Read idoma 1 ĀCƐ UKƆ́RĪNTI 14 Bible Online

1 ĀCƐ UKƆ́RĪNTI 14 - idoma bible

1 ĀCƐ UKƆ́RĪNTI 14

¹Aá cēyītīkwū kú aá yíhɔtū. Aá kwú ɔtū kú aá ú kwu aɛ́hi kú Alelékwū Ihɔ, ofíyɛ́ dúú ā ɛhi kú olɛhɔ̄ kú Ɔwɔicō ō ka tɛ́ɛcɛ.

²Ɔ̄cɛ nōo í kɛlā okónu ucē ɔhá ā, í kɛlā lɛ alɛɛcɛ ŋ́, amáŋ Ɔwɔicō. Ɔ̄cɛ ɔhá dúú í gē jɛ́ɛ́yí kú ɔdā nōó ī ka ā ŋ́. Ohígbū koó bī ɔfú kú Alelékwū kú Ɔwɔicō yɔ̄ í ka ɔkwɛ̄yi otayínū nɛ̄ ɔ̄cɛ ɔlamu í jɛ́ɛyí nū ŋ́.

³Amáŋ ɔ̄cɛ nōo gē ka olɛhɔ̄ kú Ɔwɔicō tɛ́ɛcɛ ā, ī kɛlā lɛ ācɛ cɛ́ɛ́ kóō tá uwā abɔ̄, gē tá uwā ɔtū kwu ɔtū, ó klla í tá uwā ɔtū lé.

⁴Ɔ̄cɛ nōo í kɛlā okónu ucē nɛ̄ ācɛ ɔhá í jɛ́ɛyí nu ŋ́ mā, gē tá iyīnu abɔ̄, amáŋ ɔ̄cɛ nōo gē ka olɛhɔ kú Ɔwɔicō tɛ́ɛcɛ ā gē tá ācɛ icɔ́ɔci abɔ̄.

⁵Eyī yá um kú odúúdú aá kóō ka ucē ɔhá. Amáŋ eyī yá um fíyɛ́ kú odúúdú aá kóō lɔfú ka olɛhɔ̄ kú Ɔwɔicō tɛ́ɛcɛ. Olɛhɔ̄ kú Ɔwɔicō ō ka tɛ́ɛcɛ tīilɛ nɛ̄ɛ̄nɛ̄hi fíyɛ́ ɔ̄cɛ nōo gē ka ucē ɔhá á, ń táafú ŋ́ ɔ̄cɛ éyi yɔ̄ abɔ́ɔ nōo í cɔ̄ɔ̄wɔ kú ɔdā nōó ka ā, cɛ́ɛ́ ó lɛ odúúdú ācɛ icɔ́ɔci tábɔ̄.

⁶Ayínɛ́ um nɔ̄nyā mɛ́mla ayínɛ́ um nɔ̄nyílɔ, ɔ́dāŋ ka n gā ipú aá gē ka ucē nɛ̄ aá pó ŋ́, ile nyá nɛ̄ n tū lɛ aá ā. Ń táafú ŋ́ ayíka n bī ɔdā nɛ̄ Ɔwɔicō mafú gā um ā gé lɛ aá ámāŋ ka n bī ɔdā nɛ̄ n jé ā wā, ámāŋ ɛlā ɔkwɛ́yi nɛ̄ Ɔwɔicō mafú mɛ́mla ɔdā nɛ̄ n wā í nwū.

⁷Ó kōō aɔ́dā ō bī gwííjē, lɛbɛ̄ɛka ɔkpancílé ámāŋ ka ɛ̄ngwū ā, ɔ́dāŋ ka ɔ̄cɛ í gwō ɔ́ lɔhi ŋ́, ɔ̄cɛ dúú í gáā jé ɔdā nēé ī gwō ā ŋ́.

⁸Ɔ́dāŋ ka ɔ̄cɛ o tá opo ā í tá opo kɛlā péee ŋ́, ɔ̄cɛ dóódu í gáā tútu ɛfú glá ŋ́.

⁹Ɔwɛ ékpó ɔ́ɔmā, ɔ̄cɛ dúú í gáā jɛ́ɛyí kú ɔdā nɛ̄ a yɔ̄ ī ka ā glá ŋ́, ɔ́dāŋ nɛ̄ olɛhɔ̄ nɛ̄ a ī cɛ̄ okónu ucē ɔhá ā í le pélúú ŋ́. Ayíka aá yɔ̄ gē kɛlā tū ipú inu áncā.

