Read idoma 1 ĀCƐ UKƆ́RĪNTI 15 Bible Online

1 ĀCƐ UKƆ́RĪNTI 15 - idoma bible

1 ĀCƐ UKƆ́RĪNTI 15

¹Abālɔbányā, ayínɛ́ um nɔ̄nya mla ayínɛ́ um nɔ̄nyīlɔ, n tíne ō tá aá ɛlá kwu ɔ̄kōolɔhi nɛ̄ n tɔ́ɔna nū lɛ aá, nɛ̄ aá le pó klla lɛ abɔ̄ bī ɔ̄ ā. Anú ā yá ɛ́ɛ́ nɛ̄ aá lɔtūce Ɔwɔicō á.

²Ɔ́dāŋ ka aá lɛ abɔ̄ bī ɔ̄kōolɔhi ā kli, ó géē nya aá tá. Amáŋ ɔ́dāŋ nɛ̄ aá lɛ abɔ̄ bī ɔ̄ kli gɔbū ŋ́, ayíkā ɔtōōce kú aá wɛ áncā.

³N cɛ̄hɔ̄ nōo cɛgbá fíyɛ́ dúú ā lɛ aá. Olɛhɔ̄ ɔ́ɔmā nɛ̄ ami abɔ̄yī um kē mīyɛ ā ka Ohɔ́nyɛtá ā kwú ohígbū íne nɛ̄ alɔ bīya ā, ɛ́gɛ́nɛ̄ é tá ɔ̄ ipú Ɔkpíihɔ lɛ ā ā.

⁴Keé lɛ ɔ́ nyi, kéē kē kwú ɔ̄ ú héyī ŋmá ɔlékwū ɛ̄cī ɔ́mɛtá ɛ́gɛ́nɛ̄ é tá ɔ̄ ipú Ɔkpíihɔ ā.

⁵Anɔ́ɔ ó lɛ iyī nū mafú lɛ Upíta mɛ́mla ācotɛ̄hɔ igwɛ́ɛpa ā.

⁶Anɔ́ɔ ó le hɛ́ wɛ̄ɛcɛ ɔtāhɛ̄ ācɛ nēe cɛ̄ɛ̄lā Ɔwɔicō nēe fíyɛ́ ulá cofɛhɔ̄ igbeékpónú á. Ācɛ alɛwa kú uwā kē béeyī kpɔ́ ɛɛ́, nááná nɛ̄ ācɛ ōhī kú uwā le pɛ́ gekwú ɛɛ́ mā.

⁷Ó le hɛ́wɛ̄ɛ̄cɛ lɛ Ujémīsi, igbīhi ɔ́ɔmā ó lɛ iyī nū mafú lɛ odúúdú ācotɛ̄hɔ̄ ā.

⁸Ámōōmɛ ā ó le hɛ́wɛ̄ɛ̄cɛ gā um dúú, nááná nɛ̄ n lɛbɛ̄ɛka ɔyí nēé hɛ́ma ā.

⁹Ohígbū ka ami ā í tīile ŋ́ fíyɛ́ dúú ipú odúúdú ācotɛ̄hɔ̄ á. É kōō cíkā ō hī um tū ipú ācotɛ̄hɔ̄ ŋ́ dúú, ohígbū ka n yá icɔ́ɔci kú Ɔwɔicō ōwē.

¹⁰Amáŋ oŋmá ɛhi kú eyīnyinyi kú Ɔwɔicō ā, n wɛ ɔdā nɛ̄ n wɛ ícɛ nyā ā. Ihɔtū nōó mafú gā um ā lɛ úklɔ́ yá. Ɛ́gɛ́nɛ̄ ācɛ í leyīce ŋ́ mā, ami yúklɔ́ nwuné fíyɛ́ odóódu kú ācotɛ̄hɔ̄ ohile á, nááná nōó wɛ ɔfú kú ami abɔ̄yī um ŋ́ mā. Ɛhi kú eyīnyinyi kú Ɔwɔicō yɔ̄ ī tá um abɔ̄ á.

¹¹Ohígbū ka odúúdú alɔ, kwu ami mɛ́mla ācotɛ̄hɔ̄ ohile ā, tɔ́ɔna kú olɛhɔ̄ ékpó ɔ́ɔmā ā. Olɛhɔ̄ ɔ́ɔmā nɛ̄ aá kē mīyɛ cɛ̄ á.

