Read idoma 1 ĀCƐ UKƆ́RĪNTI 13 Bible Online

1 ĀCƐ UKƆ́RĪNTI 13 - idoma bible

1 ĀCƐ UKƆ́RĪNTI 13

¹N lɔfú ka ucē kú alɛɛcɛ ámāŋ ákú aálelékwū-ōtɛ̄hɔ̄ glá, amáŋ ɔ́dāŋ kú ɔ̄cɛ í he um ɔtū ŋ́, ɔkɛ̄lā kú um géē lɛbɛ̄ɛka ágōgō ō yúuya icííci amáŋ ka anwa kú oje icííci ā.

²Ɔ́dāŋ ka n lɛ ɛhi kú ɔ̄comɛ́ɛbɛ, ɔ́dāŋ ka n kōō jɛ́ɛyí ɛjɛ̄ɛ̄jī ɔdōtayínū, nɛ̄ n lɔfú lɔtūce Ɔwɔicō nɛ̄ɛ̄nɛ̄hi nɛ̄ n lɔfú da ɛfu kóō le fu glá, amáŋ nɛ̄ ɔ̄cɛ í he um ɔtū ŋ́, ó lɛ ā ń wɛ ɔdā dúú ŋ́.

³Ɔ́dāŋ ka n kōō lɛ odúúdú aɔ́dā nɛ̄ n lɛ ā kpó lɛ ācogbɛhá, nɛ̄ n kwú iyē kú um í gwɛ́ɛya, cɛ́ɛ́ ká n̄ bī ɔ́ɔmā gwō, amáŋ ɔ́dāŋ nɛ̄ ācɛ ɔhá í he um ɔtū ŋ́, ń lɛ ile dúúmā ŋ́.

⁴Ɔ́dāŋ ka ɔ̄cɛ he uwɔ ɔtū ayíka a lɔtūlé lɛ ɔ́, a kē í gbonɛnɛ lɛ ɔ́. Ɔ́dāŋ ka ɔ̄cɛ he uwɔ ɔtū, á gáā má ɔ̄ ímálānyí ŋ́, ɛ́ɛ́ nɛ̄ á gē gwō tá ɔ̄ ŋ́.

⁵Á klla gáā gɔ̄ tú ɔ̄ ŋ́. Ɔ́dāŋ ka ɔ̄cɛ he uwɔ ɔtū, á gáā yá ucē aflūmā lɛyíkwu ɔ́ ŋ́, ɛ́ɛ́ nɛ̄ a gē yá ɔdā nōo ī lɔhi lɛ iyī uwɔ ōfōōfūnū ŋ́. Ɔ́dāŋ ka ɔ̄cɛ he uwɔ ɔtū, á gáā kpɔ́tūfúúlú lɛyíkwu ɔ́ ŋ́, ɛ́ɛ́ nɛ̄ a gē yɔ̄ í blakwu ɔdōōbɔ̄bí nōó yá uwɔ ā ŋ́.

⁶Ɔ́dāŋ ka ɔ̄cɛ he uwɔ ɔtū á gáā yɔ̄ í gwéeyē eko nōo lɛ ɔdōōbɔbí yá ŋ́, ámāŋ a géē gwéeyē eko nōo lɛ ɔdā okpaakpa yá.

⁷Ihɔtū gē cɛ̄ lɛ alɔ í lɔtūlé mla ɔ̄cɛ. Ó gē yá ka ɔ̄cɛ kóō lɔtūce ɔ̄cɛ. Ó gē cɛ̄ lɛ ɔ̄cɛ kóō leyīce odée. Ó klla gē cīibū kú ɔdā dóódu.

⁸Ihɔtū í gē mɛ gbóógbóō ŋ́. Amáŋ ɛbɛ ō má, ucē ɛyɛ́ɛyɛ́yí ō ka mɛ́mla ɔdā nɛ̄ ɔ̄cɛ jé nɛ̄hi ā í mɛ tāajɛ.

⁹Ohígbū ka ɛhi kú ɔdā ō jé mɛ́mla ɛbɛ ō má kú alɔ í jīla dúúdú ŋ́.

¹⁰Amáŋ eko nɛ̄ ɔdā nōo le jīla ā gā ā, ɔdā nōo jīla ŋ́ mā géē bī tāajɛ.

¹¹Eko nɛ̄ n wɛ ɔyípɛ̄ ā, n gē kɛlá bɛ̄ɛka ɔyípɛ̄ ā, n gē gbɛlá bɛ̄ɛka ɔyípɛ̄ ā, n gē leyī miya ɛlā bɛ̄ɛka ɔyípɛ̄ ā. Amáŋ abālɔbányā nɛ̄ n le pīya ijímkpa ɛɛ́ mā, n mabɔ̄ ucē kú ɔyípɛ ɔ́ɔmā tá ɛɛ́.

¹²Ohígbū ka abālɔbányā, alɔ í mɛ́ɛbɛ fluflu bɛ̄ɛka ɔdā nɛ̄ ɔ̄cɛ í má ipú ogigo nōó lɔhi ŋ́ mā, amáŋ igbīhāajɛ ā alɔ géē má ɔ̄ eyī péee. Odúúdú ɔdā nɛ̄ n jé abālɔbányā í jīla ɛ́ɛ́ ŋ́, ó le fluflu ā ɛ́ɛ́ nɛ̄ n, amáŋ eko ɔ́ɔmā n géē jé ɛjɛ̄ɛ̄jī ɔdā dóódu jīla, ɛ́gɛ́nɛ̄ Ɔwɔicō jē um abālɔbányā ā.

¹³Ó lɛ aɔ́dā ɛtá nēe géē yɔ̄ gajaajɛ. É wɛ ɔtōōce, eyīyōce mɛ́mla ihɔtū. Amáŋ ɛ̄nɛ̄ o fíyɛ́ dúú ā wɛ ihɔtū.