¹⁰Ucē alɛwa ɛyɛ́ɛyɛ́yí yɔ̄ ipú ɛcɛ nyā, nááná ó lɛ ucē dúú nōó lɛyí ŋ́ nɛɛ ŋ́.

¹¹Amáŋ ɔ́dāŋ nɛ̄ ń pó ucē nēé ka ā ŋ́, ɔ̄cɛ nōo ī ka ucē ā wɛ éwɔhá tū um, n kē wɛ éwɔhá kú nū.

¹²Abɔ̄ aá gē yá ɔtū nwūlanwūla kú aá mīyɛ ɛhi kú Alelékwū kú Ɔwɔicō ā, aá í lɔfú tīiye fíyɛ́ kú aá ba ɛhi nōo lɔhi fíyɛ́ dúú nōo géē tá icɔ́ɔci abɔ̄ kóō jɛ̄ gicō ā.

¹³Ɔ̄cɛ nōo ī kɛlā okónu ucē ɔhá géē gbɔ̄ɔkɔ lɛ Ɔwɔicō kóō kwú ɛhi kú ɔwɔ ō cɛ̄ kú ucē nōó ká ā ú lɛ ɔ́.

¹⁴Ohígbū ka ɔ́dāŋ nɛ̄ n bī ucē ɔhá le gbɔ̄ɔkɔ lɛ Ɔwɔicō, alelékwū kú um yɔ̄ gē gbɔ̄ɔkɔ ōfōōfūnū á, n gáā jɛ́ɛyí kú ɔdā nɛ̄ n yɔ̄ gē ka ā ŋ́.

¹⁵Eko nɛ̄ n gbɔ̄ɔkɔ ipú alelékwū kú um, n klla géē bī odo kú um le gbɔ̄ɔkɔ. Ámāŋ n géē bī alelékwū kú um gwííjē, n ke í bē odo kú um le gwííjē dúú.

¹⁶Ohígbū ka ɔ́dāŋ nɛ̄ a gē cɛ̄tra Ɔwɔicō í tá ɔ̄ ahínyá ipú alelékwū yɔ̄ gē ka ucē ɔhá ōfōōfūnū, ɔwɛ nyá nɛ̄ ācɛ ɔlamu nēe bá ipú ojīla ā í jɛ́ɛyí ɔdā nɛ̄ a ka ā. Ɔwɛ nyá nēé í cɛ̄ “Aamí” lɛ ɔkɔ kú ahínyá nɛ̄ a gbā ā?

¹⁷Ɔ́dāŋ nɛ̄ ɔkɔ nɛ̄ a gbā tá Ɔwɔicō ahínyá ā kóō lɔhi, ɔkɔ ɔ́ɔmā í tá ācɛ ɔhá abɔ̄ fúlufúlu ŋ́.

¹⁸N tá Ɔwɔicō ahínyá ka n ka ucē ɔhá ojigógó fíyɛ́ odóódu kú aá ā.

¹⁹Amáŋ ipú ɛ̄gbā ō gbā Ɔwɔicō ipú icɔ́ɔci ā, ó he um ɔtū fíyɛ́ ká n̄ kɛlā ɛhɔ̄ ŋmá odo kú um, nɛ̄ ācɛ géē jɛ́ɛyí nū nōo géē tá ācɛ ɔhá abɔ̄, ikɔkɔ nɛ̄ n géē kɛlā úlúúlúla okónu ucē ɔhá ā.

²⁰Ayínɛ́ um nɔ̄nyā mɛ́mla ayínɛ́ um nɔ̄nyīlɔ, aá híīī gbɛlá bɛ̄ɛka ayípɛ̄ nɛ̄ncɛ ā ŋ́. Aá le pīya ogwuda bɛ̄ɛka ayípɛ̄ nɛ̄ncɛ ā ɛgiyí ínoōbīya. Amáŋ aá le pīya ijímkpa ipú ɛlá nɛ̄ aá ī gbo ā.