¹²Ɔ́dāŋ nɛ̄ olɛhɔ̄ nɛ̄ alɔ ī cɛ̄ ā wɛ ka Ɔwɔicō kwú Ohɔ́nyɛtá ā ú héyī ŋmá ɔlékwū, ó lɛ ā ɔdíyá nɛ̄ ācɛ ōhī yɔ̄ ī ka kéē gáā je ācɛ nēe gekwú ā héyī ŋmá ɔlékwū ŋ́ mā.

¹³Ɔ́dāŋ kéē je ācɛ nēe gekwú ā héyī ŋmá ɔlékwū ŋ́ nɛɛ, ayíka é kē je Ohɔ́nyɛtá ā héyī ŋmá ɔlékwū ŋ́ dúú.

¹⁴Ɔ́dāŋ kéē je Ohɔ́nyɛtá ā héyī ŋmá ɔlékwū ŋ́, ó lɛ ā, alɔ í lɛ olɛhɔ̄ dúúmā nɛ̄ alɔ ī tɔ́ɔna nū lɛ aá ŋ́. Aá kē lɛ ɔdā ó lɔtūce ɔ́ ŋ́.

¹⁵Anɔ́ɔ ɔ́ɔmā cābɔ̄ ka alɔ húmáyī kɛ̄mgbɛ̄ lɛyíkwu Ɔwɔicō eko nɛ̄ alɔ ka koó je Ohɔ́nyɛtá ā héyī ŋmá ɔlékwū ā. Ohígbū ka ɔ́dāŋ kéē gáā je ācɛ nēe gekwú ā héyī ŋmá ɔlékwū ŋ́, ayíka Ɔwɔicō í kē je Ohɔ́nyɛtá ā héyī ɔlékwū ŋ́.

¹⁶Ohígbū ka ɔ́dāŋ kéē je ācɛ nēe gekwú ā héyī ɔlékwū ŋ́, ayíka é kē je Ohɔ́nyɛtá ā héyī ŋmá ɔlékwū ŋ́.

¹⁷Ɔ́dāŋ kéē kē je Ohɔ́nyɛtá ā héyī ŋmá ɔlékwū ŋ́, ayíka ɔdā nɛ̄ aá kē lɔtūce ɔ́ ā kē wɛ áncā, é kē je íne nɛ̄ aá bīya ā yá aá ɛhi ɛ́ɛ́ ŋ́.

¹⁸Ɔ́dāŋ koó lɛ ɛ́gɔ́ɔmā ódúúdú ācɛ nēe cɛ̄ɛ̄lā Ohɔ́nyɛtá ā ɛ́ɛ́ nēé pɛ́ kwú ā í je kpó yíífi.

¹⁹Ɔ́dāŋ nɛ̄ eyīyōce nɛ̄ Ohɔ́nyɛtá ā je lɛ alɔ ā kwɛjī ipú ɛcɛ nyā ōfōōfūnū nɛ̄ ɔdā ɔhá dúú í yɔ̄ ŋ́ nɛɛ, ayíka alɔ tēyīnyinyi fíyɛ́ dúú ipú ɛcɛ nyā á.

²⁰Amáŋ ɛlā ɔ̄kwɛ̄yi ā wɛ ka, é lɛ Ohɔ́nyɛtá ā héyī ŋmá ɔlékwū. Ó lɛbɛ̄ɛka ɔdɛ̄hɔ̄ aflɛ́yí nēé gē ce nōo kwɛyí ācɛ aflɛ́yí nēé géē je héyī ŋmá ɔlékwū ā.

²¹Ohígbū ka ɛ́gɛ́nɛ̄ ācɛ gbɔɔ́ ō kwú oŋmá lɛ ɔdā nɛ̄ ɔ̄cɛ éyi yá ā, ɔwɛ ékpó ɔ́ɔmā, é í je ācɛ héyī ŋmá ɔlékwū ohígbū ɔdā nɛ̄ ɔ̄cɛ éyi yá ā.

²²Ohígbū ka ɛ́gɛ́nɛ̄ odúúdú ācɛ í kwú ohígbū kéē ŋmá iyē Ádām ā. Ɔwɛ ékpó ɔ́ɔmā, é í héyī ŋmá ɔlékwū ohígbū ɛma kú uwā mla Ohɔ́nyɛtá ā.

