɛ ɛ̄nyā.