²¹Ipú Ɔkpíihɔ, é lɛ ɔ́ tá ka Óndú ā kahíníī, “Oŋmá okónu kú ācɛ nēe í ka ucē éwɔhá ā, n géē kɛlā lɛ ācɛ ɔlɛ́ um. N géē bī okónu kú ācɛ éwɔhá le kɛlā lɛ uwá. Amáŋ ó kōō le lɛ ā nááná ācɛ ɔlɛ́ um í gáā jāhɔ̄ gā um ŋ́.”

²²Ohígbū ɔ́ɔmā, ɛhi kú ucē ɔhá ō ka wɛ ɔdōcābɔ̄ lɛ ācɛ nēé wɛ ācɛ nēe kpɔ́tūce Ohɔ́nyɛtá ā ŋ́ mā. Ó wɛ ákú ācɛ nēe kpɔ́tūce Ohɔ́nyɛtá ā ŋ́. Amáŋ ɛhi kú olɛhɔ̄ kú Ɔwɔicō ō ka tɛ́ɛcɛ wɛ ákú ācɛ kú Ohɔ́nyɛtá ā, ó wɛ ákú ācɛ nēé wɛ ācɛ nēe kpɔ́tūce Ohɔ́nyɛtá ā ŋ́ mā ŋ́.

²³Ɔ́dāŋ nɛ̄ odúúdú ācɛ icɔ́ɔci le jīla tɔ̄há anɔ́ɔ ɛjɛ̄ɛ̄jī ācɛ gbɔɔ́ ō ka ucē ɔhá á, ɔ́dāŋ nɛ̄ ācɛ ɔlamu ámāŋ ācɛ nēe wɛ ācɛ nēe kpɔ́tūce Ohɔ́nyɛtá ā ŋ́ mā le bēhé wā ipú inu ā, é gáā gbɛlá ka odúúdú aá bá gē jɛɛ́lɛ́ ŋ́?

²⁴Amáŋ ɔ́dāŋ ka ɛjɛ̄ɛ̄jī ācɛ bá gē ka olɛhɔ̄ kú Ɔwɔicō tɛ́ɛcɛ eko nɛ̄ ācɛ nēé kpɔ́tūce Ohɔ́nyɛtá ā ŋ́ mā, ámāŋ ka ācɛ ɔlamu le bēhé wā ipú ínu ā, ɛlā nōó í pó ā géē cɛ̄ lɛ ɔ̄ jé ka anúɔ lɛ ínebīya.

²⁵Abɔ̄ é bá gē jāhɔ̄ ā ɛlá nōo tayínū ipú ɔtū kú uwā ā í tɛ́ɛcɛ péee, cɛ́ɛ́ é géē túkpɛɛ́ lɛ eyī pīya klá ajɛ í gbā Ɔwɔicō ɛ̄gbā, yɔ̄ ī ka tɛ́ɛcɛ kahíníī, “Ɔkwɔ̄ɔ̄kwɛ̄yi, Ɔwɔicō yɔ̄ mla aá.”

²⁶Ayínɛ́ um nɔ̄nyā mɛ́mla ayínɛ́ um nɔ̄nyīlɔ, ɛ̄nyā wɛ ɛlā okpɔ́cíí kú ɔdā nɛ̄ um húmáyī ka ā á. Eko nɛ̄ aá le jīla tɔ̄há kú aá gbā Ɔwɔicō ɛ̄gbā nɛɛ, ɔ̄cɛ éyi géē bī ije wā, ɔ̄cɛ ɔhá bī ɔdā nōó í nwū, ɔ̄cɛ ɔhá kē bī ɔdā nɛ̄ Ɔwɔicō mafú lɛ ɔ́, ɔ̄cɛ ɔhá bī olɛhɔ̄ okónu ucē ɔhá, anɔ́ɔ ɔ̄cɛ ɔhá kē ī ka ɛyí kú ɔdā nēé ka ā. Ká odúúdú odée kóō tá icɔ́ɔci abɔ̄.

²⁷Ɔ́dāŋ ka ācɛ gáā ka ucē ɔhá nɛɛ, ayíka ó wɛ ācɛ ɛpa ámāŋ ācɛ ɛtá ōfōōfū uwā. É cíkā ō kɛlā ɔgbace ɔgbace. Ɔ̄cɛ éyi í yɔ̄ kóō cɔ̄ɔ̄wɔ kú ɔdā nēé yɔ̄ ī ka ā.