²³É í je ɔnyɔɔnyɛ héyī eko okpaakpa kú nū, ɔgbace ɔgbace. Ohɔ́nyɛtá ā wɛ ɔ̄cɛ aflɛ́yí á, cɛ́ɛ́ ācɛ nɛ̄ wɛ ákú Ohɔ́nyɛtá ā géē gboce ɔ́ eko nōó í kwúcē wā kpɔ́ ā.

²⁴Cɛ́ɛ́ ɛcɛ nyā í mɛ. Ohɔ́nyɛtá ā géē yá odúúdú ajɔ̄ɔ̄cɛ́, íkwu mɛ́mla ɔfú lé, cɛ́ɛ́ ó kwú íkwu kú ɔcɛ́ nōó lé ā ú lɛ Ɔwɔicō.

²⁵Ohígbū ka Ohɔ́nyɛtá ā géē cɔcɛ́ jāā gbéeko nɛ̄ Ɔwɔicō le odúúdú aólɛlā kú nū kpó yálé klla lɛ uwá kpó bá ɛháajɛ ikpó kú nū.

²⁶Olɛlā ámōōmɛ nɛ̄ Ɔwɔicō í yálé ā géē wɛ ikwū.

²⁷Ohígbū ka Ɔkpíihɔ kahíníī, “Ɔwɔicō lɛ odúúdú ɔdée kpó bá ɛháajɛ ikpó kú nū.” Ɛ̄nyā téeyi péee ka ɛlā nōó ka kahíníī, “Odúúdú odée,” é ka Ɔwɔicō abɔ̄yī nū nōo kpó odúúdú odée bá ɛháajɛ ikpó kú Ohɔ́nyɛtá ā tū ɔ̄ ŋ́.

²⁸Amáŋ eko nēé lɛ odúúdú ɔdā dóódu kpó yálé kwɛyí Ohɔ́nyɛtá ā, cɛ́ɛ́ Ɔyínɔ̄nyīlɔ ā, nōo wɛ Ohɔ́nyɛtá ā géē bī iyīnū wā ɛháajɛ Ɔwɔicō nōo kpó odúúdú odée bá ɛháajɛ nū ā. Cɛ́ɛ́ Ɔwɔicō géē lé ɔcɛ́ kú odúúdú ɔdā dóódu.

²⁹Ó lɛ ācɛ nēe gē kpó ɛka tū uwā ɛyí kwɛyí ācɛ nēe gekwú ā. Ɔdíyá nēé gē yá lɛ ā ɔ́dāŋ kéē le jé ka ācɛ nēe gekwú ā í gáā héyī gɛ ŋ́.

³⁰Ɔdíyá nɛ̄ alɔ a gē je oyēeyī kú alɔ tónu, klla gē kwu ikwū ajaajɛ eko dóódu ā?

³¹Ayínɛ́ um nɔ̄nyā mɛ́mla ayínɛ́ um nɔ̄nyīlɔ, n lɛyí cíikwū ɛ̄cī dóódu! N yɔ̄ ī gɔ̄ ohígbū aá, ipú opīyatɔ̄há kú alɔ mla Ohɔ́nyɛtá Ujísɔ̄si, Óndú alɔ ā, anú yá ɛ́ɛ́ nɛ̄ n ka ɛ̄nyā tɛ́ɛcɛ á.

³²Ɔdí wɛ ile kú unu nɛ̄ n nu tá ɛbɛ ipácí, ɛ́gɛ́nɛ̄ ɔ̄cɛ ī kɛlā ā, ajɛ Ɛ́fēsɔsi amānyā ā. Amáŋ ɔ́dāŋ kéē je ācɛ nēe gekwú ā héyī ŋmá ɔlékwū ŋ́, ó lɛ ā ayíka, “Ālɔ̄ lé ucɛ, klla gwá ejé ohígbū ka óócí alɔ í kwú!”

³³Aá cɛ̄ lɛ ācɛ nēe ī ka ɛdɔ kú ɛla nēe bá nyā pllá aá ŋ́. Ohígbū kahíníī, “Ɔ́dāŋ nɛ̄ ɔ̄cɛ nōo ī yá ucē olɔhi tá ipú ɔ́wá kú ācɛ nēe yá ucē obɔ̄bí, é gē bīya ɔ́.”

