Read idoma 1 ĀCƐ UKƆ́RĪNTI 16 Bible Online

1 ĀCƐ UKƆ́RĪNTI 16 - idoma bible

1 ĀCƐ UKƆ́RĪNTI 16

¹Abālɔbányā ā, ɔdā nɛ̄ aá tá tū ɔkpá gé um lɛyíkwu ije ō da gé lɛ ācɛ kú Ɔwɔicō nēe bá Ujudíya ā. Aá kóō yá ɔdā nɛ̄ n da aícɔ́ɔci kú Ugalésīya kéē yá ā.

²Ícíícɛ aláadi dóódu ɔnyɔɔnyɛ kú aá géē lɛ ukpɛ̄ kú ɔdā nōó lɛ ā kpó tū piíí. Cɛ́ɛ́ kóō híīī lɛ ɛ̄nɛ̄ é géē gbɔɔ́ ō mīyɛ ɛhi ŋmá abɔ̄ ācɛ eko nɛ̄ n gā gɛ ŋ́.

³Eko nɛ̄ n gā, ɛ́ɛ́ nɛ̄ n gáā jé ɔkpá o mafú lɛ ācɛ nɛ̄ aá géē fu āá, cɛ́ɛ́ n lɛ ɛhɔ̄ tū uwā kéē lɛ ɛhi kú aá kpó ga Ujerúsālɛm.

⁴Ɔ́dāŋ koó cɛgbá kú n nyɔ̄ ayíka, é lɔfú nyɔ̄ mla um.

⁵N géē wā ɛgiyí aá eko nɛ̄ n le yɛ bɛ̄cɛ ŋmá Umasɛdónīya. Ohígbū ka n le miya ka n géē bū Umasɛdónīya piíí.

⁶N géē klá mla aá ligíi, ɔ̄cɛ í jé ŋ́, n géē klá mla aá eko kú ofū ā dúúdú, cɛ́ɛ́ aá lɔfú tá um abɔ̄ ká n̄ yɛ gɔbū ipú iyāwu kú um, ɛga dúú nɛ̄ n tíne ō nyɔ̄ ɔhá ā.

⁷Ń tíne ká n̄ wā í lɛ aá má klókó nyɛ̄ɛ̄ icííci ŋ́. N miya ka n̄ wā í klá mla gbojī ajɛ ɔ́dāŋ ka Óndú ā cɛ̄.

⁸N géē klá Ɛ́fēsɔsi amānyā jāā gbéeko kú Upɛ́ntīkɔsi.

⁹N lɛ ɛga amānyā nɛ̄ɛ̄nɛ̄hi kú n̄ yúklɔ́ ō tīile, nááná nɛ̄ aólɛlā alɛwa bā kéē ci um úklɔ́ ā.

¹⁰Eko nɛ̄ Utímōti gā ɛgiyí aá, aá mīyɛ ɔ́ lɔɔlɔhi ká aá lɛ ojīlīmā ce ɔ́, ohígbū ka ɛ́gɛ́nɛ̄ n gē yúklɔ́ lɛ Óndú ā nōó gē yá dúú á.

¹¹Ɔ̄cɛ dúú kóō lɛ ɔ́ gwēyī ŋ́. Aá tá ɔ̄ abɔ̄ kóō yɛ gɔbū ipú iyāwu kú nū cɛ́ɛ́ kóō gā ɛgiyí um ɛbɔ́ ohígbū ka n yɔ̄ ī leyī tɔ́ɔwɛ kú anú mɛ́mla ayínɛ́ ohile kéē pīyɛyí.

¹²Ɛlā kú ɔyínɛ́ Apólɔsi, n le ɛlā ka lɛ ɔ́ lɔfúlɔfú ka anú mɛ́mla ayínɛ́ ohile kéē lɛ aha tá wā í le aá má. Amáŋ ó tútū ō wā ɔkwɔɔkwu nyā ŋ́. Ó géē wā í má aá eko dúú nōó lɛ ɛga má.

¹³Aá leyī kwɛcɛ, aá háyi lɔfú ipú ɔtōōce Ɔwɔicō kú aá, aá kóō lɔtū, aá lɔfú tīiyē.

¹⁴Úklɔ́ dóódu nɛ̄ aá í yá ā, aá yá ɔ́ ipú ihɔtū.

¹⁵Aá jé ka Ustifánāsi mɛ́mla ɔ̄cocɛ̄hɔ̄ ɔlɛ́ nū wɛ ācɛ aflɛ́yí nēe je pīya ācɛ kú Ohɔ́nyɛtá ā ajɛ kú Akáya á, é kē kwú iyī uwā ú táajɛ kéē cɛ̄ ācɛ Ɔwɔicō ɛhɔ̄. N gē gbɔ̄ɔkɔ lɛ aá, ayínɛ́ um,

¹⁶kú áa tɛ́ɛyí wāajɛ lɛ ɛdɔ kú ācɛ nēe bá abɔ́ɔ ā, mɛ́mla ɔ̄cɛ dúúmā nōo ī yúklɔ́ ī cɛ̄ Óndú ā ɛhɔ̄ tɔ̄há mla uwá.

¹⁷Ɔtū he um nɛ̄ɛ̄nɛ̄hi ohígbū ka Ustifánāsi mɛ́mla Ufɔtunátūsi mɛ́mla Akáyícɔ̄si gā amānyā ā, é húmáyī tábɔ̄ nɛ̄ aá yɔ̄ kú aá tá ŋ́ mā ā.

¹⁸Uwá wɛ ācɛ nēe tá um ɔtū kwu ɔtū nɛ̄hi ɛ́gɛ́nɛ̄ é tá aá ɔtū kwu ɔtū ā. Aá lɛ ojīlīmā nōo cíkā ā ce ɛdɔ ācɛ ɛ́gɛ́nyā.

¹⁹Aícɔ́ɔci kú Ésiya kpɛ́mm ī hokónu tū aá. Akwíla mɛ́mla Uprisíla mɛ́mla icɔ́ɔci nēe ī jīla tɔ̄há ɔlɛ́ uwā ā ī hɛ́ ɛdɔ kú okónu nɛ̄ ācɛ kú Ohɔ́nyɛtá ā ī hɛ́ ā tū aá.

²⁰Odúúdú ayínɛ́ nēe bá amānyā ā ī hokónu tū aá. Aá hokónu tū ɔ́mpa aá mla ɔtū ō má ɔtū nōo tīihɔ.

²¹Ami tɔ́kpá kú okónu ō hɛ́ nyā abɔ̄yī um á.

²²Ɔ́dāŋ ka ɔ̄cɛ dúúmā í yíhɔtū tá Óndú ā ŋ́, ayíka ē lɛ okónu tá lɛ ɔ́. Óndú alɔ, wā!

²³Ɛhi kú eyīnyinyi kú Óndú alɔ Ujísɔ̄si, Ohɔ́nyɛtá ā kóō yɔ̄ mla aá.

²⁴Ká ihɔtū kú um kóō yɔ̄ mla aá nēe bá ī pīyatɔ̄há mla Ohɔ́nyɛtá Ujísɔ̄si ā. Aamí.