²⁸Amáŋ ɔ́dāŋ ka ɔ̄cɛ dúú í yɔ̄ nōo gē cɔ̄ɔ̄wɔ kú ɔdā nēé í ka ā ŋ́, ayíka ɔnyɔɔnyɛ kú ācɛ nēe gē ka ucē ɔhá ā kóō yɔ̄ cíí cɛ́ɛ́ kóō kɛlā lɛ iyī nū mɛ́mla Ɔwɔicō.

²⁹Ācɛ ɛpa ámāŋ ka ācɛ ɛtá nɛ̄ Ɔwɔicō tū uwā ɛhɔ̄ ā cíkā ō kɛlā, cɛ́ɛ́ ācɛ ohile ā kē leyī yɛ ɛlā nēé ka ā.

³⁰Amáŋ ɔ́dāŋ ka ɔ̄cɛ éyi ŋmá ipú ācɛ nēe cīce ā mīyɛ olɛhɔ̄ ŋmá ɛgiyí Ɔwɔicō nɛɛ, ɔ̄cɛ nōo yɔ̄ ī kɛlā ā cíkā ō mā ɛlā.

³¹Odúúdú aá lɔfú cɛ̄ olɛhɔ̄ kú Ɔwɔicō tɛ́ɛcɛ, éyééye, cɛ́ɛ́ ɛjɛ̄ɛ̄jī ācɛ géē jé odée kéē klla lɛ uwá ɔtū tū kwu ɔtū.

³²Ācɛ nēe gē ka olɛhɔ̄ kú Ɔwɔicō tɛ́ɛcɛ ā cíkā ō lɔfú cē ɛlā ō ŋmá okónu kú uwā bī glá.

³³Ohígbū ka Ɔwɔicō í wɛ Ɔwɔicō kú ígbájí ŋ́, amáŋ ákú ɛbɔ́. Ɛ́gɛ́nɛ̄ ó yɔ̄ ipú odúúdú icɔ́ɔci ā.

³⁴Ipú ojīla tɔ̄há kú icɔ́ɔci, ācɛnyā cíkā ō bá cíí. É jɛɛga lɛ uwá kéē kɛlā ŋ́. É cíkā ō tɛ́ɛyí wāajɛ ɛ́gɛ́nɛ̄ íne kú ācɛ Ujíyu ka lɛ ā.

³⁵Ɔ́dāŋ nēé tíne kéē jé ɔdā dúúmā nɛɛ ayíka é cíkā ō da aɔ́bá uwā ɔ̄kā ɔlɛ́. Ó wɛ ɔdūwēyī nɛ̄hi kú ɔ̄cɛnyā kóō kɛlā ipú ojīlā tɔ̄há kú icɔ́ɔci.

³⁶Olɛhɔ̄ kú Ɔwɔicō í ŋmá ɛgiyí aá ŋ́, ó kē wɛ aá ōfōōfu aá mīyɛ ɛlā ā ŋ́.

³⁷Ɔ́dāŋ ka ɔ̄cɛ dúúmā gbɛlá ka anúɔ wɛ ɔ̄comɛ́ɛbɛ kú Ɔwɔicō ámāŋ ka anúɔ lɛ ɛhi kú alelékwū nɛɛ, ɔ̄cɛ ɔ́ɔmā kóō le jé ka ɔdā nɛ̄ n yɔ̄ ī tá fu aá nyā wɛ ɔ́da kú Ɔwɔicō nɛ̄ n.

³⁸Amáŋ ɔ́dāŋ nɛ̄ ɔ̄cɛ dúú leyī gwō ɛ̄nyā bónū, aá leyī gwō ɔ̄cɛ ɔ́ɔmā bónū.

³⁹Ohígbū ɔ́ɔmā ayínɛ́ um nɔ̄nyā mɛ́mla ayínɛ́ um nɔ̄nyīlɔ aá lɛ ɔtū kú aá túkwu ō ka olɛhɔ̄ kú Ɔwɔicō tɛ́ɛcɛ, amáŋ aá híīī gwū ucē ɔhá ō ka ŋ́.

⁴⁰Aá yá ɔdā dóódu ɔwɛ okpaakpa.