³⁴Eyī kóō gbo aá gɔɔ mɛ́ɛ̄, cɛ́ɛ́ kú aá bīyíne kú Ɔwɔicō gɛ ŋ́. N ka ɛ̄nyā tɛ́ɛcɛ lɛ aá kú uwēyī kóō kwú aá ohígbū ka ācɛ ōhī kú aá í jé Ɔwɔicō ŋ́.

³⁵Amáŋ ɔ̄cɛ éyi géē dɔɔ̄kā kahíníī, “Ɛ́gɛ́nyā nēé géē je ɔ̄cɛ héyī ŋmá ɔlékwū lɛ ā? Ɛdɔ iyē nyá nēé í lɛ ā”?

³⁶Olíla, īkpō nɛ̄ a nyī ā gē kwú ipú ajɛ gbɔbū ɛ́ɛ́ nōó gē bū wɛ̄ɛcɛ á.

³⁷Ɔdā nɛ̄ a nyí ā wɛ īkpō ɔlamu icííci, ó lɔfú wɛ ikpó ocikāpa ámāŋ ɛdɔ īkpō kú ɔdā ɔhá, amáŋ ó wɛ ɔcí kú ɔdɛ̄hɔ̄ abɔ̄yīnū nōo gáā bū wɛ̄ɛcɛ ā ŋ́.

³⁸Ɛdɔ kú iyē nōo he Ɔwɔicō ɔtū nōó gē je lɛ īkpō ɔ́ɔmā á. Ó gē je ɔkpíyē nōo cíkā lɛ īkpō dóódu ā lɛ ɔ́.

³⁹Ɔkpíyē kú aɔ́dā oyēeyī í wɛ ɛdɔ ɔkpíyē ékpó ŋ́. Alɛɛcɛ lɛ ɛdɔ kú ɔkpíyē kú uwā, aɛ́bɛ́ lɛ ákú uwā, ígbáanɔ lɛ ákú uwā, ɛbéenyi kē lɛ ɛdɔ ɔhá.

⁴⁰Iyē kú ɔkpáncō yɔ̄, iyē kú ɛcɛ yɔ̄. Ɛgahi kú ɔkpíyē kú ɔkpáncō wɛ ɛyɛ́ɛ́yí hɛ̄ ɛgahi kú ɔkpíyē kú ɛcɛ tá.

⁴¹Ɛnɔ lɛ ɛgahi kú abɔ̄yīnū, ɔyā lɛ ɛdɔ kú ɛgahi ɔhá, aínyílɔ́wɔ kē lɛ ɛdɔ ɛgahi ɔhá. Ɛgahi ɛdɔ ɛyɛ́ɛyɛ́yí kōō yɔ̄ ipú aínyílɔ́wɔ ā dúú.

⁴²Ɛ́gɛ́nyā nōó gáā lɛ eko nēé lɛ ācɛ nēe gekwú ā héyī ŋmá olékwū á. Eko nēé nyi iyē ɔ́ɔmā, ó wɛ iyē nōo gekwú. Eko nēé kwú ɔ̄ ú héyī ŋmá ɔlékwū, ó gáā kwú glá gɛ ŋ́.

⁴³Eko nēé nyi ɔ́ ā, ó bɔ̄bí í klla lɛ ɔfu iyē ŋ́. Amáŋ eko nēé kwú ɔ̄ ú héyī ó géē lɔhi nɛ̄hi klla í lɔfú.

⁴⁴Eko nēé nyi ɔ́ ā, ó wɛ iyē ɔlamu. Eko nēé kwú ɔ̄ ú héyī ā, ó géē wɛ iyē kú alelékwū. Ɔ́dāŋ nɛ̄ iyē ɔlamu yɔ̄, ayíka iyē kú alelékwū kē yɔ̄.

⁴⁵Ohígbū ka Ɔkpíihɔ kahíníī, “Ɔ̄cɛ aflɛ́yí nēe lé ka Ádām ā, é lɛ ɔ́ yá ɔ̄cɛ oyēeyī.” Amáŋ Ádām ámōōmɛ ā wɛ alelékwū nōo í je oyēeyī.

⁴⁶Ó wɛ ɔ̄cɛ kú alelékwū ā wā aflɛ́yí ā ŋ́, ámāŋ ɔ̄cɛ ɔlamu ā nɛ̄ n. Anɔ́ɔ ɔ̄cɛ kú alelékwū wā gboce ɔ́ á.

⁴⁷É yá ɔ̄cɛ kú aflɛ́yí ā ŋmá úmúlá kú ajɛ áncā. Ɔ̄cɛ ɔ́mpa ā ŋmá ɔkpánco.

⁴⁸Ācɛ nēe wɛ ákú ɛcɛ ā lɛbɛ̄ɛka ɔ̄cɛ nēé bī ajɛ le yá ɔ̄ ā. Ācɛ nēe kē wɛ ákú ɔkpáncō ā kē lɛbɛ̄ɛka ɔ̄cɛ nōo ŋmá ɔkpáncō ā.

⁴⁹Ɛ́gɛ́nɛ̄ nɛ̄ alɔ lɛbɛ̄ɛka ɔ̄cɛ nēé bī ajɛ le yá ɔ̄ ā, ɛ́gɔ́ɔmā nɛ̄ alɔ géē lɛbɛ̄ɛka ɔ̄cɛ nōo ŋmá ɔkpáncō ɛ̄cī éyi á.

⁵⁰Ɛyí kú ɔdā nɛ̄ n yɔ̄ ī ka ā yɔ̄ ā, ayínɛ́ um, ɔdā nōo lɛ ɔkpíye mla oyī í gáā lɛ ukpɛ̄ kú ajɔ̄ɔ̄cɛ́ kú Ɔwɔicō glá ŋ́, anɔ́ɔ ɔdā nōo ī kwú í gáā lɛ ukpɛ kú iyē nōó gē kwú ŋ́ mā glá ŋ́.

⁵¹Aá jāhɔ̄ lɛ ɛlā ɔkwɛ̄yi otayínū nyā. Ó wɛ ɛjɛ̄ɛ̄jī alɔ gáā kwú ā ŋ́, amáŋ ɛjɛ̄ɛ̄jī alɔ géē je pīyabɔ̄.

⁵²Ó í yá fíyaa bɛ̄ɛka eyī ōcēbeé ā eko nēe le opo amōōmɛ ā tá. Ohígbū ka eko nēé lɛ opo tá, é géē je ācɛ nēe kwú ā héyī, kéē kwú gbóógbóō gɛ ŋ́. É kē í pīya odúúdú alɔ abɔ̄.

⁵³Ohígbū ka ɔdā nēe gē yíífi glá ā í je pīyabɔ̄ ga ɔdā nōó gē yíífi ŋ́, ɔdā nōo ī kwú ā kē í je pīyabɔ̄ ga ɔdā nōó ī kwú ŋ́ mā.

⁵⁴Anɔ́ɔ eko nɛ̄ ɛ̄nyā le yá lɛ ā, nɛ̄ ɔdā nōo ge kwú le pīyabɔ̄ ga ɔdā nōó gē kwú ŋ́, cɛ́ɛ́ ɛlā Ɔwɔicō le yá jīla. Ó kahíníī, “É lɛ ikwū yíífi, le ɔ́ yálé kwɛyí ɛɛ́!”

⁵⁵“Ikwú, iní nɛ̄ a yálé ā? Ikwú, iní nɛ̄ ope kú uwɔ yɔ̄ ā?”

⁵⁶Ope kú ikwū ā ŋmá lɛ íne nɛ̄ ācɛ gē bīya ā, íne nēé gē bīya nyā ŋmá ɛgiyí íne nɛ̄ Ɔwɔicō je ā.

⁵⁷Amáŋ alɔ tá Ɔwɔicō ahínyá, anú nɛ̄ ohígbū Ujísɔ̄si, Ohɔ́nyɛtá ā cɛ̄ lɛ alɔ le yálé ā.

⁵⁸Abɔ̄ ó le lɛ ā, ayínɛ́ um ohumɔtū, aá yɔ̄ í gɔbū mla ɔtōōce Ɔwɔicō, ká aá hayi lɔfú iyē nɛ̄ ɔdā dúú ī cɛ̄ lɛ aá nyɛ̄ɛ̄ hɛ̄ ɔ̄ tá ŋ́. Aá lɛ abɔ̄ bī odée yɔ̄ gē yá ipú úklɔ́ nɛ̄ aá gē yá lɛ Óndú ā, abɔ̄ aá le jé ka úklɔ́ dúú nɛ̄ aá yá lɛ Ɔwɔicō ā í bónū ŋ́ mā.